A Kodall a Diak el Ulebengelel a Rokui el Tekoi!

A Bethania a kekerei el basio el eru el mael a cherridel er a Jerusalem. (Johanes 11:18) A chelebuul el tekoi a dilubech er sei er a sesei el sandei er a uchei er a kodellel a Jesus. A Lasarus el ta er a kmal sechelil a Jesus, a di mle mereched el kmal mo smecher e sola e mlad.

A Jesus er a lekot el rongesii tia el chais, e ngdilu er a redisaiplo er ngii el kmo a Lasarus a mechiuaiu me ngsoal mong el mo olekiis er ngii. (Johanes 11:11) Engdi a redisaiplo er a Jesus a dimlak lodengelii a belkul a tekingel, me a Jesus a mle bleketakl el melekoi el kmo: “A Lasarus a mla mad.”​—Johanes 11:14.

A uriul er a eua el klebesei er a lemedakl, e a Jesus a mlo er a Bethania el mo mengelaod er a Martha, el ochedal ngika el mlad el chad. A Martha a dilu el kmo: “Chomko ke mlar tiang e Rubang, e ng dimlak le mad ochedak!” (Johanes 11:17, 21) A Jesus a ulenger el kmo: “Ngak a okiis er a kodall e klengar. Ngikel oumera er ngak a le mad, e ng dirrek el di ngar.”​—Johanes 11:25.

Me a lolecholt el kmo aike el tekoi a klemerang, e a Jesus a mlo kmeed er a debull e mle klou a ngerel el kmo: “Lasarus, be mtobed!” (Johanes 11:43) Me a rechad a kmal mlo mechas a rengrir er a lesa ngika el mlad el chad el me tuobed er a debull.

A Jesus a ullekiis er a reteru el chad er a uchei. Ngulekisii a ekebil er a kodall, el ngelekel a Jairus. E a uchei er a lokisii er a kodall, e ngdirrek el milsaod el kirel el kmo ngdi mechiuaiu.​—Lukas 8:52.

Ka momtab er a tekingel a Jesus er a losaod el kirel a kodellel a Lasarus me a redil el ngelekel a Jairus, el ulemekesiu er a kodall el mo er a cheliuaiu. E ngera uchul me tiang a kmal ungil el okesiu? A chad el mechiuaiu a diak el lomelechesiu a ngerang me ngmeskid a uldasu el kmo ngolengull er a ringel me a chelebuul. (Olisechakl 9:5; momes er a baks el kmo “A Kodall a Di Uai a Cheliuaiu.”) A redisaiplo er a Jesus a mle medengelii a mera el blekerdelir a rulekoad. A Encyclopedia of Religion and Ethics a kmo: “Tirke el uleltirakl er a Jesus a mle medengei el kmo a kodall a di ua cheliuaiu, me a debull a basio er a ulengull . . . el mo er tirke el mlad el ngar er a klaumerang.”a

Nguchul a ongelaod el kired sel dodengei el kmo a rulekoad a mechiuaiu er a debull me ngdiak lengar er a ringel. Me kede medengei el kmo ngera mo duubech sel demad me ngdikea demedakt er a kodall.

“A LSEKUM NG MAD A CHAD, E NG SEBECHEL LMUUT EL MO CHAD?”

Me alta e ngkmal soad a lungil a cheliued, engdi ngtechang a soal el mo mechiuaiu el mo cherechar? Ngera el omelatk a dobang el kmo a rulekoad el mechiuaiu er a debull a lmuut el mo ngar, el di ua Lasarus me a redil el ngelekel a Jairus?

A Job a dillii tia el ker er a lomelechesiu er ngii el kmedu el mad. Ngdilu el kmo: “A lsekum ng mad a chad, e ng sebechel lmuut el mo chad?”​—Job 14:14.

A Job er a longedecheduch er a Dios el Olab a Bek el Klisiich e ngulenger er a keril er a ledu el kmo: “Cho bo momekedong, e ak mo onger er kau, ng mo ungil a rengum er ngak, el blebelem.” (Job 14:15) A Job a mle ulterekokl a rengul el kmo a Jehovah a uluureng el kirel sel sils el bo lolekiis er tirke el mla mad el blak a rengrir el mesiungel. A Job nguluureng er a tekoi el kmal diak el sebechel el mo tmaut? Ngkmal diak.

A Jesus er a lolekiis er a rulekoad e tia el tekoi a mileketeklii el kmo a Dios a mla msa Jesus a klisiich el mo mesisiich er a kodall. Nguaisei, a Biblia a mesaod el kmo a Jesus a olab a “kiis ra Kodall.” (Ocholt 1:18, BT) A Jesus a mla er ngii a klisichel el olekiis er a Lasarus, me ngdirrek el ngar er ngii a klisichel el mo olekiis er a rulekoad er a ngar er medad el taem.

A Biblia a blechoel el mesaod el kirel a okiis. A anghel a dilu er a profet el Daniel el kmo: “Ke mo mad, e ngdi ke mo mekiis el mo melai omeksullem er sel ulebongel taem.” (Daniel 12:13) A Jesus a dilu er a re Sadusi, el mengeteklir a rechad er a Judea, el tir a diak loumerang er a telbiil el kirel a okiis el kmo: “A uchul me kom cheleuid, kemiu el diak modengei a Chedaol Llechukl el ka modengelii a klisichel a Dios.” (Mateus 22:23, 29) A apostol el Paulus a dilu el kmo: “Ak di ua itir el oumerang er a Dios el kmo a rokuil chad, el ungil ma re mekngit, a mo mekiis er a kodall.”​—Rellir 24:15.

NGOINGERANG E TE MO MEKIIS A RULEKOAD?

Ngoingerang e tia el okiis er tirke el ungil me a remekngit a mo er ngii? A anghel a dilu er a melemalt el chad el Daniel el kmo ngmo mekiis “er sel ulebongel taem.” A Martha a dirrek el uluumerang el kmo a ochedal el Lasarus a “lmuut el mo chad er sel ulebongel sils.”​—Johanes 11:24.

A Biblia a mesaod er a uriul el sils el obengkel a omengederederel a Rengedel a Kristus. A Paulus a milluches el kmo: “Ele ng kirel a Kristus el oba klisiich el mo lmuut er sel bo le relleterir a re cherrouel el rokui el mo mechitechut el le serrochel er tir er eungel ochil. E a cherarou el kmal mo uriul el bo lokngemedii, a kodall.” (1 Korinth 15:25, 26) Tiang a kmal klou el uchul e ngkired el meluluuch me lemei a Rengedel a Dios e lemeketmokl a soal er a chutem.b

A Job a mle ungil el medengei el kmo ngsoal a Dios el mo olekiis er a rulekoad. Me sel lemei sel sils, e a kodall a mera el mo nguemed. E seikid e ngdikea lluut a ngii di el chad el mo oker el kmo, ‘A kodall ngulebengelel a rokui el tekoi?’