Teruich el Ker el Kirel a Durs a Monger

1 A durs ngmle kot el klengit el lerirellii a Adam me a Eba er a chelsel a sers er a Eden?

▪ Nger: A rebetok el chad a omdasu el kmo sel blul el rodech el mla er a sers er a Eden a ulemtechei er a tekoi er a durs. Me nguaisei, engdi a Biblia a diak lolisechakl er tia el tekoi.

A uchei er a lobeob a Eba, e a Dios a milengelechel er a Adam me ngdiak longang a redechel “sel kerrekar er a mo medengei a ungil ma mekngit.” (Genesis 2:15-​18) Me tiang a belkul a kmo a Adam er sel taem a di mle ngii el tang, me tia el llach a dimlak a rolel e lolutk el kirel a durs er a chebechiil. Me a lmuut el tang, a Dios a milsang a Adam me a Eba a bleketakl el llach el mle kirir el mo ‘betok a rengelekir, ma ruldidellel a rsechir bo le kiei er ker me ker er a beluulchad.’ (Genesis 1:28) Me a omomdasu, e ngika el betik a rengul el Dios ngmellach er a rekot el obekel el mo omekeek er a beluulechad, el ngii el tekoi a meketmokl el okiu a durs er a chebechiil, e sola e mo omals er tir er a uriul el okiu a kodall e le tir el oltirakl a llechul?​—1 Johanes 4:8.

Me a lmuut el tang, a Eba a ulemuchel “el menga er ngii [el blul rodech] e sola e msa bechil me ng dirrek el milenga er ngii.”​—Genesis 3:6.

E a ulebongel er ngii, a Adam me a Eba a dimlak el mukerrekeriil er sel taem el blo loruul a tekoi er a durs e bocha loungalek. (Genesis 4:1, 2) Me ngbleketakl el kmo, sel rodech el lulenga er ngii a Adam me a Eba a dimlak lomtechei er a omerellir el meruul a tekoi er a durs, e ngbai mera el rodech, el ngii a redechel a kerrekar.

2 A Biblia ngmerrob er a durs er a chebechiil?

▪ Nger: A kot el babier er a Biblia a ouchais el kmo a Dios a ngike el ulemeob er a rechad el “sechal ma redil.” A Dios a “kmal mlo ungil a rengul” er a blebelel. (Genesis 1:27, 31) E a uriul, e a Dios a ulemekrael er a chad el milluches er a Biblia el mo meluches a llechul el mo er a rebechiil el sechal el kmo: “Mosiik er a deuil a rengum el obengkel a ekebil el blo bechil. . . . A klungiolel bo lerellau el mo ungil a rengum.” (Osisechakl 5:18, 19) Me aika el tekoi, ngmelekoi el kmo a Biblia a mengelechel er a rechad me ngdiak loruul a durs er a chebechiil?

Ngklemerang el kmo, a Dios er sera lebeob a klekedellel a bedenged el kirel a durs er a chebechiil, e ngriruul me bo el sebechir a rebechiil el chad el kaiuecholt a bltkil a rengrir me a deuil a rengrir el terung, e dirrek el mo uchul e ngsebechir el oungalek. Me tia el deleuill er tir a sebechel el kutmokl aike el lousbech er a bedengir me a uldesuir, e le tir el ngar er ngii a mekeald el bltikerreng me a ungil el deleuill er tir.

3 A Biblia ngkongei er a sechal me a redil el dmak el kiei a lsekum te diak el bechiil?

▪ Nger: A Biblia a kmal bleketakl el melekoi el kmo “a Dios a mo oukerrekeriil rar ngara deleboes.” (Hebru 13:4) A tekoi er a Grik el kirel a deleboes el por·neiʹa, a melekoi el kirel a usbechel a klekedellel a bedenged el ngar er a mekngit el rolel er a delongelir a reteru el chad el tir a diak el bechiil.a Me a leuaisei, e ngkmal mekngit er a osengel a Dios a lsekum a reteru el chad a dmak el kiei e diak el bechiil, el mo lmuut me a lsekum te melatk el mo bechiil er a uriul.

A Dios a dirk mengelechel er a rechad el mo bechiil er a uchei er a bo loruul a tekoi er a durs, el mo lmuut me a lsekum e ngkmal mesisiich a bltikerreng er a delongelir. Ngii el Dios a ulemeob er kid e milskid a techelled el mo oubltikerreng. Sel kot el ngarbab el blekerdelel a Dios a bltikerreng. Me a leuaisei, e ngngar er ngii a ungil el uchul me mengelechel er kid el kmo a tekoi er a durs a di kirel a deurreng er a rebechiil el chad, e tiang a bo losaod er ngii a ongingil el suobel.

4 Ngdi ungil a lebetok a bechil a chad?

▪ Nger: Ngmla er ngii a taem el Dios a milecherei a sechal me ngmle sebechel el betok a bechil. (Genesis 4:19; 16:1-4; 29:18–​30:24) Engdi ngdimlak el moktek er a Dios er a kot el uchul el kongei er a sechal el mo becherir a rebetok el redil. Ngmilsang a Adam a di ta el bechil.

A Jehovah a milsang a ngerechelel a Jesus el mle kirel el lmuut el smisichii sel dimla llechul el kmo ngkirel el di tang a bechil a chad. (Johanes 8:28) Me sera loker er ngii el kirel a chebechiil, e a Jesus a dilu el kmo: “Ngikel ulemeob a rirelleterir ar chad ra kot luchul el sechal ma redil, e sola e dula el kmo, ‘Mitiai a uchul ma chad a mecherei a demal ma delal e mo obengkel a bechil, me tir el terung a mo tal chelechad.’ ”​—Matteus 19:4, 5.

A ta er a redisaiplo er a Jesus a lulemekrael er ngii a Dios er a uriul el mo meluches el kmo: “Ar sechal bo le chur rar becherir, mar dil me bo le chur rar becherir.” (1 Korinth 7:2) A Biblia a dirrek el melekoi el kmo a ngii di el sechal el ngar er ngii a ileakl el ngerechelel er a chelsel a ongdibel er a Rekristiano a kirel el “bechil a di tal redil.”​—1 Timoteus 3:2, 12.

5 Ngdi ungil a lsekum a rebechiil el chad a ousbech aike el kar el rulleterir me ngdiak bo loungalek?

▪ Nger: A Jesus a dimlak longelechel er a rulebengkel el mo oungalek. Me tirke el disaiplo er ngii me ngdimlak lolisiich er tia el tekoi. Ngdirrek el diak a tekoi el debetik er a chelsel a Biblia el lomtok a usbechel a kar el merrob a cheroll.

A rebechiil el chad a ngar er ngii a ilmeklir el melilt el mo oungalek me a lechub e ngdiak. Te dirrek el sebechir el di tir el melilt el kmo ngsorir el oungalek er a retela el ngalek, e oingerang e ngsebechir el mo oungalek. Me a lsekum a chad me a bechil a melilt el mo ousbech a kar el merrob er a redil me lak bo el dioll, e tiang a kmal di mo ultuil er a omelilt er tir.b Me ngdiak a chad el kirel el oukerrekeriil er tir.​—Rom 14:4, 10-​13.

6 Ngmekngit a omelecheb er a rengalek?

▪ Nger: A klengar a kmal mekreos er a osengel a Dios, e ngii a dirrek el omes er a dirk rasech el ngalek el ngar er a diil el ua bla bo el chad. (Psalm 139:16) A Dios a millekoi el kmo a chad a mo mukerrekeriil a lsekum e ngtomellii a dirkak el mechell el ngalek. Me ngngar er a osengel, e a chad el melecheb er a dirkak lemechell el ngalek a mla mekodir ngii el ngalek.​—Exodus 20:13; 21:22, 23.

E kuk mekerang a lsekum ngmo duubech a tekoi el kirel a cheroll el mo uchul a omelilt el kirel a osebelel a chedil me a lechub e ngosebelel a ngalek? A lsekum e ngmo uaisei, e ngdi mo ultuil er a rubekel el kmo ngtechang a lolilt el lolsobel er a klengar er ngii.c

7 A Biblia ngkongei er a dertel a chebechiil?

▪ Nger: A Biblia a diak lolekebai er a dertel a chebechiil. Engdi a Jesus a dillii a di chimo el tekoi el sebechel el mo uchul e a chad a dortii a chebechiielel er a ledu el kmo: “Ngikel mengoit ra bechil el diak el laokerreng [meruul a durs el lobengkel a diak el bechil] a uchul, e mo bechil a ngodech el redil, a mocha ra laokerreng.”​—Matteus 19:9.

A Dios a kmal ouketui a dertel a chebechiil el mo er ngii el oeak a blulak me a cheleblad el omeruul. Ngii a ulterekokl el mo oukerrekeriil er tirke el mengoit er a rebecherir, el ileakl tirke el mengoit er a rebecherir e mo obengkel a kuk ta er a chad.​—Malakai 2:13-​16; Markus 10:9.

8 A Dios ngkongei er a mengolchotaor?

▪ Nger: A Biblia a bleketakl el ouketui er a deleboes el omeruul, el ngii a uldimukl er a mengolchotaor. (Rom 1:26, 27; Galatia 5:19-​21) Me alta e a Biblia a meketeklii a uldesuel a Dios el ouketui er tia el omeruul, engdi kede dirrek el medengei el kmo “a klungel a bltkil a rengul a Dios era belulechad a uchul me ngmilsa dital Ngelekel, me tirikel rokui loumera er ngii a diak bo lrriid, e bai mo oba diak a ullebengelel klengar.”​—Johanes 3:16.

Me alta e a remera el Kristiano a diak el kengei er tia el blekeradel, engdi te olecholt a ungil el omeruul el mo er a rokui el chad. (Matteus 7:12) A Dios a mengelechel er kid el rokui el mo ‘mengull ra rokuil chad.’ Sei a uchul, me a mera el Kristiano a diak louketui er a chad el mengolchotaor.​—1 Petrus 2:17.

9 Ngmekngit a omeruul el phone sex, “sexting,” me a lechub a cybersex?

▪ Nger: A phone sex a belkul a kmo kede melekoi e orrenges a diak el ungil el tekoi er a durs el ousbech a dengua. A tekoi el “sexting” a melekoi el kirel a omeruul el ousbech a cell phone el oldurokl a mekikiongel el siasing me a lechub e ngcheldecheduch el mo er a rebebil. E a tekoi el cybersex a loruul er ngii el oeak sel lousbech er a internet el melekoi a tekoi er a durs.

A Biblia a diak el bleketakl el mesaod el kirel aika el beches el omeruul er chelecha el taem. Engdi ngmelekoi el kmo: “Ngkiriu el diak le borngii ra ngeriu ra delongeliu a tekoi ra deleboes, ma bek el mengelengalek ma ngibes, e bai mo redemelir ar mechedaol. E mongeroid a kikiongel tekoi, ma delebeseaol cheldecheduch, ma beluachel, el diak lungil tekoi.” (Efesus 5:3, 4) Me a chouaika el tekoi el phone sex, “sexting,” me a cybersex a melisiich er a rechad el mo olab a cheleuid el uldasu el kirel a tekoi er a durs, e dirrek el melisiich er tir el mo osiik a deurreng er a tekoi er a durs er a ikrel a chebechiil. Me ngbai diak lolisiich er a rechad el mo meduch el kilmekl a rengrir, e ngbai lmuut el melisiich a ngelbesel a rengrir me ngmenga el meleketek el kirel a deleboes el omeruul.

10 Ngerang a osengel a Biblia el kirel a omengelooch?

▪ Nger: A Biblia a diak el bleketakl el mesaod er a omengelooch el ngii a omeruul el chad a di ngii el merutech a klekedellel a bedengel el omekeroul er a ngelbesel a rengul er a deleboes, e di ngii el oltiid er ngii. Me nguaisei, engdi a Tekingel a Dios a mengelechel er a Rekristiano el kmo: “Misei e mokoad a ikel ngara chelsiu el tekoi ra belulechad: el deleboes, ma ngellengalek, ma ngibes ra [diak el kirel el meketmokl el rolel a] deleboes.”​—Kolose 3:5.

A omengelooch a sebechel el mekurulii a diak el melemalt el osengel a chad el kirel a tekoi er a durs, e rullii el di mo melatk a ngelbesel a rengul. A Biblia a oterekeklii el kmo a Dios a sebechel el mesterir a rechad “sel diak le metuk el klisiich” a lsekum te mera el melasem el mo mengikiid er tir er tia el mekngit el omeruul.​—2 Korinth 4:7; Filipi 4:13.

[Aike el Footnote]