Reteai a Silobel el Mo Soiseb er a Beches el Beluulechad

A Noah me a telungalek er ngii me a charm a siliseb er a arhe. Seikid a Jehovah a chilsmerii a arhe e ngmocha metengel a chull. Ngkmal mlo klou a chull me a arhe a mlo ombibechakl. Cherengel a taem e a beluulechad el rokir a mlo ngar cheungel a ralm. Me a rokui el mekngit el chad el mlara ikrel a arhe a mlad. Engdi Noah me a telungalek er ngii a mle selebechakl er a chelsel a arhe. Ka di molatk er a deuil a rengrir e le te ullengesenges er a Jehovah!

Ngmle chull el 40 el llomes me a 40 el klebesei, e ngmocha stob a chull. Me a ralm a milekekokil el merael el mo riou. Cherengel a taem e a arhe mlo mechiuaiu er bebul a rois. Engdi ngdirk mle klou ralm er ker me ker me a Noah me a telungalek er ngii a dimlak el sebechir el mereched el tuobed er a arhe.

Me a chutem a mlekekokil el ngilmii a ralm. A klemengetel a taem el rokir el Noah me a telungalek er ngii a mla er a chelsel a arhe a ilengelakl er a ta el rak. E a Jehovah mocha dmu er tir el kmo ngsebechir el me tuobed el mora chelsel a beches el beluulechad. Te kmal uleba omereng el saul el Jehovah ulsebelterir. Te ulechotii tia el omereng el saul loeak a lolenget el mora Jehovah.

A Jehovah mle dmeu a rengul er tia el tengetengir. Ngtilbir el kmo ngkmal diak el lluut el mo olekngemed a rokui el tekoi er a beluulechad loba ieleb. Ngrirellii a kot el orrekim er a beluulechad el olechotel tia el telbilel. Ngmla ta el mesa orrekim?

Seikid a Jehovah dilu er a Noah me a telungalek er ngii me bo loungalek e lomekeek er a beluulechad er a rechad.