A Techolb a Turrekong el Diak Bo Mouuchel er a Rengum el Kirel!

Jesus a dilu el kmo a Rekristiano a kirir el metecholb. (Monguiu er a Mateus 28:19, 20.) Engdi ngngera techolb? E ngera kirel a chad el meruul el mo rodemii tia el turrekong?

1. Ngngera techolb?

A tekoi el “techolb” a mengai er a tekoi er a Grik el belkul a kmo “moduleb” er a ralm. A Jesus er a lemetecholb e ngmloduleb er a Omoachel Jordan e “[tokerekl] er a ralm.” (Markus 1:9, 10) Ngdi osisiu, a remera el Kristiano sel lemetecholb e te dirrek el moduleb a bedengir el rokir er a ralm.

2. A techolb, ngera ngochotii?

A chad sel lemetecholb e ngochotii el kmo ngmla tibir a rengul msa klengar er ngii el mora Jehovah el Dios. Ngmekera chad a loruul er a telbilel a rengul? Uchei er a lemetecholb e ngmeluluuch el mora Jehovah louchais er ngii el kmo ngsoal mesiou er ngii el mo cherechar. Ngtibir el mo mengull er ngii el di ngii el tang e rullii a soal a Dios el mo kot el klou a ultutelel el tekoi er a klengar er ngii. Ngngiltii el “obes er a klechad er ngii, . . . e mo oltirakl” er a kerebil me a osisecheklel a Jesus. (Mateus 16:24) A telbilel a rengul me a techelbel a uchul me ngsebechel mo er ngii a kmes el deleuill er ngii me a Jehovah, me a rechad el dirrek el mesiou er ngii.

3. Ngmekera chad a lolengeriakl el mo nguu a techolb?

Mongetmokl er kau el kirel a techolb loeak sel mosuub el kirel a Jehovah e mokurulii a klaumerang er kau er ngii. (Monguiu er a Hebru 11:6.) Sel lemukeroul a klemedengei me a klaumerang er kau, me ngii a mukeroul a bltkil a rengum el mora Jehovah. Seikid e ngmo soam louchais er a rechad el kirel e mo kiei loltirakl a llechul. (2 Timothy 4:2; 1 Johanes 5:3) A chad sel bo lekiei el “oltirakl er a soal a Rubak, ma [meruul] a di blechoel el ungil er a rengul,” e ngmo soal mo rullii a telbilel a rengul el mora Dios e metecholb.​—Kolose 1:9, 10.a

BOM DMOLECH EL MERRITER

4. Aike el sebeched el suub er a techelbel a Jesus

Monguiu er a Mateus 3:13-17 el ngii a mesaod er a rolel e a Jesus a miltecholb. E a uriul e mosaod aika el ker:

• A Jesus ngmle tolechoi er a lemetecholb?

• Ngmle uangerang a techelbel? Te di milliim er ngii er a ralm?

A Jesus ulemuchel el meruul er a ileakl el ureor el lebilsa Dios er a uriul er a lemetecholb. Monguiu er a Lukas 3:21-23 me a Johanes 6:38 e mosaod er tia el ker:

• Uriul er a lemetecholb a Jesus e ngera lureor a lengiluu el mo kot er a klengar er ngii?

5. A techolb a turrekong el sebechem el rullii

Sel molatk el kirel a telbilel a reng me a techolb e nglocha kora kmal klou el tekoi er a rengum. Me nguaisei engdi ngsebechem el olengeriakl e mo ulterekokl a rengum el meruul er tia el klou a ultutelel omelilt. A lsoam el mo medengelterir a rebebil el mirruul er tiang e momes er a VIDEO.

VIDEO: Building a Relationship With Jehovah (1:11)

Monguiu er a Johanes 17:3 me a Jakobus 1:5 e mosaod er tia el ker:

• Ngera sebechel ngosuir a chad el mo kltmokl el kirel a techolb?

1. Kede rullii a telbilel a reng sel douchais er a Jehovah el kmo ngsoad el mesiou er ngii el mo cherechar

2. Sel demetecholb e kede ochotii el mora rechad el kmo kede mla tibir a rengud el mora Dios

6. Sel demetecholb e kede mo chedal a telungalek er a Jehovah

Sel demetecholb e kede mo chedal a chimo el telungalek er a rechad el meliuekl er a beluulechad el rokir. Alta kede chad er a kakerous el beluu el kakerous a siukang er kid engdi ngosisiu a klaumerang er kid, e kiei loltirakl a llach er a Biblia. Monguiu er a Psalm 25:14 me a 1 Petrus 2:17 e mosaod er tia el ker:

• A techolb ngera ngrullii el mora deleuill er a chad me a Jehovah me tirke el mengull er ngii?

SUMMARY

Jesus ullisechakl el kmo a Rekristiano a kirir el metecholb. A chad a bo lenguu a techolb e ngkirel mekurulii a mesisiich el klaumerang er ngii er a Jehovah, kiei loltirakl a llechul, e tibir a rengul el mo er ngii.

Review

• Ngngera techolb, e ngera uchul me ngkmal klou a ultutelel?

• A techolb, ngera ngochotii?

• A chad, ngera ngkirel meruul er a uchei er a loruul er a telbilel a reng me a techolb?

A LSEBECHEM E MOMES

Bo modengelii el kmo ngngera techolb me a ngera diak el techolb.

“What Is Baptism?” (Suobel el ngar er a Internet)

Em review rolel e a chad a sebechel lolengeriakl el mo nguu a techolb.

“A Bltikerreng me a Omereng el Saul el Mora Jehovah a Rullau Me Ngsoam el Mo Metecholb” (A Ongkerongel, March 2020)

Monguiu el kirel a ta el chad el dimlak di lotirakl er a rengul e lolilt el mo metecholb.

“Ngmle Sorir a Di Lengak el Mo Medengelii a Klemerang” (A Ongkerongel, February 1, 2013)

Morriter er a uchul me a turrekong er a techolb a kmal diak bo mouuchel er a rengum el kirel, me a rolel e ngsebechem el mengetmokl er kau el kirel.

“Should I Get Baptized?” (Questions Young People Ask​—Answers That Work, Volume 2, 37 el bliongel)