A Melemalt el Osenged er a Cheleuid Lomeruul

A Don me a Margareta a kmal mlo dmeu a rengrir er sera bo loldingel er tir a ngelekir el redil me a telungalek er ngii. Me ngar sel ulebongel el belsilir, e a Margaret el ngii a mla retire el chad er a omeruul kall, a rirellii a macaroni me a cheese el tirke el teru el ngelekel a ngelekir el sechal a kmal sorir el kall.

Sel taem el ledengchokl el rokui, e a Margaret a ngiluu tia el kall el kmedii er a belngel a tebel. Sera lenguu a dengebel e ngmilsang el di mle mekeald el cheese a seluk er a chelsel tia el delluchel el belatong! E le Margaret a ulebes el locha macaroni er a chelsel!b

Kede rokui el mo remuul a cheleuid el diak lultuil er a rekid me a klemedengei er kid. Ngsebechel di mekngit el omelekinged e le ngdimlak dekerekikl lomdasu me a lechub e ngmlo diak dotireklii a meldung el taem, me a lechub e kede kuk di ulebes er a tekoi. Me ngera uchul me ngduubech a cheleuid el omeruul? Ngmekerang a dosmechokl a cheleuid el omeruul? Ngsebeched el oibngid er ngii? A melemalt el osenged er a cheleuid el omeruul a sebechel ngosukid el mo onger aika el ker.

A OSENGED ME A OSENGEL A DIOS EL KIREL A CHELEUID EL OMERUUL

Ngmo ungil a rengud sel derellii a ungil tekoi e lechat er kid a rechad. Kede dirrek el mo omdasu el kmo kede rredemelel tia el ungil tekoi. Engdi a ker a kmo, sel mrellii a cheleuid, alta e ngdimlak el durengum me a lechub e ngdimlak a chad el mesekau, e ke mo kongei el kmo ke mlo mekngit? Tiang a sebeched el kutmeklii a lsekum ngmo ngariou a rengud.

A lsekum kede di mo kerekikl el di melatk er kid, e kede locha mo melasem lomekbeot er a cheleuid lomerelled, e oltelechakl er a rebebil, me a lechub e kede kmo ngdimlak derellii tia el tekoi. E a chouaika el tekoi a sebechel mo uchul a telemall. Ngsebechel mo diak lemesmechokl a tekoi, e dirrek a rechad el diak a telemellir a mo motelechakl. Me ngmo lmuut er a taem el mo sebeched el mertii a cheleuid lomerelled, me kid a ungil medengei el kmo “kede bek el chad el mo mesaod er kid er medal a Dios.”​—Rom 14:12.

A Dios a kmal melemalt osengel el kirel a cheleuid lomeruul. Ngar a babier er a Psalm, e ngmesaod er a Dios el “chubechub e betik a rengul” e dirrek el “ diak di lolemolem er a ngerrelel; ng diak le kesib a rengul el mo cherechar.” Ngungil medengei el kmo a rechad a diak lemecherrungel, e dirrek el medengei el kmo kede di mechell e ngar er ngii a chelitechetud, me ngmelatk el kmo “kid a di chebechab.”​—Psalm 103:8, 9, 14.

Me a lmuut el tang, a Dios a ua betik a rengul chedam el soal a rengelekel a bo lomes a cheleuid lomeruul el ua osengel. (Psalm 130:3) Me a Tekingel a meskid a kmal betok el ulekrael me a uleklatk el ngosukid el mo ungil mesmechokl a cheleuid lomerelled me a dirrek el cheleuid lomerellir a rebebil.

A ROLEL E KEDE OUTEKANGEL A CHELEUID LOMERUUL

Ngblechoel sel lebo er ngii a cheleuid lomeruul, e a chad a mengoit a temel me a klisichel loltelechakl er a rebebil me a lechub engdi mesaod el kirel a tekoi el mildung me a lechub e ngmileketmokl. Engdi a lsekum a tekingem a millibas er a tang, e ngbai ungil el molengit a klausubes, e msemecheklii a tekoi me lolemolem a kmes el deleuill er kemiu. Me kau, ngmla ta el mrellii a cheleuid el tekoi el mo uchul a chetituokel el kirem me a lechub a rebebil er a rechad? Ngera me ngdiak bai mkengei el sumecheklii a tekoi e bai di meruul er kau el mo kesib a rengum? A lsekum ke di oltelechakl er a rechad e kedi rullii a tekoi el mengal mo chetituokel e mengal mo uchul a klou el ngasecherreng. Me ngbai ungil omnguu a klubelem er a cheleuid el omeruul, e msemecheklii me bo lemerek el tekoi.

Ngkmal beot er kid el omes a cheleuid lomerellel a chad, e mo chemolt er osenged el mlo chetid. Me ngkmal klou a klungiolel a dotireklii a ulekrael er a Jesus Kristus er a ledu el kmo: “Moruul el mor a re chad a ikel somiu a loruul el ekor kemiu.” (Mateus 7:12) Me sel mrellii a cheleuid, alta engdi kekerei el tekoi, e ngulterekokl el dirrek el soam a rechad a bo lolecholt er a klechubechub el bedulkau, me a lechub e di lobes er a cheleuid el omerellem. Me a ker a kmo, ngera me ngdiak molasem el rullii a osisiu lungil lomeruul el mora rebebil?​—Efesus 4:32.

A OMELLACH EL NGOSUKID EL KOSADEL A CHELEUID LOMERUUL

A ta el dictionary a mesaod el kmo, “a mekngit lomelilt, me a diak lungil klemedengei er kid er a tekoi, me a lechub e ngdimlak dekerekikl a sebechel mo uchul e a chad a remuul a cheleuid el tekoi.” Me kid el rokui a kired el kongei el kmo ngmla er ngii a taem el omerelled a motaut er a ta er aika el tekoi. Me nguaisei, engdi ngsebeched el kosadel a cheleuid lomeruul sel bo dosaod a bebil meklou a ultutelel lomellach el debetik er a Bades.

A ta er aika el omellach a debetik er ngii er a Osisechakl 18:13 el kmo: “A lsekum a chad a onger a ker er uchei er a lorrenges, e ng klebelung e otuball.” Me sel bo dekerekikl e dungil rongesii a chad e domdasu er a uchei er a donger er ngii e ngulterekokl el mo uchul e ngdiak dedu mekngit el tekoi me a lechub e kede di mekerokl el meruul a tekoi. Me a klemedengei el denguu e le kid el mle ungil lorrenges a kmal klou a ultutelel e le ngmo sebechel mo ungil omelilt el doruul e dirrek el oibngid er a cheleuid lomeruul.

A ta er a omellach el ngar a Biblia a kmo: “Bor a ikel sebechiu el kie el ngar a budech kemiu ma rokui el chad.” (Rom 12:18) Me bo er a tkurrebab el sebechem el melisiich er a budech me a kltarreng. Sel moureor lobengterir a rechad, e bo mkerekikl el melatk er tir e molecholt a omengull el bedultir e dirrek el molasem el mo chemat e molisiich er tir. Ngar a chelsel a chouaitia el eltel a ureor, e ngmo beot el musubes a mlo mekngit lomelekoi me a omeruul e dirrek el mo diak dolatk, e aike el telkib loberaod el cheleuid lomeruul a mo beot el mesmechokl.

Molasem el nguu a klubelem er a cheleuid el mlo er ngii. Bai lak di molasem el mesaod er a tekoi el mdillii me a lechub e ke rirellii, e bai momes er ngii el ua techellem el mekurulii a ungil el uldesuem. Kau, ngdirk kirem el loureor er a kllourreng, me a ungil omeruul, me a ulserechakl el reng? E kuk uangera uldesuem el kirel a delemedemek me a budech me a bltikerreng? (Galatia 5:22, 23) Molasem el mo medengei el kmo ngera sebechem el rullii sel lluut el mo er ngii a cheleuid lomeruul. Molasem el mo diak di molatk er kau me a uldesuem. E a telkib el ngellakel a sebechel rullii a chetituokel el tekoi el mo kebekakl.

A MELEMALT EL OSENGED ER A TEKOI A MO UCHUL A KLUNGIOLED

Sel bo lemelemalt a osenged el kirel a cheleuid lomeruul, e ngosukid el mo outekangel sel lebo er ngii a cheleuid. Me kid a mo budech a uldesued me a dirrek el delongeled kid me a rechad. Me a lsekum kede melasem el nguu a klubeled er a cheleuid el deriruul, e ngmekurulii a klemedengei er kid er a tekoi, e a rechad a mo beot er tir el obengked. Ngdirrek el mo diak di lemekngit a uldesued el di kired. Me sel dodengei el kmo a rebebil a dirrek el loureor el kirel a cheleuid el omerellir e ngrullid el mo kmeed er tir. E a ngaruchei, ngmo uchul a klungioled sel dosuub el mo oukerebai er a bltkil a rengul a Dios me sel uldesuel el di kltmokl el mo ousubes er kid.​—Kolose 3:13.

Me a cheleuid el omerellel a Margaret, el dulsaod er ngii er a uchei, ngmlo uchul a telemellel a belsilir el telungalek? Ngkmal diak leuaisei, a rokui el chad a ulecherechur, el ileakl a Margaret, e te rokui el dilak e menga er tia el kall el dimlak a macaroni er ngii! Me a betok el rak er a uriul e tirka el teru el sechal el ngelekel a ngelekir a uluuchais er tia cheldecheduch el kirel a blengur el kmal diak lsebechir lobes er ngii el mora rengelekir, e dirrek el millatk aike el ungil temir el ulebengkel a demerir el rubak me a derrir el mechas. E a mera er ngii, tiang a di mle cheleuid lomeruul!