Mosiou er a Jehovah el Dios er a Ilmokl

“Tial tekoi el kmo, ngbetik a rengud ra Dios, a melekoi ra bo dolab a llechul. E ngiil llechul a diak le meringel.”​—1 JOHANES 5:3.

NGSEBECHEM EL ONGER?

A Satan ngsoal obo momdasu a ngerang el kirel a llechul a Dios?

Ngera uchul me ngkired el kerekikl sel dolilt er a resechelid?

Ngera ngosukid el melemolem el blak a rengud el mo er a Jehovah el Dios er a ilmokl?

1. Ngua ngerang a osengel a Jehovah el kirel a ilmokl? E ngera el ilmokl a lebilsang a Adam me a Eva?

NGDI ta el Jehovah a Dios el cherrungel el mimokl. Engdi ngblechoel el ousbech er a ilmeklel el okiu a melemalt el rolel, e dirrek el diak longedereder a rokui el tekoi el loruul a remesiungel. Ngbai mesterir a ilmokl el sebechir el di tir el melilt er a rolel a loltaut aike el melemalt el urungulir. A Dios a milsang a Adam me a Eva a di ta el llechul el kmo ngdimlak el kirir el menga redechel “sel kerrekar er a mo medengei a ungil ma mekngit.” (Genesis 2:17) Me ngmla er ngii a techellir el meruul a soal a Dios, e dirrek el mle mimokl el melilt a tekoi el loruul!

2. Ngera uchul me a Adam me a Eva a mlo sibil a klengit?

² Ngera uchul me a Dios a milsang a Adam me a Eva a klou el ilmokl? E le ngmilsterir a ukltkir e milebeterir el di uai ngii. Me nguluumerang el kmo ngsebechir el oltirakl a llechul, e le ngbetik a rengrir er ngii el Omebelir. (Genesis 1:27; Rom 2:15) Engdi ngklengiterreng e le Adam me a Eva a dimlak loba omereng el saul el bedul a Dios el ngike el milsterir a ilmokl. Te bai ngileltii el mo orrenges er a Satan el di mo tir el melilt a ungil me a mekngit. Engdi tiang a dimlak lerelleterir el mera el mo mimokl, e ngbai mlo uchul a klengit me a kodall el mo er tir me a ruldidellel a rsechir.​—Rom 5:12.

3, 4. A Satan ngsoal a bo domdasu a ngerang el kirel a llechul a Dios?

³ A lsekum a Satan a mle sebechel el mengesuseu er a reteru el mecherrungel el chad me a rebetok el anghel el mo oltngakl er a omengederederel a Dios, e ngkmal sebechel el mengesuseu er kid. Ngdirkak lemengodech a ulekbat er ngii. Ngsoal a bo domdasu el kmo a llechul a Dios a kmal meringel, me a doltirakl er ngii e ngmo diak a deurreng er kid. (1 Johanes 5:3) A rechad er tia el beluulechad a omdasu el uaisei, me a lsekum kede blechoel el obengterir e kede mo uai tir. A odos el 24 a rekil a mlo meruul a tekoi el ua remekngit el sechelil, e le ngmle chetil a bo lomdasu el kmo ngkuk ngodech er tir. Me ngmlo uchul e ngmlo er a deleboes. Me kau a dirrek el locha diak el soam el mo ngodech er a resechelim.

⁴ Ngklengiterreng e le ngdirrek el ngar er a chelsel a ongdibel er a Rekristiano e te ngar er ngii a rebebil el sebechir el mengesuseu er kid el mo meruul a mekngit. A ta el kekerei el chad a melekoi el kmo a rebebil er a resechelil el sechal er a chelsel a ongdibel a ousechelei er a redil el tir a diak losiou er a Jehovah. Me sel lolemolem lobengterir e ngmo meruul a tekoi el di uai tir. Ngdmu el kmo: ‘Ngmlo mechitechut a deleuill er ngak me a Jehovah, e mlo diak el soak el ngar er a miting, e dirrek el mlo diak kuldingel a obliil. Ak mlo melechesuar el kmo ngmla mo kirek el mo cheroid er tir, me ak mlo cheroid!’ Me kau, ke medengelii a klungel a omengesuseu er a resechelim el bedul kau? Me bo dosaod a kerebai er a Biblia el sebechel el ngosukid er chelechang.​—Rom 15:4.

NGULECHAU A RENGRIR

5, 6. Ngmilekerang a Absalom er a longeblad er a rechad? Me ngmlo tmaut a uldesuel?

⁵ Ngar er ngii a betok el okesiu el ngar er a Biblia el kirel a mekngit el omerellir a rechad el milengesuseu er a rebebil. E a ta er tir a Absalom el ngelekel a King el David, el kmal mle ungil el sechal. Ngdi mle ua Satan el milecherei a mekngit el uldasu me ngmukeroul er a chelsel a rengul. Me ngmlo soal el orribech er a deruchellel a demal el king, alta e ngdimlak a llemeltel.a Ngmillasem el mengesuseu er a rechad el mo omdasu el kmo a demal a dimlak lomekerreu er tir engdi ngii a soal el lolengeseu er tir. Me a Absalom a di ua omerellel a Diabelong er a chelsel a sers er a Eden, el milengesuseu er a rechad el mo omdasu el kmo ngomekerreu er tir, e dirrek el uluuchais a blulak el kirel a demal.​—2 Samuel 15:1-5.

⁶ Me ngmlo sebechel a Absalom el otaut a uldesuel? A rebetok el chad er a Israel a mlechetikaik er a Absalom e le Biblia a kmo: “Ng ulechau a rengrir el mor ngii.” (2 Samuel 15:6) Ngmilengeblad er a rebetok el chad, engdi ngdimlak el sebechel el otutii a uldesuel. Me a kldidiul a rengul a mlo uchul a kodellel me a kodellir a rebetok el telael el lulengeblad er tir.​—2 Samuel 18:7, 14-​17.

7. Ngera kede suubii er a omerellel a Absalom? (Momes er a siasing el ngar er a 19 el llel.)

⁷ Ngera uchul me ngmle beot er a Absalom el mengeuid er tirke el chad er a Israel? Te locha uluureng aike el tekoi el ledilu el kmo ngmo meruul el kirir. Me a lechub e te di milecheblad er a klungiolel a medal. Ngdiak dodengelii a uchul, engdi kede medengei el kmo: Ngdimlak el blak a rengrir el mo er a Jehovah me ngike el king el bla lengiltii. Me chelechang e a Satan a melemolem el ousbech er a rechad el ua Absalom el mengeuid er a remesiungel a Jehovah. Te locha mo melekoi el kmo ngkmal meringel a llechul a Jehovah, me a lechub e te kmo a rechad el diak losiou er ngii a dmeu a rengrir el di meruul a sorir. Kau, ke ungil el medengei el kmo aika el tekoi a kmal blulak me ke melemolem el blak a rengum el mo er a Dios? Ke oumerang el kmo ngdi ta el “cherrungel llach” er a Jehovah el okedongall el llechul a Kristus, a sebechel el mo uchul a mera el ilmokl? (Jakobus 1:25) A leuaisei a uldesuem, e mochotii el kmo ngbetik a rengum er ngii el llach, e mousbech er ngii el ilmeklem el oldeu er a rengul a Jehovah.​—Monguiu er a 1 Petrus 2:16.

8. Ngerang a ochotii el kmo ngdiak bo luchul a deurreng a doltngakl a llechul a Jehovah?

⁸ A Satan a kmal soal el mengeuid er a remekekerei el chad. A 30 me a derengel a rekil el odam a melekoi el kmo sera lengeasek e ngdimlak lomdasu el kmo a llechul a Jehovah a mo omekerreu er ngii. Ngbai ulemdasu el kmo ngdiak a ilmeklel el meruul a soal. Me ngmlo uchul e ngmlo er a deleboes el omeruul, engdi tiang a dimlak bo el uchul a deuil a rengul, e ngbai mlo uchul e nguluuchel er a rengul el betok el rak. A ta el odos el mlo er a deleboes er a dirk lengeasek a melluches el kmo ngkmal mlo mekngit a rengul e mlo omdasu el kmo ngdiak a ultutelel el chad. Ngdmu el kmo: “Me chelechang e ngmla mo chuib a 19 el rak e ngak a dirk melatk er tia el mekngit el omerellek.” A ta er a odos a kmo: “Sel kulatk a omerellek el kmal ulemekringel er a rebetik er a renguk a mlo uchul a ringelel a uldesuek, bedengek me a renguk. Ngkmal meringel a dekiei el cheroid er a Jehovah.” A Satan a diak el soal a omomdasu el kirel a telemellel a omerellem.

9. (a) Ngera el ker a kired el oker el kirel a ulekrael me a llechul a Jehovah? (b) Ngera uchul me ngkmal kired el mo medengelii a Dios?

⁹ A tekingir tirka el chad a ochotii el kmo ngkmal klou a telemellel a lak dolengesenges er a Jehovah. Ngklengiterreng e le rebetok el mekekerei me a remeklou el chad el ngar er a klemerang a mlo chuarm, e mlochu medengelii tia el tekoi! (Galatia 6:7, 8) Di lekau loker el kmo: ‘Ngak ak medengei a ulekbat er a Satan el lousbech el mengeuid er ngak?’ ‘Ngak a kumes er a Jehovah el ua kmeed el sechelik, el ngii a blechoel el melekoi a klemerang e soal a kot el ungil el tekoi el kirek?’ ‘Ak uumerang el kmo a Jehovah a kmal diak el sebechel el mengreos a ungil el tekoi el ngii a rullak el mo dmeu a renguk?’ (Monguiu er a Isaia 48:17, 18.) A lsekum e ke ungil el medengelii a Jehovah e ke ulterekokl el onger el kmo chochoi. Ngkirem el mo medengei el kmo a llach me a ulekrael er a Biblia a ochotii el kmo a Jehovah a betik a rengul er kau, e kmal diak el soal el olekebai er kau er a ilmeklem.​—Psalm 25:14.

MOLENGIT ER A LLOMESERRENG ME A BLEKONGESENGES

10. Ngera uchul me ngkired el oukerebai er a Salomon?

¹⁰ Sera dirk lekekerei el chad a Salomon e ngmilluluuch el mo er a Jehovah el kmo: “Ngak a dirk kekerei mak metitur el mengedereder.” Ngdirrek el ullengit me lerellii el mo bekongesenges e lebsang a llomeserreng. (1 King 3:7-9, 12) Me a Jehovah a ulenger er a nglunguchel. Me a lsekum e ke olengit er a osisiu el tekoi, e ngrongesii a nglunguchem el diak el lultuil er a rekim. Engdi ngdiak lerellau el mo mellomes a rengum el okiu a mengasireng el rolel. Ngbai rullau el mo mellomes a rengum a lsekum e ngblak a rengum el mesuub er a Tekingel, e olengit er a oureor el klisichel, e dirrek el oltirakl a ulekrael me a omellach el mngai er a ongdibel er a Rekristiano. (Jakobus 1:5) Me a Jehovah a rulleterir a remeklou me a remekekerei el chad el mesiungel el kuk mo mellomes a rengrir er tirke el diak lolengesenges er ngii, el uldimukl “rar mellomes a rengrir mar bekudasu” er tia el beluulechad.​—Lukas 10:21; monguiu er a Psalm 119:98-​100.

11-13. (a) Ngera kede mesuub er a Psalm 26:4, Osisechakl 13:20, me a 1 Korinth 15:33? (b) Ke mekerang a omoltaut aika el ulekrael er a klengar er kau?

¹¹ Me bo dosaod a bebil el bades el ngii a ngosukid el mo meduch el melilt er a resechelid, e mo medengelii a klungel a ultutelel a dosuub er a Biblia, e dolatk a tekoi el desuub me bo dungil el medengelii a Jehovah. A Psalm 26:4 a kmo: “Ng diak kdengchokl el teloi er a re mengesuul el ka kubengterir a re cheblad.” E a Osisechakl 13:20 a kmo: “Mosuub er a re mellomes a rengrir el chad me bo le mellomes a rengum. Cho mousechelei er a re mekebelung el chad e ke mo metemall.” Me a 1 Korinth 15:33 a kmo: “A mekngit el klausechelei a tomii a ungil blekeradel.”

¹² Ngera kede suub er aika el bades? (1) A Jehovah a soal a bo dekerekikl el melilt er a resechelid. Ngsoal el omekerreu er kid me lak demetemall e detemellii a deleuill er kid el obengkel. (2) A resechelid a sebechir el mengesuseu er kid el mo meruul a ungil me a lechub e ngmekngit el tekoi, e tiang a klemerang el tekoi. Aika el bades a diak el llechukl el ua mesisiich el llach el kmo “lak moruul er tiang” me a lechub e “lak mokerang.” Ngbai olecholt el kmo a Jehovah a mera el omekerreu er kid e ouchais er kid er a mo rsel a omerelled e meskid a techall el di kid el melilt a doruul.

¹³ Aika el bades a milluches el ochotii a klemerang a uchul me ngdirk sebeched el ousbech er chelecha el taem el omekrael er kid er a chelsel a ngii di el blekeradel. Di lekau el oker el kmo: Ngokiu a ngera el techall e ak mo ‘obengterir a recheblad’ el chad, e mekerang ak uliub er ngak er tir? (Osisechakl 3:32; 6:12) Te rua techang a “re mellomes a rengrir” el Jehovah a soal a kuukerebai er tir? E rua techang a “re mekebelung” el kirek el mengeroid er ngak er tir? (Psalm 111:10; 112:1; Osisechakl 1:7) Ngerang a “ungil blekeradel” el sebechek el tomall a lsekum ak mo teloi er a remekngit el sechelei? “A mekngit el klausechelei” kede di metik er tir er a beluulechad e merekong? (2 Petrus 2:1-3) Ke mekerang a omonger aika el ker?

14. Ngera el tekoi a ungil el mosaod er a temel a Omengull el Ongalek?

¹⁴ Ngdirrek el sebechem el ousbech er tia el rolel a omerriter el bades el mo medengelii a uldesuel a Jehovah el kirel a meklou a ultutelel el tekoi el kirem kau me a rechad er a blim.b Me ngungil a lsekum a ruungalek a mo mesaod aika el tekoi er sel temel a Omengull el Ongalek. Ngar sel taem e lak mobes el kmo a moktek er kau a soam el lolengeseu er a dersta el chad er a blim el mo medengei el kmo a ulekrael me a llechul a Jehovah a olechotel a bltkil a rengul el mei er kid. (Psalm 119:72) Me ngoeak tiakid el rolel a omesuub, e ngokesengii a deleuill er kemiu me a Jehovah me a dirrek el deleuill er kemiu el rokui.

15. Ke mekerang e mo medengei el kmo ngmla mo mellomes a rengum e bekongesenges?

¹⁵ Ke mekerang e mo medengei el kmo ngmla mo mellomes a rengum e bekongesenges? Ngungil a omomekesiu er a uldesuem er a uldesuir a reblak a rengrir el mesiungel a Dios er a irechar, el ua King el David el dilu el kmo: “Dios er ngak, ng kmal soak el meruul a tekingem! Ak sichedekl osisecheklem er a renguk.” (Psalm 40:8) Me ngike el milluches er a Psalm 119 a kmo: “Ng meral betik a renguk er a llechum! Ak melebedebek er ngii er a tutau el mo klebesei.” (Psalm 119:97) Ngkirem el omekeroul er tiaikid el rolel a bltikerreng, el oeak sel leblak a rengum el mesuub er a Biblia, e moluluuch, e dirrek el molebedebek a bades. Ngdirrek el mukeroul tia el bltkil a rengum sel momes a betok el klengeltengat el mei el blekongesenges er kau el mo er a Jehovah a uchul.​—Psalm 34:8.

MOUREOR EL KIREL A ILMEKLEM EL KRISTIANO!

16. Ngera kired el melatk er ngii me lak doridii a ilmekled?

¹⁶ Ngokiu a reksi er a klechad, e a betok el beluu a oumekemad el kirel a ilmeklir. Me kau me ngdirrek el kirem el meringel el oureor me lak moridii a ilmeklem el Kristiano! Lak mobes, kau a diak di momtok er a Satan me a mekngit el uldasu er tia el beluulechad. Ngdirrek el kirem el meringel el oltngakl er a diak el cherrungel el klechad er kau me a rengum el ngii a sebechel el mengeblad er kau. (Jeremia 17:9; Efesus 2:3) Engdi a Jehovah a sebechel el ngosukau el mo mesisiich. Ngngar er ngii a eru el ungil el tekoi el meketmokl er a bek el taem el molilt el meruul a llemalt. A kot, e ke odeuir a rengul a Jehovah. (Osisechakl 27:11) E a ongerung, sel molengesenges er a ‘cherrungel llach ra ilmokl’ e bo luchul a klungiolem e ngsmisichau el mo blak a rengum el merael er a rael el mo er a klengar. Me a cherengel a taem e a Jehovah a mo meskau a klou el ilmokl el bla letibir el mo er a reblak a rengrir el chedal.​—Jakobus 1:25; Matteus 7:13, 14.

17. Ngera uchul me ngdiak el kirel el mo mechitechut a rengud a lsekum kede rullii a cheleuid? E mekerang a Jehovah a lengesukid?

¹⁷ Kid el rokui a remuul a cheleuid a lebebil er a taem. (Olisechakl 7:20) Sel bo muaisei, e lak bo lemechitechut a rengum. Me sel mrellii a cheleuid e molasem el sumecheklii, alta ngmo kirem el olengit a ngeso er a remechuodel. A Jakobus a milluches el kmo: “A nglunguuch ra kloumerang chosobelii a chad el smecher, ma Rubak a mo okisii; ma le ngarngii a klengit el le riruul ngiil chad, me ngmuusubes.” (Jakobus 5:15) Lak mobes, a Dios a chubechubechad e kmal soal a omngar er a chelsel a ongdibel er ngii e le ngomes er a ungil el tekoi el ngar er a rengum. (Monguiu er a Psalm 103:8, 9.) Me a Jehovah a melemolem el olengeseu er kau a lsekum ke mesiou er ngii er a rengum el rokir.​—1 Kronika 28:9.

18. Ngera kired el meruul me bo denguu a ulekerreuil a Jehovah?

¹⁸ Sel kesus er a uchei er a kodellel, e a Jesus a milluluuch el obengterir a 11 el apostol er ngii el olengit er a demal me lomekerreu er tir. Ngdillii a ileakl el ongtil el kmo: “Ke bai mengkar er tir er ngikel mekngit.” (Johanes 17:15) Me a Jesus a dirrek el omekerreu er a rultirakl er ngii er chelechang el ua omerellel el mo rechapostol er ngii. Me ngulterekokl a rengud el kmo a Jehovah a mo onger er a nglunguchel a Jesus el mo omekerreu er kid er a chelsel aika el meringel el blekeradel. A Osisechakl 2:7, 8 a ouchais el kmo: A Jehovah a “mesebechakl er tirkel diak a telemellir” me “tirkel blak a rengrir el oltirakl er ngii.” Ngdiak el beot el tekoi a dolengesenges a llechul a Jehovah er a bek el taem. Engdi ngdi tirke el olengesenges er Ngii a mo nguu a diak a ulebengelel el klengar me a mera el ilmokl. (Rom 8:21) A rebebil a locha mo ngodech a uldesuir, engdi lak bechititerir me longeblad er kau!

[Aike el Footnote]

[Aike el siasing el ngar er a 19 el llel]

Kede mekerang e dongcheterir tirke el ua Absalom e mengeroid er kid er tir?