A Nglunguuch​—Ngera Ngrullii er Kau?

A uchei er a omoluluuch el kirel a ngii di el tekoi, e ke locha mo melatk el kmo, ‘Tiang ngerang ngrullii er ngak?’ Tia el nglunguchek ngochotii el kmo ak di melatk er a di ngak? Ngdiak leuaisei. Kid a ulebeob el soad el mo medengei el kmo a tekoi el doruul ngungil me a lechub e ngdiak. Ngmo lmuut er a melemalt el chad el Job me ngdirrek el mle ta el lolekoi el kmo: “Ng diak bo kuumerang el kmo ng mo orrenges er ngak.”​—Job 9:16.

Ngar er aike el mereko el suobel e kede milsaod a olechotel el kmo a nglunguuch a diak di el siukang er a klechelid me a lechub e ngtekoi el sebechel el mengellakl a uldasu. A mera el Dios a uaisei el lorrenges a nglunguuch. Me a lsekum kede meluluuch el okiu a melemalt el rolel e dirrek el oltirakl a soal e ngmo rongesid. Ngii el Dios a kmal soal a dolekeed er kid er ngii. (Jakobus 4:8) Me ngera mo duubech a lsekum kede rullii a omeluluuch el mo tedebechel a klengar er kid? Ka me bo dosaod a bebil el klungiaol el sebeched el ngmai.

Ngmengellakl a uldesued.

Kau, ngkmal mo suebek a rengum sel bo mchelebangel a mondai me a omelsemai er a klengar? Ngar er chelsel aika el taem e a Biblia a melisiich er kid el kmo, “moluluuch el di blechoel” e dirrek el ‘olengit er a Rubak er a bek el nglunguchiu, a ikel mousbech.’ (1 Thesalonika 5:17; Filipi 4:6) A Biblia a dirrek el mengelaod er kid el kmo a lsekum kede meluluuch el mo er a Dios e “a budech er a Dios, el diak el sebechel a chad el mo cherrungel el medengelii, a mo mtebechel a rengmiu ma uldesuiu.” (Filipi 4:7) Me ngsebechel el mo mechelaod a rengud sel douchais a rokui el tekoi el suebek a rengud er ngii el mo er a Demad el ngar er a eanged. E Ngii a kmal melisiich er kid el mo meruul er tia el tekoi, el ua lolekoi a Psalm 55:22 el kmo: “Bsa RUBAK a berredem, e ng mo ngosukau.”

Te ngar er ngii a diak lemochur a ildisir el chad el mla chormii tia el budech er a uldesuir. A Hee Ran er a beluu er a South Korea a kmo: “Alta e ak mo chelebangel a meringel el mondai, engdi sel kululuuch el kirel e ngmo kebekakl a uldesuek e mo melechesukak el ngar er ngii a klisichek el outekangel.” A Cecilia er a beluu er a Huriping a dmu el kmo: “Ngak el chedil a uchul me ngblechoel el suebek a renguk er a rengelekek el redil me a dirrek el delak el kmal chudelang me ngdikea ledengchak. Engdi ngokiu a nglunguuch e ngmo sebechek el kutmokl aike el ngerechelek er a bek el sils el diak di lesebek a renguk. Ak medengei el kmo a Jehovah a mo ngosukak el omekerreu er tir.”

Ngmengelaod e melisiich er a temel a omelsemai.

Me kau, ke chelebangel er a meringel el tekoi el sebechel el mo uchul a kodall me a lechub e ngmeringel el blekeradel? Sel doluluuch el mo er a Dios “el Chedam er a klechubechub,” e ngsebechel el chemolodii a rengud. A Biblia a dirrek el dmu el kmo: A Dios a “olengeseu er kid er a rokui el chelebuled.” (2 Korinth 1:3, 4) El ua tiang, a ta el taem e a Jesus a kmal mlo meringel a uldesuel me ngmlo “outubuach e meluluuch.” Me ngera mlo rsel? “A tal anghel a mlar a eanged el mo duum er ngii e millisiich er ngii.” (Lukas 22:41, 43) Me a blak a rengul el Nehemia a chilarm e le remekngit el chad a ulemekdakt er ngii e millasem el merrob er ngii me lak loruul er a urerel a Dios. Me ngmilluluuch el kmo: “Dios msisichii a renguk.” Me a tekoi el dilubech er a uriul a ulechotii el kmo a Dios a mera el ngilsuir me ngmlo diak lemedakt e mlo sebechel el kutmeklii a urerel. (Nehemia 6:9-16) A Reginald er a beluu er a Ghana a mesaod el kirel a tekoi el bo lolechesuar er sel taem el loluluuch el kmo: “Sel kululuuch el ileakl el ngar er aike el taem el kchelebangel a meringel el tekoi, e ngua dedu el kmo ak mla subedii a chad er a mondai er ngak. E ngii el chad a sebechel el ngosukak e dirrek smisichak me ngmo diak el sebek a renguk.” Ngmera el tekoi, a Dios a sebechel mengelaod er kid sel doluluuch el mo er ngii.

A llomeserreng el mla er a Dios.

A bebil er a omelilt el doruul a sebechel el ngar er ngii a lerellii er kid me tirke el betik er a rengud. Me ngmekerang e mo sebeched el ungil el melilt a tekoi? A Biblia a kmo: “A le ngar ngii er kemiu olengesonges er a llomeserreng [el ileakl el sel taem el lechelebangel a omelsemai], e lolengit er a Dios, me le bsang; ele Dios a ungil a tekingel el diak a le kiresii er a ngii di le chad.” (Jakobus 1:5) A lsekum kede meluluuch el olengit er a llomeserreng, e a Dios a sebechel el ousbech er a chedaol reng er ngii el omekrael er kid me kede mo ungil el melilt a tekoi el doruul. A mera er ngii e ngsebeched el olengit er a chedaol reng er ngii e le Jesus a oterekeklii tia el tekoi er a ledu el kmo: “A Demmiu el ngar a eanged a [mo mesterir] a Chedaol Reng tirkel olengit er ngii!”​—Lukas 11:13.

A Jesus me ngdirrek el mlo olengit a ngeso er a Demal er sel taem el mlo kirel el meruul er a klou el rolel a omelilt. Me a Biblia a ouchais el kmo sera bocha lolilt er tirke el 12 el chad el mo apostol er ngii e “ng mle tal kesus el loluluuch el mor a Dios.”​—Lukas 6:12.

A rebetok er chelechang a di ua Jesus el mo mechelaod a rengrir sel lesa rolel e a Dios a onger a nglunguchir, me ngmo sebechir el ungil el melilt a tekoi el loruul. A Regina er a beluu er a Huriping a mesaod a kakerous el mondai er ngii. Ngkirel el omekerreu er a telungalek er ngii, e mla mad a bechil e mla mo diak a urerel e dirrek el kmal betok a mondai er ngii el kirel a okurulir a rengelekel. Me ngera el tekoi a ngosuir el mo ungil el melilt a tekoi? Ngdmu el kmo: “Ak kmal ultuil er a ngelsuil a Jehovah el okiu a nglunguuch.” A Kwabena er a beluu er a Ghana, a mesaod er a uchul me ngolengit a ngeso er a Dios el kmo: “Ak urridii a ungil el urerek el omekedechor a blai.” Me sel lolatk el kirel a rolel a omelilt el loruul e ngdmu el kmo: “Ak di blechoel el meluluuch el mo er a Jehovah el kirel a melemalt el ulekrael. Ngkmal ulterekokl a uldesuek el kmo a Jehovah a ngosukak el mo ngiltii a ungil el urerek me ngmo sebechel a deleuill er ngak lobengkel el melemolem el mesisiich e dirrek el mo sebechek el smiik aike el kuusbech er a klechad.” Me kau, me ngdirrek el sebechem el nguu a ulekrael er a Dios el okiu sel moluluuch el ouchais er ngii aike el tekoi el ngar er ngii a lerellii er a deleuill er kau me ngii.

Me kede mla smaod a bebil el tekoi el nglunguuch a sebechel el kutmokl el kirem. (A lsoam a lmuut el omesodel e momes er a baks el “A Klungiolel a Nglunguuch.”) Engdi a kot e ngkirem el mo medengelii a Dios me aike el tekoi el soal a omoruul e mochu sebechem el ngmai aika el klungiaol. Me a lsekum ngsoam, e bo mongedecheduch er a ta er a Resioning er a Jehovah me bo losuub a Biblia el obengkem.a Tiang a sebechel el rullau el mo kmeed er a Dios el ngike el ‘onger a nglunguuch.’​—Psalm 65:2.