Mosuub Er A Tekingel A Dios

Ngera Uchul me a Dios a Ngar er Ngii a Cheldebechelel?

Tia el suobel a mesaod a ker el locha mla ta el moker e dirrek el ocholt a nger er ngii er a chelsel a Biblia. A Resioning er a Jehovah a kmal dmeu a rengrir el mo mesaod aika el nger el obengkem.

1. Ngera uchul me a Dios a kiltmeklii a Israel el mo cheldebechellel?

A Dios a uleldak er a ruldidellel a rsechel a Abraham el mo ta el renged e milsterir a llach. Ngmilengeklii tia el renged el mo Israel e milsa ngerechelel el mo omekerreu er a mera el omengull me a Tekingel, el Chedaol el Bades. (Psalm 147:19, 20) Me tiang a mlo uchul a klungiolir a rechad er a bek el renged.​—Monguiu er a Genesis 22:18.

A Dios a millilt er a rechad er a Israel el mo sioning er ngii. A lsekum e te ullengesenges, e te mo ngmai a klungiolir er a llechul a Dios. (Duteronomi 4:6) Me ngoeak a omesubed er a reksi er a rechad er a Israel, e ngsebeched el mo medengei a lmuut el betok el kirel a mera el Dios.​—Monguiu er a Isaia 43:10, 12.

2. Ngera uchul me a remera el Kristiano a mla mechudel el mo cheldebechel?

Cherengel a taem, e a rechad er a Israel a urridii a kengei er a Dios, me a Jehovah a ngiluu a ongdibel er a Rekristiano el mtechir tia el cheldebechel. (Matteus 21:43; 23:37, 38) A uchei e a rechad er a Israel a mle sioning er a Dios. E chelechang e a remera el Kristiano a mesiou el sioning er a Jehovah.​—Monguiu er a Rellir 15:14, 17.

A Jesus a ullisechakl er a rulebengkel el mo dmak el oureor el ousioning el kirel a Jehovah e meruul a redisaiplo er a bek el renged. (Matteus 10:7, 11; 24:14; 28:19, 20) Tia el ureor a mocha er a ulebengelel. Chelecha el taem, e a Jehovah a mla chudelterir a rebetok el miliol el chad er a bek el renged el mo er a mera el omengull. (Chocholt 7:9, 10) A remera el Kristiano a dirrek el dmak el oureor me bo el sebechir el kasisiich e kaingeseu er a delongelir. Meliuekl er a beluulechad el rokir e te oldeu a rengrir er a osisiu el prokuram el kirel a osisechakl er a Biblia el ngar er aike el miting er tir.​—Monguiu er a Hebru 10:24, 25.

3. Ngmilekerang e omuchel a cheldebechel er a Resioning er a Jehovah er chelecha el taem?

A cheldebechellir a Resioning er a Jehovah er chelecha el taem a ulemuchel er a rak er a 1870. A kekerei el cheldellir a remesuub er a Biblia a mlo sebechir el metik a bebil el ririid el mera el osisechakl er a Biblia. Te mle medengei el kmo a Jesus a kiltmeklii a ongdibel er a Rekristiano el mo omerk er a klumech. Me te ulemuchel er a ureor er a berkel a klumech er a Renged er a beluulechad el rokir. Sera 1931 e te ngiluu a ngakl el Resioning er a Jehovah.​—Monguiu er a Rellir 1:8; 2:1, 4; 5:42.

4. Ngua ngerang a oketmeklir a Resioning er a Jehovah er chelecha el taem?

Sera kot el dart el rak, e aike el ongdibel er a Rekristiano el ngar er a betok el beluu a ngilai a klungiolir er a cheldellir a ruungerachel el tir a ulemes er a Jesus el Bdelul a ongdibel. (Rellir 16:4, 5) Me nguaisei, chelecha el sils e a Resioning er a Jehovah a omes er a Jesus el Merredelir. (Matteus 23:9, 10) Te dirrek el ngmai a klungiolir er a ulekrael er a Cheldellir a Ruungerachel el mechuodel el oltobed a omelisiich me a ulekrael el ngar er a Biblia el mo er a kuk betok er a 100,000 el ongdibel. Ngar er a derta el ongdibel, e a rengar er ngii a duch er tir el sechal a mo mesiou el mechuodel. E tirka el chad a omekerreu er a delebechel er a Dios el oba bltikerreng.​—Monguiu er a 1 Petrus 5:2, 3.

A Resioning er a Jehovah a kltmokl el mo omerk er a ungil el chais e mo meruul er a redisaiplo. Te oleiuid e oltobed e merous a babier el kirel a omesubel a Biblia el ngar er a kuk betok er a 500 el omelekoi. Te dirrek el uai a rechapostol el merael el oldingel a bek el obliil. (Rellir 20:20) Te mesuub a Biblia el obengterir a rederta el chad el mera el betik a rengrir er a klemerang. A rechedal a Jehovah a kmal sorir el odeuir a rengul a Dios e olengeseu er a rebebil a uchul me te cheldebechel er a redmeu a rengrir el chad.​—Monguiu er a Psalm 33:12; Rellir 20:35.

A lsoam a lmuut el omesodel e momes er a 19 el bliongel er tia el babier, Ngerang Mera el Lolisechakl a Biblia?, el mirruul er a Resioning er a Jehovah.