Moldars a Tenget el Ngar er a Rengum el Rokir el Mo er a Jehovah

“Ma ikel ngiidi le ngerang el moruul, . . . e moruul el ngara reng el ua cho moruul el kirel a [Jehovah].”​—KOLOSE 3:23.

NGSEBECHEM EL ONGER:

Ngmekera e sebeched el mengebkall er a Jehovah el oeak a tekoi el doruul er a bek el sils?

Ngera el tenget a doruul el ngar er a omengull er kid el mo er a Dios?

Ngmekerang a doldars aike el ngar er ngii er kid el mo er a Jehovah?

1-3. (a) Sel kodellel a Jesus el ngar er a teluo el kerrekar ngbelkul a kmo a Jehovah ngdikea longerechir er kid a ngii di el tenget? Mosaod. (b) Ngera el ker a duubech el kirel a tenget er chelechang?

NGAR er a kot el dart el rak, e a Jehovah a mileketeklii el mo er a rechedal el kmo a olubet el tengetengel a Jesus a uchul, me ngdikea loltirakl er a Llach er a Moses. (Kolose 2:13, 14) A Jehovah a dikea longerechir er a rechad el mo melenget a charm me a kuk bebil er a tenget el lullenget a Rechijudea el betok el dart el rak. A Llach a mla otutii sel moktek er ngii el mle “tebecheled el mo lmuut er sera le merma Kristus.”​—Galatia 3:24.

² Tiang a diak el belkul a kmo a Rekristiano a diak loldars a tenget er chelecha el taem. A apostol el Petrus a millekoi el kmo ngkirir el oldars “a tenget . . . el odeuir a rengul a Dios loeak a Jesus Kristus.” (1 Petrus 2:5) Me a apostol el Paulus a dirrek el mileketeklii el kmo a klengar er a Kristiano el rokir a di ua “tenget” el mlodars el mo er a Dios.​—Rom 12:1.

³ Misei e a Kristiano a oldars a tenget el mo er a Jehovah sel lolenget a tenget el mo er ngii me a lechub e ngmo imikr a bebil er a tekoi me bo el ungil el mesiou er ngii. Me ngoeak a klemedengei er kid el kirel a tenget el luleldars a Rechisrael, e kede mekerang e mo medengei el kmo a tengetenged er chelechang a lekengei er ngii a Jehovah?

NGAR ER A KLENGAR ER A BEK EL SILS

4. Ngera kired el melatk er ngii el kirel a klengar er kid er a bek el sils?

⁴ Nglocha mo meringel er kid el melatk aike el doruul er a bek el sils el ua letenget el doldars el mo er a Jehovah. A ureor er a blai me a skuul me a omengereker me a ocheral a klalo me a lmuut el bebil a sebeched el omes el ua lak a ngera el lerellii er a deleuill er kid me a Dios. Engdi a lsekum ke mla tibir a klengar er kau el mo er a Jehovah me a lechub e ke melatk el mo meruul el uaisei, e ngklou a ultutelel el molatk el kmo aike el tekoi el moruul er a bek el sils a ngar er ngii a lerellii er a deleuill er kau me a Dios. Kid a Kristiano el 24 el sikang er a bek el sils. Me a omellach er a Bades a kired el oltaut er a bek el telengtengil a klengar er kid. Sei a uchul me a Paulus a milengelechel er kid el kmo: “Ma ikel ngiidi le ngerang el moruul, lak le ua cho moruul el kirel a chad, e moruul el ngara reng el ua cho moruul el kirel a [Jehovah.]”​—Monguiu er a Kolose 3:18-​24.

5, 6. Ngera el tekoi a ngar er ngii a lerellii er a omerelled me a rolel a doubail er a bek el sils?

⁵ Aike el loruul a Rekristiano er a bek el sils a diak el telengtengil a chedaol el omesiou er tir. Engdi sel tekingel a Paulus el mengelechel er kid el oureor el ‘ngar er a rengud el mo er a Jehovah’ a rullid el mo omdasu el kirel a klengar er kid el rokir. Ngmekerang a doltaut er tia el tekoi el kired? A omerelled me a rolel a doubail ngungil er a bek el taem? Me a lechub a doruul a tekoi er a bek el sils, ngsebeched el kora mo merur el olecholt el kmo kede Sioning er a Jehovah, e le a blekerdeled me a lechub e ngteletelel a biled a uchul a rrenged? Ngkmal diak el soad a ledubech choua tia el tekoi! A rechedal a Jehovah a diak el sorir el meruul a ngii di el ngerang el mo uchul a otuub el mo er a ngklel a Dios.​—Isaia 43:10; 2 Korinth 6:3, 4, 9.

⁶ Ka me bo domes el kmo ngmekerang a urunguled el oureor el ‘ngar er a rengud el mo er a Jehovah’ a ngar er ngii a lerellii er a kakerous el blekeradel er a klengar er kid. E sel doruul el uaisei, e ngkired el melatk el kmo a rokui el tenget el luleldars a Rechisrael el mo er a Jehovah a mle kirel el ike el kot el ungil er tir.​—Exodus 23:19.

NGERANG MO RULLII ER A KLENGAR ER KAU

7. Ngera belkul a telbilel a rengul a Kristiano?

⁷ Sera omtibir a rengum el mo mesiou er a Jehovah, e tiang a kmal mle ungil el omelilt. Ke tilbir el mo ousbech er a klengar er kau el rokir el mo mesiou er ngii. Tia belkul a kmo ke nguu a Jehovah el mo kot er a chelsel a ngii di el blekeradel er a klengar. (Monguiu er a Hebru 10:7.) Ke ulterekokl el mla mesa el kmo sel mosiik er a soal a Jehovah er a tekoi el bo moruul e melasem el mo oltirakl er ngii, e ngmo ungilbesul a klengar er kau. (Isaia 48:17, 18) A rechedal a Dios a chedaol e dmeu a rengrir e le te olecholt a blekerdelel Ngike el olisechakl er tir.​—Levitikus 11:44; 1 Timoteus 1:11.

8. Ngera me ngklou a ultutelel a bo dodengei el kmo a tenget el luleldars a Rechisrael a mle chedaol er a osengel a Jehovah?

⁸ A tenget el luleldars a Rechisrael el mo er a Jehovah a mle chedaol er a osengel. (Levitikus 6:25; 7:1) A tekoi er a Hebru el mloiuid el “cheledaol” a mesaod er a tekoi el mleakl me a lechub e ngtekoi el di kirel a Dios. A lsekum e ngsoad a Jehovah a bo lekengei er a tengetenged, e ngii el tenget a kirel el ileakl el diak el chelsechusem er a tekoi er tia el beluulechad. Ngdiak el sebechel el betik a rengud er a ngii di el tekoi el louketui er ngii a Jehovah. (Monguiu er a 1 Johanes 2:15-​17.) Me tia belkul a kmo ngkired el mengeroid er kid er a ngii di el chad me a ngii di lengerang el rullid el mo diak deklikiid er a osengel a Dios. (Isaia 2:4; Chocholt 18:4) Ngdirrek el belkul a kmo ngdiak debechei a medad me lolemolem el omes a mekikiongel tekoi el ua siasing er a remeau me a lechub e debechei a uldesued me lolemolem el omdasu chouaika el mekngit el tekoi.​—Kolose 3:5, 6.

9. Ngera me a omerellel a Kristiano el mo er a rebebil a klou a ultutelel?

⁹ A Paulus a milengelechel er a rekldemel er a klaumerang el kmo: “E lako mobes chomeruul lungil ma blekerurau, e a Dios a dmeu a rengul er chouaisel tenget.” (Hebru 13:16) Me a lungil a blekerdeled me a doruul a ungil el mo er a rebebil a lomes a Jehovah el di ua letengetenged el mo er ngii. A olechotel a bltikerreng a olengchelir a remera el Kristiano.​—Johanes 13:34, 35; Kolose 1:10.

TENGET EL KIREL OMENGULL

10, 11. Ngua ngera osengel a Jehovah el kirel a omesiunged el Kristiano me a omengull er kid el mo er ngii? E tia ngerang rullii el kired?

¹⁰ A ta er a rolel e kid el Kristiano a meruul a ungil el mo er a rebebil a oeak a ‘dolecholt er sel doumera er ngii el tekoi.’ Kau ke ousbech a bek el techall el olecholt er a klaumerang er kau? A Paulus a millekoi el kirel tia el tekoi el kmo ng “tenget er chodanges, el rodech ra ngor lolecholt ra ngklel [a Dios.]” (Hebru 10:23; 13:15; Hosea 14:2) Ngungil a dolatk er a ildisel a taem el dousbech el omerk er a klumech me a rolel a dongedecheduch. A betok el suobel el ngar er a Miting el kirel a Berkel a Klumech a ngosukid el mo meruul er tiang. Engdi sel doldingel a obliil me a domerk er a klumech er a ngii di el taem, e tiang a ureor “el tenget er chodanges,” el telengtengil a omengull er kid, e ngii el tenget a kirel el sel kot el ungil el tenget el sebeched el odersii el mo er a Dios. Me nguaisei el kakerous a blekerdelel a klengar er a rechad, engdi a ildisel a taem el dousbech el ouchais er a ungil el chais a olecholt er a omereng el saul er kid el kirel a omesiunged el mo er a Dios.

¹¹ A Rekristiano a blechoel el ousbech a temir el mengull er a Dios el di tir el tang me sel lebo er a miting er a ongdibel. A Jehovah a soal a doruul el uaisei. Alta e ngdikea doltirakl er a Ulengull el Sils me a lechub e debo er a Jerusalem el kirel a chedaol el sils, engdi ngsebeched el ngmai a klubeled er aika el llach. Me ngbek el sils el betok a tekoi el doruul, engdi a Dios a soal a dousbech a bebil er a temed el mesuub er a Biblia, e meluluuch e mo er a bek el miting. Me a bdelul a ongalek el Kristiano a kirel el mengetmokl a suobel el kirel a omengull er tir el ongalek. (1 Thesalonika 5:17; Hebru 10:24, 25) Me ngungil a di lekid el oker el kmo: ‘Ngsebechek el rullii a omengull er ngak el mo er a Dios el lmuut el mo ungil?’

12. (a) Ngsebeched el omekesiu a ochod el mlodars er a omengull er a irechar el mo er a ngerang er chelechang? (b) E tia ngerang rullii er a tekoi el doluluuch el kirel?

¹² A King el David a milengitakl el mo er a Jehovah el kmo: “A nglunguchek bo le ua ochod er medam.” (Psalm 141:2) Ka molatk er a ildisel a taem el mousbech el meluluuch me aike el tekoi el moluluuch el kirel. A babier er a Chocholt a omekesiu a “nglunguchir ar mechedaol” el mo er a ochod el meketeklii el kmo a nglunguuch el lekengei er ngii a Jehovah a di ua ochod er a osengel. (Chocholt 5:8) A Israel er a irechar a mle kerekikl el meruul a ochod el mlodars er a olengetongel er a Jehovah el oltirakl aike el ledilung. A Jehovah a kilengei er tia el ochod a lsekum ngmlodars el ngar sel rolel el lekiltmeklii. (Exodus 30:34-​37; Levitikus 10:1, 2) Me a lsekum kede meluluuch el uaisei, e ngulterekokl a rengud el kmo a Jehovah a mo kongei a nglunguched.

A OMEROUS ME A OMELAI

13, 14. (a) Ngera ngmirruul a Epafroditus me a Rekristiano er a Filipi el kirel a Paulus, e ngera mle uldesuel ngika el apostol el kirel? (b) Ngmekerang e sebeched el oltirakl er a kerebai er a Epafroditus me a Rekristiano er a Filipi?

¹³ Sel dolenget a mekesai me a lechub e ngbetok el udoud el mo olengeseu er a ureor el meliuekl er a beluulechad, e ngsebeched el omes er ngii el ua tenget. (Markus 12:41-​44) Ngar er a kot el dart el rak e a Rekristiano er a Filipi a ulderchii a Epafroditus el mo er a Rom el mo olengeseu er a Paulus. Ngika el oderuchel a ullab a udoud el sengk el mla er a ongdibel er a Filipi. E tiang a dimlak el ketengir el lolecholt a blekerurau el omeruul el mo er a Paulus. Ngmle sorir el ngosuir a Paulus me bo el sebechel el kilungii a temel el lousbech er a omesiungel me ngdiak el sebek a rengul el kirel a udoud. Ngmle ua ngera osengel a Paulus el kirel tia el sengk? Ngmilsaod er ngii el kmo: “Ungil bau, el le nga Dios el tenget el odeuir a rengul.” (Monguiu er a Filipi 4:15-​19.) A Paulus a kmal uleba omereng el saul el kirel tia el blekururau el omerellir a Rekristiano er a Filipi, me a Jehovah a dirrek el mlo ungil a rengul.

¹⁴ Me nguaisei er chelechang, a Jehovah a kmal dmeu a rengul er a tengetenged el kirel a ureor el meliuekl er a beluulechad. Me ngdirrek el tibir el kmo, a lsekum kede nguu a Renged el mo kot er a klengar er kid, e ngmo meskid aike el dousbech me ngmelemolem el mesisiich a klaumerang er kid e dirrek el meskid aike el dousbech er a bek el sils.​—Matteus 6:33; Lukas 6:38.

MOCHOTII A OMERENG EL SAUL

15. Ngera bebil er a tekoi el lurruul a Jehovah el kau a oba omereng el saul el kirel?

¹⁵ Ngkmal klou el taem a dousbech el mo omasech a betok el uchul e kede oba omereng el saul el mo er a Jehovah. Tia ngdiak el mera el tekoi el kmo, ngkired el mereng a sulel er a bek el sils el kirel a sengk er a klengar? Ngmeskid a rokui el dousbech er a bek el sils el ua keled me a biled me a blid me a dirrek el eolt el dousbech el outeliil. Me a klaumerang er kid el mengai a uchetemel er a melemalt el klemedengei a meskid a ungil el omelatk. Ngkmal kired el mengull er a Jehovah e oldars a tenget er a odanges el mo er ngii, e le ngii a di ta el Dios, e riruul a kmal betok el tekoi el kired.​—Monguiu er a Chocholt 4:11.

16. Ngmekerang a dolecholt a omereng el saul el kirel a olubet el tengetengel a Kristus?

¹⁶ Kede mla suubii er sel mlo merek el suobel el kmo a ta el kmal mekreos el sengk er a Jehovah el mo er a klechad a olubet el tengetengel a Kristus. Tiang a klou el olechotel a bltkil a rengul a Dios el kired. (1 Johanes 4:10) Ngerang kirel el rullii el kired? A Paulus a dilu el kmo: “Ngmisisiich el mengedereder er kemam a bltikerreng ra Kristus, ma ki ulterekokl medengei el kmo, a bla le mad a tal chad el kirir a rokuil chad, . . . me ngii el mlad el kirir a rokuil chad a kirel me tirikel ngar a dikea le ngar el di kirir, e te bai ngar el kirel ngikel mlad e mokiis el kirir.” (2 Korinth 5:14, 15) A Paulus a mileketeklii el kmo a lsekum kede oba omereng el saul el kirel a klou el blekokeuii er a Dios el kired, e kede mo ousbech er a klengar er kid el mo mengebkall er Ngii me a Ngelekel. A bltkil a rengud me a omereng el saul er kid el mo er a Dios me a Kristus a mocholt el oeak a blekongesenges er kid me a dirrek el urunguled el soad el omerk er a klumech e meruul er a redisaiplo.​—1 Timoteus 2:3, 4; 1 Johanes 5:3.

17, 18. Ngoeak a ngera el rolel e a rebebil a milenglou er a tengetengir er a odanges el mo er a Jehovah? Mochotii a ta er a kerebai.

¹⁷ A omomdasu, e ngsebechel el lmuut el mo ungil a tengetengem er a odanges el mo er a Dios? Uriul er a lolebedebek er aike el ungil tekoi el bla leruul a Jehovah el kirir, e a rebetok a mla kutmokl a temir me bo el sebechir el menglou er a omesiungir el kirel a berkel a klumech er a Renged me a kuk bebil el rolel a omesiou. A rebebil a mlo sebechir el mo auxiliary pioneer el tang me a lechub e ngbetok el buil er a bek el rak, e a rekuk bebil a mlo sebechir el mo teloi er a mui el taem el omesiou. Ngdirrek el mlo er ngii a rullengeseu el meleketek a blai el lousbech el kirel a ureor er a Renged. Aika el rolel a omesiou a kot el ungil el rolel a dolecholt a omereng el saul er kid. A lsekum a moktek er a chad a melemalt, el soal el olecholt a omereng el saul, e aika el kakerous el rolel a chedaol el omesiou a bo lekengei er ngii a Dios.

¹⁸ A rebetok el Kristiano a kmal mlo sorir el olecholt a omereng el saul el mo er a Jehovah. A Morena a ta er tirka el chad. Ngmlukeroul el Katolik, e mla er ngii a betok el keril el kirel a Dios me a mera el belkul a klengar. Me ngulsiik a nger er a Ikelesia er ngii me aike el klechelid er a Asia. Engdi sera bo losuub a Biblia el obengterir a Resioning er a Jehovah e ngmiltik a bleketakl el nger er a keril. A Morena a mlo soal el mereng a sulel a Jehovah el kirel a tekoi el lesiluub er a Biblia e le ngmlo uchul a mera el deurreng er a klengar er ngii. Me ngmlo soal el ochotii a omereng el saul el oeak a lousbech a rokui el klisichel el mesiou er ngii. Ngdi mle mereched el mo auxiliary pioneer er a uriul er a lemetecholb e dirrek el kiltmokl a temel me bo el sebechel el mesiou el mui el taem. E tiang a dilubech er a 30 el rak er a mla me mong, e a Morena a dirk mesiou el mui el taem el me lmuut er chelechang.

19. Ngmekera e sebechem el kilungii a tengetengem el mo er a Jehovah?

¹⁹ Me nguaisei el ngar er ngii a reblak a rengrir el mesiungel a Jehovah el blekerdelel a klengar er tir a uchul, e ngdiak el sebechir el mesiou el mui el taem. Me a lsekum ngbetok ma lechub e ngkesai a tekoi el sebeched el meruul er a omesiunged el mo er a Dios, e kid el rokui a kmal sebeched el oldars a tenget el bo lekengei er ngii a Jehovah. Ngar er a klengar er a bek el sils, e ngkired el mo kerekikl el oltirakl a melemalt el omellach er a Biblia, e le kede medengei el kmo kede omtechei er a Jehovah er a bek el taem. Me kede otuil a mui el klaumerang er kid er a otutel a moktek er a Dios. Ngar er a ungil el omerelled, e kede olengeseu el omerk er a ungil el chais. Me ngngar er a rengud el rokir, e me dolecholt a omereng el saul el mo er a Jehovah el kirel a tekoi el bla leruul el kired, el oeak a dolemolem el oldars a tenget el mo er a Ngii.

[Blurb el ngar er a 27 el llel]

A ungilreng er a Jehovah ngrullau el mo soam el kilungii a tengetengem er a odanges?

[Siasing el ngar er a 25 el llel]

Ke ousbech a bek el techall el ousioning?