Ngera Ngmo Meruul a Dios?

A lsekum e ngmetacherbesum e kulterekokl el medengei el kmo a ungil sechelim a mo ngosukau. Tiakid a uchul me a rebebil a melekoi el kmo a Dios a diak el sechelirir le ngdiak lolengeseu er tir. Me nguaisei a Dios a mla remuul a betok el luchul a klungiaol el mei er kid e dirrek el ngar ngii a bo loruul el kirel a mondai me a ringel el dechelebangel er chelechang. Ngera ngmo meruul a Dios?

SMULD A ROKUI EL MEKNGIT

A Dios a mo suldii a klengit loeak a lokngemedii ngike el luchul a mekngit. A Biblia ouchais el kmo ngtecha ngike el luchul a klengit: “A beluulchad el rokir a ngar eungel Ngikel Mekngit.” (1 Johanes 5:19) ‘Ngikal Mekngit’ a ngike el lomekedong er ngii a Jesus el kmo ng “merreder er tial beluulchad” el Satan el Diabelong. (Johanes 12:31) A omengetikaik er a Satan el mora rechad a uchul a ringel el desang er a beluulechad. Ngera ngmo meruul er ngii a Dios?

A Jehovah el Dios a oeak a Ngelekel el Jesus Kristus e ngdi kmedung e ngmo “tomellii a Diabelong, el ngikel oba klisiich er a kodall.” (Hebru 2:14; 1 Johanes 3:8) A Biblia ochotii el kmo a Diabelong a medengei el kmo “ng di kedeb ku temel.” (Ocholt 12:12) A Dios a dirrek el mo okngemedeterir tirke el meruul a mekngit.​—Psalm 37:9; Osisechakl 2:22.

RULLII A BELUULECHAD EL MO BARADIS

Uriul er a lokngemedii a klengit er a beluulechad, e a Ulemeob a mo meruul aike el usbechall el mo otutii a moktek er ngii el kmo, a remecherrungel el chad a mo kiei er a baradis el beluulechad el mo cherechar. Ngera sebeched el lomes el bedul luchei el kirel?

Diak el lengemed el budech me a osebechakl. “Tirkel medemedemek a mo ungilbesrir el kiei el ngar a beluu el ungil a rengrir er a cherrungel budech.”​—Psalm 37:11.

Betok el kall lungil er a bedenged. “[Ngmo] betok a redechel a wheat er a beluu; ma ikel bukl di bo le medekedek er a dellomel el kall.”​—Psalm 72:16.

Ungil delengchokl me a ureor. “A re chad a mo toketek a blai e mo kiei er ngii . . . Te mo dualem a sers er a bilong, . . . Ng mo cherrungel a deuil a rengrir er a ikel uluureor el kirel.”​—Isaia 65:21, 22.

Kau, ngkmal soam el mes aika el tekoi el meketmokl? Ngdi kmedung e ngmo tekoi er a bek el sils.

OKNGEMEDII A SECHER ME A KODALL

Rokui el chad er chelechang a mo smecher e mad, engdi ngdiak bo leuaisei el diak a ulebengelel. Ngdi kmedung e a Dios a mo ousbech er a olubet el tengetengel a Jesus el mo uchul me “tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.” (Johanes 3:16) Me ngngera mo meketmokl?

Ngmo diak a secher. “Ng mo diak a tal chad el kiei er a beluad el lmuut el mo mengeremrum el kmo ng smecher, e a rokui el klengit a mo musubes.”​—Isaia 33:24.

Ngmo diak a kodall. “Ngiil Rubak el DIOS a mo okngemedii a kodall me ng mo diak el mo cherechar. Ng mo mesuld a iuechel a mederir a re bek el chad.”​—Isaia 25:8.

A rechad a mo kiei el diak a ulebengelel. “Diak el ocheraol el sengk er a Dios, a diak a ulebengelel klengar el ngar a Kristus Jesus el Rubak er kid.”​—Rom 6:23.

Tirke el mla mad a mo mekiis er a kodall. “Ngmorngii chokiis rar melemalt mar diak le melemalt.” (Rellir 24:15, BT) Olubet el sengk er a Dios a uchul me a rulekoad a mo mekiis er a kodall.

Ngmekera bo leketmokl aikang a Dios?

TOKETEKII A KABELMENT EL DIAK A KNGTIL

A Dios a mo otutii a moktek er ngii el kirir a rechad me a beluulechad loeak a kabelment el ngar er a eanged el Kristus Jesus a mla metutk el mo mengedereder er ngii. (Psalm 110:1, 2) Tiaikid tia el kabelment me a lechub e ngrenged el Jesus ullisechakl er a rultirakl er ngii el mo meluluuch el kirel el kmo: “Demmam el ngar a eanged . . . a Rengedem le mei.”​—Mateus 6:9, 10.

A Rengedel a Dios a mo mengedereder er a beluulechad e mo okngemed a rokui el ringel. Tiakid el Renged sel kot lungil kabelment el sebechir a rechad el nguu! Tiakid a uchul me a Jesus a mle blak a rengul lomerk er a “Ungil Chais el kirel a Rengedel a Dios” er a lengar tia el chutem e dilu er a redisaiplo me dirrek el lomerk.​—Mateus 4:23; 24:14.

A Jehovah el Dios el kmal betik a rengul er a rechad a uchul me ngmla tibir el mo meruul a kmal ungil tekoi el kirir. Tiang, ngdiak lerellau el mo soam el mo medengelii e mo kmeed er ngii? Ngera ngmo rullii el mo er kau omngiltii el mo meruul er tiang? Ongingil llel a mo mesaod er tiang.