Blulak el Tekoi el Kmo a Dios a Diak a Ngklel

KLAUMERANG ER A REBETOK

“Ngdirkak ki mngai a kengei er a uldesuir a rechad el kmo ngsebeched el omekedong er ‘a’ ngklel a Dios, e a lsebeched e ngera tia el ngakl.”​—Professor David Cunningham, Theological Studies.

KLEMERANG EL NGAR ER A BIBLIA:

A Dios a dilu el kmo: “A rokui el klebekelek a mo engelakl er medam, . . . e ak mo dulii a ngklek el ‘RUBAK’.” (Exodus 33:19) Ngar er a Biblia el tekoi er a Belau, e a ngakl el Jehovah a bla lutechir er a “RUBAK.” A Jehovah a ngakl er a Hebru el belkul a kmo “Ngii a Mo.”​—Genesis 2:4, footnote.

A Jehovah a soal a dousbech er a ngklel. A Biblia a kmo: “Momekedong er a ngklel, e mouchais a chisel omerellel er a delongelel a bek el beluu. Mouchais el kmo a ngklel a ngosecheklang.”​—Isaia 12:4.

A Jesus a uluusbech er a ngklel a Dios. Ngar er a nglunguchel e a Jesus a dilu er a Jehovah el kmo: “Ma kmla ochotii a ngklem er tir [redisaiplo er a Jesus], e lmuut lolecholt er ngii.” Ngera me a Jesus a ulechotii a ngklel a Dios el mo er a redisaiplo er ngii? Ngmillemolem el kmo: “Me sel bltkil a rengum er ngak le bora chelsir, me ngak kngara chelsir.”​—Johanes 17:26, BT.

A UCHUL ME NGKLOU A ULTUTELEL:

A Walter Lowrie el mesuub a tekoi er a klechelid a milluches el kmo: “A chad el diak lodengelii a ngklel a Dios a diak el sal ungil medengelii, e dirrek el diak el sebechel oubltikerreng el mo er ngii, a lsekum ngdi medengelii el ua leklou el klisiich.”

A chad el ngklel a Victor a mlo er a ikelesia er a bek el sandei, engdi ngdimlak lomdasu el kmo ngmera el medengelii a Dios. Ngmelekoi el kmo: “E a uriul e ak siluubii el kmo a ngklel a Dios a Jehovah, me ngua blo kudengelii. Ak kumelechesiu er ngak el mocha medengelii ngika el Chad el bla krenges a betok el tekoi el kirel. Me ak mocha omes er ngii el mera el Chad e sebechek el mekurulii a klausechelei el obengkel.”

A Jehovah a dirrek el olekeed er ngii el mo er a rechad el ousbech er a ngklel. A Biblia a tibir el kmo: “Tirkel medengelii a ngklem a oumeral ulsirs er kau, ele kau e RUBAK a diak mchititerir a rusiik er kau.” (Psalm 9:10) A Dios a dirrek el omekngeltengat er tirke el omekedong er a ngklel. A Biblia a kmo: “Tirke el rokui el omekedong er a ngklel a Jehovah a mo suobel.”​—Rom 10:13, NW.