Ngera Uchul Me a Jesus a Dimlak Bo el Teloi er a Tekoi er a Balatiks?

KA MOLATK er a tekoi el dilubech er a rak er a 32 er a taem er kid. Ngmocha er a ulebengelel a sils. E a Jesus, el ngike el lulemlaoch el kirel el kmo ng Messias, a mla mo merael a chisel e le ngii el omekungil a secher e dirrek el olekiis er a rechad er a kodall. Chelecha el sils, e ngmla chemas a rengrir a rebetok el telael el chad el loeak a omerellel el mle sebechel el meruul a mengasireng el olangch e lolisechakl er tir a tekingel a Dios. Chelechang e ngomii er tirka el songerenger el chad el mo er a mekekerei el cheldellir a rechad. E meluluuch el mo er a Jehovah e oeak a mengasireng el rolel e ngmekelterir el rokui. E sola e chemudel a derengel aika el kall. Me te mekerang tirka el chad?​—Johanes 6:1-13.

A uriul er a leues a mengasireng el urerel a Jesus me a dechal el omtebechel er a seked e lomekerreu aike el lousbech, e tirka el chad a kilengei el kmo a Jesus a kmal mo ungil el king. (Johanes 6:14) Tia el uldesuir a diak el mechas a rengud er ngii. Molatk el kmo ngkmal mle sorir a ungil el merredel, e le belurir a mla er a cheungel a meringel el omengederederel a ngodech el beluu. Me te millasem el orrimel er a Jesus el mo teloi er a tekoi er a balatiks. Chelecha el dodengelii tiang, e ka dolatk er sel lerirellii a Jesus.

A Johanes 6:15 a kmo: “Ma Jesus ra bocha lodengei el kmo te merekung lomdechem er ngii e meruul er ngii el mo king, e ngulibngii el lmuut el mora rois el di ngiil tang.” Me a delecherul a Jesus a kmal mle bleketakl. Ngmle ulterekokl a rengul el dimlak el soal el mo teloi er a balatiks er a belual. E tia el delecherul a dimlak el mengodech. Ngmillekoi el kmo a rultirakl er ngii a mle kirir el mo meruul er a osisiu el tekoi. (Johanes 17:16) Ngera me ngmirruul er tiang?

Ngera Uchul me a Jesus a Ngileltii el Mo Diak Loba Bitang me a Ka Lebitang?

A blekerdelel a Jesus el dimlak el loba bitang me a ka lebitang er a tekoi er a balatiks er tia el beluulechad a mlengai a uchetemel er a omellach er a Bades. Ka molatk a eru er aikang.

“A re bebil er a re chad er tial beluulchad a ngar ngii a klisichir, e a re bebil a mo chuarm er tir.” (Olisechakl 8:9) Tiaikid a rolel a Biblia a losaod er a reksi er a omengederederir a rechad. Molatk el kmo a Jesus a di mla ngar er ngii a klengar er ngii er a eanged er a uchei er a lemei er tia el chutem el ua chad. (Johanes 17:5) Me ngmle medengei el kmo a chad, alta ngungil a moktek er ngii, a diak a duch er ngii el mo ungil el lomekerreu aike el lousbech a rebiliol el chad, me a ka lulebeob er a Dios el mo meruul el uaisei. (Jeremia 10:23) A Jesus a mle medengei el kmo a semecheklel a mondai er a klechad a mei el oeak a ngodech el rolel, el dimlak loeak a kabelment er a klechad.

“A belulechad el rokir a chederdall er ngikel mekngit.” (1 Johanes 5:19) Ngmechas a rengum er tia el tekoi? Te betok a uai kau. Te melatk el kirir a remedemedek el chad el mo teloi er a kabelment e le ngsorir el meruul er tia el beluulechad el mo ungil el basio el sebeched el kiei er ngii. Me alta e te melasem, engdi ngmo lmuut er tirke el kmal medemedemek el merredel, me te di mo mechetakl er a klisichel ngike el lolekoi er ngii a Jesus el kmo ng “merreder er tial belulechad.” (Johanes 12:31; 14:30) Sei a uchul me a Jesus a dilu er a ta er a chad er a balatiks el kmo: “A rengedek a diak le ngar tial belulechad.” (Johanes 18:36) A Jesus a ngike el miltutk el mo King er a kabelment er a Dios el ngar er a eanged. Me a lsekum e ngmlo teloi er a balatiks, e ngua lechilitii a blakerreng er ngii el mo er a kabelment er a Demal.

Me a Jesus ngullisechakl el kmo a rultirakl er ngii a diak a ngerechelir el mo er a kabelment er a beluulechad? Ngdiak, ngbai ullisechakl er tir el mo tabesul a uldesuir el kirel a ngerechelir el mo er a Dios me a dirrek el ngerechelir el mo er a kabelment er a beluulechad.

A Jesus a Milengull a Klisichel a Kabelment

A Jesus er a lolisechakl el ngar er a templo, e a rulemtok a millasem el mengeblad er ngii me bo el lolekoi a cheleuid el tekoi er a loker el kmo a rechad ngkirir el mengkad a tax er tir me a lechub e ngdiak. Omko ngdilu el kmo ngdiak, e a rechad a mle sebechir el omes er a nger er ngii el kmo ngomtok er a kabelment e mo uchul a ultok er a delongelir a rechad el mle sorir el mo mimokl er a cheungel a klisichel a beluu er a Rom. Engdi a ledu el kmo choi, e a rebetok er tir a locha mlo omdasu el kmo ngkilengei aike el diak el melemalt el omeruul el lechilebangel tirka el chad. A nger er a Jesus a kmal mle tabesul. Ngdilu el kmo: “A le uaisei e a kloklel a kaiser le bora kaiser, ma kloklel a Dios a le bora Dios.” (Lukas 20:21-25) Me a rultirakl er ngii a ngar er ngii a ngerechelir el mo er a Dios me a Kaiser, el ngii a kabelment er a beluulechad.

A kabelment a omtebechel a tekoi er a beluu me ngdi ungil el merael e dirrek el ngar er ngii a llemeltir me a ngerechelir el omes er a rechad me te meruul a llemalt, e mo harau a tax er tir, e dirrek el mo oltirakl a llach. Ngera el kerebai a lebilecherei a Jesus er a lomsang a ‘kloklel a kaiser el mora kaiser’? A Jesus a lulemekeroul er ngii a demal me a delal el tir a ulengesenges a llach alta loruul el uaisei e ngmle meringel. El ua tiang, a Josef me a bechil er a Maria, el mle dioll, a mirrael el bekord el 90 el mael el mo er a Bethlehem er sel taem er a letobed a llach er a Rom el mo melai a ulecherengelir a rechad. (Lukas 2:1-5) Me ngdi uai tir, e a Jesus a uleltirakl a llach, e dirrek el milengkad a teksel, el ngii a mera er ngii ngdimlak el blals el kirel. (Matteus 17:24-27) Ngdirrek el mle kerekikl me ngdiak loba klisichel el mo mengedereder a tekoi er a beluu. (Lukas 12:13, 14) Me ngsebeched el melekoi el kmo ngmilengull a kabelment, engdi ngdimlak el soal el mo teloi er ngii. Engdi ngera mle belkul a tekingel el kmo bsa ‘kloklel a Dios el mora Dios’?

Ngmilekerang a Jesus e Msa ‘Kloklel a Dios el Mora Dios’

A Jesus a mle ta el loker er ngii el kmo ngera kot el ngarbab el llach er aike el rokui el llach el Dios a milsterir a rechad. Ngulenger el kmo: “Bo le betik a rengum ra Rubak el Dios er kau era rengum el rokir, ma chomeltkem el rokir, ma chomelebedebekem el rokir. Tiaikid a kot el klou a blkul e ngarbab el llach. Ma chongerung me ngdi uaisei el kmo, Bo le betik a rengum era ngar bita er kau el ua le betik a rengum er kau.” (Matteus 22:37-39) Ngullisechakl el kmo sel dosaod el kirel a domsa ‘kloklel a Dios el mora Dios,’ e sel kot el tekoi el debelsel a Dios er ngii a bltikerreng, el ngii a uldimukl er a rengud el rokir me a cherrungel el blakerreng er kid.

A chouaisei el bltikerrreng ngsebechel el obii? Ngsebechel a blakerreng er kid el obii el bebil a mo er a Jehovah el Dios me a kabelment er ngii el ngar er a eanged me a mo er a kabelment er a beluulechad? A Jesus a di mle ngii el melekoi er tia el omellach el kmo: “Ngdiak a sebechel siungeterir ar terul rubak; ngmo ouketui ra tang e mo betik a rengul er ngikel tang, malechub e ngotekir a rengul ra tang e ngikel tang a le ings a medal er ngii.” (Matteus 6:24) Ngar tiang, e a Jesus a milsaod el kirel a bingel a blakerreng er a chad el mo er a Dios me a kerruul, engdi ngdirrek el ulemdasu el kmo tia el osisiu el omellach a millutk el mo er a deteloi er a balatiks, e tirke el uleltirakl er ngii er a kot el dart el rak a dirrek el uleba osisiu el uldasu.

Aike el babier er a meketeketang a olecholt el kmo a rultirakl er a Jesus er a ngar er a mong a dimlak el bo el teloi er a balatiks. Tir el milengull er Ngike el lulengull er ngii a Kristus a uchul me ngdimlak el kengei el losus el mo er a Rom me a merredel er ngii, e dimlak bo el soldau, me ka lerirurt el mo olab a deruchall er a buai. Me te mlo chelebangel a bek el bedengel a mekngit el omeruul. A recherrouir a lebebil er a taem e te uleltelechakl er tir el kmo te uluuketui er a klechad. Me tia el ultelechakl ngmle klemerang?

A Remera el Kristiano a Omekerreu er a Rechad

Ka molatk er a omesodel a Jesus el kirel sel ongeru el ngarbab el llechul a Dios el kmo “Bo le betik a rengum era ngar bita er kau el ua le betik a rengum er kau.” Me ngbleketakl el kmo ngdiak a oltirakl er a Kristus el sebechel el louketui er a klechad. A Jesus a mle betik a rengul er a rechad, e mle meringel el oureor el kirir, e ngilsuterir er aike el mondai er tir er a bek el sils.​—Markus 5:25-34; Johanes 2:1-10.

Engdi a Jesus ngmle merael a chisel el kirel a ngerang? A rechad a mle medengelii, el diak el Chad el Omekungil, me a ka el Ngike el Lomekang er a Retelael el Chad, me a lechub e le Chad el Olekiis er a Remla Mad, alta ngmirruul aika el rokui el meklou el ngerachel. Te bai ulemekedong er ngii el Sensei, e mera el mle kirel el uaisei. (Johanes 1:38; 13:13) A Jesus a milsaod el kmo a ngarbab el uchul e ngmlei er tia el beluulechad a mle kirel el olisechakl er a rechad el kirel a Rengedel a Dios.​—Lukas 4:43.

Sei a uchul me a rultirakl er a Kristus a tonget a klengar er tir el meruul er a osisiu el ureor el ble lemechesang er ngii a Mastang er tir er a lengar tia el chutem, el olisechakl er a rechad er a ungil el chais el kirel a Rengedel a Dios. A Jesus Kristus a uleldurech er a rokui el mera el Kristiano el mo olisechakl er a rechad el meliuekl er a beluulechad el kirel a Rengedel a Dios. (Matteus 24:14; 28:19, 20) Tia el diak el ngemed el kabelment el ngar er a eanged a mo mengedereder er a rokui el blebelel a Dios, el oltirakl er a llach er a bltikerreng. Ngmo kutmeklii a soal a Dios, e okngmedii a ringel me a kodall. (Matteus 6:9, 10; Chocholt 21:3, 4) Sei a uchul me a Biblia a melekoi el kirel a klemechel a Kristus el kmo “ungil klumech.”​—Lukas 8:1.

Me a lsekum e ke osiik er tirke el mera el oltirakl er a Jesus Kristus er chelecha el taem, e ke mekera e dongcheterir? Te mo chelsechusem er a balatiks er tia el beluulechad? Me a lechub e te omes er tia el ureor er a berkel me a osisecheklel a Rengedel a Dios el kmo ngklou a ultutelel el uai a Jesus?

Ngsoam el mesuub a lmuut el betok el kirel a Rengedel a Dios me a ngerang rullii er a klengar er kau er a chelechang? Aki mengemedaol er kau el mo mengedecheduch er a Resioning er a Jehovah el ngar er a beluam me a lechub e bo mesa sel Web site el www.watchtower.org.

[Baks/​Siasing el ngar er a 20, 21 el llel]

A Resioning er a Jehovah Te Olengeseu er a Buai?

A Resioning er a Jehovah a diak lolab el mo er a bitang me a bitang er a tekoi er a balatiks. Engdi te kmal blak a rengrir el olengeseu er a rechad er a kakerous el beluu el ngar er a belurir el tir a dirrek el kakerous a blekerdelel a klengar er tir. Ka momtab aika el bebil er a olechotel:

◼ Te ngar er ngii a kuk betok er a euid el miliol el Sioning er a Jehovah el kongei el mengoit a betok er a 1.5 el biliol el sikang er a bek el rak el olisechakl er a rechad a tekoi el ngar er a Biblia e dirrek el olisechakl el kmo ngmekerang aika el tekoi e sebechel el ngosuterir el mo mengoit aike el mekngit el blekeradel me a omeruul, e loleketek a deurreng er a chelsel a telungalek er tir, e dirrek el sumechokl a blekerdelel a klengar er tir el mo ungil.

◼ Te oltobed e merous a babier el diak locheraol el ngar er a kuk betok er a 500 el omelekoi, el uldimukl er ngii a bebil er a omelekoi el dirkak el lemotobed a babier er ngii.

◼ Te mla kutmokl a prokuram el ngii a mla ngosuterir a rebetok el telael el chad er a beluulechad el mo meduch el menguiu e dirrek el meluches.

◼ Te mla kutmeklii a skuul el mla ngosuterir a rebetok el miliol el mo ungil e dirrek el meduch el mengedecheduch er a mederir a rechad.

◼ Te mla kutmokl a betok er a 400 el Chelechad er a Rumekedechor a Blai el meliuekl er a beluulechad el olisechakl er tirke el kongei el mo meduch el omekedechor a blai me bo el sebechir el omekedechor a blil a omengull. Ngar er aika el mereko el teruich el rak, e a kuk betok er a 20,000 el blil a omengull, me a lechub e ng Kingdom Hall, a mla mukedechor.

◼ Te dirrek el teloi er aike el ureor el olengeseu aike el mla metemall el beluu el meliuekl er a beluulechad, el olengeseu er a Resioning me a rediak el Sioning. A uriul er a lemetemall a bebil el beluu er a Merikel er a mesisiich el eolt, e a Resioning er a Jehovah el tir a kilengei el chemoit a temir el mo olengeseu a milekedechor a betok er a 90 el Kingdom Hall me a 5,500 el blai.

[Siasing el ngar er a 19 el llel]

A rechad er a lorrimel er a Jesus el mo teloi er a balatiks, e “ngulibngii el lmuut el mora rois el di ngiil tang”