A Rolel a Omolisechakl er a Ngelekiu

A Jehovah er sera leketmeklii a telungalek e ngmilsterir a ngerechelir a rechedam me a rechedil el mo oungerachel er a rengelekir. (Kolose 3:20) Me ngerecheliu el olisechakl er a rengelekiu el mo betik a rengrir er a Jehovah e mo bekongerachel el chad. (2 Timothy 1:5; 3:15) E dirrek el kiriu el mesuub el mo medengei a ngar er a chelsel a rengrir a rengelekiu. Ngklemerang el tekoi, ngklou a ultutelel el molecholt er a ungil el kerebai. Ngsebechiu el kmal mo ungil el osisecheklterir a rengelekiu er a Tekingel a Jehovah, a lsekum e a tekingel a mo kot er a chelsel a rengmiu.​—Psalm 40:8.

1 MRELLII EL MO BEOT ER A RENGELEKIU EL MENGEDECHEDUCH ER KEMIU

A LOLEKOI A BIBLIA: ‘Bo mereched el orrenges, e meoud el mengedecheduch.’ (Jakobus 1:19) Ngsomiu a rengelekiu a bo lodengei el kmo ngsebechir el beot el mengedecheduch er kemiu. Me ngkirir el mo medengei el kmo kom kltmokl el orrenges sel sekum ngkirir el mengedecheduch er kemiu. Mrellii a delengchekliu me lebo er ngii a budech er ngii, me bo el sebechir a rengelekiu el mo beot er tir el melekoi aike el mera el ngar er a rengrir. (Jakobus 3:18) E a lsekum te omdasu el kmo ngmo mekngit a tekingiu me a lechub e ko mo oukerrekeriil er tir, e nglocha mo diak el sorir el ouchais a tekoi er kemiu. Bo moba kllourreng el mo er a rengelekiu e bo blechoel el ouchais er tir er a bltkil a rengmiu.​—Mateus 3:17; 1 Korinth 8:1.

SEBECHEM EL MERUUL:

• Bo mkltmokl a lsekum a rengelekiu a sorir el mengedecheduch

• Bo blechoel el mengedecheduch er a rengelekiu, el diak di el sel lengar er ngii a mondai

2 MOLASEM EL MO MEDENGEI A MERA EL NGAR ER A RENGRIR

A LOLEKOI A BIBLIA: “Bo mungil el orrenges a tekoi me bo le ungilbesum.” (Osisechakl 16:20) A lebebil er a taem e ngkiriu el omes el engelakl a tekoi el lolekoi a rengelekiu, me bo el sebechiu el mo medengei a mera el ngar er a rengrir. Ngblekerdelir a remekekerei el ngalek el kmal meklou a chisir me a lechub e te melekoi a tekoi el diak el mera el ngar er a rengrir. “A lsekum a chad a onger a ker er uchei er a lorrenges, e ng klebelung e otuball.” (Osisechakl 18:13) Me lak di el mereched el mo kesib a rengmiu.​—Osisechakl 19:11.

SEBECHEM EL MERUUL:

• Mtibir el diak bo morrob a cheldechedecherir me a diak bo el kesib a rengmiu er a ngii di el tekoi el lolekoi a rengelekiu

• Molasem el melebedebek er sera cho mua meklungir el kmo, ngera mla er a uldesuiu me a ngera mle meklou a ultutelel el tekoi er kemiu

3BO MOBA TA EL ULDASU

A LOLEKOI A BIBLIA: “Rungalek, morrenges a lolisechakl er kau a demam, e bo le blak a rengum er a ikel le dung a delam.” (Osisechakl 1:8) A Jehovah a mla mesterir a ngerechelir a rechedam me a rechedil el mo omekrael e mellach er a rengelekir. Ngkiriu el lolisechakl er a rengelekiu el mo mengull e olengesenges er kemiu. (Efesus 6:1-3) A rengalek a sebechir el melechesuar a lsekum a redemerir me a rederrir a diak el ‘ta rengrir ma uldesuir.’ (1 Korinth 1:10) Me a lsekum ngkakerous a uldesuiu e molasem el diak bo mcholt er a rengelekiu, e le ngsebechel choitechetur a omengull er tir el eko er kemiu.

SEBECHEM EL MERUUL:

• Mchadecheduch e bo moba ta el uldasu er a rolel a omollach er a rengelekiu

• A lsekum e kau me a bechim a kakerous a uldesuiu a omolisechakl er a rengelekiu, e molasem el mo medengelii a uldesuel a bechim

4 MRELLII A TELBILIU

A LOLEKOI A BIBLIA: “Molisechakl er a ngalek er sel meral rolel a klengar.” (Osisechakl 22:6) A ungil el osisecheklir a rengelekiu a diak di el ngii el duubech. Mketmeklii a ungil el rolel a osisechakl, el uldimukl er a rolel a omollach er a rengelekiu. (Psalm 127:4; Osisechakl 29:17) Me a omollach er a rengelekiu e ngdiak el belkul a kmo kom di mengelebus er tir, e ko bai dirrek el olengeseu er tir el mo medengelii a uchul e ngkirir el oltirakl a llach. (Osisechakl 28:7) Ngdirrek el kiriu el lolisechakl er tir el mo betik a rengrir er a Tekingel e mo melebedebek a omellach er a Jehovah. (Psalm 1:2) Tiang a mo ngosuterir el mo mesisiich a ukltkir.​—Hebru 5:14.

SEBECHEM EL MERUUL:

• Mesa el kmo, a rengelekiu a omes er a Dios el ua lemera el Chad el sebechir el oumerang er ngii

• Mngesuterir el mo medengei e longeroid er tir er a kengaol el tekoi, el ua aike el debetik er a Internet me a social network. Molisechakl er tir el mo medengelii a rolel a longeroid er tir er a rechad el melemall er a rengalek