1 EL SUOBEL

A Ungil el Uchelel a Cheldecheduch

Rellir 17:22

KEDEB EL OMESODEL: A uchelel a cheldechedecham a kirel el omeksemeriar, e ochotii a tekoi el mosaod er ngii, e smodii a uchul me a rurrenges er kau a kirir el mo semeriar er ngii.

ROLEL A MORUUL ER NGII:

Omeksemeriar er a chad. Mngiltii a ker, me a tekoi el dilubech, me a chais er a beluu, me a lechub e ke mesaod er a tekoi lesemeriar er ngii.

Bom kerekikl el melatk er a uchei el kirel a tekoi el lesemeriar er ngii a rurrenges er kau, me aike el suebek a rengrir er ngii, e mngedechii a uchelel a cheldechedecham a lsekum ngmengodech a rolel a cheldecheduch.
Mochotii a tekoi el mosaod er ngii. Bom kerekikl me a uchelel a cheldechedecham lerellii a tekoi el mosaod er ngii me a moktek er ngii el mo bleketakl er a rurrenges er kau.
Mochotii a uchul me a tekoi el mosaod er ngii a klou a ultutelel. Mngedechii a omesodem el mo mesaod aike el ousbech a rurrenges er kau. Ngkirel lobeketakl er a uldesuir sel rolel e a tekoi el mosaod er ngii a sebechel ngosuterir.

Sel mongetmokl er a cheldechedecham e molatk el kmo, ‘A rudam me a rudos er a ongdibel er ngak, te chelebangel a ngera el tekoi?’ E seikid e mrellii a uchelel a cheldechedecham el mo mesaod a tekoi el lousbech.