Moumerang er a Jehovah er Chelecha el Lolekedang a Ulebongel

“Moumerang er a [Jehovah] el mo cherechar.”​—ISAIA 26:4.

1. Ngerang a klekakerous er a remesiungel a Dios me a rechad er tia el beluulechad?

KID a kiei er a beluulechad el rebetok el miliol el chad a dikea lodengei el kmo te mo ultuil a klaumerang er tir er a ngerang me a lechub e ngtechang, e le te locha mla metemall a rengrir er a betok el mekngit el omerellir a rechad. Me nguaisei, engdi tia el uldasu a kmal ngodech er a uldesuir a remesiungel a Jehovah! Tir el mukrael er sel llemesel a rengul a Dios a uchul me te ungil medengei el kmo ngdiak el kirir el mo ultuil a klaumerang er tir er a “re merreder.” (Psalm 146:3) Te bai mla oterekokl a klengar er tir er a chimal a Jehovah, e ungil el medengei el kmo Ngii a kmal betik a rengul er tir, e dirrek el mo otaut aike el tekingel el letilib el mo er a rechedal.​—Rom 3:4; 8:38, 39.

2. Ngerang dilung a Josua el kirel a dultuil a klaumerang er kid er a Dios?

² A Josua er a irechar a kmal ulterekeklii a klemerang er a tekingel a Dios. Ngar er a ulebongel er a klengar er ngii e ngdilu er a rekldemel el chad er a Israel el kmo: “Kemiu el rokui a medengei er a rengmiu ma chomeltkiu el kmo ng diak a tar a ikel rokui el le tilib a [Jehovah] el Dios er kemiu el kiriu el dimlak bo le tekoi.”​—Josua 23:14.

3. Ngera ngouchais er ngii a ngklel a Dios el kirel?

³ A Jehovah a oltaut a telbilel, el diak di el bltkil a rengul el mo er a remesiungel e ngdirrek el ileakl el kirel a osebecheklel a ngklel. (Exodus 3:14; 1 Samuel 12:22) Ngngar er a uchelel a babilengel a J. B. Rotherham el The Emphasized Bible, e ngmesaod er tia el ileakl el ngakl el kmo: “Tia el ngakl a oterekeklii a telbilel a Dios el kmo ngngar er a chelsel a ngii di el blekeradel, me a meringel el taem el bo lechelebangel a rechedal e Ngii a sebechel el ngosuterir er aike el lousbech, el kirel a ngklel. . . . Tia el ngakl a telbiil, . . . e dirrek el ocholt, e dirrek el kineng. Ngoeak tiaikid el ngakl, e a Dios a melemolem el blak a rengul el oltaut er a telbilel, e diak a ta el bo louuchel er a rengul er a tekoi el letibir el mo meruul er ngii.”

4. (a) A bades er a Isaia 26:4, ngmelisiich er kid el mo mekerang? (b) E ngera kede mo mesaod er a chelsel tia el suobel?

⁴ Di lekau el oker er kau el kmo: ‘Ngak, ak ungil medengelii a Jehovah me ngsebechek el mo mui el oumerang er ngii? Ngak, ak kumes el bedul a ngar medak el klebesei el oumerang el kmo ngii el Dios a mo sumechokl a rokui el tekoi el mo ungil?’ A bades er a Isaia 26:4 a kmo: “Moumerang er a [Jehovah] el mo cherechar. Ng di mo blechoel el mesebechakl er kid.” Me nguaisei, engdi a Dios a diak loruul a mengasireng el tekoi er chelecha el taem el ua ike el lurruul er a irechar er a taem er a omelechesel a Biblia. Engdi ngii el Dios a ua mesisiich el risois el “blechoel el mesebechakl er kid” a uchul me ngsebeched el mo mui el oumerang er ngii “el mo cherechar.” Me ngmekerang e sebechel ngika el blak a rengul el Dios el lolengeseu er a reblak a rengrir el mesiungel er chelecha el taem? Ka me bo dosaod a edei el rolel: Ngmelisiich er kid er sel taem el dolengit a ngeso er ngii el mo outekangel a omelsemai el kirel a ngibeserreng, e dirrek el melisiich er kid me ngsebeched el outekangel a ultok me a orimel, e dirrek el smisichid er sel taem el meringel el tekoi a omekberaod a uldesued me a rengud. Me chelechang el bocha dosaod aika el tekoi, e ngungil a dekerekikl el melebedebek el kmo ngmekerang e mo sebeched el lmuut el smisichii a klaumerang er kid el mo er a Jehovah.

Moumerang er a Dios er a Taem er a Omelsemai

5. Ngera el klou el omelsemai a sebechel el mo er ngii el kirel a olechotel a klaumerang er kid?

⁵ Ngkuk ta er a tekoi sel sekum kede oumerang er a Jehovah el kirel a telbilel el Paradis me a lechub e ngokiis el ngii a tekoi el desal loureng. Engdi ngsebechel el mo meringel el bo doumerang er ngii er sel taem el kuk bo lekirel a omelilt el kirel a tekoi er a kldung. El mera el mo melodech er a uldesued me a rengud el mo kongei el kmo a rolel me a llechul a melemalt e dirrek el sebechel el mo uchul a diak el mekimd el deurreng er kid. A King Salomon a dilu el kmo: “Moumeral ulsirs er a [Jehovah] el oba rengum el rokir. Lak mulsirs er a di llemesel a rengum. Mletkii a [Jehovah] er a ikel bek el moruul, e ngii a mo ochotii er kau a melemalt el rael.” (Osisechakl 3:5, 6) Momtab a tekoi el “aike el bek el moruul” me a dirrek el melemalt el “rael.” Nguaisei, ngkmal kired el mo mui el ultuil a klaumerang er kid er a Dios el diak di lomeltked el Kristiano e le merekong. Me kede mekerang e ochotii tia el klaumerang er a taem er a omelsemai?

6. Kede mekerang e mo sebeched el mesisiich el oltngakl a mekngit el uldasu?

⁶ A uldesued a omuchel el melebedebek a tekoi me bo el sebeched el mengeroid er kid er a mekngit. (Monguiu er a Rom 8:5; Efesus 2:3.) Me kede mekerang e mo sebeched el smisichid el mo oltngakl a mekngit el uldasu? Ka molatk aika el eim el rolel: 1. Molengit a ngeso er a Dios el okiu a nglunguuch. (Matteus 6:9, 13) 2. Molebedebek aike el omerellir tirke el dimlak lolengesenges er a Jehovah me a dirrek el tirke el mle blak a rengrir el olengesenges er Ngii. E momtab aike el tekoi el dilubech el mo er tir. (1 Korinth 10:8-​11) 3. Molatk aike el telemellel me a ringelel a uldesuem el sebechel el mo er ngii el kirem kau me a rebetik er a rengum el klengit a uchul. 4. Ka di molatk el kmo ngmo uangerang a rengul a Dios sel sekum a ta er a mesiungel a ruebet er a oberaod el klengit. (Monguiu er a Psalm 78:40, 41.) 5. Ka di molebedebek er sel klou el deuil a rengul a Jehovah sel lomes er a blak a rengul el mesiungel el oltngakl a mekngit e lolemolem el meruul a ungil er a taem el leteloi er a rechad me a dirrek el sel taem el di lengii el tang. (Psalm 15:1, 2; Osisechakl 27:11) Kau me ngdirrek el kmal sebechem el ochotii el kmo ke ultuil a klaumerang er kau er a Jehovah.

Moumerang er a Dios Sel Bo Mchelebangel a Ultok Me a Odechelakl

7. Ngera el omelsemai a blo lechelebangel a Jeremia, e mlo uangerang a uldesuel er a bebil er a taem?

⁷ Ngar ngii a rebetok el rudam er kid el mesiou er a chelsel aike el beluu el klou a ultok er ngii. A profet el Jeremia a dirrek el milsiou er a chelsel a meringel el taem el ngar er a ta el beluu, el ngii a renged er a Juda. Ngmle bek el sils el lemeasem a klaumerang er ngii el mo er a Jehovah, e le ngii el ullengesenges e mle blak a rengul el ouchais er a klumech el kirel a kerrekerilel a Dios. Ngmlo er ngii a taem el ngike el blak a rengul el melechesel el Baruk a dirrek el mlo chuarm a rengul. (Jeremia 45:2, 3) Me tiang rirellii a Jeremia el mo mechitechut a rengul? Ngmla er ngii a ta el taem e ngdirrek el mlo mechitechut a rengul, me ngdilu el kmo: “Mdebeklii sel sils el kmlechell er ngii!” E dirrek el dilu el kmo: “Ngera uchul mak mlechell? Ng di kirek el ngar a chelebuul ma klengiterreng, e merekui er a klengar er ngak el otuball?”​—Jeremia 20:14, 15, 18.

8, 9. Me ngokiu a bades er a Jeremia 17:7, 8 me a dirrek el Psalm 1:1-3, e ngngera kired el meruul er ngii me bo el sebechel a omesiunged el mo oltobed a ungil el rodech?

⁸ Me nguaisei, engdi a Jeremia a dimlak el bo lemechitechut a rengul. Ngmillemolem el ultuil a klaumerang er ngii er a Jehovah. Me tiang a mlo uchul e ngika el blak a rengul el profet a mle sebechel el mesang a otutel a tekingel a Jehovah el llechukl er a Jeremia 17:7, 8: “Ng ngeltengat a chad el oumeral ulsirs er a [Jehovah]. Ng mo ua kerrekar el dellomel er bita er a ralm me ng meledes a risel el mor a omoachel. Ng diak a dektel a bo le belsechel a kleald ele llel a di mellekulek, ma diak lesebek a rengul sel le bo lak a chull ele ng di ourodech.”

⁹ Me a Jeremia a di mle ua ungil a dbechel e mellekulek el kerrekar “el dellomel er bita er a ralm” me a lechub e ngungil a rolel a ralm el mo er ngii el dellomel el mle blechoel el “di ourodech.” Ngdimlak a ta el lebechei aike el mekngit el omerellir a rechad el mle iliuekl er ngii me longesuseu er ngii el mo er a klengit. Ngbai mle blak a rengul el omereked er ngii er Ngike el Uchul a klengar me lsebechel el melai a “ralm” e dirrek el mle bekongesenges el kirel a rokui el tekoi el le dilu er ngii a Jehovah. (Monguiu er a Psalm 1:1-3; Jeremia 20:9) Ngkmal ungil el kerebai el kired a Jeremia, el ileakl a lsekum kede mesiou er a Dios er a chelsel a basio el meringel a blekeradel er ngii! Me a lsekum kede chelebangel er tia el rolel a omelsemai, e ngkmal kired el melemolem el ultuil er a Jehovah el kirel a ngeso, e le ngkmal sebechel el meskid a dechal a rengud el mo outekangel a ngii di el omelsemai el churrengelii a omesiunged el kirel a “rodech ra ngor lolecholt ra ngklel.”​—Hebru 13:15.

10. Ngera el klengeltengat a ngar ngii er kid, e ngera el ker a kired el di kid el oker er kid?

¹⁰ A Jehovah a mla meskid a kmal betok el ungil tekoi el sebechel el ngosukid el mo outekangel a rokui el ringel me a omelsemai el bo dechelebangel er chelecha el uriul sils. Me nguldimukl er ngii el tekoi e ngmla meskid a cherrungel el Tekingel el Biblia, el ngii a merael a ureor er chelecha el taem el oleiuid er ngii el mo er a betok el kakerous el omelekoi. Ngii a dirrek el meruul a betok el ungil el tekoi el kirel a klaumerang el mechii a bek el blsechel el okiu a blak a rengul el mesiou. Ngdirrek el mla meskid a rebetok el kldemed er a klaumerang el tir a sebechir el melisiich er kid sel deteloi er tir el ngar er a miting me a dirrek aike el meklou el ongdibel er kid. Me ker a kmo, kau ke ungil el ousbech aika el ileakl el techall? Tirke el rokui el ousbech aika el ungil el tekoi a “mo mengitakl er a deurreng.” Engdi tirke el diak lolengesenges er a Dios a “mo lmangel el chelam a rengrir.”​—Isaia 65:13, 14.

Moumerang er a Dios Sel Bo Mchelebangel a Mondai Me a Ringelel a Uldasu

11, 12. Sel domes a betok el mondai er a beluulechad er chelecha el taem, e ngngerang a mera el rolel a llomeserreng el sebeched el ultuil er ngii?

¹¹ A klechad a chuarm er a kmal betok el mekngit el omeruul er chelechang, el ua losaod a ulaoch. (Matteus 24:6-8; Chocholt 12:12) Sel sekum e ngmo er ngii a ieleb er a beluu, e a rechad a blechoel el chemiis el mo er a ngii di el mekedidai el basio me a lechub e te ngmasech el mo er a bebul a mekedidai el blai. Me ngdi osisiu, sel loleketek a mekngit el omeruul er a beluulechad, e a rebetok el miliol el chad a mo osiik a osebechakl er a kerruul, me a tekoi er a balatiks, me a lechub a tekoi er a klechelid, me a tekoi er a science me a dirrek el beches el mesil el loruul a rechad. Engdi ngkmal diak a ta er aika el tekoi el sebechel el meskid a mera el ulekerreu. (Jeremia 17:5, 6) Engdi a remesiungel a Jehovah a kuk ngodech a omeltkir, e kmal ngar ngii a basio er a osebechakl el lodengelii, el ngii a Jehovah el ‘blechoel el mesebechakl er tir.’ (Isaia 26:4) A ta er a remilluches er a Psalm a melekoi el kmo: A Jehovah a “di ngii ia risois er ngak e osebelek. Ng cheuotelek me ng diak bo kmesmesim.” (Monguiu er a Psalm 62:6-9.) Me kede mekerang e rullii ngika el Dios el mo osebechekled?

¹² Kede melemolem el olekeed er kid er a Jehovah sel doltirakl er a mellomes el Tekingel, el ngii a blechoel el ngodech er a llemesel a klechad. (Psalm 73:23, 24) El uaitiang, a rechad el mekususeu er a llemesel a klechad a sebechir el mo melekoi el kmo; ‘Mousbech er a klengar er kau el meruul aike el soam er chelechang, e le a klengar er kau a di tang.’ ‘Mosiik er a kot el ungil el ureor.’ ‘Mongudel a betok el udoud.’ ‘Mocherar tiang, mocherar sei.’ ‘Moldeu er a rengum el mesarech a beluu el meliuekl er a beluulechad.’ Engdi a llomeserreng el ngar er a Dios el mei a omeklatk er a rechad el kmo: “Mar uusbech er tial belulechad bo le ua lak el sal chemau ngii. Le teletael er tial belulechad a mo nguemed.” (1 Korinth 7:31) Me ngdi osisiu, a Jesus a blechoel el omeklatk er kid el mo nguu a omengull er a Jehovah el mo kot er a chelsel a klengar er kid el oeak sel domatek a “mekreos el klalo er a eanged,” el ngii a mo uchul a cherrungel el osebechakl.​—Matteus 6:19, 20.

13. Sel dolatk er a bades er a 1 Johanes 2:15-​17, ngkired el di kid el oker er kid el kirel a ngera el ker?

¹³ A omerellem me a uldesuem el kirel a “belulechad ma ikel tekoi el ngara belulechad,” ngochotii el kmo ke ultuil er a cherrungel el klaumerang er kau er a Dios? (1 Johanes 2:15-​17) A tekingel a Dios me a dirrek el techall el mobang el mesiou er a Dios, ngmeklou a ultutelel el tekoi er a klengar er kau el kuk ngaruchei er a tekoi er tia el beluulechad? (Filipi 3:8) Ke melasem er a tkurrebab el sebechem el ‘omekbeot er a rolel a klengar’ er kau? (Matteus 6:22) Nguaisei, engdi a Dios a dirrek el diak el soal a bo lak dekerekikl aike el ngerecheled el ileakl el kirel a telungalek er kid. (1 Timoteus 5:8) Engdi ngdirrek el mengerechir er a remesiungel el mo mui el ultuil er ngii el kirel a rokui el tekoi, el diak lebo lultuil er tia el ngomedung el beluulechad er a Satan.​—Hebru 13:5.

14-16. Ngmilekerang e mo sebechir a rebebil el ngmai a betok el klengeltengat e le tir el ‘omekbeot er a rolel a klengar’ er tir e ngiluu a tekoi er a Renged el mo kot?

¹⁴ Ka di molatk er a blekerdelel a Richard me a Ruth el tir a oungalek er a retedei el mekekerei el ngalek. A Richard a melekoi el kmo: “Ak melatk el kmo, ngsebechek el lmuut el remuul a betok el kirel a Jehovah. Ngdirrek el mle ungilbesul a klengar er ngak engdi ak dirk kulemdasu el kmo, aike el kumsang a Jehovah a di ike el medeel er ngak e merekong. Me a uriul er a kim moluluuch el kirel tia el tekoi, e ngak me a Ruth a dul kilengei me ngmlo sebechek el mo olengit er a merreder er ngak, me bo el sebechel el kongei er ngak el di mo oureor el eua el sils er a chelsel a ta el sandei. Me alta e ngar tia el taem e ngkmal kosekodel a rolel a udoud er a beluu, engdi a merreder er ngak a kilengei er a ongtik, me sel ongingil el buil e ak ulemuchel el oureor el oltirakl er tia el beches el temek er a ureor.” Me ngmlo uangerang a uldesuel a Richard er chelechang?

¹⁵ Ngmelekoi el kmo: “A ududek a milengas er a 20 el basent, engdi chelechang e ngmla medechel a 50 el klebesei er a chelsel a ta el rak el sebechek el lobengkel a telungalek er ngak e olsisechakl er a rengelekek. Ngdirrek el mla mo er ngii a techellek el kilungii a temek er a omesiungek, e mla mo chachisois a ildisir a rechad el kusuub a Biblia el obengterir, e dirrek el mla mo er ngii a techellek el meruul a lmuut el betok er a chelsel a ongdibel. Osisiu el taem e ngmla mo er ngii a temek el kuk olengeseu er a rengelekek, el uchul me chelecha el taem e a Ruth a sebechel el kuk mo auxiliary pioneer er a chelsel a bebil er a buil. Ak kmal kltmokl el di melemolem el oltirakl er tia el bla kuterekeklii el temek el kirel a omesiungek.”

¹⁶ A Roy me a Petina el dirk ngar ngii a ngelekir el redil el kiei el obengterir, a dirrek el milengesadel a temir er a urerir me bo el sebechir el mo teloi er a mui el taem el omesiou. A Roy a melekoi el kmo: “Ak ureor el edei el klebesei er a chelsel a ta el sandei, e a Petina a oureor el eru el klebesei. Aki dirrek el millukl er a klou el blimam el mo kiei er a apartment, el ngii a bai beot a omengetmeklel. Kemam a milsiou el mui el taem er a uchei er aki bo moungalek, me sera lebo er ngii a rengalek, e ngmlo diak a techellam er tia el ureor, engdi ngdimlak ki meterob el melatk er ngii el ureor. Me sera bo lemeklou a rengelekam, e aki liluut el mo soiseb er tia el ureor. Ngkmal diak a ngii di el ildisel a udoud el sebechel el mekesiur aike el betok el klengeltengat el ki bla mngai.”

Becherei a “Budech ra Dios” Me Lolisiich er a Rengum

17. Me alta e ngmeringel a rolel a klengar er kid er chelecha el taem, engdi ngmekerang e sebechel a Bades el mla mengelaod er kau?

¹⁷ Ngdiak a ta er kid el medengei el kmo ngngera mo duubech er a klukuk e le “a taem ma techall a mor a re bek el chad.” (Olisechakl 9:11) Me nguaisei, engdi ngdiak el belkul a kmo me kid el diak dodengei aike el mo duubech er a klukuk me lerellid el mo diak a budech er a uldesued, el ngii a uldasu el leblechoel el omdasu er ngii tirke el chad el diak a kmes el deleuill er tir lobengkel a Dios. (Matteus 6:34) A apostol Paulus a milluches el kmo: “Lak el sebek a rengmiu ra ngiidi le ngerang, e di moba chomereng el saul loldars a nglunguuch ma chongit ra bek el tekoi el subedii a Dios ra ikel molengit. Ma diak le metuk ra klemedengei rar chad el budech ra Dios a mo kokar a rengmiu ma chomelebedebekiu.”​—Filipi 4:6, 7.

18, 19. A Dios ngmengelaod er kid el oeak a ngera el rolel? Ka momekesiu.

¹⁸ A rebetok el rudam me a rudos el tir a chelebangel a meringel el omelsemai er a klengar er tir a mera el chelellakl a rengrir e melechesuar a budech el lomesterir a Jehovah. A ta el odos el mengiil er a temel el mo er a botk a melekoi el kmo, “A toktang a melasem el mengesuseu er ngak el mo kongei el ousbech a rasech, me sera lekot el mengedecheduch er ngak e ngmelekoi el kmo: ‘Ngera tia el omesodel a tekoi me a uldasu el kmo, ngdiak molai a rasech?’ Me ak millemolem el meluluuch el mo er a Jehovah, e mera el mlo melechesuar a budech er a renguk. Ak melechesukak el kmal mo mesisiich el ua klou el risois. Me alta e ngkmal mle kesai a rsechek, engdi ak kmal dmeu a renguk el mlo sebechek el ousbech er a Tekingel a Dios el ochotii a klaumerang er ngak.”

¹⁹ A lebebil er a taem e a Dios a meskid a ngeso el okiu a ongelaod er a rekldemed er a klaumerang me a lechub e ngkuk okiu a suobel el dengai er a ungil blsechel. Ke ulterekokl el mla rongesterir a rudam me a lechub e te odos el melekoi el kmo: “Ak mera el uluusbech er tia el suobel, e tiang a mera el milluches el ileakl el kirek!” Ngmera el tekoi, ngar er a chelsel a ngii di el blekeradel er a klengar er kid me a lechub e ngkuk di bebil er a meringel el tekoi el dechelebangel, e a Jehovah a kmal mo ochotii el mei er kid a klou el bltkil a rengul a lsekum kede mui el ultuil a klaumerang er kid er ngii. E le kid a “sib” er ngii me ngdirrek el mla oterekeklii a ngklel er kid.​—Psalm 100:3; Johanes 10:16; Rellir 15:14, 17.

20. Ngera uchul me a remesiungel a Jehovah a mo kiei el selebechakl er sel taem er a ulebongel er a beluulechad er a Satan?

²⁰ Ngar er a chelsel tia el di kmedu el mei el “sils er a ngesechel a rengul a [Jehovah]” e aike el rokui el tekoi el ngar tia el beluulechad er a Satan el lultuil a klaumerang er a rechad er ngii a mo nguemed. A kolt me a silber me aike el betok el mekreos el klalo a kmal diak el sebechel el mesebechakl er a rechad. (Sefania 1:18; Osisechakl 11:4) Ngdi ta el Jehovah el osebechekled a mo “mesebechakl er kid” el diak a ulebengelel. (Isaia 26:4) Me chelechang e bo leblak a rengud el otuil a mui el klaumerang er kid er a Jehovah e dolengesenges a bek el tekingel e dorael er a melemalt el rael, e douchais el kirel a klumech er a Rengedel, me sel bo dechelebangel a ultok me a omelsemai e bo el sebeched el ngmai a rokui el ringeled el oterekokl er ngii. Me sel dekengei el mo oltaut aika el rokui, e kede mera el ‘mo selebechakl, ele ng diak a ngeral uchul me bo de medakt.’​—Osisechakl 1:33.

Ngsebechem el Mesaod?

Kede mekerang e mo mui el ultuil a klaumerang er kid er a Dios

• er sel taem el bo dechelebangel a omengesuseu el mo meruul a mekngit?

• er sel taem el bo dechelebangel a omelsemai me a odechelakl?

• er sel taem el bo dechelebangel a ringelel a uldasu?

[Siasing el ngar er a 15 el llel]

Ngulterekokl el mo uchul a klou el deurreng a dolemolem el oltirakl a llechul a Jehovah

[Siasing el ngar er a 17 el llel]

“[A Jehovah] a di mo blechoel el mesebechakl er kid”