Moumera el Ulsirs er a Jehovah “el Dios er a Bek Longelaod”
“Le modanges a Dios el Demal a Rubak er kid el Jesus Kristus, el Chedam ra klechubechub, el Dios er a bek longelaod.”—2 KORINTH 1:3.
1. Ngera el tekoi a lousbech er ngii a rebek el chad?
A RECHAD a di mechell e ousbech a ongelaod. A tolechoi a lmangel el ouchais el kmo ngousbech a ongelaod el soal a decheblii me a lechub e ngmla mo songerenger. Ngmo lmuut er sel taem el demeklungang el chad, me kid a dirrek el ousbech a ongelaod, el ileakl sel bo dechelebangel a meringel el blekeradel.
2. A Jehovah ngomesterir tirke el oumerang el ulsirs er ngii a ngera el omelisiich el kirel a ongelaod?
2 A rechedad me a resechelid a sebechir el lomeskid a ongelaod. Nguaisei, engdi a lebebil er a taem, e a rechad a diak el sebechir el ngosukid el kirel a ringelel a uldesued. Ngdi ta el Dios a sebechel el mengelaod er kid er a chelsel a ngii di el ringel el bo dechelebangel er ngii. A Tekingel a melisiich er kid el kmo: “[A Jehovah a] kmeed er tirkel rokui el omekedong er ngii, . . . ng orrenges ongterir e olsobel er tir.” (Psalm 145:18, 19) Nguaisei, “a [Jehovah] a mengkar er a re melemalt e orrenges ongterir.” (Psalm 34:15) Engdi a bo el sebeched el ngmai a ngeso me a ongelaod er a Dios, e ngkmal kired el oumerang el ulsirs er ngii. A milluches er a psalm el David a mileketeklii tiang er a longitakl el kmo: “A [Jehovah] a osebecheklir a re mucheracheb, ng mesisiich el cheuatel er a temel a chelebuul. Tirkel medengelii a ngklem a oumeral ulsirs er kau, ele kau e [Jehovah] a diak mchititerir a rusiik er kau.”—Psalm 9:9, 10.
3. Ngmilekerang a Jesus er a lousbech er a okesiu el lomeketakl er a bltkil a rengul a Jehovah el kirir a rechedal?
3 A remesiungel a Jehovah a mekreos er a osengel. A Jesus a ulemeketakl er tiang er a ledu el kmo: “A kleim el sisebangiau ngkora moterau ra teblol sens? E lmuut kung me ngdiak a chimo er ngii el mo bes er medal a Dios. E lmuut kung ma chui ra bdelmiu me ngdirrek lulecherangel el rokui. Me lako medakd; e kemiu a kuk ngaruchei ra betok el sisebangiau.” (Lukas 12:6, 7) Nguleak a profet el Jeremia, e a Jehovah a dilu er a rechedal er a irechar el kmo: “Ng blechoel betik a renguk er kemiu, misei e ak di olecholt er kemiu er a diak le mengodech el bltikerreng er ngak.”—Jeremia 31:3.
4. Ngera me ngsebeched el oumerang el ulsirs er a telbilel a Jehovah?
4 A doumerang el ulsirs er a Jehovah me a otutel a telbilel a sebechel el mengelaod er kid er a taem er a chelebuled. Me ngkired el mo oumerang el ulsirs er a Dios, el di ua blekerdelel a Josua el dilu el kmo: “Ng diak a tar a ikel rokui el le tilib a [Jehovah] el Dios er kemiu el kiriu el dimlak bo le tekoi. Ng rokui el le tilib a di mlo ungilbesul el dimlak a tal mlor ngii a ngelsengesel.” (Josua 23:14) Me nguaisei, ngsebechel el mo ulterekokl a rengud el kmo a lsekum e kede chormang er a meringel el blekeradel, e a “Dios a blak a rengul” me ngdiak lechiteterir a reblak a rengrir el mesiungel.—Monguiu er a 1 Korinth 10:13.
5. Ngmekerang e sebeched el mengelaod er a rebebil?
5 A apostol el Paulus a milsaod er a Jehovah “el Dios er a bek longelaod.” “A dongelaod” a belkul a kmo kede olengeseu er a chad el chormang me a lechub e ngngar er a klengiterreng el mo er ngii a budech me a ongelaod er a rengul. A Jehovah a ulterekokl el meruul er tia el tekoi. (Monguiu er a 2 Korinth 1:3, 4.) Ngdiak a ngii di el ngerang me a ngii di el chad el sebechel el meluk er a klisichel a Dios. Misei e ngngar er ngii aike el rokui el lousbech el mo mengelaod er tirke el betik a rengrir er ngii. Me kid el mlo “sebeched loba uaisel ongelaod” er a Dios a kuk sebeched el ngosuterir a rekldemed er a klaumerang el “ngara chelsel a ngiidil ringel.” Ngdiak a chad el sebechel el mengelaod er kid er a chelsel a chelebuled el uai a Jehovah!
Doutekangel a Uchul a Ringel
6. Mosaod a bebil el tekoi el sebechel el mo uchul a ringel.
6 Kede ousbech a ongelaod er a chelsel a betok el blekeradel er a klengar. A kot el klou el uchul a klengiterreng a mo er ngii sel lemad a betik er a rengud, el ileakl a bechil a chad me a lechub e ngngelekel. Me a chad el mlo chormii a blekeradel er a omengetukel me a klekakeakl er a delongelir a rekakerous el chad a dirrek el mo ousbech a ongelaod. A resmecher, me a remechudelang, me a remechebuul, me a mondai er a chebechiil, me aika el mekngit el blekeradel er a beluulechad er chelechang a uchul me kede kmal ousbech er a ongelaod.
7. (a) Ngera el ongelaod a dousbech er ngii a dengar er a chelsel a meringel el blekeradel? (b) Ngmekerang a Jehovah a lomekungil er a “chelam” el rengul a chad?
7 Ngar er a chelsel a taem er a ringel, e kede ousbech a ongelaod el sebechel el mengellakl a rengud me a uldesued, e melisiich a bedenged me a deleuill er kid me a Dios. El ua tiang, ka molatk er a rengud. A Tekingel a Dios a melekoi el kmo a rengud a sebechel el “chelam.” (Psalm 34:18) A Jehovah a sebechel el ngosukid er a chelsel a chouaitia el blekeradel e le “ng omekungil a chelemuul el [rengrir a rechad], e omkar a telemall er a bedengir.” (Psalm 147:3) Ngmo lmuut er a dengar er a chelsel a meringel el blekeradel, e a Dios a kmal sebechel el smisiich a rengud a lsekum e kede meluluuch el mo er ngii el oba klaumerang e oltirakl a llechul.—Monguiu er a 1 Johanes 3:19-22; 5:14, 15.
8. Ngmekerang a Jehovah a lengesukid er a ringelel a uldesued?
8 A uldesued a dirrek el ousbech a ongelaod e le kede mo chelebangel a kakerous el ongarm el sebechel el mo uchul a ringelel a uldesued. E kid a diak el sebeched el di ultuil er a klisiched e outekangel aika el omelsemai er a klaumerang er kid. Nguaisei, engdi a milluches er a psalm a milengitakl el kmo: “Sel lesal mo ouedikel a renguk, e ng kau a cholodak e rullii a renguk el mo ungil.” (Psalm 94:19) A Paulus a dirrek el milluches el kmo: “Lak el sebek a rengmiu ra ngiidi le ngerang, e di moba chomereng el saul loldars a nglunguuch ma chongit ra bek el tekoi el subedii a Dios ra ikel molengit. Ma diak le metuk ra klemedengei rar chad el budech ra Dios a mo kokar a rengmiu ma chomelebedebekiu el ngara Kristus Jesus.” (Filipi 4:6, 7) Me a donguiu e dolebedebek a Bades, e ngsebechel el ngosukid el outekangel a ringelel a uldasu.—2 Timoteus 3:15-17.
9. Ngera sebechel el ngosukid el outekangel sel bo lak lungil a uldesued?
9 A lebebil er a taem, e ngsebechel el kmal mo mechitechut a rengud el mo uchul e ngmo diak lungil a omelebedebeked. Alta e kede melatk el kmo ngdiak el sebeched el remuul aike el soal a Jehovah a doruul, me a lechub e deketmokl a ngerecheled er a ongdibel. Ngar er a chouaika el blekeradel, e a Jehovah a sebechel el mengelaod e dirrek el ngosukid. El ua tiang: A Josua er a bo longetakl er a rechad er a Israel el mo omtok aike el mesisiich el renged el meliuekl er tir, e a Moses a dilu er ngii el kmo: “Bo mesisiich e bo bekeu; ng kau ngikel mo mengetikaik er tirkal chad el mor ngii el beluu el [Jehovah] a tilbir el mor a ruchelir. A [Jehovah] a di ngii a mo choitikikau e mo obengkem. Ng diak di bo le bechikau ma lechub e le chitau, me lak bo le mechitechut a rengum ma lechub e bo medakt.” (Duteronomi 31:7, 8) Me ngoeak a ngelsuil a Jehovah, e a Josua a mlo sebechel el omekrael er a rechedal a Dios el mo soiseb er a Beluu er a Nglat e mlo kats er a rokui el cherrouir. A betok el rak er a uchei el ngar er a Bekerekard el Daob, e a Dios a dirrek el ngilsuir a Moses.—Exodus 14:13, 14, 29-31.
10. Ngera sebechel el ngosukid a lsekum a ringel er a klengar a ngar er ngii a bo el temellii er a klisichel a bedenged?
10 A ringel er a klengar a ngar er ngii a bo el temellii er a klisichel a bedenged. Nguaisei, a donga kall el ungil er a bedenged, e lungil a cheliued, e dolisiich a bedenged e dekerekikl a siungel a bedenged a rokui el di mo uchul a klungioled. Me a dolatk a telbiil el ngar er a Biblia el kirel a ngar er a medad el taem a dirrek el melisiich a bedenged. Me a lsekum e kede mo chelebangel a meringel el blekeradel, e ngungil a dolebedebek a tekoi el dilubech el mo er a Paulus me a tekoi el ledilung el kmo: “Kede mosarech ra bek el bedengel a ringel, e diak bo lturk a rengud; e mo diak dodengei el kmo kede mekera, e diak doridii chomelatk; kede modechelakl, e diak de mechoit; e obengkangk, e diak de mad.”—2 Korinth 4:8, 9.
11. Ngera sebeched el meruul a lsekum a klaumerang er kid a mo mechitechut?
11 A bebil er a ongarm a sebechel el tomellii a klaumerang er kid. Ngar er a chouaika el blekeradel, e a Jehovah a sebechel el ngosukid. A Tekingel a oterekokl a rengud el kmo: “Ng olengeseu er a rokui el ngar a chelebuul; e mengedidai er a rokui el ngariou a rengrir.” (Psalm 145:14) Me a bo dousbech a ngeso el kirel a klaumerang er kid, e ngungil a dosiik a ulekrael er a remechuodel el Kristiano. (Jakobus 5:14, 15) E a bo deblechoel el melebedebek er a omelatk er a diak a ulebengelel el klengar el ngar er a Biblia, a sebechel el smisichid el mo outekangel a ongarm er a klaumerang er kid.—Johanes 17:3.
Kerebai er Tirke el Ngilai a Ongelaod er a Dios
12. Mosaod er a blekerdelel a Jehovah er a longelaod er a Abraham.
12 A chad el mlukrael er a Dios a milluches el kmo: “Lak mobes a tekingem [e Jehovah] el mer a mesiungem, a renguk a ultuil er ngii. Tia ia chelodek er a ringelek, ele telbilem a omekngar er ngak.” (Psalm 119:49, 50) Chelechang, e kede oba cherrungel el Tekingel a Jehovah, el llechukl er ngii a betok el kerebai er tirke el ngilai a ongelaod er a Dios. El ua tiang, a Abraham a kmal mlo ouedikel a rengul er a bo lodengei el kmo a Jehovah a mo okngemedii a Sodom me a Gomora. Ngike el blak a rengul el rubak a uleker er a Dios el kmo: “Kau ke meral mo melemall er a re melemalt el di uldak er a re mekngit?” A Jehovah a milengelaod er a Abraham er a longer er ngii el kmo a lsekum e te di 50 el melemalt el chad a ngar isei, e ngdiak bo lolemall er a Sodom. Nguaisei engdi a Abraham a mle eim el taem el loker er a Jehovah el kmo: E kuk mekerang a lsekum e te di 45 el melemalt el chad a ngar isei? 40? 30? 20? 10? A bek el taem, e a Jehovah a uleba kllourreng me a blekokeuii el mesaod el mo er a Abraham el kmo ngdiak bo lolemall er a Sodom. Me alta e ngdimlak bo el teruich el melemalt el chad a mla er isei, engdi a Jehovah a ulsebelii a klengar er a Lot me a rengelekel el redil.—Genesis 18:22-32; 19:15, 16, 26.
13. Ngmilekerang a Hana e ochotii el kmo nguluumerang el ulsirs er a Jehovah?
13 A Hana, el bechil a Elkana a uluureng el mo oungalek engdi ngmle kebai el dil el mlo uchul a kngtil a rengul. Ngmiluluuch el mo er a Jehovah el kirel tia el tekoi, e a Ngarbab el Prist el Eli a dilu er ngii el kmo: “A Dios er a Israel le beskau cho mullengit er ngii.” Tia el tekoi a milengelaod er a Hana, me ng “dikea le mekngit a rengul.” (1 Samuel 1:8, 17, 18) A Hana a uluumerang el ulsirs er a Jehovah me ngulelterekokl a rokui el tekoi er Ngii. Me alta e ngdimlak lodengei a tekoi el mo duubech er a uriul, engdi ngmlo chelellakl a rengul. A Jehovah a ulenger a nglunguchel me ngmlo dioll e mechelii a ngelekel el sechal e mengeklii el Samuel.—1 Samuel 1:20.
14. Ngera uchul me a David a uluusbech a ongelaod, e mlo osiik a ongelaod er techang?
14 A King el David er a Israel er a irechar a ta er a kerebai er a chad el ngilai a ongelaod er a Dios. A Jehovah el sebechel el “omes er a rengul a chad,” a ngileltii a David el mo king er a Israel e le ngmle medengei el kmo a David a mle soal el meruul a llemalt e mle blak a rengul el kirel a mera el omengull. (1 Samuel 16:7; 2 Sam. 5:10) Me nguaisei, engdi a David a mlo er a laokreng el obengkel a Bathseba e millasem el omart er tia el tekoi er a lokodir a bechil er a Uria. Me a David er a bo lolechesuar a berredel a kngtil, e ngmilluluuch el mo er a Jehovah el kmo: “Msuld a kngtik, el klou el klechubechub er kau a uchul! Mrisu a ikel mekngit el ngar ngak, e mkikidak er a kngtik! Ak medengei a telemellek; mak di blechoel melebedebek a kngtik.” (Psalm 51:1-3) A David a kmal uluuchel er a rengul a uchul me a Jehovah a uluusubes er ngii. Engdi ngmle kirel el mo chelebangel a telemellel aike el klengit el leriruul. (2 Samuel 12:9-12) Me a klechubechub er a Jehovah a mlo uchul a ongelaod el mo er ngika el ngariou a rengul el mesiungel.
15. A Jehovah ngmilsa Jesus a ngera el ngeso er a uchei er a kodellel?
15 Sera lengar tia el chutem a Jesus, e ngmlo chelebangel a betok el meringel el blekeradel. A Dios a milechei aika el ongarm, engdi a Jesus a di millemolem el blak a rengul. Ngmle cherrungel el chad e mle mui el ultuil er a Jehovah e millisiich er a llemeltel a Dios el mengedereder. A Jesus er a bochu lolterekokl er ngii e lokodir, e ngmilluluuch el mo er a Jehovah el kmo: “Ngdi lak le uldesuek, e bai le ngar sel uldesuem.” Seikid e a anghel a mlo duum er a Jesus e mellisiich er ngii. (Lukas 22:42, 43) Me a Dios a milsa Jesus a ongelaod me a klisiich me a ngeso er sel taem el luluusbech a ngeso.
16. Ngmekerang a Jehovah a lengesukid a lsekum e kede mo chelebangel a kodall el klaumerang er kid a uchul?
16 Me a lsekum e kede mo chelebangel a kodall el klaumerang er kid el Kristiano a uchul, e a Jehovah a sebechel e dirrek el mo ngosukid el melemolem er a blakerreng er kid el mo er ngii. A omelatk el kirel a okiis er a kodall a dirrek el mengelaod er kid. Kede dirrek el kmal omes el bedul sel taem el ngike el mo kot el uriul el cherarou “el mo nguemed a kodall”! (1 Korinth 15:26) A reblak a rengrir el mesiungel a Dios el mla mad, me a rebebil, a ngar er a omeltkel a Jehovah e mo nguu a okiis. (Johanes 5:28, 29; Rellir 24:15) A klaumerang er kid el kirel a telbilel a Jehovah er a okiis a meskid a ongelaod me a ulterekokl el omelatk er a taem er a odechelakl.
17. Ngmekerang a Jehovah a longelaod er kid er sel taem el lemad a betik er a rengud?
17 Ngkmal mechelaod a rengud sel dodengei el kmo a rebetik er a rengud el mla mad, a mo mekiis er a kodall el mo kiei er a klebokel el beches el beluulechad, el mimokl er a rokui el uchul a ringel el decharm er ngii er chelechang! Ngdirrek el klou el techall a mo er a “kloul seked” er a remesiungel a Jehovah, el tir a mo suobel er a ulebengelel tia el mekngit el blekeradel er a beluulechad, e mo sebechir el ouetkeu e dirrek el olisechakl er tirke el mo mekiis er a kodall el mo kiei er tia el chutem!—Chocholt 7:9, 10.
A Dios a Di Blechoel el Mesebechakl er Kemiu
18, 19. Ngmekerang a Dios a longelaod er a remesiungel er sel taem el lemodechelakl?
18 A Moses a ulelterekokl a rengrir a rechad er a Israel el ousbech aika el mesisiich el tekoi er a chelitakl el kmo: “A Dios a di blechoel el mesebechakl er kemiu, ma diak a ulebengelel chimal a melekau er kemiu.” (Duteronomi 33:27) A profet el Samuel er a uriul a dilu er a rechad er a Israel el kmo: “Ngii di lak mobult el mo cheroid er a [Jehovah], ko bai mesiou er ngii el olab a rengmiu el rokui. . . . A Dios a mla rullii a mesisiich el telbiil, me ng diak bo le chitemiu.” (1 Samuel 12:20-22) Me a dolemolem el blak a rengud el mesiou er a Jehovah, e ngkmal diak bo lechitid. Ngmo blechoel el meskid a ngeso er sel taem el dousbech er ngii.
19 A Dios a blechoel el omesterir a rechedal a ngeso me a ongelaod el lousbech er chelecha el taem er a blsechel a ringel. Ngar er aika el mereko el dart el rak, e a rebetok el telael el kldemed er a klaumerang el meliuekl er a beluulechad, a mla modechelakl e mekelebus e le tir el mesiou er a Jehovah. A tekoi el dilubech el mo er tir er a lengar er a chelsel aika el meringel el taem a meketeklii el kmo a Jehovah a mera el mengelaod er a remesiungel. El ua tiang, a ta er a odam er kid el ngar er a beluu er a Rosia a mlekelebus el 23 el rak el klaumerang er ngii a uchul. Nguaisei, engdi ngmle sebechel el ngmai a babier el mesaod er a Biblia el millisiich e dirrek el milengelaod er ngii. Ngdilu el kmo: “Ngar er a chelsel aike el betok el rak, e ak milsuub el mo mui el ultuil er a Jehovah e ngilai a omelisiich er Ngii.”—Monguiu er a 1 Petrus 5:6, 7.
20. Ngera me ngsebeched el oumerang el kmo a Jehovah a kmal diak bo lechitid?
20 Me a ngii di el ngera el tekoi el bo dechelebangel er a ngar er medad el taem, e ngungil a domtab a ungil el tekingel a milluches er a psalm el kmo: “Ele [Jehovah] a diak lobes er a re chedal.” (Psalm 94:14) Me alta e a lebebil er a taem e kede mo ousbech a ongelaod, engdi ngdirrek el ngar er ngii a klou el techelled el mo mengelaod er a rebebil. Ngar er a ongingil el suobel, e kede mo mesuub el kmo ngmekerang e mo sebeched el mengelaod er tirke el chuarm a rengrir el ngar er a chelsel tia el mekngit el beluulechad.
Ngmekerang a Omonger?
• Ngera bebil er a tekoi el sebechel el mo uchul a ringelel a uldesued?
• Ngmekerang a Jehovah a longelaod er a remesiungel?
• Ngera sebechel el mengelaod er kid a lsekum e kede mo chemau a kodall?
[Baks/Aike el Siasing el ngar er a 26 el llel]
NGMEKERANG A DOUTEKANGEL AIKE EL TEKOI EL NGAR ER NGII A BO LERELLII ER A . . .
▪ rengud Psa. 147:3; 1 Johanes 3:19-22; 5:14, 15
▪ uldesued Psa. 94:19; Fil. 4:6, 7
▪ omelebedebeked Exo. 14:13, 14; Dut. 31:6
▪ klisichel a bedenged 2 Ko. 4:8, 9
▪ klaumerang er kid Psa. 145:14; Jak. 5:14, 15