Watchtower ONLINE LIBRARY
Watchtower
ONLINE LIBRARY
Palauan
  • BIBLIA
  • BABIER
  • MITING
  • w13 8/1 3-7 el llel
  • Siasing er a Remeau Ngkikiongel me a lechub e Ngdiak a Telemellel?

Ngdiak a video el kirel tiang.

Mousubes, ngdimlak el sebechel el load a video.

  • Siasing er a Remeau Ngkikiongel me a lechub e Ngdiak a Telemellel?
  • A Ongkerongel Ouchais er a Rengedel a Jehovah—2013
  • Mekekerei el Dai el Ngar er a Suobel
  • Kmeed el Osisiu el Suobel
  • Ngerang ngrullii er a derta el chad a siasing er a remeau?
  • Ngera ngrullii er a telungalek a siasing er a remeau?
  • Ngera ngmelekoi a Biblia el kirel a siasing er a remeau?
  • A Rolel e Kede Omekerreu er Kid er a Ta er a Bedeklel a Satan
    A Ongkerongel Ouchais er a Rengedel a Jehovah—2019
  • A Lsekum a Bechim Omes a Siasing er a Remeau
    A Ongkerongel Ouchais er a Rengedel a Jehovah (Suobel)—2023
  • Uchul Me Ngmekngit a Siasing er a Remeau
    A Klengar er Kid a Rekristiano me a Omesiunged—Subeled er a Miting—2023
A Ongkerongel Ouchais er a Rengedel a Jehovah—2013
w13 8/1 3-7 el llel

OMESODEL A SUOBEL ER A IKREL

Siasing er a Remeau Ngkikiongel me a lechub e Ngdiak a Telemellel?

A beluulechad er chelecha el taem a mui er a siasing er a remeau.a Ngsebeched el metik er a advertisement, bail, mubi, chelitakl, me a magazine, e dirrek el ngar er a tv, video game, cellphone me aike el klekedall el uai ngii, Web site, e chelechang e ngsebechir a rechad el kaudurokl a siasing el ngar er a internet. A siasing er a remeau a tekoi el lekengei er ngii a rechad er chelechang. E a rebetok el chad el ngar er a betok el beluu a kmal klou a osengir er a siasing er a remeau er chelecha el taem el kuk ngaruchei er a ngii di el taem er a reksi.​—Momes er a baks el “Tekoi el Kirel a Siasing er a Remeau.”

A teletelel a siasing er a remeau a dirrek el di mengedengodech. A ta el brobesong el ngklel a Gail Dines a meluches el kmo: “A siasing er chelecha el taem a kmal mla mo mekngit, me aike el mle mekngit er a uchei a kora di hutsu el tekoi er chelechang.”

Ngua ngera uldesuem el kirel aika el tekoi? A siasing er a remeau ngdiak a telemellel me a lechub e ngomekodall? A Jesus a dilu el kmo: “A ungil a dbechel el kerrekar ourodech a ungil rodech, ma mekngit a dbechel el kerrekar ourodech a mekngit el rodech.” (Mateus 7:17) Ngera el rodech a lomekdubech a siasing er a remeau? A bo dodengei a nger er aikang, e bo dosaod a bebil er a ker el kirel a siasing er a remeau.

Ngerang ngrullii er a derta el chad a siasing er a remeau?

AIKE EL LOLEKOI A RECHELLIMOSK EL CHAD: A siasing er a remeau a klou a klisichel el rullii a chad el mo sibil, e a rebebil el chad er a omerriter me a rechad el olengeseu er a resmecher a omekesiu er ngii el mo er a cocaine.

A Brian,b el ngii a mle blechoel el omes a siasing er a remeau el ngar er a Internet a ouchais el kmo: “Ngdimlak a sebechel merrob er ngak. A renguk ak ulemerrous. Ak di mo omritel e mo meringel a bdeluk. Ak mera el millasem el mo diak kuruul er ngii, engdi ngmlo chuib a betok el rak er a uriul e ngak a dirk mirruul er ngii.”

A rechad el omes a siasing er a remeau a blechoel el omart aike el tekoi el loruul. Te omart er tir e mengeblad. Engdi ngdiak el mechas a rengud el kmo, a rebetok er tir a chuarm er a uldesuir el sorir el mengeroid er tir, e merur, e di bekikl, e di mekngit a rengrir, e kesib a rengrir. A lebebil er a taem e ngmo sorir el di tir el melai a klengar er tir. A chad el ngklel a Serge, el ngii a mle kmeed el bek el sils el download a siasing er a remeau el mo er a dengua er ngii a melekoi el kmo: “Ak di millatk er ngak e merekong. Ak ulemdasu el kmo ngdiak a ultutelek, e mle mekngit a ukltkek, e ulemdasu el kmo ngdi mle ngak el tang, e dimlak el sebechek el choridak er ngii. Ak mera el mle merur e mle medakt el mo osiik a ngeso.”

Mo lmuut er a di telkib el osengel a siasing er a remeau a sebechel el ngar er ngii a telemellel. A Dr. Judith Reisman el ngarbab el chad er a omerriter er a siasing er a remeau a millekoi el ngar er a medal a U.S. Senate committee el kmo: “A siasing er a remeau sel bo lesiseb er a bdelud e ngodechii a no er a bdelud, e di melemolem el ngar er a ngii e diak el sebechel el mo diak.” A 19 a rekil el Susan el milsang a siasing er a remeau el ngar er a Internet a melekoi el kmo: “Aike el siasing a di mereko el ngar er a bdeluk. Alta ngdiak kulatk er ngii, engdi ngdi mei er a uldesuek. Sel kumelechesiu er ngak e ngdiak el sebechek el otobed er a uldesuek.”

A KEDEB EL OMESODEL: A siasing er a remeau a rulleterir a rechad el mo sibil e tomall a klengar er tir.​—2 Petrus 2:19.

Ngera ngrullii er a telungalek a siasing er a remeau?

AIKE EL LOLEKOI A RECHELLIMOSK EL CHAD: “A rubekel me a telungalek a mo chacheroid e le ngsiasing er a remeau a uchul.”​—The Porn Trap, by Wendy and Larry Maltz.

A siasing er a remeau a tomall a chebechiil me a telungalek el oeak a

  • Lolemall a klaumerang er a chebechiil, durs me a bltikerreng.​—Osisechakl 2:12-17.

  • Lolisiich a blechelechelingaol el reng, uldasu el melatk er a di tir, me a telemellel a deurreng er a bechil a chad.​—Efesus 5:28, 29.

  • Lolisiich a mekngit el rolel a durs me a ngibeserreng.​—2 Petrus 2:14.

  • Longetikaik er tir el mo orrimel a mekngit el rolel a deleboes el mo er a rebecherir.​—Efesus 5:3, 4.

  • Lolisiich a ngibes er a chelsel a rengul a chad me a laokreng.​—Mateus 5:28.

A Biblia a melisiich er a rebechiil el chad el kmo ngdiak el kirir el mo ‘diak le blak a rengrir’ el mo er a rebecherir. (Malakai 2:16) A laokreng a ta er a rolel a cheleblad el sebechel el tomall a chebechiil e mo uchul e a rebechiil el chad a mo chacheroid e medort a chebechiielir. A chouaika el tekoi a sebechel el tomelleterir a rengalek.

A siasing er a remeau a dirrek el sebechel tomelleterir a rengalek. A Brian, el dulsaod er ngii er a uchei, a mesaod el kmo: “Ngmle teruich a rekik er a kbetik a magazine er a demak el ngar er ngii a siasing er a remeau. A kulemuchel el omart er ngak e omes ngii el babier, e kora dimlak kudengei el kmo ngera uchul me ngkmal mle soak el omes. Tiang a mlo uchul e ak di mlo blechoel el omes el mo lmuut er a bok klou el chad.” A omesuub a ochotii el kmo a siasing er a remeau a sebechel el rulleterir a remekekerei el chad el mo omuchel el meruul a deleboes el omeruul sel ledirk el ngeasek, e dirrek el mo sorir el meruul a delengerenger, e meruul aike el mekngit el rolel a deleboes, e mo mekngit a uldesuir.

A KEDEB EL OMESODEL: A siasing er a remeau a tomall a ungil el deleuill e mo uchul a klengiterreng me a ringel.​—Osisechakl 6:27.

Ngera ngmelekoi a Biblia el kirel a siasing er a remeau?

A TEKINGEL A DIOS A KMO: “Ma le ua isei, e mokoad a ngelbesel a mekngit el omichoech er a rengmiu, el oketa deleboes el delengerenger, ma olechotel a deleboes, ma klekad, ma ngibes er a deleboes, ma nglemokel, el rullii a chad el mo ouchelid a klalo.”​—Kolose 3:5

A Jehovahc el Dios a ouketui a siasing er a remeau. Tiang a diak el belkul a kmo ngchetil tia el tekoi er a durs. Ngmileob aika el klekedellel a bedenged e mle soal a rebechiil el chad a lousbech el oldeu a rengrir, e mo sebechir el mo kaubltikerreng, e mo uchul e te dmeu a rengrir el omechell er a rengelekir.​—Jakobus 1:17.

Me a leuaisei e ngera me ngsebeched el melekoi el kmo a Jehovah a kmal ouketui a siasing er a remeau? Ka me dolatk a bebil er a uchul.

  • Ngmedengei el kmo a siasing er a remeau a sebechel el tomall a klengar.​—Efesus 4:17-19.

  • Ngbetik a rengul er kid e soal el omekerreu er kid er a tellemall.​—Isaia 48:17, 18.

  • A Jehovah a soal el omekerreu a chebechiil me a telungalek.​—Mateus 19:4-6.

  • Ngsoal a deklikiid er a tekoi er a kldung e dolecholt a omengull el kirel a llemeltir a rebebil.​—1 Thesalonika 4:3-6.

  • Ngsoal a bo doba omengull el kirel aika el klekedall er a bedenged e dousbech el ngar er a melemalt el rolel.​—Hebru 13:4.

  • A Jehovah a medengei el kmo a siasing er a remeau a olecholt er a blechelechelingaol el reng, me a mekngit el osengel a Satan el kirel a durs.​—Genesis 6:2; Jude 6, 7.

A KEDEB EL OMESODEL: A siasing er a remeau a tomellii a deleuill er a chad me a Dios.​—Rom 1:24.

A Jehovah a kmal olecholt a klechubechub el mo er tirke el sorir el mo diak lomes a siasing er a remeau. A Biblia a kmo: “A RUBAK a chubechub e betik a rengul, ng meoud el ngmasech a rengul, e mui er a diak le mengodech el bltikerreng. Ng medengei el kmo kede rruul er a ngerang; ng melatk el kmo kid a di chebechab.” (Psalm 103:8, 14) Ngmengemedaol er tirke el ngariou a rengrir el mo ‘nguu er ngii a klechubechub e le betik er a krasia el mo ngosuterir sel lousbech er ngii.’​—Hebru 4:16; momes er a baks el “Mo Diak Domes a Siasing er a Remeau.”

Te betok el chad a mla kongei er a ngeso er a Dios. Tial ngeso ngsebechel el ngosuir a chad? Ka momtab aike el lolekoi a Biblia el kirir a rebebil el mlo mesisiich er a mekngit el tekoi el lurruul: “Kemiu a chad el mlekikiid er a klengit e mechedaol. Ma Dios a silmechii a delongeliu kemiu me ngii el okiu a Rubak el Jesus Kristus” me a chedaol klisichel a Dios. (1 Korinth 6:11) Me ngdi uai sel ngar er a Isaia, a chouaitirka el chad a sebechir el melekoi el kmo: “A Dios a osobelek, mak mo oumera er ngii, e diak kmedakt, ele RUBAK el Dios a cheliteklek e klisichek. Ingii a mla mo osobelek.”​—Isaia 12:2.

A Susan, el ngii a mlo diak lomes a siasing er a remeau, a melekoi el kmo: “Ngdi ta el Jehovah a sebechel el ngosukau el mo mesisiich er a osengel a siasing er a remeau. A lsekum e ke olengit a ngeso er ngii me a ulekrael, e ngmo sebechem el klikiid e dechor er medal a Dios. Ngkmal diak bo lechitau.”

Mo Diak Domes a Siasing er a Remeau

Kau ke medengelii a chad el meringel er ngii el mo diak lomes a siasing er a remeau? Ka molatk a bebil er a rolel el mla ngosuterir a rebebil er a rechad el mo mimokl er tia el tekoi.

1. Moluluuch el mo er a Dios.

“Sel kot el klou a ultutelel el tekoi el kirem el meruul er ngii me bo lak momes a siasing er a remeau a sel molengit a ngeso er a Jehovah el oeak a nglunguuch.”​—Franz.

A Jehovah a sebechel el msang a chad a chedaol klisichel, el melisiich er ngii ‘me bo le soal e le sebechel el meruul a ikel soal’ a Dios. (Filipi 2:13) A lsekum a chad a mecherei a chedaol klisiich me ngmelisiich er ngii, e ngmo ngosuir el mo mesisiich er aike el tekoi el “loureng a klechad el soal meruul.”​—Galatia 5:16, 24.

2. Mngai a ngeso er a rebebil.

“A osengel a siasing er a remeau a rullii a chad el mo omart er ngii e mo merur e mo omdasu el kmo ngdiak el sebechel el olengit a ngeso. Ke mo omdasu el kmo ngsebechem el di kau el mo mesisiich er ngii, engdi tiang a diak el klemerang el tekoi. Ngdi sebechem el mo mesisiich er ngii el oeak a ngeso. Me ngmlo diak kulatk er a kldidiul a renguk e mocha ouchais er a bechik. Ak dirrek el ullengit a ngeso er a ta er a kmal kmeed el sechelik. Tiang a mera el mle meringel er ngak a meruul er ngii, engdi ngmlo sebechek el ngmai a ngeso el kuluusbech.”​—Yoshi.

Kede ousbech er a blakerreng me a ulterekokl el reng el mo sebeched el olengit a ngeso er a rebebil. Engdi, tiang a kot el tekoi el kirel a chad el meruul er ngii me bo lemesisiich er tia el tekoi e lluut el mo ungil a deleuill er ngii me a rebetik er a rengul. A Susan el dulsaod er ngii er a uchei a melekoi el kmo: “A uriul, e ngmera el mlo ungil a renguk. Aika el taem a mera el mle meringel er ngak, engdi ngmlo sebechek el melechesuar a budech er a klengar er ngak e klikiid a ukltkek.”​—Jakobus 5:16.

3. Bo modengei e mongeroid er kau er aike el mo uchul e ke mo omes a siasing er a remeau.

Ngera el blekeradel, uldasu, me a lechub e ngtekoi el dolechesuar a mo uchul e a chad a mo oltirakl er a ngelbesel a rengul? Ngsel lengar er a Internet? Sel lomes a TV er a metuda klebesei? Sel longuiu a magazine? Sel lebo longedub? Ngsel lesongerenger, ngkesib a rengul, ngsel di el ngii el tang, me a lechub e ngsel lemesaul a bedengel? A Sven a melekoi el kmo: “Bo modengei a chelitechetum e mongeroid er kau er ngii el uai a lemekngit el rakt.” A Jesus a dilu el kmo: “Misei e a lsekum a kadekmel a medam a rullau me ke mor a klengit, e bechetir el nguu el choitii.”​—Mateus 5:29.

A Franz a melekoi el kmo: “Sel bo el soak el omes er a ta er a redil e bok ngibes er ngii, e ak di mereched el meluluuch el mo er a Jehovah e orrimel er ngak el mo omes er cheroid.” Ngike el blak a rengul el Job a dilu el kmo: “Ak mla rullii a mesisiich el telbilek el kmal diak bo kngibes a kumes er a tar a ekebil.”​—Job 31:1.

4. Molisiich er a deleuill er kau me a Dios.

A Franz a liluut el dochelii el kmo: “Momekeek er a uldesuem er a ungil el uldasu, e bo blechoel el meruul a tekoi el kirel a omesiungem er a Dios.”

A Biblia a kmo: “Bo mungil el melebedebek a ikel tekoi el ungil e rredemelel odanges; tekoi el merang, e chetengakl, e melemalt, e klikiid, e olechau a bltikerreng, e kuoll. . . .  E a Dios el omeskid a budech a mo obengkemiu.”​—Filipi 4:8, 9.

a A “siasing er a remeau” a meketmokl el mo rullii a chad el omes, menguiu e orrenges el mo soal el meruul a tekoi er a deleboes. Aikang a dirrek el uldimukl er ngii a llechukl el babier me a lechub a tekoi el sebeched el orrenges.

b A bebil el ngakl el ngar er tia el suobel a mla mengodech.

c A Jehovah a ngklel a Dios el mocholt er a Biblia.

TEKOI EL KIREL A SIASING ER A REMEAU

BEK EL BIO: Bekord el 30,000 el chad a omes a siasing er a remeau el ngar er a Web site.

BEK EL BUNG: A ruusbech a Internet a kaudurokl a kuk betok er a 1.7 EL MILIOL el siasing er a remeau el okiu a email.

BEK EL SIKANG: Ngar er ngii a ERU el mekngit el video er a remeau el tuobed er a Merikel.

BEK EL SILS: A kuk betok er a ERU EL MILIOL el mubi er a remeau a loleng a rechad el ngar er a Merikel.

BEK EL BUIL: Ngbekord el 9 er a chelsir a 10 el ngeasek el sechal me a 3 er a chelsir a 10 el ngeasek el redil el ngar er a Merikel a omes a siasing er a remeau.

BEK EL RAK: A siobai er a omeruul siasing er a remeau el meliuekl er a beluulechad el rokir a mengereker a $100 EL BILIOL (U.S.) a ildisel el udoud.

    Palauan Publications (1996-2024)
    Log Out
    Log In
    • Palauan
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share