A NGER ER AIKE EL KER ER A BIBLIA
Ngmekerang a kodellel a Jesus e mo uchul a klungioled?
A Dios er sera lomeob er a rechad, e ngmle soal a bo lekiei el diak a ulebengelel el ngar er a chutem el diak bo lecharm er a secher me a lechub a kodall. Engdi ngike el kot el chad, el Adam a dimlak lolengesenges er a Omebelel me ngurridii sel omelatk el mo kiei el diak a ulebengelel. Me kid el uldidellel a rsechel a Adam a uchul me kede oudiukes er a kodall el mla er ngii el mei. (Rom 5:8, 12; 6:23) A mera el Dios, el Jehovah, a uldureklii a Ngelekel el Jesus, el me er a chutem el mo mad e mecherar sel tekoi el lurridii a Adam.—Monguiu er a Johanes 3:16.
A Jesus a mlad me bo el sebechir a rechad el mo nguu a diak a ulebengelel el klengar. Ngua ngera osengem el kirel a klengar el diak a ulebengelel el ngar er a chutem?
A kodellel a Jesus a milskid a techall el kirel a klausubes er a kngtid me a klengar el diak a ulebengelel. A Biblia a meskid a olechotel a blekerdelel a klengar el ngar er a chutem sel bo lak decharm a ringelel a cheluodel, secher me a kodall.—Monguiu er a Isaia 25:8; 33:24; Ocholt 21:4, 5.
Kede mekerang a bo dolatk er a kodellel a Jesus?
Sel kesus er a uchei er a lemad, e a Jesus a dilu er tirke el ulebengkel el mo melatk er a kodellel el okiu a beot el rolel. Me sel bo dedak el uaisei el melatk er a kodellel a Jesus er a bek el rak, e ngrullid el mo melatk er sel bltikerreng er a Jesus me a Jehovah el kirel a klechad.—Monguiu er a Lukas 22:19, 20; 1 Johanes 4:9, 10.
Chelecha el rak e a Chedaol Blsoil er a kodellel a Jesus a mo er ngii er a Kot el Ureor, April 14, er a uriul er a lengelt a sils. Aki mengemedaol er kau el mei el mo teloi er a Resioning er a Jehovah el kmeed er a basio er kau.—Monguiu er a Rom 1:11, 12.