Jehovah​—A Kot el Kmeed el Sechelid

1. Ngera sebeched el meruul e le kid el ulebeob el ‘ua teletelel’ a Dios?

A REBETOK el chad a mesa ngalek el sechal e dmu el kmo: “Ngkmal di ua demal.” Nguaisei, e le rokui el ngalek a mudiukes er a blekerdelir a redemerir me a rederrir. A Jehovah, el Demad el ngar er a eanged, a milskid a klengar. (Psa. 36:9) Me kid el ngelekel a di uai ngii el okiu a betok el rolel. E ngii el milebid el ‘ua teletelel’ a uchul me ngsebeched el ungil omdasu e melilt a tekoi, e dirrek el omak a kmes el deleuill er kid el obengterir a rechad.​—Gen. 1:26.

2. Ngmekerang e sebechel a Jehovah el mo kot el kmeed el Sechelid?

² A Jehovah a sebechel el mo kot el kmeed el Sechelid. Ngsebechel el mo uaisei e le ngkmal betik a rengul er kid me kid a oumerang er Ngii me a Ngelekel. A Jesus a dilu el kmo: “Ele Dios a kmal mle betik a rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.” (Jn. 3:16) Me te betok el chad a ngar er ngii a kmes el deleuill er tir me a Jehovah. Me bo dosuub el kirir a reteru er tir.

“A SECHELIK EL ABRAHAM”

3, 4. Ngera rirellii a deleuill er a Abraham me a Jehovah el kuk mo ngodech er a deleuill er a rechad er a Israel me Ngii?

³ A Jehovah a milsaod el kirel a demerir a rechad er a Israel el kmo “a sechelik el Abraham.” (Isa. 41:8) Me a 2 Kronika 20:7 a dirrek el omekedong er a Abraham el sechelil a Dios. Ngera rirellii a Abraham el mo er ngii a kmes el deleuill er ngii me ngika el Ulemeob? Ngsel mesisiich el klaumerang er ngii.​—Gen. 15:6; monguiu er a Jakobus 2:21-23.

⁴ A klengelakel er a Abraham el ngii a mlo renged er a Israel a dirrek el mle sechelil a Jehovah e Ngii a dirrek el mle Demerir. Engdi ngklengiterreng e le cherengel a taem e te urridii a kmes el deleuill er tir me a Dios. E ngera uchul? E le ngmlo diak loumerang a telbilel a Jehovah.

5, 6. (a) Ke milekerang e mekurulii a deleuill er kau me a Jehovah? (b) Ngera el ker a kired el melatk?

⁵ Sel molemolem el mesuub el kirel a Jehovah, e nglmuut el smisichii a klaumerang er kau e lmuut el dochelii a bltkil a rengum el mo er ngii. Ka di molatk er sera cho momuchel el suubii el kmo a Dios a di ua mera el Chad el sebechem el omak a kmes el deleuill er kau el obengkel. Ke silubii el kmo kede rokui el uldiukes er a klengit e le Adam el mlo diak lolengesenges. Ke dirrek el mlo medengei el kmo a ruumesingd el chad a diak a deleuill er tir me a Dios. (Kol. 1:21) Ke mlo melechesuar el kmo a betik a rengul el Demam el ngar er a eanged a diak lecheroid er kau, e dirrek el kmal semeriar er kau. Me sera desuubii el kmo a Jehovah a tilengetengii a Ngelekel e dokurulii a klaumerang er kid er a olubet el tenget, e kede ulemuchel el omak er a delongeled el obengkel a Dios.

⁶ Sel dolatk er a rolel e kede mlo medengelii a Jehovah, e ngungil a di lekid el oker el kmo: ‘Ngak ak meleketek er a deleuill er ngak me a Dios? Ngmesisiich a klaumerang er ngak el bedulngii? Me a bltkil a renguk el mo er ngii ngmukeroul er a bek el sils?’ A Gideon a ta er a chad el kmal mle kmes a deleuill er ngii me a Dios. Me bo dosuub el kirel me bo el sebeched el oukerebai er ngii.

“A RUBAK A BUDECH”

7-9. (a) Ngera el ileakl el tekoi a dilubech el mo er a Gideon, me ngera mlo rsel? (Momes er a siasing er a uchelel a suobel.) (b) Ngmekerang e sebeched el mo sechelil a Dios?

⁷ A ta er a mengeteklel a beluu el Gideon a milsiou er a Jehovah er a chelsel a meringel el taem er a uriul er a lesiseb er a Beluu er a Nglat a rechad er a Israel. A rechad er a Midian a ulemcheracheb er a rechad er a Israel e dirrek el mla mo betok el taem el lesiseb er a belurir el oldechelakl er tir. Sei a uchul me a Gideon a milleakl a budel a wheat er a chelsel a omeseokl er a bilong el dimlak lengar er a sers me bo el sebechel el di mereched el omart aike el ungil el wheat. Me a 6 el bliongel er a Mengeteklel a mesaod el kmo a anghel er a Jehovah a mlo oldingel er a Gideon er a beluu er a Ofra. Me a Gideon a kilebetiekl er a be le duum er ngii a anghel e lomekedong er a Gideon el “bekeu el chad.” Me alta e a Jehovah a ulsebelterir a rechad er a Israel er a beluu er a Ekipten, engdi a Gideon a dimlak loumerang el kmo Ngii a mo ngosuterir er seikid el taem. Me a anghel a milengedecheduch el omtechei er a Jehovah el ulterekeklii er a Gideon el kmo a Dios a mo ngosuir.

⁸ A Gideon a dimlak lodengei el kmo ngmekerang e mo sebechel el “osebelii a Israel er a re chad er a Midian.” Me a Jehovah a mle bleketakl a nger er ngii el kirel tiang el kmo: “Ele ngak a mo ngosukau. Ngdi mo beot er kau el tomelleterir a re chad er a Midian el di ua le tal chad.” (Men. 6:11-16) Ngdirk mle rrau a rengul a Gideon el kirel tia el tekoi me ngullengit er a Dios me lebsa olangch. Ngsebeched el omtab er tia el cheldecheduch e mo ulterekokl a rengud el kmo a Gideon a ulemes er a Dios el ua mera el Chad.

⁹ A tekoi el dilubech er a uriul er tiang a liluut el smisichii a klaumerang er a Gideon e okesengii a deleuill er ngii me a Dios. A Gideon a riruul a kelel a anghel e ngmai el msang. Me a anghel a ngiluu a skersel el melul aika el kall. Me sera bo lodengei a Gideon el kmo ngika el anghel a luldureklii a Dios, e ngmlo medakt me ngdilu el kmo: “Rubak el DIOS! Ak meral mla mesa er a medak a anghel er kau!” (Men. 6:17-22) Me a tekoi el dilubech ngtilemellii a deleuill er a Gideon me a Jehovah? Ngkmal dimlak! Ngbai mlo melechesuar el kmo ngbudech a deleuill er ngii me a Dios. Kede medengelii tiang e le olengetongel el letileketekii a Gideon a lulemekedong er ngii el kmo, “A RUBAK a Budech.” (Monguiu er a Mengeteklel 6:23, 24.) Me a lsekum e kede melatk a bek el tekoi el loruul a Jehovah el mei er kid er a bek el sils, e ngmo ua kot el kmeed el Sechelid. Me sel deblechoel el meluluuch el mo er Ngii, e a budech er a rengud me a kmes el deleuill er kid el obengkel a lmuut el mukeroul.

NGTECHA SUBED EL MO ER A TEMPLO ER A JEHOVAH?

10. Ngerang a llechul a Jehovah el kirir tirke el sorir el mo sechelil el llechukl er a Psalm 15:3, 5?

¹⁰ A Jehovah a ngar er ngii a llechul el kirir tirke el sorir el mo sechelil. Ngar er a cheliteklel el llechukl er a Psalm 15, e a David a milsaod aike el tekoi el kired el meruul me bo lesubed er kid el mo er a templo er a Jehovah. (Psa. 15:1) Me chelechang e bo dosaod a eru er aika el tekoi el kmo: mo melemalt a omerelled e diak doltuub er a rechad. Ngmilsaod a tekoi el kirel a chad el soal el mo sechelil a Dios el kmo: Ngkirel el “diak lolaes er a re bebil er a re chad” e “diak le mecheluch el mo sioning el omtok er a diak a telemellel.”​—Psa. 15:3, 5.

11. Ngera uchul me ngmekngit a doltuub er a rechad?

¹¹ Ngar er a ta er a Psalm e a David a dilu el kmo: “Le mereko omelekoi el mekngit.” (Psa. 34:13) A lsekum ngdiak dolengesenges er tia el omellach e ngmo uchul a telemellel a deleuill er kid me a Demad el ngar er a eanged. Nguaisei, a otuub a blekerdelel ngike el kot el ngaruchei el cherrouel a Jehovah el ngii a Satan el Diabelong. A tekoi el “Diabelong” a mengai er a tekoi er a Grik el belkul a kmo, “chad el oltuub.” Me ngsebeched el omekerreu er a deleuill er kid me a Jehovah sel dekerekikl a tekoi el dolekoi el kirir a rechad. E ileakl el kmal kired el kerekikl a uldesued el kirir a rudam el lullilt er tir a Dios el mo omekerreu er a ongdibel.​—Monguiu er a 1 Thesalonika 5:12; Hebru 13:17.

12, 13. (a) Ngera uchul me ngkired el mo melemalt a omerelled er a bek el taem? (b) Ngera mo duubech sel lemelemalt a omerelled?

¹² A remesiungel a Jehovah a lodengelterir a rechad el kmo te melemalt el chad. A apostol el Paulus a milluches el kmo: “Moluluuch el kiram, a ki oumera el kmo a ki oba klikiid lukltkam, me ngsomam el melemalt loureor el kirel a ngiidil tekoi.” (Heb. 13:18, BT) Me kid el soad el mo “melemalt loureor el kirel a ngiidil tekoi” a uchul, me ngdiak dongeblad er a rudam er kid el Kristiano. El ua tiang, a lsekum e te oureor el mei er kid e ngkired el mo ungil a omerelled el mo er tir e dirrek el omdoud er tir er sel ildois el kid a tilbir el mo er tir. Me kid el Kristiano a uchul me ngkirel el mo melemalt a omerelled el mo er a rechad el oureor el mei er kid me a rokui el chad. Me a lsekum kede kuk oureor el mo er a rekldemed el Kristiano e ngdiak el kirel el mo mekngit a omerelled e di dongerechir er tir el meruul a ungil el mei er kid.

¹³ A rechad er a beluulechad a blechoel el chemat er a Resioning er a Jehovah el kirel a melemalt el omerellir. El ua tiang, a ta el director er a klou el kombalii a mla mtebengii el kmo a Resioning er a Jehovah a oltaut a telbilir me ngdilu el kmo, “Kemiu a blechoel el oltirakl a telbiil el moruul.” (Psa. 15:4) Sel doruul a llemalt e ngosukid me kede melemolem el sechelil a Jehovah e dirrek el mo uchul a omengebkall el kirel ngika el betik a rengul el Demad el ngar er a eanged.

MNGESUTERIR A RECHAD EL MO SECHELIL A JEHOVAH

14, 15. Sel domerk er a klumech e kede mekerang e ngosuterir a rechad el mo sechelil a Jehovah?

¹⁴ Sel doldingel a obliil e kede metik er a rechad el oumerang el kmo ngar er ngii a Dios, engdi a rebetok er tir a diak lomes er Ngii el ua lekot el kmeed el Sechelirir. Me kede mekerang e ngosuterir? Me bo domes a ulekrael el Jesus a milsterir a rebebil el disaiplo er ngii er sera loldurech er tir el derterung el mo omerk er a klumech el kmo: “Sel bo mtuu er a bek el blai e kom omuchel el dmu el kmo, ‘A budech le mer tial blai.’ E a lsekum ng ngar ngii a chad el kiei er ngii el soal a budech, e a budech er a klauetkeu er kemiu a mor ngii, ngdi lsekum ng diak, e a budech a lmuut el ekor kemiu.” (Lk. 10:5, 6) A rechad a locha mo sorir el mesuub el kirel a klemerang a lsekum ngungil a omerelled el mo er tir. Me a lsekum kede meruul a ungil el mo er tirke el omtok er kid e nglocha sebechel el rulleterir el mo diak lekesib a rengrir e mo kongei el orrenges er a kuk ta er a taem.

¹⁵ Sel debetik er a rechad el kmal mesisiich el chedal a klechelid er tir, e ngkired el melemolem el meruul a ungil el mo er tir. Ngdmeu a rengud el outkeu er a rokui el chad el mei er a miting er kid, e ileakl el mo er tirke el mla tmurk a rengrir er a blekeradel er tia el beluulechad me ngmla mo sorir el mesuub a lmuut el betok el kirel a Dios el dongull er ngii. A suobel el “A Biblia a Melodech er a Klengar er a Rechad” el ngar er aika el babilenged a mesaod el kirir a rebetok el uaisei el chad.

OUREOR EL OBENGKEL A KOT EL KMEED EL SECHELID

16. Kede mekerang e mo sechelil a Jehovah e dirrek el ‘kldemel er a ureor’?

¹⁶ A rechad el dmak el oureor a blechoel el mo kmes a deleuill er tir. Me tirke el rokui el mla tuib a rengrir el mo er a Jehovah a sechelil e dirrek el ‘kldemel er a ureor.’ (Monguiu er a 1 Korinth 3:9.) Sel domerk er a klumech e doruul er a remo disaiplo, e kede mesuub a lmuut el betok el ungil el blekerdelel a Demad el ngar er a eanged. Kede dirrek el mo medengelii a rolel e a chedaol klisichel a ngosukid el mo merkii a ungil chais.

17. Ngmekerang aika el meklou el ongdibel e ochotii el kmo a Jehovah a Sechelid?

¹⁷ Sel deblechoel el omerk er a klumech e nglmuut el okesengii a deleuill er kid me a Jehovah. Ngsebeched el mtab a omerellel a Jehovah sel lorrob er tirke el sorir el melemall er tia el ureor. Ngbleketakl el kmo ngomekrael er kid, me kid a dirrek el mechas a rengud er a rolel a lolemolem el olisechakl er kid el okiu a miting me a babilenged. Ngar er aike el meklou el ongdibel er kid e kede mesang el kmo a Jehovah a kmal ungil el medengei a mondai er kid me aike el dousbech. A uriul er a ta er a klou el ongdibel e a ta el telungalek a milluches el kmo: “Aike el prokuram el tilobed a kmal rirutech a rengmam. Aki mlo melechesuar el kmo a Jehovah a kmal betik a rengul er a derta er kid e soal a bo lungil a klengar er kid.” Me a uriul er a ta er a ileakl el klou el ongdibel er a beluu er a Ireland, e a ta el obekel el mla er a Dois a uleba omereng el saul el kirel a ungil el omerellir a rechad er sel beluu el mo er tir. Te dilechelii el kmo: “Engdi a kot el klou el omereng el saul a mo er a Jehovah me a King er ngii el Jesus Kristus. Te mla mekedongemam el mo chedal tia el cheldebechel el oba kltarreng. Me ngdiak di dosaod el kirel a kltarreng e kede bai omelechesiu er ngii er a bek el sils. Me a bek el tekoi el ki blo momelechesiu er sera ki bo er a ongdibel er a beluu er a Dublin, a mo blechoel el omeklatk er kemam er a ileakl el techall el ki mobang el mo mesiou er ngika el kot el ungil el Dios el teloi er kemiu.”

A REKAUSECHELEI EL CHAD A BLECHOEL EL CHADECHEDUCH

18. Ngera el ker el kirel a rolel a cheldecheduch er a delongeled kid me a Jehovah a kired el melatk er ngii?

¹⁸ A rekausechelei el chad a mo kmes a deleuill er tir sel leblechoel el chadecheduch. Chelecha el sils, e a rechad a blechoel el chadecheduch el okiu a Internet me a dirrek el text. Me ngua ngerang a rolel a cheldecheduch er a delongeled kid me ngike el kot el kmeed el Sechelid el Jehovah? Ngii a “onger a nglunguuch.” (Psa. 65:2) Me kid kede blechoel el mengedecheduch er a Jehovah?

19. Ngera sebechel el ngosukid a lsekum e ngmeringel er kid el ouchais a uldesued sel doluluuch el mo er a Jehovah?

¹⁹ A rebebil el mesiungel a Dios a meringel er tir el mesaod aike el tekoi el kmal ngar er a rengrir. Engdi a Jehovah a soal a doruul er tiang sel doluluuch. (Psa. 119:145; Kle. 3:41) A Paulus a milluches el mo er a Rekristiano er a beluu er a Rom el kirel a tekoi el sebechel el ngosukid a lsekum e ngmeringel er kid el mesaod aike el ngar er a rengud. Ngmilluches el kmo: “Le ngdiak dodengei el kmo kede mlekera doluluuch el ngar sel kirel, ngdi Reng a smodid loba diak le medu el ngingd. Me ngikel merriter a reng rar chad a medengei a ikel lolebedebek a Reng, le Reng choltirakl a uldesuel a Dios el meluluuch el mesaod el kirir ar mechedaol.” (Rom 8:26, 27, BT) Me sel donguiu a babier er a Biblia el ua Job, Psalm, me a Osisechakl, e ngosukid el mo meduch el olecholt a uldesued el mo er a Jehovah.

20, 21. Ngmekerang e mengelaod er kid a tekingel a Paulus el ngar er a Filipi 4:6, 7?

²⁰ Sel bo dechelebangel a mondai e ngungil a dolatk a tekingel a Paulus el mo er a rechad er a Filipi el kmo: “Lak el sebek a rengmiu er a ngii di le ngerang, e bai molengit er a Rubak er a bek el nglunguchiu, a ikel mousbech, el di blechoel el mereng a sulel.” Ngmo mechelaod a rengud sel doluluuch el mo er a Jehovah el oltirakl er tiaikid el rolel. A Paulus a milluches el kmo: “A budech er a Dios, el diak el sebechel a chad el mo cherrungel el medengelii, a mo mtebechel a rengmiu ma uldesuiu el oltirakl er a Kristus Jesus.” (Fil. 4:6, 7) Me ngkmal kired el mo oba omereng el saul el kirel tia el “budech er a Dios” el ngii a omekerreu a rengud me a uldesued.

²¹ A nglunguched a ngosukid el okesengii a deleuill er kid me a Jehovah. Misei e “moluluuch el di blechoel.” (1 Th. 5:17) Ngkmal kired el melemolem el melisiich er a deleuill er kid me a Dios e meruul a soal. E dongoit a taem el melatk aike el klengeltengat el dengai e le kid el oudios er a Jehovah el ngii a Demad, Dios er kid, e dirrek el Sechelid.