“Morael el Mor a Bek el Bedengir a Re Chad er Ker Me Ker e Moruul er Tir el Mo Obengkek”
“Morael el mor a bek el bedengir a re chad er ker me ker . . . e molecholb er tir . . . e molisechakl er tir me bo loltirakl a ikel rokui el bla kdu er kemiu.”—MT. 28:19, 20.
1, 2. A doltirakl er a tekingel a Jesus el ngar er a Mateus 24:14, e ngera el ker a mo duubech?
A JESUS a ulemlaoch el kmo, a ungil chais el kirel a Rengedel a Dios a mo oberk er a beluulechad er sel taem er a uriul sils. (Mt. 24:14) Me ngmeliuekl er a beluulechad e a rechad a medengei el kmo kede Sioning er a Jehovah el okiu a urered el omerk er tia el klumech. Me a rebebil er a rechad a sorir tia el klumech e a rebebil a kuk diak. Engdi alta e a rebebil a chetirir tia el klumech engdi ngsorir kid el tia el urered a uchul. Kede kongei el kmo ngdi kid a meruul er tia el ureor el Jesus a ulemlaoch el kirel. Me a ker a kmo, ngar er ngii a llemelted el melekoi el uaisei? Ngmekerang e mo ulterekokl a rengud el kmo tiaikid sel lureor el lulemlaoch er ngii a Jesus?
2 A betok el klechelid a melekoi el kmo te omerk er a klemechel a Jesus. Engdi a osisecheklir a di meketmokl er a chelsel a ikelesia er tir me a TV me a lechub e ngar er a Internet, me a lechub e te kuk di ouchais er a rebebil er sel rolel e te mlo mesuub el kirel a Jesus. E a rebebil a kuk omdasu el kmo sel loruul a tekoi el lolengeseu er a rechad, el ua ureor er a kltoktang me a nurse me a lechub e te mo sensei, e te meruul er a omesiungir el mo er a Dios. Engdi aika el tekoi ngmo tmaut er sel rolel a osisechakl el lulsaod er ngii a Jesus?
3. A doltirakl er a Mateus 28:19, e ngera el eua el tekoi a kirir a rultirakl er a Jesus el mo meruul?
3 Me a Jesus, ngmle soal a redisaiplo er ngii a di ledengchokl e longiil er a rechad el mo er tir? Ngkmal diak! E le uriul er a lebekiis er a kodall e ngdilu er a rebetok el dart el uleltirakl er ngii el kmo: “Morael el mor a bek el bedengir a re chad er ker me ker . . . e molecholb er tir . . . e molisechakl er tir me bo loltirakl a ikel rokui el bla kdu er kemiu.” (Mt. 28:19, 20) Me kid el oltirakl er a Jesus a kmal kired el meruul a eua el tekoi. Ngkired el meruul er a remo disaiplo, e melecholb er tir, e dirrek el olisechakl er tir. Engdi a kot e ngkired el merael el mo er tir. A ta el chad el mesuub er a Biblia a kmo: “A tekoi el ‘morael’ a ngerechelel a derta el chad el oumerang, el belkul a kmo ngkirel el merael el mo imuul er a bita el rael me a lechub e ngmo imuul er a bita el daob.”—Mt. 10:7; Lk. 10:3.
4. Ngera el lureor a kirir a ‘remengesokes er a rechad’ el meruul er ngii?
4 A Jesus, ngmle soal a redisaiplo er ngii a lokerang? Ngmle soal a di el tir el tang el omerk er a klumech me a lechub e te mo dmak el ua ta el cheldebechel e meruul er tia el ureor? Tia el klumech a kmal diak el sebechel a di ta el chad el merkii el mo er a “re chad er ker me ker,” a uchul me a redisaiplo er ngii a mle kirir el mo dmak el ua ta el cheldebechel e meruul er ngii. Tiaikid sel rolel el lurruul er ngii a Jesus er a lomekedong er a redisaiplo er ngii “el mo mengesokes er a re chad.” (Monguiu er a Mateus 4:18-22.) A tekingel a dimlak lebelkul a kmo ngdi ta el chad el ousbech er a kerelel me a olel e dengchokl el mengiil er sel taem el ngikel a mo menga er a uaol. Ngbai milsaod er tia el omengesokes el ua lousbech a uuked er a ngikel. E tia el rolel a omenged a meringel el ureor el ousbech er a rebetok el chad el mo ua ta el cheldebechel e dmak el oureor.—Lk. 5:1-11.
5. Ngera el eua el ker a kirel el monger, e ngera uchul?
5 Ngkired el mo medengei a nger er aika el eua el ker a lsekum ngsoad el mo medengelterir a rumerk er a ungil chais er a chelechang:
Ngera el klumech a kirir a rultirakl er a Jesus el omerk er ngii?
Ngkirel el mo ua ngerang a moktek er tir?
Ngera el klekedall a kirir el lousbech?
Ngkirel el mo ua ngera klungel me a klemengetel a loruul er tia el ureor?
A nger er aika el ker a mo ngosukid el dongcheterir tirke el meruul er tia el ureor el ngii a uchul a osebelir a rechad. Ngdirrek el mo smisichii a urunguled me ngsoad el melemolem el omerk er a klumech er a ungil chais.—1 Ti. 4:16.
NGERA EL KLUMECH A KIREL EL OBERK?
6. Ngera me ngulterekokl a rengud el kmo a Resioning er a Jehovah a omerk er a mera el klumech?
6 Monguiu er a Lukas 4:43. A Jesus a ulemerk er a “Ungil Chais er a Rengedel a Dios,” e dirrek el mle soal a redisaiplo a bo loruul er ngii. Me te rua techang a omerk er tia el klumech el mo er a rokui el chad? Te di Resioning er a Jehovah! A rechad el chetirir kid me te dirrek el kongei er tia el tekoi. El ua tekingel a ta el prist el mla kiei er a chelsel a betok el beluu el mo er a ta el Sioning er a Jehovah. Ngar er a chelsel aike el beluu el lekiliei er ngii e nguleker er a Resioning er a Jehovah el kmo ngera el klumech a lomerk er ngii. Me ngii el prist a dilu el kmo: “Tirkang a kot el mekebelung el chad e le ngdi ta el tekoi a lolekoi er ngii el kmo: ‘Aki omerk er a ungil chais el kirel a Rengedel a Dios.’” Me tia el tekingel a ochotii el kmo kid a diak demekebelung, e kede bai oba kltarreng e dmak el oureor el ua remera el Kristiano. (1 Ko. 1:10) Me a Rengedel a Dios a uchetemel a klumech el ngar er A Ongkerongel Ouchais er a Rengedel a Jehovah. Tia el babier a mla mo er ngii el ngar er a 254 el bedengel a omelekoi, e motobed a bekord el 59 el miliol er ngii el uchul me ngkot el betok a ildisel el babier el merous el meliuekl er a beluulechad!
7. Kede mekerang e mo medengei el kmo a remengeteklel a Klsuul Klekristiano a diak lomerk er a mera el klumech?
7 A remengeteklel a Klsuul Klekristiano a diak lolisechakl el kirel a Rengedel a Dios. Engdi a lsekum e te mo mesaod el kirel a Renged, e a rebetok er tir a melekoi el kmo a renged a di ngar er a rengul a chad. Me ngdiak lolisechakl er a rechad el kmo a kabelment el ngar er a eanged a longedereder er ngii a Jesus. Te bai di mesaod el kirel a Jesus sel lebo el temel a Kurismas me a Baskua. Ngdiak a ta el losaod el kmo a Rengedel a Dios a mo sumechokl a rokui el mondai er a klechad, e di telkib kung e ngmo choroid a rokui el mekngit el ngar tia el chutem. (Och. 19:11-21) Me ngbleketakl el kmo a remengeteklel a Klsuul Klekristiano a diak lodengei aike el bo loruul a Jesus, el ngii a King er a Rengedel a Dios. Me tir el diak lodengelii a belkul a klemechel a Jesus a uchul, me ngdiak el sebechir el mo medengelii a uchul me ngkirir el omerk er ngii.
NGERA MOKTEK ER KID SEL DORUUL ER TIA EL UREOR?
8. Ngera cheleuid el moktek er a rechad el leko te mesiou er a Dios?
8 A redisaiplo er a Jesus a diak el kirir el mengereker sel lolisechakl me a lechub e loleketek a meklou el blirir. A Jesus a dilu el kmo: “Kom ngilai el diak locheraol, mo morous el diak locheraol.” (Mt. 10:8, BT) Me ngdiak el kired el meruul er a berkel a klumech el mo ua lerolel a omengereker. (2 Ko. 2:17) Me a redisaiplo er a Jesus a diak el kirir el omerk er a klumech el ua longereker. (Monguiu er a Rellir 20:33-35.) Me alta e ngkmal bleketakl a tekingel a Jesus, engdi a oumesingd el ikelesia a kmal mechesang el melai a tenget me bo el sebechir el orrurt a ikelesia er tir, e lomdoud er a remengeteklir me tirke el chad er a ureor. Tiaikid a uchul me a rebetok el mengeteklel a Klsuul Klekristiano a kmal mla mo merau.—Och. 17:4, 5.
9. Te mekerang a Resioning er a Jehovah e ochotii el kmo ngmelemalt a moktek er tir e omerk er a klumech?
9 A Resioning er a Jehovah, te merael el melai a tenget er a chelsel Blil a Ongdibel er tir? Ngdiak leuaisei! Tia el urerir a meketmokl el okiu a tengetengir a rechad. (2 Ko. 9:7) Me nguaisei, engdi tia el mlo merek el rak e a Resioning er a Jehovah a chiloit a 2 el biliol el sikang el omerk er a klumech er a ungil chais, e milsuub el obengterir a kuk betok er a 9 el miliol el chad er a bek el buil. Engdi ngdiak el uduudel sel loruul er tia el ureor, e dirrek el kmal dmeu a rengrir el ousbech a di ududir el meruul er tia el urerir. A ta el chad el merriter a tekoi a mesaod er a urerir a Resioning er a Jehovah el kmo: “A moktek er tir a omerk e olisechakl er a rechad.” Ngdirrek el mesaod el kmo ngdiak a ruduudel el mengeteklel a klechelid er tir. Me a lsekum kede omerk er a klumech el diak dudeuudel, e ngera moktek er kid e kede meruul er tia el ureor? Kede kongei el meruul er ngii e le ngbetik a rengud er a Jehovah me a dirrek el rechad. E tia el moktek er kid a otutii a ulaoch el ngar er a Psalm 110:3. (Monguiu.)
NGMEKERANG A LORUUL ER TIA EL UREOR?
Kede omerk er a klumech el mo er a bek el bedengir a rechad (Momes er a parakurab 10)
10. Ngmilekerang a Jesus me a redisaiplo er ngii er a loruul er tia el ureor?
10 Ngmilekerang a Jesus me a redisaiplo er ngii er a loruul er tia el ureor? Te ulsiik aike el basio el ngar er ngii a rechad er ngii e olisechakl er tir. Me te milengedecheduch er a rechad el merael er a rael me a rengar er a makit, e dirrek el mlo er a blirir a rechad. (Mt. 10:11; Lk. 8:1; Rel. 5:42; 20:20) Me a berkel a klumech er a bek el obliil a ta er a ungil el rolel e ngsebeched el merkii a klumech el mo er a rokui el chad.
11, 12. Ngera klekakerous er a rolel a lomerk er a klumech a Resioning er a Jehovah me a rolel a loruul er tia el ureor a rechedal a Klsuul Klekristiano?
11 E a rechedal a Klsuul Klekristiano, te omerk er a ungil chais el ua Jesus? Ngdiak, ngbai di tirke el uduudel el mengeteklel a klechelid a olisechakl er a rechad er a ikelesia er tir. Me tirkang a diak loruul er a remo beches el disaiplo e te bai melasem el di orreked er tirke el di mla chedal a ikelesia er tir. E a lebebil er a taem e te melasem el melisiich er a rechederir el mo olisechakl. Me sera rak er a 2001, e a Pope John Paul II a lilechesii a babilengel el mo er a rechad er a ikelesia el kmo ngkirir el mo omerk er a Ebangkelio e dirrek el kirir el mo blak a rengrir el ua apostol el Paulus el dilu el kmo: “Ak di kmal mo chebuul a lsekum ng diak kumerk er a Ebangkelio.” Ngii el Pope a dirrek el dilu el kmo ngdiak el kirir a redi kesai el chad el meruul er tia el ureor e ngbai kirir a rokui el meruul er ngii. Me nguaisei, engdi te di mekesai a oltirakl er tia el tekingel.
12 Te kuk mekerang a Resioning er a Jehovah? Tirkang a di chimo el cheldebechel el olisechakl el kmo a Jesus a mlo mengedereder el King er sera 1914. Te olengesenges er a Jesus e merael el omerk er a klumech el ngii a kot el klou a ultutelel el ureor er a klengar er tir. (Mk. 13:10) A babier el Pillars of Faith—American Congregations and Their Partners a mesaod el kmo a berkel a klumech a kot el klou a ultutelel el ureor el loruul er ngii a Resioning er a Jehovah. Ngmelemolem el mesaod el kmo tirka el Sioning sel lebetik er a rechad el songerenger, e sabisi, e smecher, e te melasem el olengeseu er tir, engdi sel kot el ngaruchei el tekoi el sorir el meruul er ngii a omerk er a klumech el kirel a ulebongel er tia el beluulechad, e dirrek el olisechakl er a rechad el kirel a osobel. Te melemolem el omerk er a ungil chais e dirrek el oukerebai er sel rolel a osisecheklel a Jesus me a redisaiplo er ngii.
NGKIREL EL UA NGERA KLUNGEL ME A KLEMENGETEL TIA EL UREOR?
13. Ngkirel el mo ua ngera klungel a ureor er a berkel a klumech?
13 A Jesus a dilu er a rultirakl er ngii me bo lomerk er a ungil chais “er a beluulchad el rokir.” Ngdirrek el milengelechel er tir el mo meruul er a remo disaiplo er a bek el beluu. (Mt. 24:14; 28:19, 20) Me ngbelkul a kmo a ungil chais a kirel el oberk er a beluulechad el rokir.
14, 15. Ngera meketeklii el kmo ngdi kid el Sioning er a Jehovah a mla otutii a ulochel a Jesus el kirel a berkel a ungil chais? (Momes a siasing er a uchelel a suobel.)
14 Te di Resioning er a Jehovah a mla otutii a ulochel a Jesus el kmo a ungil chais a kirel el oberk er a beluulechad el rokir. Ngera me ngsebeched el melekoi el uaisei? E le ngdi chelsel a beluu er a Merikel, e te ngar er ngii a bekord el 600,000 el mengeteklel a Klsuul Klekristiano, engdi te ngar er ngii a bekord el 1,200,000 el Sioning er a Jehovah el omerk er a ungil chais er a chelsel tia el beluu. E meliuekl er a beluulechad e te ngar er ngii a bekord el 400,000 el prist er a Katolik, engdi te ngar er ngii a kuk betok er a 8 el miliol el Sioning er a Jehovah el omerk er a ungil chais er a chelsel a 240 el beluu. Me tiang a kmal meketeklii el kmo a Resioning er a Jehovah a omerk er a ungil chais er a bek el merekelel a beluulechad el uchul a klebkall me a odanges el mo er a Jehovah!—Psa. 34:1; 51:15.
15 Me a moktek er kid el Sioning er a Jehovah a omerk er a ungil chais el mo er a rokui el chad er a uchei er a lemei a ulebongel. Me ngokiu tia el ureor e kede mla oiuid e otobed a betok el babier me a magazine me a tract, me a invitation el kirel a meklou el ongdibel me a Chedaol Belsoil el ngar er a kuk betok er a 700 el bedengel a omelekoi. Kede merous aika el babier el mo er a rechad el diak locheraol. E tia el mlo merek el rak e kede uleltobed a bekord el 4.5 el biliol el babier el mesaod er a Biblia. Kede dirrek el mla otobed a kuk betok er a 200 el miliol el Biblia el New World Translation of the Holy Scriptures el ngar er a kuk betok er a 130 el omelekoi. E ngar sel website er kid e ngar er ngii a kuk betok er a 750 el bedengel a omelekoi. Me ngdi kid el Sioning er a Jehovah a meruul er tia el kot el mengasireng el ureor.
16. Kede mekerang e medengei el kmo a chedaol reng er a Dios a olengeseu er a Resioning er a Jehovah?
16 Me ngua ngera klemengetel tia el ureor er a berkel a klumech? A Jesus a dilu el kmo tia el berkel a ungil chais a kirel melemolem el mo lmuut er a ulebongel. Me kid el Sioning er a Jehovah a sebeched el outekangel e melemolem el meruul er tia el ureor e le chedaol reng er a Jehovah a olengeseu er kid. (Rel. 1:8; 1 Pe. 4:14) A rebebil el chedal a klechelid a locha mo melekoi el kmo, “Ngar er ngii er kemam a chedaol reng.” Engdi a ker a kmo, me ngsebechir el meruul er tia el ureor el loruul er ngii a Resioning er a Jehovah er chelecha el taem er a uriul sils? A bebil el cheldebechel a mla melasem el olisechakl el mesuub er kid, engdi ngdi telkib e mo diak loruul er ngii. E a rekuk bebil a kmal kongei el omerk er a klumech, engdi ngdi telkib el taem e mo diak. Me a rebebil a locha mo merael a obliil el olisechakl, engdi ngdiak lomerk er a klumech el kirel a Rengedel a Dios. Seikid a uchul me ngkmal diak el sebechir el lomelemii a ureor el Jesus a miluchelii.
TE RUA TECHANG A MERA EL OMERK ER A UNGIL CHAIS ER CHELECHANG?
17, 18. (a) Ngera me ngulterekokl a rengud el kmo ngdi kid el Sioning er a Jehovah a omerk er a ungil chais el kirel a Rengedel a Dios er chelechang? (b) Ngmekera e mo sebeched el melemolem el meruul er tia el ureor?
17 Me te rua techang a omerk er a klumech el kirel a Rengedel a Dios er chelechang? Ngdi kid el Sioning er a Jehovah! Ngera me ngsebeched el melekoi el uaisei? E le ngdi kid el tang a omerk er a mera el klumech, el ngii a ungil chais el kirel a Rengedel a Dios. Kede oldingel a obliil el osiik er a rechad e ouchais er tir, el oltirakl er sel rolel a lolisechakl a Jesus. E a moktek er kid a melemalt, e le ngbetik a rengud er a Jehovah me a dirrek el rechad. Me tia el urered er a berkel a klumech a imis el klou e le kede omerk er ngii el mo er a rechad er a bek el renged el kakerous a omelekingir. Me kede melemolem el omerk er tia el ungil chais el kirel a Rengedel a Dios el mo lmuut er a ulebongel!
18 Me ngkmal dmeu a rengud el omes er tia el mengasireng el ureor er a berkel a klumech er a ungil chais el loruul er ngii a rechedal a Jehovah er chelecha el uriul sils. Engdi, ngmekerang e mo sebeched el churrengelii tia el urered? A apostol el Paulus a milsaod er ngii el kmo: “Ele Dios a di blechoel el oureor er a rengmiu me bo le somiu e le sebechiu el meruul a ikel soal.” (Fil. 2:13) Mada dolemolem el olengit er a Jehovah me lebeskid a klisiich me bo lsebeched el lmuut el mo ungil el merkii tia el ungil chais!—2 Ti. 4:5.