OMESODEL A SUOBEL ER A IKREL | A MEKEMAD EL NGILDECHII A BELUULECHAD

Ngike el Mera el Uchul A Mekemad me a Ringel

Sera November 11, 1918, e a Kot el Mekemedil a Beluulechad a mlo merek. A siobai a mlengesimer me a rechad a milloik er a rael. Engdi a ngloik a dimlak lolemolem. A kuk ta er a kdekudel el tekoi, el lmuut el klou a telemellel er a mesil el boes, a di mle mereched el duubech er a uriul er a mekemad er a beluulechad.

A omekodall el rakt el lomekedong er ngii el Spanish flu a uleberk er aike el basio el mla er ngii a mekemad er ngii er a beluu er a France er a June 1918. Tia el rakt a di mle mereched el mocholt el omekodall. El ua tiang, chelsel a sesei el buil, e ngmilekodeterir a rebetok el soldau er a Merikel el ngar er a France el kuk betok er tirke el mlad er a recherrouir. E ngii el rakt a di mle mereched el oberk e le tirke el soldau a ngiluu el mo remei er a rekebelurir er sera bo lemerek a mekemad.

Aike el rak er a uriul er a mekemad a dirrek el mlo er ngii a chelebuul er a klengerenger me a keizai. A betok el beluu er a Europe a mlo olengesonges a kall er ngii er a uriul er a mekemad er a rak er a 1918. E sera rak er a 1923, e a udoud er a Germany a dikea usbechel. A elolem el rak er a uriul, e a keizai er a beluulechad el rokir a miltemall. E sola e sera rak er a 1939, e ngulemuchel a ongeru el mekemedil a beluulechad. Me ngokiu a bebil el rolel e ngomechelel sel kot el mekemedil a beluulechad. Me ngera sel mera el uchul aika el uldekdak el chelebuul?

OLANGCH ER A URIUL SILS

A ulaoch er a Biblia a ngosukid el mo medengei a tekoi el dilubech el kirel a bebil el tekoi er a reksi, e tia ileakl el mera el tekoi el kirel a Kot el Mekemedil a Beluulechad. A Jesus Kristus a ulemlaoch el kirel a taem el ‘meklou el beluu a mo kaumekemad’ me a bosech er a kall me a bekoiueiuul el rakt a mo oberk er a beluulechad el rokir. (Mateus 24:3, 7; Lukas 21:10, 11) Ngdilu er a redisaiplo er ngii el kmo aika el chelebuul a mo olangch el kirel a uriul sils. A lmuut el betok el omesodel a ngar a babier er a Ocholt, el omech er a chelebuul el ngar a chutem el mo er a mekemad el ngar a eanged.—Momes er a baks el “Mekemad el ngar er a Chutem me a Mekemad el ngar er a Eanged.”

Tia el osisiu el babier er a Biblia a mesaod el kirir a reteua el chad el ngar a uos, el lebebil e te mokedong el teua el chad el ngar a uos er a Apocalypse. A retedei er tirka el chad el ngar a uos a omtechei aike el osisiu el chelebuul el Jesus a ulemlaoch el kirel el, mekemad, bosech, me a bekoiueiuul el rakt. (Momes er a baks el “Tirke el Teua el Chad el Ngar er a Uos Te Merael er Chelechang?”) Me ngbleketakl el kmo, a kot el mekemedil a beluulechad a mlo uchelel a ringel el dirk melemolem. Me a Biblia a ochotii el kmo a Satan a ngike el uchul aika el rokui el ringel. (1 Johanes 5:19) Me tia el klisichel ngsebechel el mo meterob?

A babier er a Ocholt a dirrek el oterekeklii a rengud el kmo a Satan a “di kedeb ku temel.” (Ocholt 12:12) Sei a uchul me ngkmal kesib a rengul e dirrek el uchul e ngkmal betok a ringel el ngar tia el chutem. Nguaisei, engdi aika el mondai el domes a dirrek el ochotii el kmo a temel a Satan a kmedu el mo merek.

MO MELEMALL A UREREL A DIABELONG

A Kot el Mekemedil a Beluulechad a mera el mlo uchul a omelodech. Ngmlo uchelel a taem er a mekemad, betok el uldikel me a dirrek el klaumededenger er a rechad el kirir tirke el olab a dereder er a beluu. Ngdirrek el meskid a bleketakl el olechotel a otebedel a Satan er a eanged. (Ocholt 12:9) E ngika el diak lemoues el mengedereder er a beluulechad a ulechotii a blekerdelel el di ua mekngit el merreder el medengei el kmo ngdi kedeb ku temel el mengedereder. Me sel bo lemerek a temel el mengedereder, e aike el taem er a mondai el ulemuchel el obengkel a Kot el Mekemedil a Beluulechad a mo merek.

Me ngoeak a llomes er a ulaoch er a Biblia, e ke ulterekokl el oumerang el kmo a Jesus Kristus el King er kid el ngar a eanged a di kmedung e ngmo “melemall a urerel a Diabelong.” (1 Johanes 3:8) A rebetok el miliol el chad a meluluuch me lemei a Rengedel a Dios. Kau ke meluluuch el uaisei? Kede kmal mereng a saul e le ngokiu sel Renged e a reblak a rengrir el chad a mo mesa soal a Dios, el diak el sel soal a Satan, el mo meketmokl el ngar tia el chutem. (Mateus 6:9, 10) Ngar cheungel a Rengedel a Dios, e ngdiak el luut el mo er ngii a mekemedil a beluulechad me a lechub a ngii di el mekemad. (Psalm 46:9) Mosuub el kirel a Renged, me bo el sebechem el kiei el mesa budech el mo mekekii a beluulechad el rokir!—Isaia 9:6, 7.

Mekemad el ngar er a Chutem me a Mekemad el ngar er a Eanged

A bekord el 19 el dart el rak er a uchei er a lomuchel a Kot el Mekemedil a Beluulechad, e a Satan a ulemsang a Jesus a “rokui el rengedel a beluulchad.” (Mateus 4:8, 9) A Jesus a ultngeklii tia el ongetikaik, engdi a uriul e ngmilsaod er a Diabelong el “merredel er tial beluulchad.” (Johanes 14:30) A apostol el Johanes a dirrek el milluches el kmo “a beluulechad el rokir a ngar eungel Ngikel Mekngit.”—1 Johanes 5:19

E le a Satan el Diabelong a kmal klou a klisichel er a beluulechad, me tiaikid a mo uchul e ngsebeched el melekoi el kmo ngmla er ngii a ngerechelel el kirel a kot el mekemedil a beluulechad me aike el tekoi el dilubech er a uriul er ngii. Me tiang a uchul me a babier er a Ocholt a melutk er a Satan el ngii a uchul aika el chelebuul er a beluulechad el ulemuchel er a rak er a 1914. Aikakid a mekedeb el omesodel a tekoi el dilubech el losaod a Ocholt er a 12 el bliongel.

Bades 7 A mekemad a ulemuchel er a eanged er a delongelel a Mikael (Jesus Kristus) me a drakon (Satan).
Bades 9 A Diabelong el “mengeblad er a beluulchad el rokir” a ulebidokl el me er a chutem.
Bades 12 “Ngdi ng kmal chebuul [a] beluulchad ma daob! Ele Diabelong a mla metengel el ekor kemiu e blekall er a klsiberreng, ele ng medengei el kmo ng di kedeb ku temel.”

A blechebechel a tekoi el dilubech el ngar er a Biblia me a tekoi el dilubech er a beluulechad a ochotii el kmo tia el mekemad er a eanged a mlo er ngii er a uriul er a lomuchel a Rengedel a Dios er a eanged er a rak er a 1914.a Me tiaikid el osisiu el klou a belkul el rak e ngulemuchel a mekemedil a beluulechad me a mekemad el ngar er a eanged.

a Momes er a 8 el bliongel er a babier el Ngerang Mera el Lolisechakl a Biblia? el mirruul er a Resioning er a Jehovah.

Tirke el Teua el Chad el Ngar er a Uos Te Merael er Chelechang?

A becheleleu el uos, el chad el ngar er bebul a king el ngar er a eanged. Ngike el King el Jesus Kristus, a ngike el ngar er ngika uos el meruul a tekoi el mo uchul a llemalt. (Psalm 45:4) Sel kot el tekoi el bo loruul er ngii a mo oldik er a Satan me a remekngit el anghel er ngii er a eanged.—Ocholt 6:2; 12:9.

A bekerekard a bedengel el uos, el chad el ngar er bebul a ngar er ngii a klisichel el mo “orrechii a budech era belulechad.” (Ocholt 6:4, BT) Sera rak er a 1914 el mei er chelechang, e a klechad a mla mo chelebangel a betok el mekemad. A 21 el rak er a uriul er a Kot el Mekemedil a Beluulechad, e a ongeru el mekemedil a beluulechad a ulemuchel e mlo uchul a kodellir a lmuut el betok el chad. A ta el omerriter a kmo a Ongeru el Mekemedil a Beluulechad a mlo uchul a kodellir a bekord el 60 el miliol el chad. Sera rak er a 1945 el mei er chelechang, e a mekemad a melemolem el ngar er ngii er a chelsel a betok el beluu el dirrek el mo uchul a kodellir a rebetok el chad. A rebebil el chad er a reksi a merriter el kmo a kuk betok er a dart el miliol el chad a mlad er aike el mekemad el mla er ngii er a delongelel a rak er a 1901-2000.

A chedelekelek el uos, el chad el ngar er bebul a olab a olebedabel el ngar er a chimal el omtechei a bosech er a kall. (Ocholt 6:5, 6) Sera temel a kot el mekemedil a beluulechad, e tirke el uluumekemad er a rechad er a Germany a mle torob a ngii di el klekedall el mo er tia el beluu me ngmlo uchul e a 750,000 el chad a mlad er a klengerenger. A kuk betok er a eru el miliol el chad er a Russia a mlad er a klengerenger er a rak er a 1921, e a osisiu el tekoi a dirrek el dilubech er a kuk bebil er a beluu. Me ngmla er ngii a bekord el 70 el miliol el chad el mlad er a klengerenger er a delongelel a rak er a 1901-2000. A mekngit el omengelir a rengalek a uchul me a kuk betok er a edei el miliol er tir, el dirkak bo el eim a rekrir a mad er a bek el rak.

A mengeleu a bedengel el uos, el chad el ngar er bebul a mo omekoad el okiu a rakt. (Ocholt 6:8) Sel kot el klou el rakt el mla er a ngii er a delongelel aike el rak er a 1901-2000 a Spanish flu. Ngbetok a kakerous el omerriter el ngar er ngii, engdi a ta er ngii a kmo tia el rakt a milekodeterir a bekord el 50 el miliol el chad. A babier el Man and Microbes a melekoi el kmo: “Tia el rakt a ta er a kot el klou a telemellel el mla duubech er a chelsel a reksi. E le sel rakt el bubonic me ngdimlak di lemereched el mekodeterir a rebetok el chad.” A small pox, malaria, me a TB a bebil er a bekoiueiuul el rakt el mlo uchul a kodellir a rebetok el chad er a delongelel aike el rak er a 1901-2000.