OMESODEL A SUOBEL ER A MEDAL TIA EL BABIER

Ngua Ngera Uldesuel a Dios el Kirel a Mekemad?

Ngmekera omonger er tia el ker? A rebetok a omdasu el kmo a Dios a kongei a mekemad. Te mesaod el kmo, a Dios a uleldurech er a rechedal er a irechar el mo oumekemad; e a Biblia a dirrek el ouchais el kirel ngii el omeruul. A rekuk bebil a mtebengii el kmo a Jesus el Ngelekel a Dios a ullisechakl er a rulebengekel el mo betik a rengrir er a recherrouir. (Mateus 5:43, 44) Me te omdasu el kmo ngmlo er ngii a taem e a Dios a ngildechii a uldesuel el kirel a mekemad, me chelechang e ngdikea lekengei er ngii.

E kau a kuk ngua ngera uldesuem? A Dios, ngkongei me ngar er ngii a mekemad? A lsekum nguaisei, e omomdasu e ngolab el mo er a rua techang er a chelsel aika el betok el mekemad er a beluulechad er chelechang? Sel bo modengelii a nger er aika el ker e ngulterekokl el ngar er ngii a lengedechii er a uldesuem el kirel a mekemad. El ua tiang, oleko ke medengei el kmo a Dios a kongei a mekemad e dirrek el mesebechakl er a beluu el kau a mesebechakl er ngii, e nglocha kmal ungil a rengum e dirrek el medengei el kmo ngmo mesisiich a beluu el mosebechakl er ngii. Engdi ngmo ua ngera uldesuem oleko ke mo medengei el kmo a Dios a mesebechakl er a ngodech el beluu el diak el beluam? Ngulterekokl el soam el mo ungil el melebedebek er tia el tekoi.

Sel bo modengelii a uldesuel a Dios el kirel a mekemad e ngdirrek el ngar er ngii a bo lengedechii er a uldesuem el kirel a Dios. A lsekum ke ta er tirke el betok el miliol el chormang el mekemad a uchul, e ngulterekokl el kmal soam el mo medengelii a nger er a ker el kmo: A Dios ngkmal soal a loumekemad a rechad me a lechub e ngmelisiich a ringel el mekemad a uchul, me a lechub e a Dios ngdiak lomekerreu er a rechormang el mekemad a uchul?

Nglocha mo mechas a rengum sel bo modengei el kmo a nger er a Biblia a kmal ngodech er aika el rokui el uldasu. Ngmera el tekoi, a Dios a dirkak lemengodech a uldesuel el kirel a mekemad er a irechar el me lmuut er chelechang. Me bo domes a tekoi el losaod a Biblia el kirel a mekemad er a irechar me sel taem er a rekot el Kristiano er a dirk lengar er a chutem a Jesus. Aika ngosukid el mo medengelii a uldesuel a Dios el kirel a mekemad er chelechang. Kede dirrek el mo mesang el kmo a mekemad ngmo melemolem el tedebechel a klengar er a rechad er a ngar medad el klebesei me a lechub e ngdiak.