A NGER ER AIKE EL KER ER A BIBLIA

A Jesus, ngmera el ullekiis er a rulekoad?

A Biblia a kmal bleketakl el mesaod el kmo a Jesus a ullekiis er a rulekoad el lmuut el me ngar. E aikang a diak el delbochel el cheldecheduch, e ngbai mera el dilubech el tekoi e le ngar er ngii a omesodel a temel me a basio el ledilubech er ngii aika el tekoi. El ua tiang, ngar er a rak er a 31, e a klou el seked a uleltirakl er a Jesus el ngar er a rael er a Kapernaum el mo er a Nain. Ngar er isei e te mlo metik er a lmuut el ta er a klou el seked. Ngsebeched el oumerang er tia el cheldecheduch el kirel a okiis, e le ngllechukl er a Tekingel a Dios el Biblia, e dirrek el mla er ngii a rebetok el chad el milsa tia el tekoi er a lemeketmokl.​—Monguiu er a Lukas 7:11-15.

A Jesus a dirrek el ulekisii a sechelil er a Lasarus el mle ulekoad el eua el klebesei. Ngsebechem el oumerang er a tekoi el lerirellii a Jesus er sel sils e le te dirrek el mle betok el chad a ulemes er ngii.​—Monguiu er a Johanes 11:39-45.

Ngera uchul me a Jesus a ullekiis er a rulekoad?

A Jesus a kmal mle chubechubechad a uchul me ngmle soal el olekiis er a rulekoad. Ngdirrek el mirruul el uaisei e le ngulemeketakl er ngii el kmo, a Demal el ngii a Uchul a klengar, a milsang a klisiich el olekiis er a rulekoad.​—Monguiu er a Johanes 5:21, 28, 29.

A omerellel a Jesus el ullekiis er a rulekoad a oterekokl a rengud er a telbiil el ledilung el kirel a ngar medad el taem. Ngmo olekiis er a rebetok el chad, el uldimukl er tirke el dimlak lodengelii a mera el Dios. Me ngmo er ngii a techellir el mo medengelii a Jehovah el Dios e mo betik a rengrir er ngii.​—Monguiu er a Rellir 24:15.