Ngsebechel a Chad el Mesa Ngar Medad el Klebesei?

Kid el rokui a melatk el kirel a ngar medad el klebesei. Kede melatk el kmo ngmo ua ngera klengar er kid me a rebetik er a rengud. Kede dirrek el mo oker a chouaika el ker el kmo: ‘A rengelekek te mo kiei er a lmuut el ungil el beluulechad? Tia el chutem ngmo metemall er a klou el tellemall? Ngar er ngii a kmung ngerang el sebechek el ngodechii er chelechang el mo uchul e ngmo ungil a ngar medak el klebesei?’ Tia el blekeradel el soad el mo medengei a tekoi, a ta er a telengtengil a klengar er kid, e le ngsoad a budech me a ungilbesul el klengar. Omko ngulterekokl a rengum er a tekoi el mo duubech er a ngar medam el klebesei, e ngsebechem el kutmeklii a rengum e dirrek el kutmeklau el kirel.

Me ngera mo duubech er a ngar medam el klebesei? Ngar er ngii a chad el sebechel el mo medengelii? A remeduch el chad el leko ngar er ngii a ileakl el klisichir el omlaoch a tilaut a bebil er a ulochir engdi a betok er ngii a dimlak el taut. Engdi a rechad a melekoi el kmo a Dios a sebechel el omlaoch el kirel a mera el tekoi el mo duubech er a ngar medad el klebesei. A Tekingel a melekoi el kmo: “Ngar sel kmal uchelel e ak uluuchais er a mo rsel; ak di mla ouchais er a mo duubech.” (Isaia 46:10) Me a ulochel a Dios ngulterekokl a otutel?

A ULOCHEL A DIOS A ULTEREKOKL A OTUTEL

Ngera me ngkirem el mo semeriar er a dechal a Dios el oltaut a ulochel? Ka me dolatk er tiang. Omko ke miltik er a chad el omes a blekerdelel a eanged el blechoel el klemerang a lolekoi el kirel a bek el sils, e ke mo mechas a rengum. Ke locha mo kerekikl el melatk aike el bo lolekoi el kirel a blekerdelel a eanged er a klukuk. Me ngdi osisiu, omko ke mo medengei el kmo a Dios a mla omlaoch a tekoi e mle cherrungel a otutel, e ke ulterekokl el mo semeriar a ulochel el kirel a ngar medad el klebesei.

A TELEMELLEL A KLOU EL MATS:

El uaitiang, ngkmal ileakl el tekoi a lsekum e ngsebechel a chad el mera el omlaoch el kmo a klou el mats, el mla mo betok el dart el rak el lemesisiich a mochu nguemed. Ngoeak a ta er a melekingel, e a Dios a ulemlaoch er a chouaitia el tekoi el kirel a telemellel a Ninive. (Sefania 2:13-15) Me ngera te mla lemuches a rechad er a reksi? Sera rak er a 632 er a uchei er a Kristus, el locha mle 15 el rak er a uriul er a lomlaoch a Dios, e a rechad er a Babilon me a Media a mlo oldechelakl er a beluu er a Ninive e mlo mesisiich. Me a lmuut el tang, a uchei er a leduubech tia el tekoi e a Dios a mileketeklii el kmo a Ninive a di mo “cheloit el beluu, el medirt el beluu el diak a ralm er ngii.” Me tia el tekoi ngtilaut? Ochoi, e le alta e tia el mats me aike el beluu el ngar er a ikrel a mle kmeed el 60 el mael a klungel el meliuekl, engdi tirke el mlo mesisiich er tia el beluu a dimlak lousbech er ngii, e te bai tilemellii. Ngsebechel a ngii di el chad el merriter a tekoi er a balatiks el mera el omlaoch el kmo aika el tekoi a mo duubech?

NGMO MEDUL A CHIUESIR A RECHAD:

Me ngtecha ngike el kmal bekeu el di 300 el rak er a uchei e ngouchais er a ngakl me a klengelakel el lengar er ngii ngike el chad el mo melul a chiuesir a rechad el ngar er a olengetongel, el uldimukl er a ngklel a beluu el lengar er ngii tia el olengetongel? Omko a chouaitia el ulaoch a mlo klemerang, e ngike el chad el ulemlaoch a kmal mo merael a chisel. Ngike el melekingel a Dios a uluuchais el kmo: “A ngalek el sechal el Josia a ngklel a mo mechell er a blil a David . . . , e ngii a mo melul a chiuesir a re chad” er a olengetongel el ngar er a beluu er a Bethel. (1 King 13:1, 2) Me a bekord el edei el dart el rak er a uriul, e a king el ngklel a Josia, el ngakl el diak desal metik er ngii er a Biblia, a mla er a klengelakel er a David el mei. Me ngdi uai aike el mla er a ulaoch, a Josia a miles a “bebil el debull el ngar a bukl er isei me ng dilu me ng mengai a chiuis er ngii el mo medul er bebul ngiil olengetongel” el mla er a Bethel. (2 King 23:14-16) Ngmekerang e sebechel a ngii di el chad el omlaoch el kirel aika el tekoi a lsekum e ngdimlak lemukrael el okiu a klisiich el kuk ngarbab er a rechad?

A ULEBENGELEL A KLOU EL RENGED:

Ngmera el mo mechas a rengud omko ngar er ngii a chad el sebechel el mera el omlaoch e mo medengelii a ngklel a chad er a uchei er a lemechell, el ngii el chad a mo oungerachel er a telemellel a klou el renged, e dirrek el mo medengelii sel ileakl el rolel a bo loruul er tiang. A Dios a uluuchais el kmo a chad el ngklel a Sairus a mo oldechelakl er a ta er a renged. A Sairus a dirrek el mo oltobed er a resibai el chad er a Judea e mo melisiich er a ureor el lmuut el toketekii a chedaol templo. Me a Dios a ulemlaoch el kmo a rolel a bo loumekemad a uldimukl er a lomekdirt aike el omoachel, me a siseball a diak bo lemechesimer, me bo lebeot er tir el mo mesisiich. (Isaia 44:27–45:2) Me aika el betok el tekoi el lulemlaoch a Dios ngmera el tilaut? A rechad er a reksi a kongei el kmo aika el tekoi a mera el dilubech. A resoldau er a Sairus a mera el ullecholt er a duch er tir er a lotucheklii a ralm er a omoachel er a Babilon, el mlo uchul me aike el omoachel a di mlo medirt. Me a lmuut el tang, tirka el soldau a tiluu er tia el mats el okiu a siseball el dimlak lechelsimer. A uriul er itiang, e a Sairus a ultebedeterir a Rechijudea e uluuchais el kmo ngsebechir el lmuut el toketekii a templo er tir er a Jerusalem. Tiang a mera el mle ngodech el tekoi e le Sairus a dimlak losiou er a Dios er a Rechijudea. (Esra 1:1-3) Ngtechang, ngdiak di el ta el Dios a mle sebechel omlaoch a chouaika el tekoi el ngar er a reksi?

Kede mla smaod a edei el olechotel a rolel a Dios a lomlaoch el kirel a mera el tekoi el mo duubech er a ngar medad el klebesei. Engdi ngdiak di el ikaikid el ulaoch a tilaut e lemerekong. A Josua el mengeteklir a rechad er a Judea a millekoi er a tekoi el ble lodengelii sel klou el seked el ulerrenges er ngii el kmo: “Kemiu el rokui a medengei er a rengmiu ma chomeltkiu el kmo ng diak a tar a ikel rokui el le tilib a RUBAK el Dios er kemiu el kiriu el dimlak bo le tekoi. Ng rokui el le tilib a di mlo ungilbesul el dimlak a tal mlor ngii a ngelsengesel.” (Josua 23:1, 2, 14) A rechedal a Josua a dimlak el sebechir el oumededenger er a dechal a Dios el oltaut a telbilel me a ulochel. Engdi ngmekerang a Dios a loruul er tiang? Ngkmal klou a klekakerous er a rolel a Dios me a rechad. E tiang a klou a ultutelel a obo modengelii, e le Dios a mla ouchais a meklou a ultutelel el tekoi el kirel a ngar medad el klebesei el ngar er ngii a bo lerellii el kirem.

A ULOCHEL A DIOS ME A LECHUB A ULOCHIR A RECHAD

A ulochir a rechad a blechoel el ultuil er a tekoi el uai a omesuub er a science, omerriter er aike el ngar er ngii el ocholt, me a lechub a diak el mera el klisiich el omlaoch el kirel a ngar medad el klebesei. Me a rechad sel bo lemerek el omlaoch, e te mo dengchokl e diak a ngera el loruul er ngii el mengiil el kmo ngera mo duubech.​—Osisechakl 27:1.

Engdi a Dios a kuk ngodech er a rechad, e le ngmedengei a rokui el tekoi. Ngungil el medengei a teletelir me a urungulir a rechad, me sel bo lolilt el mo omes er a ngar medad el klebesei, e ngsebechel el mesa el kmo ngera ngmo meruul er ngii a chad me a lechub a meklou el renged. Engdi a Dios a sebechel el remuul a lmuut el betok er aikang. Ngsebechel el omekrael me a lechub e ngmodech a tekoi me ngmeketmokl el oltirakl er sel soal. Ngmelekoi el kmo: A “tekingek el kulekoi er ngii, ng diak le iit el rullii sel kulemdasu er ngii el kirel; ng mo remuul a bek el kuldurech er ngii el mo meruul.” (Isaia 55:11) Me a bebil er a ulochel a Dios a ua louchais el kmo ngera ngmo meruul er ngii er a ngar medad el klebesei. Ngulterekokl el kutmokl a tekoi me ngblechoel el tmaut.

A NGAR MEDAM EL KLEBESEI

Ngar er ngii a ulterekokl el ulaoch el kirel a ngar medam el klebesei el kirem kau me a rebetik er a rengum? A lsekum e ngdi mle uchei e ke mo medengei el kmo ngmo er ngii a klou el eolt, e ngsebechem el meruul a tekoi el mo uchul a osebelem. Ngsebechem el meruul er a osisiu el tekoi el kirel a ulaoch er a Biblia. A Dios a mla ouchais el kirel a klou el omelodech er a beluulechad el rokir el di kmedung e ngmo er ngii. (Momes er a baks el dai er ngii a kmo: “Aike el Bla Locholt a Dios el Kirel a Ngar Medad el Klebesei.”) Tia el ngar medad el klebesei el losaod er ngii a kmal ngodech er aike el tekoi el bla lomlaoch tirke el leko te omlaoch el kirel a ngar medad el klebesei.

Nglocha sebechem el melatk er ngii el uai tiang: A Jehovah a ngar er ngii a moktek er ngii el llechukl er a Tekingel el sebechem el mo er ngii e menguiu el kirel a mo ulebengelel tia el moktek er ngii. A Dios a ouchais el kmo: “Sel kmal uchelel e ak uluuchais er a mo rsel; . . . Ak dilu el kmo a ikel uldesuek a kmal diak bo le metom; ak mo remuul a bek el kullatk el mo meruul.” (Isaia 46:​10) Kau me a telungalek er kau a sebechiu el mo oldeu a rengmiu er a ngar medemiu el klebesei. Molengit er a Resioning er a Jehovah me louchais el kmo ngera ngmelekoi a Biblia el kirel aike el tekoi el di kmedu el mo duubech. A Resioning a diak a ileakl el klisichir el omlaoch el kirel a ngar medad el klebesei me a lechub e lolekoi el kmo te orrenges a ngodech el ngor. Tirkang a mesuub er a Biblia me ngsebechir el ocholt er kau aike el ungil el tekoi el loruul a Dios el kirel a ngar medam el klebesei.