A Prokuram Er A Omesubel A Biblia El Mo Er A Rokui El Chad

A rechad a medengelterir a Resioning er a Jehovah el blechoel el merael el lousioning er a buai. Engdi ke medengei el kmo ngdirrek el ngar er ngii a prokuram el meliuekl er a beluulechad el rokir el ki moruul er ngii el lolisechakl er a rechad el kirel a Biblia?

Chelsel a rak er a 2014 e ngbekord el 8,000,000 el Sioning er a chelsel a 240 el beluu a milsuub a Biblia el obengterir a rebekord el 9,500,000 el chad er a bek el buil.a A ildisir a rechad el mesuub a Biblia el obengkemam a lmuut el betok er a ildisir a rechad er a chelsel a 140 el kakerous el beluu!

Ngsebecham el meruul er tia el ureor er a osisechakl, e le ki oltobed a bekord el 1.5 el biliol el Biblia, me a babier, me a magazine, me a kuk bebil er a babier el mesaod er a Biblia er a bek el rak, el ngar er a bekord el 700 el omelekoi. Tia el kmal ungil el diak a mekesiur el ureor a uchul me a rechad a sebechir el mesuub er a Biblia el ngar sel omelekoi el sorir.

AIKANG A NGER ER A KERRIR A RECHAD EL KIREL TIA EL PROKURAM ER A OMESUBEL A BIBLIA.

Ngua ngerang a oketmeklel tia el omesubel a Biblia?

Aki merriter a kakerous el suobel el ousbech aike el bades el mesaod er ngii el suobel. El ua tiang, a Biblia a meskid a nger er a ker el ua: Ngtecha Dios? Ngua ngera blekerdelel? Ngar er ngii a ngklel? Ngkiei er ker? Ngsebeched el olekeed er kid er ngii? Engdi ngkired el mo medengei el kmo kede metik a nger er a keskelel a Biblia.

Me kede blechoel el ousbech er sel babier el Ngerang Mera el Lolisechakl a Biblia?b me bo el sebeched el ngosuterir a rechad el metik a nger er a kerrir. Tia el babier a mle ileakl a oketmeklel el sebechel ngosuterir a rechad el mo medengei a osisecheklel a Biblia. Ngar er a chelsel e ngar er ngii a suobel el kirel a Dios, me a Jesus Kristus, me a ringelir a rechad, me a okiis, me a nglunguuch, me a lmuut el betok.

Ngoingerang e ngar er ker e ngsebechel ngar er ngii tia el omesubel a Biblia?

Tia el omesuub a sebechel el ngar er ngii er a taem me a basio el ungil el kirem.

Ngua ngera klemengetel a bek el omesubel a Biblia?

A rebetok el chad a mla eklii a ta el sikang me a lechub e ngkuk betok er a ta el sikang er a bek el sandei el mo mesuub er a Biblia. Engdi a temel tia el omesuub a sebechel el mengodech. Aki meruul er ngii el oltirakl er a ungil el temem. A rebebil a mesuub el di 10 me a lechub e ng 15 el bung er a bek el sandei.

Ngtela cheral tia el omesuub?

Tia el omesubel a Biblia me aike el babier el bo mousbech a diak locheraol. Tiang a oltirakl er a ulekrael er a Jesus el mo er a redisaiplo er ngii el kmo: “Ng dimlak momechar a ikel ilekor kemiu, me lak bo locheraol a cho momesterir a re chad.”​—Mateus 10:8.

Ngua ngera klemengetel tia el prokuram er a omesubel a Biblia?

Ngsebechem el melemolem el mesuub el mo er sel soam el taem. A babier el Ngerang Mera el Lolisechakl a Biblia? a ngar er ngii a 19 el suobel er a chelsel. Ngsebechem el melilt el mo mesuub a ngii di el ta er aika el suobel me a lechub e ngii el rokui.

Ngak ngkirek el mo ta er a Sioning er a Jehovah?

Ngdiak. Aki mengull er a llemeltir a rederta el chad el di tir el melilt aike el sorir el mo oumerang. Engdi a rechad el ngar er ngii a klemedengei er tir er a Biblia a sebechir el melilt el kmo ngsorir el melodech er a klechelid er tir me a lechub e ngdiak.

Ngar er ker a sebechek el ngmai a betok el omesodel a omesubel a Biblia?

A Web site el jw.org/pau a omesterir a rechad a melemalt el klemedengei el kirel a tekoi el loumerang me a loruul a Resioning er a Jehovah.

Ak mekerang e olengit a omesubel a Biblia?

• Molengit a omesubel a Biblia er a online el ngar er a www.jw.org/pau.

• Moluches el mo er sel address el kot el kmeed er kau el llechukl er a 2 el llel tia el magazine.

• Mosiik er a “Jehovah’s Witnesses” er a babier er a dengua er a beluu a lsoam el omekedong er tir.