Aki ngmai a udoud er ker el melemolem er a omesiungam?

Bek el rak, e aki oltobed e merous a betok el miliol el Biblia me a babier el mengai a uchetemel er a Biblia. Aki dirrek el omekedechor e omtebechel a branch office me aike el blai el oltobed a babilengam er a beluulechad el rokir. Betok el telael el ongdibel a mo dmak el ngar er a ungil a oketmeklel e klebokel el basio er a omengull el okedongall el Blil a Ongdibel. Aki ngmai a udoud er ker el melemolem er a omesiungam?

A ureram a meketmokl el okiu a tengetengir a rechad. (2 Korinth 9:7) Sera 1879, e a ongeru el otebedel tia el babier el monguiu er ngii a millekoi el kmo: “Aki oumerang el kmo a JEHOVAH a omekrael er a rolel e ngmeketmokl a ‘Zion’s Watch Tower’ me ngdiak ki bo molengit er a rechad el kirel a ngeso.” Aki dirk oltirakl er tia el tekoi.

A bek el tenget a modurokl el mo er a ta er aike el branch office er kemam me a lechub e ngmo er a blil a tenget el ngar er a derta el Blil a Ongdibel. Engdi ngdiak ki momelecha ongeltacher, e ki morael el melai a tenget, me a lechub e ki mongerechir a udoud el kirel a ureram me a lechub a babilengam. Ngdiak ki muduudel el omerk er a klumech, e olisechakl er a ongdibel, me a lechub e ki momekedechor a blil a omengull. E le Jesus a dilu el kmo: “Ng dimlak momechar a ikel ilekor kemiu, me lak bo locheraol a cho momesterir a re chad.” (Mateus 10:8) A rokui el chad el mesiou er a branch office me sel klou el obis er kemam, el uldimukl er a Chelechad er a Ruungerachel, a dirrek el diak el uduudel.

Aika el tenget a dirrek el ki mousbech el olengeseu aike el miltemall el beluu. A Rekristiano er a irechar a kmal mle dmeu a rengrir el olengeseu er a rechad el chillebangel a ringel. (Rom 15:26) Kemam me aki dirrek el uaisei el olengeseu er a choua tirkaikid el chad el oeak sel ki momekedechor a blirir me a blil a omengull er tir e ki momesterir a kelir, bilir, me a kerrir.