OMESODEL A SUOBEL ER A MEDAL TIA EL BABIER | NGERA UCHUL ME NGKIREL MELEMALT A OMERELLED?
Ngdikea Ultutelel a Melemalt el Omeruul?
A Hitoshi a uluureor er a ta el obis er a accounting er a beluu er a Siabal. Ngmle chadecheduch ngii me a merrederel, e a merrederel a mle soal a bo longeblad sel loruul a report er ngii. Engdi a Hitoshi a dimlak lekengei el meruul er tia el blulak el tekoi. Me tiang a mlo uchul a ngesechel a rengul a merrederel, e a uriul e ngurridii a urerel.
A sesei el buil er a uriul, e ngkmal mlo mekngit a rengul a Hitoshi, e le ngdimlak lebetik er a urerel. Ngmlo er ngii a techellel el mo er a interview er a ta el ureor, e dilu el kmo ngkmal diak el sebechel el oureor el mengeblad. Me ngike el chad el mle interview er ngii a dilu el kmo, “Kau a mera el ngodech a uldesuem el chad!” A telungalek er a Hitoshi me a resechelil a millisiich er ngii me lolemolem el meruul a llemalt, engdi ngii a mlo telkib el rrau a rengul. Ngulemdasu el kmo: “Kele lak lungil tia el omerellek el di bleketakl el ouchais a tekoi el chetik el meruul.”
Me a tekoi el dilubech el mo er a Hitoshi a meketeklii el kmo, ngdiak el rokui el chad a sorir a melemalt el omeruul. A rebebil, el ileakl a rebetok el chad er a siobai, a omes er a melemalt el omeruul el ua lemekngit el tekoi. Me a redil er a South Africa a mesaod el kmo: “A kuureor el teloi er a rechad el di omulak, me a lebebil er a taem e ngmo meringel er ngak el meruul a llemalt.”
A omengeblad a ta er a rolel a chelebirukel el omeruul el kmal mla mo klou. A sesei el rak er a uchei, e a Robert S. Feldman el psychologist er a University of Massachusetts Amherst a mlo metik el kmo, a bekord el 60% er a remeklou el chad a omulak er a chelsel a bek el teruich el bung. Me ngdmu el kmo: “Aki kmal kilebetiekl er tia el tekoi, e le ngdimlak a ta el ki momdasu el kmo a omengeblad a mla mo tekoi er a bek el sils.” Me ngmera el mechas a rengud, e le ruumesingd el chad a kmal chetirir el mecheblad, engdi te betok el chad a di mengeblad.
Me ngera uchul me a chelebirukel el omeruul el ua omengeblad me a omerechorech a kmal klou er chelechang? E ngera telemellel aika el omeruul? Me a lmuut el tang, kede mekerang e diak bo doruul aika el mekngit el tekoi?