A Rolel a Dolisechakl er a Rengalek el Kirel a Dios​—Ngerang a Kot el Ungil el Rolel?

“Ng kmal diak mobes a ikal llach el kumeskau er chelechal sils. Mosisechakl el mor a re ngelekem. Ke mo omelekl cho mngar a blai ma cho mcheroid, ma cho molengull ma cho moureor.”​—DUTERONOMI 6:6, 7.

A LEBEBIL er a taem e a ruungalek a kmal mo seselk a rengrir er a ngerachel el kirir el olisechakl er a rengelekir. Ngsorir el osiik a melemalt el ulekrael, engdi ngkmal mo rrau a rengrir er a betok el tekoi me a uldasu el medung. A rechederir me a resechelirir a dirrek el kmal mereched el mo sorir el lolengeseu el kirel a uldasu. Me a babier me a suobel el loltobed a kmal betok, me aike el loltobed er a Internet a dirrek el kmal rulleterir a ruungalek el mo rrau a rengrir me ngdikea lodengei el kmo ngerang a ungil el ulekrael me a ngerang a diak.

Me nguaisei, engdi a Biblia a mesterir a ruungalek a melemalt el ulekrael el kmo ngera el tekoi el kirir el olisechakl er a rengalek, e dirrek el mesterir a melemalt el rolel a lolisechakl er tir. El ua ike el meldung er a uchei el bades er a Biblia, a ruungalek a kirir el osiik a ngii di el rolel er a bek el sils me bo el sebechir el mesaod el kirel a Dios el mo er a rengelekir. Kede mo mesaod aika el eua el tekoi el mengai a uchetemel er a Biblia el ngii a mla ngosuterir a rebetok el telael el chedam me a rechedil el mo ungil el olisechakl er a rengelekir el kirel a Dios.

1. Mosisecheklterir a rengalek el mo mesuub el kirel a blebelel a Dios. A apostol el Paulus a milluches el kmo: “Le sel diak le meues el blekerdelel a Dios, el diak a ullebengelel klisichel ma klechelid er ngii a domtab el bleketakl meues ra ikel ulebeob ra uchelel a belulechad. Me ngdiak a cheldechulir e lsodeterir.” (Rom 1:20) Me a ruungalek a sebechir el losisecheklterir a rengelekir el mo omekeroul er a ungil el deleuill er tir el obengkel a Dios el loeak sel losisecheklterir el mo medengei a blebelel a Dios, e bo lodengelii a klungel a ultutelel aika el bleob, e dirrek el ngosuterir el mo meduch el melebedebek aike el ngarbab el blekerdelel a Dios el ngii a mocholt el okiu aika el blebelel.

A Jesus a dirrek el uluusbech er tiakid el rolel er a lolisechakl er a redisaiplo er ngii, el ua tiang, ngdilu el kmo: “Momes a suebek el charm ra milidiul: ngdiak lolalem el ka loridm el ka lolecha ra soko, me nguaisei e a Demmiu ra eanged chomekeroul er tir. E kemiu ngdiak bai mluut el ngarbab er tir?” (Matteus 6:26) Ngar tia el tekingel a Jesus e ngmilsaod el kirel a ngarbab el blekerdelel a Jehovah el bltikerreng me a klechubechub. Ngdirrek el riruul a lmuut el betok el tekoi. Ngmlo sebechel el ngosuterir a redisaiplo er ngii el mo medengelii a osengel a Dios el kirir a rengalek.

A mellomes a rengul el King el Salomon a milsaod el kirel a llomeserreng el Dios a milsang a chedib, e dirrek el uluusbech er a omerellel aika el mekekerei el charm el melisiich er a klou a belkul el suobel. Ngdilu el kmo: “A re mesaik el chad a kirir el melai a klubelir er a klengar er a chedib. Ng diak omtebechel er tir, ma ka merreder er tir, ma lechub e le mengeteklir, ngdi te mengudel a kelir er a belsechel a kleald, el mengedmokl el kirel a belsechel a kelekolt.” (Osisechakl 6:6-8) Tiang a kot el ungil el rolel e ngsebeched el osisecheklterir a rengalek el mo meruul a meklou a ultutelel el turrekong er tir, e dirrek el mo meduch el ousbech er a klisiich el omeskid a Dios el mo otaut a turrekong el bla leketmokl!

A ruungalek a dirrek el sebechir el oukerebai er a osisecheklel a Jesus me a Salomon el oeak sel loltirakl aika el tekoi: (1) Oker er a rengelekir el kmo ngera el dellomel me a charm a sorir. (2) Mo mesuub a betok el tekoi el kirel aika el dellomel me a charm. (3) Mengetmokl a omesuub el kirel a Dios el ousbech aikaikid el blebelel a Dios.

2. Moukerebai er a omerellel a Jesus el bedul tirke el lullisechakl er tir. A Jesus a ngike el chad el millekoi a kot el meklou a ultutelel el tekoi, er a ngii di el chad el mla kiei er tia el chutem. Me nguaisei, engdi ngchiloit a betok el temel el di oker a ker. Ngkmal mle semeriar el mo medengei a ngar er a rengrir me a uldesuir a tirke el lullisechakl er tir. (Matteus 17:24, 25; Markus 8:27-​29) Me ngdi osisiu, a ruungalek a dirrek el ngar er ngii er tir a betok el meklou a ultutelel el tekoi el kirir el olisechakl er a rengelekir el kirel. Me a lsekum e ngsorir el mo ungil el osisecheklterir e ngkirir el mo oukerebai er a Jesus, e mo melisiich er a rengelekir el mo ouchais aike el ngar er a rengrir me a uldesuir.

E kuk mekerang a lsekum a rengalek a diak lolengesenges me a lechub e te meoud el mesuub a meklou a ultutelel el tekoi? Ka di molatk aike el blekerdelel a Jesus er a lolisechakl er a rechapostol er ngii. A lebebil er a taem e te mo kautoketok er a delongelir e dirrek el mo meoud el suubii a klungiolel a le ngariou a rengud. Engdi a Jesus a di millemolem el oba kllourreng el bedul tir, e dirrek el millemolem el omelekl aike el tekoi el mle usbechall el kirel a klengariourreng. (Markus 9:33, 34; Lukas 9:46-​48; 22:24, 25) Me a ruungalek el chad el tir a oukerebai er a Jesus a ulterekokl el mo klou a rengrir el omeklemalt er a rengelekir, e a lsekum e ngmo kirir el omelekl a osisiu el tekoi me bo el sebechir el mo medengei, e te meruul er ngii e le ngkmal kirir a rengalek el mo medengelii a ultutelel a tekoi el losuub el kirel.a

3. Molisechakl el oeak a kerebai. A ruungalek a kmal kirir el melatk er a uleklatk el ledillii a apostol el Paulus el mo er a Rekristiano er a beluu er a Rom. Ngmilluches el kmo: “E ngklsakl me kolisechakl rar chad e diak mosisecheklau? Komerk el kmo, ‘Lak bo morechorech’ e kau a merechorech?”​—Rom 2:21.

Tia el ulekrael a kmal klou a ultutelel e le rengalek a blechoel el mereched el suub a omerellir a rechad er a blirir er a bai ike el tekoi el lolekoi. Me ngkmal klemerang, a ruungalek el tir a meruul a tekoi el lolisechakl el mo er a rengelekir a blechoel el sebechir el rulleterir a rengelekir el mo orrenges aike el tekoi el lolisechakl er tir.

4. Momuchel sel dirk el kekerei. Ngike el mle kldemel a Paulus er a ureor er a klemissionari el ngeasek el Timoteus a kmal mle ungil a chisel er a belual. (Rellir 16:1, 2) A ta er a uchul tiang a ngii el mlosisechakl er a “chedaol llechukl [er a dirk el] kekerei.” A delal me a delal el mechas a dimlak di longuiu a Bades el mo er ngii, e te dirrek el ngilsuir el mo medengei a belkul a klemerang el tekoi el ngar a tekingel a Dios.​—2 Timoteus 1:5; 3:14, 15.

Basio el Sebechem el Mo er Ngii e Metik a Ngeso

A Resioning er a Jehovah a oltobed a kmal betok el babier el mla meketmokl el sebechel el ngosuterir a ruungalek el mo ungil el lolisechakl er a rengalek er a klemerang el tekoi el kirel a Dios. A bebil a kmal ungil kltmokl el ileakl el di kirir a remekekerei el ngalek. E a bebil a kuk sebechel el olengeseu er a ruungalek me a rengeasek el ngelekir el mo meleketek er a ungil el rolel a cheldecheduch er a delongelir.b

Nguaisei, a uchei er a lolisechakl er a rengelekir el kirel a Dios, e ngkirir a ruungalek el mo medengei a nger er aike el chetituokel el ker el loker a rengelekir. El ua tiang, ke mekerang a omonger chouaika el ker el kmo: Ngera uchul me a Dios a omechei a ringel me ngmelemolem? Ngerang a moktek er a Dios el kirel tia el chutem? Te ngar ker a rulekoad? A Resioning er a Jehovah a kmal dmeu a rengrir el ngosukau el mo medengei a nger er aika el ker me a lmuut el bebil, me bo el sebechem kau me a rechad er a blim el mo olekeed er kemiu er a Dios.

[Aike el Footnote]