A NGER ER AIKE EL KER ER A BIBLIA
Te rua techang a mo er a eanged, e ngera uchul?
A rebetok el miliol el chad a oureng el mo er a eanged sel lemad. A Jesus a dilu el kmo a reblak a rengrir el apostol er ngii a mo kiei er sei. Uchei er a lemad, e ngtilbir el mo kutmeklii a basio el kirir el obengkel a Demal el ngar er a eanged.—Monguiu er a Johanes 14:2.
Ngera me a rechad el mla er a chutem a mo mekiis el mo nguu a klengar el ngar er a eanged? Ngera te mo meruul er sei? A Jesus a dilu er a rechapostol er ngii el kmo te mo king. Te mo mengedereder er tia el beluulechad.—Monguiu er a Lukas 22:28-30; Ocholt 5:10, BT.
A rokui el ungil el chad te mo er a eanged?
Ngar er a betok el beluu, e te di mekesai el chad a mengedereder. A Jesus a mo olekiis er a rechad el mo nguu a klengar el ngar er a eanged me bo el sebechir el mengedereder er tia el beluulechad a uchul, me ngkirel el di mekesai el chad a mo mengilt el mo er a eanged. (Lukas 12:32) A Biblia a ouchais er sel kmal ildisir tirke el mo mengedereder el obengkel a Jesus.—Monguiu er a Ocholt 14:1.
A Jesus a mla kutmokl a basio el ngar er a eanged el kirir a rebebil er a rultirakl er ngii. Ke medengei el kmo ngera te mo meruul er sei?
Ngdiak el di el tirke el mo er a eanged a mo nguu a omeksullir. Tirke el blak a rengrir el chederedall er a Rengedel a Jesus a mo oldeu a rengrir er a diak a ulebengelel el klengar el ngar er a mlukbeches el paradis el ngar tia el chutem. (Johanes 3:16) A rebebil a mo soiseb er a Paradis el okiu a bo el sobel er a telemellel tia el mekngit el blekeradel er a beluulechad. E a rekuk bebil a mo soiseb el okiu a okiis er a kodall.—Monguiu er a Psalm 37:29; Johanes 5:28, 29.