A Jesus a Mle Blechoel el Olengesenges

Ngblechoel el beot er kau el olengesenges er a demam me a delam?— A lebebil er a taem e ngmeringel. Ke medengei el kmo a Jesus ngullengesenges er techang?— A kerebai er ngii a sebechel el ngosukau el mo olengesenges er a demam me a delam alta e ngdiak el beot. Ka me bo dosuub a lmuut el betok el kirel tiang.

A Jesus er a uchei er a lemei er a chutem, e ngulebengkel a Demal, el Jehovah, el ngar er a eanged. Engdi a Jesus a dirrek el mla er ngii a demal me a delal el ngar er a chutem. A ngklir a mle Josef me a Maria. Ke medengei el kmo te milekerang e mlo demal me a delal a Jesus?—

A Jehovah a rirellii a mengasireng el tekoi me bo el sebechel a Jesus el mukeroul er a chelsel a delel a Maria el ua retolechoi a lemukeroul er a delir a rederrir. E a etiu el buil er a uriul, e a Jesus a milechell. Tiaikid a rolel e a Maria me a bechil el Josef a mlo demal me a delal a Jesus el ngar er a chutem.

A Jesus er a le 12 a rekil, e ngrirellii a tekoi el ulechotii a klungel a bltkil a rengul el mo er a Demal, el Jehovah. E tia dilubech er sel taem el Jesus me a telungalek er ngii er a lorael er a kemanget el omerael el mo er a Jerusalem el kirel a Baskua. Tiang a mle omengedaol el mo omeklatk er tir er a otebedir a rechad er a Israel er a beluu er a Ekipten. E a lengar a omerollir el mo remei, e a Josef me a Maria a mlo diak el sebechir el metik er a Jesus er a ngii di el ker. Ke medengei el kmo ngika ngmla er ker?—

A Josef me a Maria a ulerreched el lmuut el mo er a Jerusalem el osiik er a Jesus er a bek el basio. Ngkmal mlo suebek a rengrir e le ngdimlak el betik er ngii. E a uriul er a edei el klebesei, e te miltik er ngii el ngar er a templo! Ke medengei el kmo ngera uchul me a Jesus a mla er a templo?— E le ngar isei, e ngmle sebechel el mesuub el kirel a Demal, el Jehovah. Ngmle betik a rengul er a Jehovah e mle soal el mesuub el mo oldeu er a rengul. Me sera lemukeroul el mo klou el chad, e a Jesus a mle blechoel el olengesenges er a Jehovah, alta e ngmle meringel er ngii, e dirrek el mle belkul a kmo ngkirel el mo chuarm. A Jesus ngdirrek el ullengesenges er a Josef me a Maria?— Ochoi, a Biblia a melekoi el kmo ngullengesenges.

Ngera sebechem el suubii er a kerebai er a Jesus?— Ngkirem el mo olengesenges er a demam me a delam, alta e ngmo meringel. Kau ke mo meruul er tiang?—