A Uchul Me Kede Meruul er a Chedaol Belsoil

1, 2. Ngera ngmirruul a Jesus er sel kesus er a Nisan 14 er a rak er a 33? (Momes er a siasing er a uchelel a suobel.)

NGAR er a Jerusalem er sel kesus er a Nisan 14 er a rak er a 33, e ngmle orakiruu. A Jesus me a rechapostol er ngii a milengedaol er a Baskua, el ngii a taem el mle kirir el melatk er sel rolel er a Jehovah er a lotebedeterir a rechad er a Israel er a beluu er a Ekipten er a 1,500 el rak er a uchei. Me sera bo lemerek e a Jesus a mirruul er a ileakl el belsoil el obengterir tirke el 11 el blak a rengrir el apostol er ngii. E tia el belsoil a mle kirir tirka el ulebengkel el mo meruul er ngii er a bek el rak el omeltkir el kirel a kodellel a Jesus.​—Mt. 26:1, 2.

² A Jesus a milluluuch, e mirrous er a blauang el mo er a rechapostol er ngii, e dmu el kmo: “Mnguu me monga er ngii.” E sola e ngiluu a kob, e mirreng a sulel a Dios, e nguu el mesterir, e dilu el kmo, “Molim er ngii kemiu el rokui.” (Mt. 26:26, 27) A blauang me a bilong a mla er ngii a ileakl el belkul. Me tirke el apostol er a Jesus a siluub a betok el meklou a ultutelel el tekoi er isel kesus.

3. Ngera el ker a bo dosaod er tia el suobel?

³ A Jesus a mle soal a redisaiplo er ngii a bo lolatk er a kodellel er a bek el rak, e tiang a mlo okedongall el “Chedaol Belsoil.” (1 Ko. 11:20) Me ngmo duubech a bebil el ker el kmo: Ngera uchul me ngkired el melatk er a kodellel a Jesus? Ngera belkul a blauang me a bilong? Kede mekerang a dongetmokl er a Chedaol Belsoil? Te rua techang a sebechir el melai a blauang me a bilong? E mekerang a Rekristiano e ochotii el kmo te oba omereng el saul el kirel a omelatk el lobang?

A UCHUL ME KEDE MELATK ER A KODELLEL A JESUS

4. Ngera ngrullii el kired a kodellel a Jesus?

⁴ Kid el ngelekel a Adam a uchul me kede rokui el mludiukes er a klengit me a kodall. (Rom 5:12) Me ngdiak a chad el sebechel el kokedir sel blsel a kngtil me a lechub e ngkngterir a rebebil me lak lemad. (Psa. 49:6-9) Engdi a Jesus a tilengetengii a cherrungel el klengar er ngii el kired, e uldersii a kerresel a rsechel el mo er a Dios. Me tiaikid a mlo uchul me ngmlo er ngii a techelled el mo kiei el mo cherechar el mimokl er a klengit me a kodall.​—Rom 6:23; 1 Ko. 15:21, 22.

5. (a) Kede mekerang e medengei el kmo a Dios me a Jesus a betik a rengrir er kid? (b) Ngera uchul me ngkired el mo er a Chedaol Belsoil?

⁵ A Dios a ulechotii a bltkil a rengul el mo er a rechad er a leketmeklii a olubet el tenget. (Jn. 3:16) Me a bltkil a rengul a Jesus el me er kid a dirrek el mocholt er a lekengei el tongetengii a klengar er ngii el kired. A uchei er a lemei er a chutem, e a Jesus a ‘ulebotech a rengul er a re chad.’ (Osi. 8:30, 31) Me kede kmal oba omereng el saul el kirel a tekoi el bla leruul a Jehovah me a Jesus el kired! Sei a uchul me kede mo er a Chedaol Belsoil el olengesenges er a tekingel a Jesus el kmo: “Moruul er tiang el kirel a omeltkiu er ngak.”​—1 Ko. 11:23-25.

A BELKUL A BLAUANG ME A BILONG

6. Ngua ngerang a klemedengei er kid el kirel a blauang me a bilong er a Chedaol Belsoil?

⁶ Ngar sel ulebongel el blengur er tir e a Jesus a dimlak loruul a mengasireng el tekoi el omult er a blauang el mo bedengel me a lechub e lulemult er a bilong el mo rsechel. A doltirakl a bebil el Biblia e a Jesus a milsaod er a blauang el kmo: “Tiang a bedengek,” e dirrek el milsaod er a bilong el kmo: “Tiang a rsechek.” (Mk. 14:22-24) Engdi ngbleketakl el kmo a blauang me a bilong a di okesiu.a

7. Ngera ngomtechei er ngii a diak a omkukel el blauang?

⁷ Ngar seikid el ileakl el kesus, e a Jesus a uluusbech a diak a omkukel el blauang el derengel aike el blauang er a Baskua. (Exo. 12:8) A lebebil er a taem e a Biblia a ousbech a omkukel a blauang el omekesiu er a klengit. (Mt. 16:6, 11, 12; Lk. 12:1) Me a blauang el dimlak a omkukel a luluusbech er ngii a Jesus el omekesiu er a bedengel el dimlak a kngtil. (Heb. 7:26) Seikid a uchul me kede ousbech a diak a omkukel el blauang er a temel a Chedaol Belsoil.

8. Ngera ngomtechei er ngii a bilong?

⁸ A Jesus a uluusbech er a bilong el omekesiu er a rsechel me a lechub e ngklengar er ngii el di uaike el bilong el dousbech el meruul er a Chedaol Belsoil er chelecha el taem. Ngar er a Golgatha el basio er a ikrel a Jerusalem e a Jesus a mlad el kired e tilengetengii a klengar er ngii “el kirel el melubet a klengit.” (Mt. 26:28; 27:33) Me a lsekum kede oba omereng el saul el kirel tia el ileakl el sengk e kede mo ungil el kutmeklid er a bek el rak el kirel tia el ileakl el kesus. Me ngmekerang a doruul er tiang?

A BEBIL EL ROLEL E KEDE KUTMEKLID EL KIREL A CHEDAOL BELSOIL

9. (a) Ngera uchul me ngkired el menguiu aike el mla meketmokl el omengiuel a Biblia el kirel a Chedaol Belsoil? (b) Ngua ngera uldesuem el kirel a olubet el tenget?

⁹ A ta er a rolel e kede kutmeklid el kirel a Chedaol Belsoil a sel donguiu aike el mla meketmokl el omengiuel a Biblia el kirel a Chedaol Belsoil el ngar er a Examining the Scriptures Daily. Me sel donguiu aika el cheldecheduch er a Biblia e ngmo ngosukid el melatk aike el tekoi el lurruul a Jesus er a uchei er a kodellel.b A ta el odos a milluches el kmo: “Kede kmal omes el beduluchei el kirel a Chedaol Belsoil. Bek el rak e ngmengal mo mekreos a osenged el kirel. Ak melatk er sel taem er ak dechor . . . el omes er a demak el mla mad e kmal mlo oba omereng el saul el kirel a olubet el tenget. . . . Ak kmal ungil el medengei a bades e dirrek el kmal sebechek el mesaod. Engdi sel taem er a bo kulechesuar a kngtil a renguk el kodall a uchul e ngmera el mlo dmeu a renguk sel kulatk aike el ungil el tekoi el mo meketmokl el okiu a olubet el tenget.” Me sel dongetmokl er kid el kirel a Chedaol Belsoil e ngklou a ultutelel a dolebedebek er a klungiaol el bo dengai el okiu a olubet el tengetengel a Jesus.

10. Ngera lmuut el sebeched el meruul el kutmeklid el kirel a Chedaol Belsoil?

¹⁰ A ta er a rolel e ngsebeched el kutmeklid el kirel a Chedaol Belsoil a menglou a temed er a omesiunged, e mo mengemedaol er a rebetok el chad el mei er a Chedaol Belsoil. Nglocha sebeched el mo auxiliary pioneer. Sel dongedecheduch er a rechad el kirel a Dios me a Ngelekel me a dirrek el omelatk el kirel a diak a ulebengelel el klengar, e ngkmal mo dmeu a rengud e le kede medengei el kmo kede meruul er a tekoi el soal a Dios a doruul er ngii.​—Psa. 148:12, 13.

11. Ngera uchul me a Paulus a millekoi el kmo a rebebil el mla er a Korinth a mirrekakl er a rolel a omenga el blauang me a omelim el bilong?

¹¹ Me sel dongetmokl er kid el kirel a Chedaol Belsoil, e ngsoad el melatk a tekoi el lulluches a Paulus el mo er a Rekristiano er a Korinth. (Monguiu er a 1 Korinth 11:27-34.) Ngdilu el kmo, a lsekum a chad a meterekakl a omerellel sel longa blauang e lolim a bilong, e ngmo mukerrekeriil e le ng “mor a klengit el merrekakl er a bedengel ma rsechel a Rubak.” Me a lsekum a ta er a ngellitel a meruul a mekngit el tekoi e melemolem el menga blauang e melim er a bilong, e ngdi “ngii el mo olechau er a belsel el kirel sel omengelel ma omelmil.” Sel taem er a Paulus e a rebetok el chad er a Korinth a mirruul a mekngit. A rebebil er tir a locha mlo imis el omengur e melim er a uchei, me sel temel a Chedaol Belsoil, me te locha mle mesulaul. Me a omerellir a dimlak lolecholt a omengull el kirel tia el ileakl el kesus. Me sel taem er a lolai aika el klekedall e a Dios a kmal dimlak lekengei a omerellir.

12. (a) A Paulus ngulemekesiu er a Chedaol Belsoil el mo er a ngerang? E ngera el uleklatk a ledillii el mo er tirke el mle ngellitel er sel taem? (b) A lsekum a chad el menga blauang e melim a bilong er a Chedaol Belsoil a mo ruebet er a oberaod el klengit, e ngkirel el mo mekerang?

¹² A Paulus er a longelechel er tirke el ngellitel e ngulemekesiu er a Chedaol Belsoil el mo er a blengur, me ngdilu el kmo: “Ng diak el sebechiu el melim er a kebengel a Rubak, e mo melim er a kebengel a mekngit el chelid. Ng diak el sebechiu el omengur er a tebelel a Rubak, e kuk mo omengur er a tebelel a mekngit el chelid.” (1 Ko. 10:16-21) Me a lsekum a chad el menga blauang e melim a bilong er a Chedaol Belsoil a ruebet er a oberaod el klengit e ngkmal kirel el mo olengit a ngeso er a remechuodel. (Monguiu er a Jakobus 5:14-16.) Me a lsekum ngmo chemolt er a omerellel el kmo ngmera el mla obult er a kngtil, e ngdiak a telemellel sel bo longa blauang e lolim er a bilong er a temel a Chedaol Belsoil.​—Lk. 3:8.

13. Ngera uchul me ngkired el meluluuch el mo er a Dios el kirel a omelatk el bla lebeskid?

¹³ Ngsebeched el mengetmokl er kid el kirel a Chedaol Belsoil sel doluluuch e dolatk el kirel a omelatk el bla lebeskid a Dios. Ngkmal diak el soad el mo meterekakl er a olubet el tengetengel a Jesus. Me ngkmal diak el kired el menga blauang e melim er a bilong a lsekum ngdiak el ulterekokl a rengud el kmo kede ta er a rengellitel. Me te rua techang a kirir el melai a blauang me a bilong?

TE RUA TECHANG A KIRIR EL MELAI A BLAUANG ME A BILONG?

14. A rengellitel el chedal a beches el telbiil, te mo mekerang er a temel a Chedaol Belsoil?

¹⁴ Tirke el melai a blauang me a bilong er a Chedaol Belsoil a kmal ungil el medengei el kmo te chedal a beches el telbiil. A Jesus a milsaod el kirel a bilong el kmo: “Tiang a kob er a beches el telbiil er a rengedel a deleuill el okiu a rsechek.” (1 Ko. 11:25) A Jehovah a rirellii a Llach er a telbiil el obengterir a rechad er a Israel, engdi a uriul e ngmlo mtechir el oba beches el telbiil. (Monguiu er a Jeremia 31:31-34.) Ngmirruul er tia el beches el telbiil el obengterir a rengellitel el tir a “Israel ra Dios.” (Gal. 6:15, 16, BT) Me a kodellel a Jesus a uchul me ngmlo sebechel el oureor tia el telbiil. (Lk. 22:20) Me a Jesus a ngike el Deleuill er tia el beches el telbiil. Me tirke el blak a rengrir el ngellitel el chedal a beches el telbiil a mo obengkel a Jesus el ngar er a eanged.​—Heb. 8:6; 9:15.

15. Te rua techang a chedal a telbiil el kirel a Renged? E ngera el ileakl el techall a lobang a lsekum te melemolem el blak a rengrir?

¹⁵ Tirka el ngellitel a medengei el kmo te dirrek el chedal sel telbiil el kirel a Renged. (Monguiu er a Lukas 12:32.) Tia el telbiil a mileketmokl er a delongelel a Jesus me tirke el mle blak a rengrir el oltirakl er ngii, el tir a dirrek el ‘ulebengkel er a ringelel.’ (Fil. 3:10) Me tirke el blak a rengrir el ngellitel er chelechang a dirrek el chedal tia el telbiil. Te mo king el obengkel a Kristus el ngar er a eanged el mo cherechar. (Och. 22:5) Tirkang a rredemelel a menga blauang e melim er a bilong er sel temel a Chedaol Belsoil.

16. Mtelkib el mesaod er a belkul a Rom 8:​15-​17.

¹⁶ Me a rengellitel a kmal ulterekokl a rengrir el kmo te ngelekel a Dios e dirrek el sebechir el melai a blauang me a bilong. (Monguiu er a Rom 8:15-17.) A Paulus a dilu el kmo te omekedong er a Dios el kmo: “Abba! Chedam!” A tekoi er a Aramaic el “Abba” a olechotel a bltikerreng el ua tekoi el “bapa,” e dirrek el olechotel a omengull el ua tekoi el “chedam.” Tiang a olechotel a ileakl el deleuill er a delongelir a rengellitel me a Jehovah er sel taem er a ‘lerelleterir el mo ngelekel.’ Me a reng er a Dios a “dmu” er tir, me a lechub e ngoterekokl a rengrir el kmo, te ngellitel el ngelekel. Tiang a diak lebelkul a kmo ngchetirir el kiei er a chutem. Te bai medengei el kmo a lsekum te blak a rengrir el mo lmuut er a kodall e te mo king el ngar er a eanged el obengkel a Jesus. Te dirrek el medengei el kmo a Jehovah a mla ngilteterir. Me chelechang e te ngar er ngii a redi mekesai er tirke el 144,000 el ngelekel a Dios el dirk ngar tia el chutem. (2 Ko. 1:21; Och. 14:1) Te melechesuterir el kmal kmeed er a Jehovah me te omekedong er ngii el “Abba, Chedam!”

MONGREOS ER A OMELATK EL MOBANG

17. Ngerang a omeltkir a rengellitel? E te mekerang e medengei el kmo te ngellitel?

¹⁷ A lsekum kau a ngellitel el Kristiano, e ke di blechoel el mesaod el kirel a omelatk el mo er a eanged er a chelsel a nglunguchem. E a Bades a mo blechoel el ngar er ngii a ileakl el belkul el kirem. El ua tiang, a lsekum a Biblia a mesaod el kirel a chebechiil el ngar er a eanged er a delongelel a Jesus me a ‘redil el mo bechil,’ e ke medengei el kmo tia el tekoi a melutk el kirem me ke semeriar el mo teloi er ngii. (Jn. 3:27-29; 2 Ko. 11:2; Och. 21:2, 9-14) Me a lechub e a Biblia a mesaod el kirel a bltkil a rengul a Dios el mo er a rengellitel, e ke medengei el kmo ngmelekoi el kirem. Me a lechub e ke menguiu a ulekrael el ileakl el kirir a rengellitel el ngar er a Tekingel a Dios, e a chedaol reng a rullau me ngmo soam el olengesenges ngii el ulekrael. Ngdirrek el oterekeklii a rengum el kmo a omelatk el mobang a mo er a eanged.

18. Ngera el omelatk a lobang a ‘rekuk bebil el sib’? E ua ngera uldesuem el kirel tia el omelatk?

¹⁸ A lsekum ke chedal a “kloul seked” er a ‘rekuk bebil el sib,’ e a Dios a mla meskau a omeltkem el mo kiei er a Baradis el chutem el mo cherechar. (Och. 7:9; Jn. 10:16) Ngua ngera uldesuem el kirel tiang? Ngmo dmeu a rengum sel molatk aike el tekoi el losaod a Biblia el kirel a Baradis el chutem. Ke omes el beduluchei el mo kiei el teloi er a rechedam me a resechelim er a chelsel a beluulechad el mui er a budech. Ngkmal soam el mo mesa sel taem el bo lak a klengerenger, me a chelebuul, me a ringel, me a secher me a kodall. (Psa. 37:10, 11, 29; 67:6; 72:7, 16; Isa. 33:24) Ke mera el mengiil er sel taem el mo sebechem el mesterir a rebetik er a rengum el mekiis er a kodall. (Jn. 5:28, 29) Ke dirrek el oba klou el omereng el saul el mo er a Jehovah el kirel tia el ileakl el omelatk! Me alta e ngdiak molai a blauang me a bilong er a temel a Chedaol Belsoil, engdi ke mong e le kau el oba omereng el saul el kirel a olubet el tengetengel a Jesus.

ME KAU, KE MONG?

19, 20. (a) Ngmekerang e sebechem el mo kiei el mo cherechar? (b) Ngera uchul me ke mo er a Chedaol Belsoil?

¹⁹ A lsekum ngsoam el mo kiei el mo cherechar el ngar er tia el chutem me a lechub e ng eanged, e ngkmal kirem el mo ochotii a klaumerang er kau er a Jehovah el Dios, me a Jesus Kristus, me a olubet el tenget. Me sel obo er a Chedaol Belsoil, e bo molebedebek er tia el omeltkem me sel klungel a ultutelel a kodellel a Jesus. A uriul er a ngeltel a sils er a Ongeim el Ureor er a April 3, 2015, e a rebetok el miliol el chad el meliuekl er a beluulechad a mo er a Chedaol Belsoil, el mo er ngii er a Blil a Ongdibel er a Resioning er a Jehovah me a lmuut el bebil er a basio.

²⁰ Me a lsekum ke mo er a Chedaol Belsoil e nglmuut el mo dmolech a omereng el saul er kau el kirel a olubet el tengetengel a Jesus. Me sel leblak a rengum el orrenges er a cheldecheduch el mo motobed, e ngmo soam el oubltikerreng el mo er a rechad el okiu sel mouchais er tir el kirel a bltkil a rengul a Jehovah me a moktek er ngii el kirel a klechad. (Mt. 22:34-40) Mada mketmeklau me bo el sebechem el mong.