Molengesenges Er A Remengkerengel A Sib Er A Jehovah

1, 2. Ngera uchul me a Jehovah a omekesiu er ngii el ua klekerengel a sib?

A JEHOVAH a omekesiu er ngii el ua klekerengel a sib. (Ese. 34:11-14) Tiang a ngosukid el mo ungil el medengelii a blekerdelel. A betik a rengul el klekerengel a sib a melechesuar a berredel a ngerechelel el kirel el omekerreu a klengar er a chermel el sib. Me ngomekrael er tir el mo er a basio el ngar er ngii a ralm me a kall e dirrek el menguoku a ngelekel. (Psa. 23:1, 2; Isa. 40:11) Ngmengkar a chermel el sib a lemellomes me a klebesei e dirrek el omekerreu er tir er a tebelik el charm. (1 Sa. 17:34, 35; Lk. 2:8) Ngolechoud er a ririid el sib el mla mo cheroid er a delebechel e omkar er tirke el telemall a bedengir.​—Ese. 34:16.

² A ruumesingd el chedal a Dios er a irechar a mle klekerengel a sib me a rechad er a sers. Me te mle medengelii a uchul me a Jehovah a ulemekesiu er ngii el ua klekerengel a sib. Te mle medengei el kmo a sib a mo ungil a ulekurulel a lsekum e ngungil el ulekerreu me ngmesisiich a bedengel. Me ngdi osisiu, a rechad a dirrek el ousbech a ulekerreu me a ulekrael er a Jehovah. (Mk. 6:34) Me ngsebechir el mo chuarm a lsekum a Jehovah a diak lomekerreu er tir. E le ngdiak lodengei el kmo ngera ungil me a mekngit, e dirrek el diak a chad el omekerreu er tir. Me te ua “sib el diak a mengkar.” (1 Ki. 22:17) Engdi tirke el kongei er a Jehovah me ngomekerreu er tir a mo er ngii aike el rokui el lousbech.

3. Ngera kede mo mesuub er tia el suobel?

³ Kid me kede medengei el kmo ngua ngera el klekar a Jehovah. Kede medengei el kmo ngkmal ungil el omekerreu er a rechedal er chelechang. Me kede mo mesuub er a rolel a lomekrael e lomekerreu er kid. Kede dirrek el mo mesaod el kmo ngmekerang e mo sebeched el ngmai a klungioled er a ulekrael me a ulekerreuil a Jehovah.

A UNGIL MENGKERENGEL A SIB A OMEKNGERACHEL ER A REBEBIL EL MO OLENGESEU ER NGII

4. Ngmekerang a Jesus a lomekerreu a sib er a Jehovah?

⁴ A Jehovah a mla omekngerachel er a Jesus el mo Bdelul a ongdibel er a Rekristiano. (Efe. 1:22, 23) A Jesus el “ungil mengkerengel a sib,” a di ua Demal el kmal betik a rengul e omekerreu a sib er ngii. Ngdirrek el tilengetengii a klengar er ngii el kirel a sib er ngii. (Jn. 10:11, 14, 15) Ngkmal mekreos el sengk el kirir a rechad tia el olubet el tengetengel a Jesus! (Mt. 20:28) Me a moktek er a Jehovah a soal a rokui el chad el olecholt a klaumerang er tir er a Jesus me ‘lak le mad e bai mo ngar el diak a ulebengelel’!​—Jn. 3:16.

5, 6. (a) Te rua techang a bla lolilt er tir a Jesus el mo omekerreu a sib er ngii? Ngera kirel a sib el meruul me lengai a klungiolel er a ulekerreuil a Jesus? (b) Ngera sel kot el ngarbab el uchul me ngkired el oltirakl a ulekrael er a remechuodel?

⁵ Ngmekerang a sib e ochotii el kmo te kongei er a Jesus el mo Mengkerengir? A Jesus a dilu el kmo: “A sib er ngak orrenges er a ngerek, me ngak a medengei, me ng oltirakl er ngak.” (Jn. 10:27) Me a sib a orrenges er a ngerel a Ungil el Klekerengel sel leblechoel el oltirakl a ulekrael er ngii. Ngdirrek el olengesenges er tirke el bla lomekngerachel er tir a klekar el mo olengeseu er ngii. Sel taem er a rekot el Kristiano, e a Jesus a millilt er a rechapostol me a redisaiplo er ngii el mo omekerreu er a rultirakl er ngii. Ngdilu er tir me bo lolisechakl e lomekang a ‘chermel el sib.’ (Monguiu er a Johanes 21:15-17; Mt. 28:20.) Me sera loberk a ungil chais, e te betok el chad a mlo disaiplo er a Kristus. Me a Jesus a kiltmokl a rokui me lebo er ngii a rungil el klekar el mo omekerreu a ongdibel er ngii.​—Efe. 4:11, 12.

⁶ A Paulus a dilu er a remechuodel er a ongdibel er a Efesus el kmo, a chedaol klisichel a Dios a mla melilt er tir el mo “klekar er a Ikelesia er a Dios.” (Rel. 20:28) Me a remechuodel er chelecha el taem a dirrek el metutk el okiu a chedaol klisichel a Dios. Ngmekerang e mo uaisei? Te mengilt el ultuil er aike el tekoi el kirir el meruul, el ngii a llechukl er a mlukrael el Tekingel a Dios. Me sel dekengei el olengesenges er a remechuodel e kede ochotii el kmo kede mengull er a Jehovah me a Jesus el tir a kot el ngarbab el Mengkerengel a sib. (Lk. 10:16) Tiaikid a kot el ngarbab el uchul me ngkired el kongei el olengesenges er a remechuodel. Engdi ngar er ngii a lmuut el bebil el uchul me ngkired el oltirakl a ulekrael el lomeskid.

7. Te mekerang a remechuodel e ngosukau el smisichii a deleuill er kau me a Jehovah?

⁷ A omelisiich me a ulekrael el lomeskid a remechuodel a blechoel el mengai a uchetemel er a Biblia. Ngdiak lolatk el mengedereder a klengar er a rudam er tir. (2 Ko. 1:24) Te bai sorir el ngosuterir el mo meduch el melilt a tekoi el loruul el oltirakl a omellach er a Biblia. Me sel loruul el uaisei, e a remechuodel a melisiich er a kltarreng me a budech er a ongdibel. (1 Ko. 14:33, 40) A Biblia a kmo a remechuodel a “omecheliu er kemiu.” Tiang a belkul a kmo a remechuodel a sorir el olengeseu er a derta el chad er a ongdibel el mo melemolem el kmeed er a Jehovah. Me te di mereched el olengeseu er a odam me a lechub a odos el kmedu el mo er a klengit me a lechub e ngmla rullii a klengit. (Gal. 6:1, 2; Jud. 22) Me ngkmal betok a ungil el uchul me ngkired el ‘orrenges er a re mengetekled e oltirakl a tekingir.’​—Monguiu er a Hebru 13:17.

8. Te mekerang a remechuodel e omekerreu a ongdibel er a Dios?

⁸ A apostol el Paulus el mle ungil el klekar a milengelechel er a rudam er ngii er a Kolose el kmo: “Bo mkerekikl me lak a chad el ebedemiu er a chelsengsang el leko ng llomeserreng er a klechad, el uldelid el mei el okiu a re chad ma ikel leko ng chelid el olab a dereder er a eanged, e diak le mlar a Kristus el mei.” (Kol. 2:8) Tia el omengelechel a ngosukid el mo medengelii a ta er a uchul me ngklou a ultutelel el dolengesenges a ulekrael er a remechuodel. Te omekerreu er a rudam er tir er tirke el chad el sorir el mengitechut a klaumerang er tir. A apostol el Petrus a dilu el kmo, a “re diak le meral profet” me a “re diak le meral chad er osisechakl” a mo melasem el mengesuseu er tirke el mechitechut a klaumerang er tir el mo melemall a llechul a Jehovah. (2 Pe. 2:1, 14) Me chelecha el taem e a remechuodel a dirrek el kmal kirir el mengelechel er a rudam er tir a lsekum ngmo kirir. Te mla mukeroul el mo meklou el chad el Kristiano me ngklou a klemedengei er tir er a tekoi er a klechad. Te mlengilt el mo mechuodel er a ongdibel e le te ulechotii el kmo te ungil el medengei a Bades me te rredemelel a olisechakl er a klemerang er a Biblia. (1 Ti. 3:2; Tit. 1:9) A klloulechad er tir me a tabesul el osengir er a tekoi, me a klemedengei er tir er a Biblia a ngosuterir el mo ungil el omekrael er a rudam me a rudos er tir.

A UNGIL MENGKERENGEL A SIB A OMEKANG E OMEKERREU A SIB ER NGII

9. Ngmekerang a Jesus a lomekang e lomekrael a ongdibel er chelechang?

⁹ A Jehovah a ousbech er a cheldebechelel el olisechakl e omekrael er a rokui el chedal el meliuekl er a beluulechad. Kede ngmai a betok el omellach er a Bades el ngar aike el babilenged. Me a lebebil er a taem e tia el cheldebechel a oltobed a ulekrael el ileakl el di kirir a remechuodel el okiu a babier me a lechub e ngtirke el odam el oldingel a ongdibel. Me ngokiu aikaikid el rolel e a sib a ngmai a ulekrael.

10. Ngera kirel a betik a rengul el klekar el meruul er ngii a lsekum a chad a mo cheroid er a ongdibel?

¹⁰ A betik a rengul el klekar a ngerechelel el omecheliu a cheremel el sib. Me a Rekristiano el mechuodel a ileakl el kmal kirir el kerekikl er tirke el mechitechetong a klaumerang er tir me tirke el mla rullii a oberaod el klengit. (Monguiu er a Jakobus 5:14, 15.) A rebebil a locha kuk mla mo cheroid er a ongdibel e dikea losiou er a Dios. Me a betik a rengul el klekar ngkirel el mekerang? Ngkirel el mo er a tkurrebab el sebechel el osiik er tirka el chad e melisiich er tir me lluut el mei er a ongdibel. A Jesus a dilu el kmo: A “Demmiu el ngar a eanged a diak el soal a tar tirkal mekekerel ngalek a bo leriid.”​—Mt. 18:12-14.

NGUA NGERANG A ULDESUED EL KIREL A CHELITECHETERIR A REMECHUODEL?

11. Ngera uchul me a rebebil a mo meringel er tir el olengesenges er a remechuodel?

¹¹ A Jehovah me a Jesus a klekar el diak a chelitecheterir. Engdi a redi chad el tir a lousbech er tir el mo omekerreu a ongdibel a ngar er ngii a chelitecheterir. Me tiang a sebechel el rulleterir a rebebil el mo meringel er tir el olengesenges er a remechuodel. Ngsebechir el mo omdasu el kmo: ‘A remechuodel a diak lemecherrungel el chad el di uai kid. Me ngera uchul me ngkired el oltirakl a ulekrael el lomeskid?’ Ngmera el tekoi, a remechuodel a diak lemecherrungel, engdi ngdiak el kired el di blechoel el melatk a chelitecheterir.

12, 13. (a) Ngera el cheleuid el tekoi a lurruul a rebekongerachel el mesiungel a Dios er a irechar? (b) Ngera uchul me a Jehovah a mle soal a lemeluches a chelitecheterir tirka el chad er a chelsel a Biblia?

¹² A Bades a bleketakl el ouchais a chelitecheterir a rechad el Jehovah a uluusbech er tir el omekrael er a rechedal er a irechar. El ua tiang, a David a mle ngellitel el king er a Israel, engdi uriul e ngmlo er a klengit el omtok er a Dios. Ngmlo bad el obengkel a bechiil el redil e a uriul e ngmilekodir a bechil ngii el redil. (2 Sa. 12:7-9) Ka kuk molatk er a apostol el Petrus. Ngmlukngerachel el mo meruul a meklou el tekoi er a ongdibel er a Rekristiano, engdi ngdirrek el riruul a cheleuid el tekoi. (Mt. 16:18, 19; Jn. 13:38; 18:27; Gal. 2:11-14) Ngdirkak a lmuut el cherrungel el chad er a uriul er a Adam me a Eva el mei er chelechang, ngdi ta el Jesus.

¹³ Ngera me a Jehovah a mle soal a lemeluches a cheleuid el omerellir a rebebil el bekongerachel el mesiungel er a chelsel a Biblia? A ta er a uchul a kmo ngsoal el meketeklii el kmo ngsebechel el ousbech er a rediak el mecherrungel el chad el mo omekrael er a rechedal. E tiang a di mla omerellel er a uchei. Me chelechang e ngkmal diak el kired el ousbech a chelitecheterir a remechuodel el mo ua luchul e kede mengeremrum er tir me a lechub e ngdiak dongull er sel deruchellir. A Jehovah a mengerechir er kid el mo mengull e olengesenges er tir.​—Monguiu er a Exodus 16:2, 8.

14, 15. Ngera kede suubii er sel rolel er a Jehovah e ngulemekrael er a rechedal er a irechar?

¹⁴ Ngkmal klou a ultutelel el kired el mo olengesenges er a remechuodel. E ngera uchul? Ka di molatk er sel rolel er a Jehovah er a lomesterir a ulekrael a rechedal er a irechar me bo el sebechir el mo suobel er a chelsel a meringel el taem. Sel taem er a letobed er a Ekipten a rechad er a Israel e a Dios a uluusbech er a Moses me a Aron el mo melekoi a tekingel el mo er a rechedal. Te dirrek el mle kirir el mo olengesenges a ulekrael me bo el sebechir el suobel er a temel sel ulebongel el teruich el ringel el mlo er a rechad er a Ekipten. Te mluchelechel el mo meruul er a ileakl el rolel a blsoil, e mo mekodir a sib, e ngmai a rsechel el duiim a chelseklel me a bebul a chesmerel a blirir. Me a Dios ngdi mle melemalt el mengedecheduch er a rechedal? Ngdiak, te mle kirir el orrenges er a remechuodel el tir a millai a ulekrael er a Moses. (Exo. 12:1-7, 21-23, 29) Me nguleak tiaikid el rolel e a Jehovah a uluusbech er a Moses me a remechuodel el mo omekrael er a rechedal. Me chelechang e ngousbech er a remechuodel er a ongdibel el mo meruul er tia el tekoi.

¹⁵ Nglocha dirrek el sebechem el lmatk a lmuut el bebil er a taem el Jehovah a uluusbech er a rechad me a lechub e te anghel el mo omekrael er a rechedal me bo lesobel. Ngar er a chelsel aika el blekeradel e a Dios milsterir a llemeltir a rebebil el mo melekoi a tekingel e dirrek el omekrael er a rechad er a tekoi el kirir el meruul er a chelsel a meringel el taem. Me kid a dirrek el ngar er ngii a ungil el uchul me kede oumerang el kmo a Jehovah a mo meruul a osisiu el tekoi el kirir a rechedal er a taem er a Armakedon. Me a remechuodel el mla mukngerachel el mo omtechei er a Jehovah me a cheldebechelel er chelechang a kmal kirir el kerekikl me lak lousbech er a llemeltir el mo meruul a tekoi el diak el kirir el meruul.

“TAL DELEBECHEL” ME A “TAL MENGKERENGEL A SIB”

16. Ngera el “ngor” a kired el orrenges er ngii?

¹⁶ A rechedal a Jehovah a ua “tal delebechel” el mukrael er a “tal mengkerengel a sib” el Jesus Kristus. (Jn. 10:16) A Jesus a dilu el kmo ngmo obengterir a redisaiplo er ngii “el di blechoel el mo lmuut er a ulebongel er a beluulchad.” (Mt. 28:20) Me ngii el King el ngar er a eanged a uchul me ngar er ngii a klisichel el omekrael a rokui el tekoi el mo duubech er a uchei er a lokngemedii tia el beluulechad er a Satan. Me kede mekerang e mo ta rengud e mukerreu el ngar er a chelsel a cheldebechelel a Dios? A Biblia a kmo: “Kom mo rongesii a ngor el di ngar ulliu el kmo, ‘Tiakid a rael el bo mokiu ngii.’” E tia el “ngor” a uldimukl er a tekoi el lolisechakl er kid a Jehovah el ngar er a Biblia me a dirrek el tekingel ngii me a Jesus el mei el okiu a reklekar el bla lolutk er tir.​—Monguiu er a Isaia 30:21; Ocholt 3:22.

17, 18. (a) Ngera el kdekudel el blekeradel a lechelebangel er ngii a rechedal a Dios? E ngulterekokl a rengud er a ngera el tekoi? (b) Ngera kede mo mesuub er a ongingil el suobel?

¹⁷ A Biblia a melekoi el kmo a Satan a “ua ongumk el laion el osiik er a bo lomerkakl er ngii.” (1 Pe. 5:8) Ngdi ua tebelik e songerenger el charm el omekbat a delebechel el sib e mengiil el mo er sel ungil el taem el bo loldechelakl er a mechitechetong el sib el mla mo cheroid er a delebechel. Tiaikid a ta er a ungil el uchul me ngkmal kired el mo blechoel el kmeed er a ongdibel me a Jehovah el ngii a ‘Mengkerenged e Tebechelel a rengud.’ (1 Pe. 2:25) Me a Ocholt 7:17 a mesaod el kirir tirke el mo suobel er a taem er a kloul ringel el kmo: A Jesus “a mo mengeteklir, e mo ngoititerir el mor a madedok el ralm er a klengar. E a Dios a mo smuld a rokui el chiuosech er a mederir.” Me tiang a kmal mengasireng el telbiil!

¹⁸ Ngkmal klou a ultutelel a ngerechelir a remechuodel el mo omekerreu er a delebechel. Me te mekera tirka el mla metutk el chad e mo ungil el omekerreu a chermel a Jesus el sib? Kede mo onger er tia el ker er a ongingil el suobel.