A Klemerang a Sebechel el Ngodechii a Klengar er Kau

KE locha mla rongesii me a lechub e ke mla mosisechakl er a ta el blulak el tekoi el kirel a Dios el tia el babier a mla meketeklii. Engdi nglocha dirk meringel er kau el mo melodech er a klaumerang er kau, el ileakl a lsekum ke mla oba tia el klaumerang el kmal kemanget el taem.

Aki ungil medengelii a uldesuem. A bebil el klechelid a diak lolisiich er a rechad el omekesiu aike el osisecheklir er a tekoi el losaod a Biblia. A rebebil a melisiich er a cheleuid el osisecheklir el melekoi el kmo a Biblia a meringel er kid el mo medengelii a mera el belkul. Engdi a ruumesingd el disaiplo er a Jesus a dimlak a ngarbab el skulir, e di mle mereched el mo medengei a belkul a osisecheklel.​—Rellir 4:13.

Ngdirrek el mo meringel el morriter er a klaumerang er kau e le ngua lebelkul a kmo ngmechitechut a klaumerang er kau. Engdi tia ngmelemalt el uldasu el kmo a Dios a kesib a rengul er kau sel morriter er a tekingel el Biblia, e le ngsoam el mo medengei a tekoi el longerechir er kau? Ngkmal diak el uaisei, a Tekingel a bai melisiich er kau el mo ungil el merriter a Bades sel lolekoi el kmo: “Bo msal medengei el kmo ngngera soal a Dios, me ngngera ungil lodeuir a rengul a Dios.”​—Rom 12:2.

A omesubel a klemerang el kirel a Dios a lmuut el klou er a di llomeserreng, e le ngsebechel el ngodechii a klengar er kau el mo ungil. (Johanes 8:32) A Deanne el dulsaod er ngii er a uchelel tia el babier a mla toketekii a klaumerang er ngii el okiu a Tekingel a Dios. Ngdmu el kmo: “Ngkmal dimlak kudengei el kmo a Bades a kmal bleketakl el mo lmuut er sel taem er a kumuchel el mesuub er a Biblia. Chelechang e ak mla mo medengelii a Jehovah el kmo ngii a betik a rengul el chedam el ngar er a eanged el diak el cheroid e lemeringel er kid el mo medengelii. Me ngmla mo er ngii a mera el belkul a klengar er ngak.”

Alta ke milsuub er a Biblia er a uchei engdi ke mlo omdasu el kmo dimlak a klungiolem el mnguu er ngii. A leuaisei, e lak bo lemechitechut a rengum. Ngdiak el sebechem el mo ungil medengelii a Biblia a lsekum ke mlosisechakl er a blulak el tekoi el kirel a Dios er a uchei, el di ua omorael el mo er a basio el dirkak a ta el bo er ngii el ousbech er a blulak el ulekrael. Alta e ngmo ungilbesul a uchelel a omerollem, engdi ngmo seselk a rengum e le ngdi mo cheleuid a rael el mokiu ngii. Me a lsekum e ngsoam el mo er sel basio, e ngkirem el merael el oltirakl er a ungil e melemalt el ulekrael.

Me kau ngdiak el soam el mo suubii a klemerang el kirel a Dios? Aki kmal mengemedaol er kau el mo mengedecheduch er a Resioning er a Jehovah el ngar er a beluam me a lechub e moluches el mo er a ta er a address el ngar er a 4 el llel tia el babier el kirel a diak locheraol el omesubel a Biblia.

[Blurb el ngar er a 9 el llel]

“Bo msal medengei el kmo ngngera soal a Dios, me ngngera ungil lodeuir a rengul a Dios.”​—ROM 12:2