Demukrael er a Reng e Dekiei el Rodemii a Telbiled

‘Morael el ngara reng, cho bo muaisei e ngdiak motaut a ngelbesel a tech.’​—GALATIA 5:16.

1. Ngera el techolb a mlo er ngii er a sils er a Pentekost?

SEL taem er a Pentekost er a rak er a 33 er a uriul er a lemetecholb a rulebengkel a Jesus el oba ngklel a chedaol el reng e te mlo melekoi a kakerous el omelekoi. Me te ulemuchel el meruul a tekoi el loba tia el ngat. (1 Korinth 12:4-10) Me ngngera ngrirellii tia el ngat me a cheldechedechal a apostol el Petrus? A rebetok a “kmal mlo odikel a rengrir.” Me a uriul er a cheldechedechal a Petrus e te ulebult e miltecholb. Me a reksi a melekoi el kmo: “Me tirikel mlo olab a tikingel a meltecholb, me te mlo modak er tir er itial sils el bekord edel telael el chad.” (Rellir 2:​22, 36-41) El di ua lullekoi a Jesus, te mle kirir el metecholb er a ralm el oba ngklel a Chedam me a Ngalek me a chedaol el reng.​—Matteus 28:19.

2, 3. (a) Ka msodii a klekakerous er a techolb el okiu a chedaol el reng me a techolb el loba ngklel a chedaol el reng. (b) Ngera uchul me a remera el Kristiano er a chelechang a kirir el mo metecholb er a ralm?

² Me a leuaisei, e ngngar er ngii a klekakerous er a techolb el oba chedaol el reng me a techolb el loba ngklel a chedaol el reng? Choi, tirke el metecholb el okiu a chedaol el reng a mechell el beches el ua ngellitel el ngelekel a Dios. (Johanes 3:3) Tirkang a mengilt el mo king e prist er a Rengedel a Dios el ngar er a eanged, e mo ta el chelechad el obengkel a Kristus. (1 Korinth 12:13; Galatia 3:27; Chocholt 20:6) Me tia el techolb el okiu a chedaol el reng a lekiltmeklii a Jehovah er a sils er a Pentekost e millemolem e le ngdirk melemolem el melilt er a remo oudiukes el obengkel a Kristus. (Rom 8:​15-17) E kuk ngerang aike el techolb er a ralm el loba ngklel a chedaol el reng el blechoel el meketmokl er aike el meklou el ongdibel er a rechedal a Jehovah er a chelechal el taem?

³ A remera el Kristiano a mo metecholb er a ralm el olechotel a telbilel a rengrir el mo er a Jehovah el Dios. Tiang a di osisiu el kirir tirke el nguu a okedong el mo er a eanged. Me nguaisei, a techolb er a ralm a klou a ultutelel el kirir a rebetok el miliol el sechal me a redil er a chelechang, el tir a oba omelatk el mo kiei er a chutem el diak a ulebengelel. Me a techolb el loba ngklel a Chedam, me a Ngalek, me a chedaol el reng, a klou a ultutelel el bakes el mo er a rechad el oba omelatk el mo er a eanged me a lechub e ngchutem me bo el sebechir el nguu a kengei er a Dios. A rokui el Kristiano el nguu tia el techolb a kirir el ‘merael el ngara reng.’ (Monguiu er a Galatia 5:16.) Kau, ke merael el ngar er a reng e oltaut a telbilem?

A Belkul a ‘Dorael el Ngara Reng’

4. Ngera belkul a ‘dorael el ngara reng’?

⁴ A ‘dorael el ngara reng’ a uldimukl er a dekengei el mukrael er a chedaol el reng. Ngbelkul a kmo a omerelled er a bek el sils a kirel mukrael er a chedaol reng. A 5 el bliongel er a Galatia a smodii a klekakerous er sel demukrael er a chedaol el reng me sel demukrael er a tech.​—Monguiu er a Galatia 5:​17, 18.

5. A demukrael er a chedaol el reng e ngbelkul a kmo kede mengeroid er kid er a urerel a ngerang?

⁵ A lsekum e kede mukrael er a chedaol el reng e ngkired el mengeroid er kid er a urerel a tech. E a urerel a tech a uldimukl er a “deleboes, ma ngellengalek, ma klekad, ma meluluuch a bleob, ma cholai, ma reng ra klaucherarou, ma klaititekangel, ma blechelechelingaol, ma ngasechereng, ma reng er chomengirt el cheldebechel, ma chomeleakl, ma chomeleakl cheldebechel, ma chelechei, ma cheltelaol ra rrom, ma tametereng el blengur, ma ikel ua ingii.” (Galatia 5:​19-21) Me tiang a belkul a kmo kede ‘oeak a reng lomekoad a urerel a bedenged.’ (Rom 8:​5, 13) Tia el omeruul a ngosukau el mo meruul a llemalt me a bliochel el tekoi me a bltikerreng me a ungil el omeruul, el mo uchul e ke mecherei a klisichel a Dios me ngomekrael er kau er a bai lomekrael er kau a ngelbesel a rengum.

6. Mosaod a meklou a ultutelel el tekoi el sebechel el uchul a okurulel a rodech er a reng.

⁶ Sel lomekrael er kau a chedaol el reng e ngmo uchul e ke meleketek aike el ungil el blekerdelel a Dios el ngii a ‘rodech ra reng.’ (Galatia 5:​22, 23) Ke medengei el kmo ngngar er ngii a ngerechelem. Ngsebeched el omekesiu er tia el omeruul el ua chad el meruul er a sersel. A sers a ousbech a dichel a sils me a ralm, e le a lsekum e ngdiak a ralm me a sils e ngdiak el sebechel el duubech a dellomel. Ngsebeched el omekesiu er a chedaol el reng er a dichel a sils. Ngklou a ultutelel el domekeroul a rodech er a reng. Engdi ngmekerang e duubech a dellomel a lak el meringel el oureor a chad er a sers? (Osisechakl 10:4) Nguaisei, sel rolel a omomtebechel er a rengum a ngar er ngii a lerellii er a klungel me a ildisel a rodech er a reng er a chelsel a klengar er kau. Ka di lekau el oker el kmo, ‘Ngak ak kongei el mecherei a chedaol el reng me ngomekeroul a rodech er a reng er a chelsel a klengar er ngak?’

7. Ngera uchul me ngklou a ultutelel el dosuub e dolebedebek a klemerang er a Biblia me bo el sebeched el mekeroul a rodech er a chedaol el reng?

⁷ A chad er a sers a kirel el mo ungil el melubs a dellemelel me bo el sebechel el meridm a betok el redechel a dellomel. Me a lsoad el meleketek a rodech er a reng, e ngkired el mesuub er a ralm er a klemerang el ngar er a Biblia, me aike el suobel el sebeched el ngmai el okiu a ongdibel er a Rekristiano er a chelechang. (Isaia 55:1) Ke ulterekokl el mla ouchais er a rebebil el kmo a Chedaol el Llechukl a mlukreng er a chedaol el reng. (2 Timoteus 3:​16) Ngdirrek, tirke el chelechad er a blak a rengul e mellomes a rengul el mesiou a oureor el oltobed aike el usbechall el tekoi el kirel tia el bliochel el ralm, el ngii a klemerang er a Biblia. (Matteus 24:​45-47) Me tiang a kmal bleketakl el kmo, a lsekum e ngsoad el mukrael er a chedaol el reng, e ngkired el menguiu e melebedebek a Tekingel a Dios. A omerellem a ochotii el kmo, kau a oltirakl er a ungil el kerebai er a reprofet el tir a mla ‘smiik e tiriter’ a tekoi el meldung. Tiang a kmal klou a ultutelel el tekoi e le rechanghel me te dirrek el semeriar el mo medengei a klemera el tekoi el kirel a telbiil el Uldidellel a Rasech me a ongdibel er a rengellitel el Kristiano.​—Monguiu er a 1 Petrus 1:​10-12.

Ngmekerang a Demukrael er a Reng?

8. Ngera uchul me ngklou a ultutelel el molengit er a ngelsuil a reng er a Jehovah?

⁸ Ngdiak el belkul a kmo sel desuub a Bades e dolebedebek a tekoi el desuub e ngungiang. Ngkmal kirem el di melemolem el olengit a ngeso me a ulekrael er a Jehovah. Ngii a “sebechel remuul el engelakl ra ikel bek el dolengit ma domdasu.” (Efesus 3:20; Lukas 11:​13) Ke mekerang a omonger er a chad el oker er kau el kmo, “Ngera uchul me ak melemolem el olengit er a Dios a lsekum Ngii a ‘medengei ikel dousbech er uchei er a dolengit’?” (Matteus 6:8) Sel moluluuch el olengit a ngeso er a chedaol el reng e ke olecholt el kmo ke mera el ousbech er a ngelsuil a Jehovah. El ua itiang, a lsekum a chad a eko er kau el olengit a ngeso e ke ulterekokl el remuul aike el sebechem el ngosuir, e le ngii el oumerang er kau a uchul me ngullengit a ngeso er kau. (Momekesiu er a Osisechakl 3:27.) Me ngdi osisiu, a Jehovah a dmeu a rengul el ngosukau sel molengit er a ngelsuil a reng er Ngii.​—Osisechakl 15:8.

9. Ngmekerang e sebechel a reng er a Dios el omekrael er kau sel bo blechoel el mo er a miting er a Rekristiano?

⁹ Kede oba omereng el saul el kirel a ta er a rolel e kede mukrael er a chedaol el reng er a Dios, el ngii a mei el okiu a bek el miting er a ongdibel me aike el eru el sils el ongdibel, el uldimukl er aike el meklou el ongdibel er kid. Me ngklou a ultutelel el debo er a bek el miting e bo leblak a rengud el orrenges aike el cheldecheduch el motobed. A doruul el uaisei e ngmo er ngii a klou el klemedengei er kid er aike el “dmolech ra Dios.” (1 Korinth 2:​10) Ngdirrek el ngar er ngii a klungiolel sel deblechoel el onger er a miting. Ka di molatk aike el miting el kau a mlo er ngii er aika el merekong el eua el sandei. Ngmle ua ngera a ildisel el moldars e onger el olechotel a klaumerang er kau? Ngngar er ngii a tekoi el dirk kirem el oureor er ngii? A lsekum e ngar er ngii, e molasem el oureor el kirel er a chelsel aika el merael el mei el sandei. A Jehovah a sebechel el mesang a blakerreng er kau e mo meskau a reng er ngii el mekrolau me ngmo sebechem el ngmai a klungiolem er a bek el miting.

10. A dorael el ngar er a reng e nguldimukl er a ngera el okedong el mo er a rebebil?

¹⁰ A dorael el ngar er a reng e ngbelkul a kmo, kede kongei er sel okedong el ngar er a Chocholt 22:17 el kmo: “Ma Reng ma Hanayome a dul dmu el kmo, ‘Mei.’ Me tirikel orrenges ldu el kmo, ‘Mei.’ Me tirikel meched a rengrir le mei, me tirkel sorir a ralm ra klengar le me lolai el diak locheraol.” A reng el oureor er a chelsel a chelechad er a rengellitel el Hanayome a meruul er tia el okedong el kirel a ralm er a klengar. A lsekum e ke mla kongei er tia el okedong el kmo, “mei!” e kau ke mla tibir er a rengum el mo omekedong el kmo, “Mei!”? Ngkmal lungil el techall sel bo el sebeched el mo teloi er tia el ureor el olsobel a klengar!

11, 12. Ngmekerang a chedaol el reng a lomekrael er a ureor er a berkel a klumech?

¹¹ Tia el klou a ultutelel el ureor a meketmokl er a chelechang el okiu a ulekrael er a chedaol el reng. Kede menguiu el kirel a rolel a loureor a chedaol el reng er a chelsel a kot el dart el rak, el milekengii a techall er a ureor er a klemisionari el mo er aike el ngodech el beluu. A apostol el Paulus me a rulebengkel a ‘mlokebai ra chedaol reng ra mo mengedecheduch ra Asia a Tekoi,’ me a dirrek el beluu er a Bithinia. Ngdiak dodengei el kmo ngmlekerang a chedaol el reng er a lolekebai er tir me lak bo lsiseb er aike el beluu, engdi ngbleketakl el kmo a chedaol el reng a ulemekrael er a Paulus er a lomerk er a klumech er a chelsel a beluu er a Europe. Ngmilsang a ues er a chad er a Masedonia el ullengit a ngeso.​—Rellir 16:​6-10.

¹² Chelecha el taem e a chedaol el reng er a Jehovah a dirrek el omekrael er a ureor er a berkel a klumech el meliuekl er a beluulechad. Ngdiak a mengasireng el ues el usbechall er a chelecha el taem el lomekrael er a ureor, ngbai Jehovah a omekrael er a rengellitel el okiu a chedaol el reng er ngii. Me tia el osisiu el reng er ngii a melisiich er a rudam me a rudos me te meruul aike el sebechir el kirel tia el ureor er a berkel a klumech el olisechakl. Me kau a ulterekokl el mla teloi er tia el klou a ultutelel el ureor. Ngsebechem el lmuut el kilungii a deurreng er kau er tia el klou a ultutelel el ureor?

13. Ke mekerang e kongei el mukrael er a chedaol el reng? Momekesiu.

¹³ Ngsebechem el mukrael er a chedaol el reng sel moltaut er a klengar er kau a suobel el meketmokl el kirir a rechedal a Dios. Ka molatk er a kekerei el redil er a beluu er a Siabal el ngklel a Mihoko. Ngii el dirk mlo pioneer, me ngulemdasu el kmo ngmetitur el lmuut el mo oldingel er tirke el chad el mle semeriar; ngulemdasu el kmo ngmeringel er ngii el mengedecheduch el omeksemeriar er a rechad. Seikid el taem e ngtilobed a suobel er a Omesiunged el kirel a Renged el kirel a deluut el mo oldingel er tirke el chad el mle semeriar. E dirrek el tilobed a brochure el dai er ngii a kmo A Satisfying Life​​—How to Attain It. Tia el babier a kmal mlo klou a ultutelel er a berkel a klumech er a beluu er a Siabal. A Mihoko a uluusbech aike el ulekrael el ngar er tia el brochure el ileakl el kirel sel loldingel er tirke el semeriar. Ngmlo sebechel el omuchel a omesubel a Biblia el obengterir tirke el dimlak el semeriar er a kot el uchul. Ngmelekoi el kmo, “Ak mlo mesuub el obengterir a rekuk betok er a 12 el chad er a ta el taem, me ak ullengit er a rebebil me longiil er sel kot el mereched el techellek el mo mededaes e ki bo mosuub!” Me nguaisei, a demukrael er a reng e doltaut a ulekrael el kirir a remesiungel a Jehovah, e kede mo meridm a betok el klengeltengat.

Ultuil er a Reng er a Dios

14, 15. (a) Ngmekerang e sebechel a diak el cherrungel el chad el kiei el rodemii a telbilel el mo er a cherrungel el Dios? (b) Ke mekerang e metik er a rungil el sechelei?

¹⁴ Kau el mla metecholb el mesiungel a Dios a uchul me ngngar er ngii a ngerechelem el kirem el meruul. (Rom 10:​14) Ke locha mo melatk el kmo ngdiak mrredemelel a meruul er a chouaitia el klou el ngerachel. Engdi a Dios a ngike el mla ngiltau el di ua sel lolilt er a rengellitel el mesiungel. (Monguiu er a 2 Korinth 3:5.) Ngsebechem el kiei el otutii a telbilem el ngar er a tkurrebab el sebechem e dirrek el ultuil er a ngelsuil a reng er a Dios.

¹⁵ Ngdiak el beot er kid el diak demecherrungel el chad el kiei el rodemii a telbiled el mo er a cherrungel el Dios er kid, el Jehovah. A ta er a meringel el tekoi a sel bo mteloi er a rechad el mle medengelkau er a uchei me ngmechas a rengrir er tia el beches el rolel a klengar er kau, me ‘toltuub er kau.’ (1 Petrus 4:4) Engdi lak mobes er a klou a ultutelel el tekoi el kmo, ke mla mekeroul a beches el klausechelei er kau, e ileakl ke mla mekerulii a ungil deleuill er kau el obengkel a Jehovah me a Jesus Kristus. (Monguiu er a Jakobus 2:​21-23.) Ngklou a ultutelel el bo modengelterir a rudam me a rudos er a ongdibel er kau, el ngii a tedebechel a ongdibel er a remesiungel a Jehovah el meliuekl er a beluulechad, el ua losaod a bades er a 1 Petrus 2:17 me a Osisechakl 17:17. Me ngoeak a reng er a Jehovah e ngmo meskau a rungil el sechelim el tir a mo melisiich er kau.

16. Ke mekerang e mo ua Paulus el ‘ungil a rengum a le mer kau a chelitechut’?

¹⁶ Me alta e ke iliuekl er a resechelim er a ongdibel engdi nglocha mo er ngii a taem el bo mchelebangel a meringel el tekoi el kirem el outekangel. Me a tekoi el bo mcheremii a sebechel el mo uchul a chelitechetul a rengum el ua dedu el kmo, ngkmal imis el betok a mondai er a klengar er kau. Tiaikid sel taem el kau a kmal kirem el lolengit er a chedaol el reng er a Jehovah me lengesukau. A apostol el Paulus a milluches el kmo: “Ele sel kmechitechut, iseikid e ak misisiich.” (Monguiu er a 2 Korinth 4:​7-10; 12:10.) A Paulus a mle medengei el kmo a reng er a Dios a sebechel el ngosuir a chad er aike el chelitechetul. Me a klisichel a Dios a sebechel el smisichau er sel taem el kau a mechitechetong e ousbech a ngeso. A Paulus a milluches el kmo: “Misei e ngungil a renguk a le mer ngak a chelitechut.” Me sel taem er a lolechesuar el kmo ngmechitechetong e a chedaol el reng a ngilsuir. Kau me ngdirrek el sebechem el mo melechesuar tia el tekoi!​—Rom 15:13.

17. Ngmekerang a chedaol el reng e ngosukau el merael el bedul a basio el soam el mo er ngii?

¹⁷ Kid a ousbech er a reng er a Dios me bo el sebeched el kiei el rodemii a telbiled el mo er ngii. Ka di molatk, oleko ke chad el omekall a ears. A turrekong er kau a soam el mesiou er a Jehovah el diak a ulebengelel. A chedaol el reng a di ua eolt, el soam el oltoir er ngii me bo el sebechem el mo er a basio el mo uchul e ngsebechem el mukerreu. Ngkmal diak el soam el mo mechetakl er a reng er tia el beluulechad er a Satan. (1 Korinth 2:​12) Ngkirem el dongchii a eolt el soam el oltoir er ngii, e ngii el eolt a chedaol el reng er a Jehovah. Me ngoeak a Tekingel a Dios me a dirrek el cheldebechelel, el ngii a mukrael er a reng er Ngii, e ngmo ngosukau el ngiltii a melemalt el rael.

18. Ngerang a turrekong er kau er a chelechang, e ngera uchul?

¹⁸ A lsekum ke dirk mesuub el obengterir a Resioning er a Jehovah, e dmeu a rengum el teloi er tir, engdi ngdirkak mtibir er a rengum el mo metecholb e ngungil a di lekau el oker el kmo, ‘Ngera uchul me a kumai er a renguk?’ A lsekum e ke melechesuar a chedaol el reng er a Jehovah a loureor er a chelechang el churrengelii a moktek er ngii, e dirrek el oba omereng el saul el kirel a tekoi el momes, e ngmla mo kirem el nguu a klou a ultutelel el bakes. A Jehovah a mo omekngeltengat er kau e mo meskau a chedaol el reng er ngii. A lsekum e ke miltecholb er a ngar er a mong e ke ulterekokl el mla melechesuar a chedaol el reng er ngii a loureor. Ke dirrek el mla mesang e melechesuar sel rolel a lolisiich er kau a chedaol el reng er a Dios. E tiang a sebechel el melemolem el diak a ulebengelel. Mada mtibir er a rengum el mo mukrael er a chedaol el reng er a Dios.

Ke Dirk Melatk?

• Ngera belkul a “merael el ngara reng”?

• Ngerang a sebechel el ngosukau el “merael el ngara reng”?

• Ke mekerang e kiei el rodemii a telbilem?

[Siasing el ngar er a 17 el llel]

A rolel a omomtebechel er a rengum a ousbech er a klou el temem me a klisichem

[Siasing el ngar er a 19 el llel]

Kau ke mukrael er a chedaol el reng er a Dios?