A Rolel a Retolechoi a Lengedechii a Chebechiil

A cherellel a ngalek a ngar er ngii a lerellii el mo er a rubekel, ngsebechel el mo uchul a klou el deurreng me a lechub e ngmo uchul a ringel. A redirk mlo oungalek a locha mo mechas a rengrir e le oumesingd el temir me a klisichel a bedengir a longoit el mo mengetmokl er a ngelekir. A ngelsengesel a cheliuaiu el obengkel a ngeldechel a uldasu a sebechel el ngar er ngii a letemellii er a delongeliu. Me ngkiriu el mo meruul a omelodech er a chelsel a delengchekliu me bo el sebechiu el melemolem el omekerreu er a ngelekiu me a chebechiieliu. Ngmekerang a ulekrael er a Biblia e ngosukemiu el mo sebechiu el outekangel aika el omelsemai?

1 A ROLEL A TOLECHOI A LENGEDECHII A KLENGAR ER KEMIU

A LOLEKOI A BIBLIA: “A bltikerreng a klou a rengul e bekokuii.” E dirrek el “diak le bechelechelingaol a rengul, e diak le bekongesengasech a rengul.” (1 Korinth 13:4, 5) Ngdiak el mechas a rengud a lsekum a dirk mlo oungalek el chedil a di omdasu er a tolechoi. Me a leuaisei, e a bechim a locha mo omelechesiu er ngii el kora di cheloit, lak mobes, ngii me ngdirrek el ousbech er a ulekerreuim. Ngobengkel a kllourreng me a delemedemek, e ngsebechem el ngosuir el mo melechesuar el kmo ngkmal klou a ultutelel er a rolel a okurulel a ngelekiu.

“Me kemiu el bechiil el sechal . . . bo mkerekikl el omekerreu er a re bechemiu.” (1 Petrus 3:7) Bo modengei el kmo a bechim a mo ousbech a oumesingd el temel er a ngelekiu. Ngar er ngii a beches el ngerechelel me nglocha mo suebek a rengul, mesaul a bedengel, e dirrek el sebechel mo mekngit a rengul. A lebebil er a taem, e nglocha dirrek el mo kesib a rengul er kau, engdi molasem el melemolem el oba chelellakl el reng, e le “a klou a rengul a kuk ungil er a mesisiich el chad.” (Osisechakl 16:32) Mochotii a sekutaberreng, e mngesuir er aike el ousbech el ngeso.​—Osisechakl 14:29.

SEBECHEM EL MERUUL:

• Rechedam: Molengeseu er a bechim el omekerreu er a tolechoi, a lemellomes me a leklebesei. Molengeasek a taem el mongoit er a bebil er a tekoi me bo lsebechem el mengoit er a klou el taem el obengkel a bechim me a ngelekem

• Rechedil: Sel sekum a bechim a kongei el olengeseu er kau er a tolechoi e mkengei er ngii. E a lsekum ngdiak bo lungil el kutmeklii a ureor el loruul er ngii e lak molekoi a mekngit el kirel e bai bo mungil el osisecheklii

2 MSISICHII A DELONGELIU

A LOLEKOI A BIBLIA: “Me bo letal chelechad.” (Genesis 2:24) Me alta ngmla mo er ngii a beches el chedal a telungalek er kemiu engdi lak mobes, kau me a bechim a dirk “tal chelechad.” Bo er aike el tkurrebab el sebechiu el rullii a deleuill er kemiu me lolemolem el mesisiich.

Rebechiil el redil, bo moba omereng el saul el kirel a ngelsuil me a ulekerreuil a bechim. A rolel a omolecholt er a omereng el saul er kau a “sebechel el omekungil.” (Osisechakl 12:18) Rebechiil el sechal, mouchais er a bechim er a bltkil a rengum el mo er ngii me a klungel a ultutelel, e mchetengii er a rolel a lomekerreu er a telungalek er kemiu.​—Osisechakl 31:10, 28.

“Lak a chad el omdasu er a di ungil er ngii, e bai lomdasu er a ungil er a re bebil er a re chad.” (1 Korinth 10:24) Bo blechoel el meruul a ungil el mo er a bechim. El ua rubekel, mongoit a taem el chadecheduch, e mchetengii a tang e mkaiuerenges er a delongeliu. Bo molatk aike el lousbech a bechim el kirel a tekoi er a durs er a chelsel a chebechiieliu e lak di momdasu a ungil er kau. A Biblia a kmo: “Kele mongreos er a tekoi er a chebechiil er a delongeliu. E ngdi cho mtilbir er a delongeliu el diak bo mdak . . . e ng di ungil.” (1 Korinth 7:3-5) Me bo bleketakl el smodii tia el tekoi er a delongeliu el terung. A kllourreng me a sekutaberreng a mo smisichii a delongeliu.

SEBECHEM EL MERUUL:

• Lak mobes el rullii a taem el di mo kiriu el terung

• Moruul a mekekerei el tekoi el rullii a bechim el mo melechesuar a bltkil a rengum, el ua, omeluches el mekekedeb el babier el ochotii a uldesuem el kirel, me a lechub e ke msang a mekekerei el bresent

3 MOLISECHAKL ER A NGELEKEM EL TOLECHOI

A LOLEKOI A BIBLIA: “E kau itia er a cho modengei a Chedaol Llechukl er cho mkekerei el me klou, el ngii ia sebechel el mekllemesii a rengum . . . me ke mo suobel.” (2 Timothy 3:15) Molib a obo moruul el mo olisechakl er a ngelekem el tolechoi. Ngar er ngii a ileakl el duch er ngii el mesuub a tekoi, el ulemuchel er sera dirk lengar er a chelsel a diil. A ngelekem er sera dirk lengar er a delem e ngsebechel dongchii a oto er a ngerem e sebechel mo medengei a tekoi el momelechesiu. Monguiu el mo er ngii er sel dirk el tolechoi. Me alta e ngdiak bo lodengei aike el tekoi el monguiu, engdi ngmo ngosuir el mo soal el menguiu sel bo el klou.

Ngdiak momdasu el kmo a ngelekem a kmal kekerei me ngdiak el sebechel el orrenges er kau el mesaod el kirel a Dios. Becherei me lorrenges er kau el meluluuch el mo er a Jehovah. (Duteronomi 11:19) Ngmo lmuut er a omdak el milil, e mosaod el kirel a tekoi el bla leruul a Dios. (Psalm 78:3, 4) Me sel lorael el mo klou el chad a ngelekem e ngmo omelechesiu er a bltkil a rengum el mo er a Jehovah me ngmo sebechel el dirrek el mesuub el mo betik a rengul er ngii.

SEBECHEM EL MERUUL:

• Moluluuch el ileakl el olengit er a llomeserreng el mo olisechakl er a ngelekem el tolechoi

• Momelekl a meklou a ultutelel el tekoi me a uldasu el mo er a ngelekem me bo lsebechel omuchel el mesuub er sel dirk el tolechoi