A Jehovah a Omes er a “Amen” er Kau el Klou a Ultutelel

“A ROKUI EL CHAD A MO KMO, ‘NG UA ISEI!’”

A tekoi er a Merikel el “amen” a belkul a kmo “ng ua isei.” Tiang a milengai er a tekoi er a Hebru el belkul a kmo “bo moba blakerreng,” e “bo bekongerachel.” A lebebil er a taem e ngusbechall el kirel a tekoi er a kerrekeriil. A uriul er a lolekoi a tekingel a chad er medal a kerrekeriil, e ngmo dmu el kmo “amen” el olsiich a tekingel el kmo a rokui el tekoi el bla ledung a melemalt e ngii a kongei a rokui el tekoi el mo meketmokl el kirel a tekoi el mildung. (Ule. 5:22) Me sel lengar mederir a rechad e ledu el kmo “amen” e ngmla olsiich a tekingel el kmo ngmo melemolem loltaut a tekoi el bla ledung.​—Neh. 5:13.

A ngarbab el usbechel a tekoi el “amen” a llechukl er a 27 el klou el bliongel er a babier er a Duteronomi. A uriul er a lesiseb er a Beluu er a Nglat a rechad er a Israel, e te mlo kldibel er a delongelel a Rois Ebal me a Rois Gerisim e orrenges a Llach el milechuiu. Tirkang a dimlak di lorrenges aika el tekoi, e te dirrek el mle kirir el oterekeklii el kmo te kongei aika el Llach. Te mirruul er tiang er sera ledu el kmo “Amen!” er a uriul er a lobeketakl a tekoi el kirel a telemellel a blekerdelir a rechad el dimlak lolengesenges. (Dut. 27:15-26) Me ka di molatk er a oto er a ngerir a rebetok el telael el sechal me a redil me a rengalek el melekoi er tia el tekoi el klou a ngerir! (Jos. 8:30-35) Te ulterekokl el dimlak lobes a tekoi el ledilung er sel sils. Me tirka el chad er a Israel a millemolem loltirakl a tekingir, e le rekord a kmo: “Ma re chad er a Israel a milsiou er a RUBAK er a klteketel a le chad a Josua, e uriul er a kodellel, e te di milsiou er a RUBAK el klteketel el le kiei tirkel mengeteklir el mle medengei a rokui el tekoi el le riruul a RUBAK el kirir a re chad er a Israel.”​—Jos. 24:31.

A Jesus a dirrek luluusbech er a tekoi el “amen” el olsiich a klemerang er a tekoi el lullekoi, engdi ngmirruul er ngii el ngar a ileakl el rolel. Ngdimlak ledu el kmo “amen” er a uriul er a tekingel a chad, e ngbai uluusbech er tia el “amen” (el mloiuid el mo tekoi er a Merikel el “meral”) er uchei er a lolekoi a tekoi, el olterekokl el kmo a tekoi el lolekoi a klemerang. A lebebil er a taem e ngomelekl er tia el tekoi el kmo “amen amen.” (Mt. 5:18; Jn. 1:51) Ngmirruul uaisei el olterekokl a rengrir a rurrenges er ngii el kmo a tekingel a kmal klemerang. A Jesus a mle sebechel melekoi el uaisei, e le ngdi ngii el tang a mlengilt el mo oltaut a rokui el telbilel a Dios.​—2 Ko. 1:20; Och. 3:14.

“ROKUI EL CHAD ER A ISRAEL A DILU EL KMO, ‘NG UA ISEI’ E ULELDANGES ER A DIOS”

A rechad er a Israel a dirrek el millekoi er a tekoi el “amen” er sel taem el lolenget e loluluuch el mora Jehovah. (Neh. 8:6; Psa. 41:13) Me sel ledelii tia el tekoi er a uriul er a loluluuch, e tirke el lorrenges er tir a ochotii el kmo te dirrek el kongei aike el tekoi el mildung er a nglunguuch. Seikid e tir rokui a mo dmeu a rengrir el dmak el mengull er a Jehovah. Tiaikid el blekeradel a dilubech er sel taem el King el David a ngiluu a Blil a Telbiil er a Jehovah el mora Jerusalem. Me sera loruul er a ungil klebesei el kirel, e ngmilluluuch er a kmal mle ungil nglunguuch el mlo uchul e ngmeldibech a chelitakl el llechukl er a 1 Kronika 16:8-36. Me tirke el mla er isei, a kmal mlo dmeu a rengrir er a tekingel me a rokui el chad a “dilu el kmo, ‘Ng ua isei’ e uleldanges er a Dios.” Me a blekerdelir el mle ta el longer el rokui a liluut el dochelii a deurreng er isel sils.

A Rekristiano er a irechar a dirrek luluusbech er a tekoi el “amen” sel loldanges er a Jehovah. A remilluches er a Biblia a mle blechoel lousbech er ngii el tekoi er a chelsel a babilengir. (Rom 1:25; 16:27; 1 Pe. 4:11) A babier er a Ocholt a dirrek el mesaod el kirir a rechanghel el ngar a eanged el mengebkall er a Jehovah lokiu sel ledu el kmo: “Amen. Hallelujah!” (Och. 19:1, 4, BT) Ngmle siukang er a Rekristiano er a irechar el melekoi el kmo “amen” er a uriul er a lerengesii a nglunguuch el ngar aike el miting er tir. (1 Ko. 14:16) Me nguaisei, engdi tiang a tekoi el mle kirir el kerekikl el melatk er ngii.

A UCHUL ME A “AMEN” ER KAU A KLOU A ULTUTELEL

Me a uriul er a desuubii a rolel a lousbech er a tekoi el “amen” a remesiungel a Jehovah er a irechar, e ngsebeched el mo medengelii a uchul me ngklou a ultutelel el dolekoi er ngii er a uriul er a nglunguuch. E sel dolekoi er ngii er a uriul er a nglunguched, e kede ochotii el kmo a tekoi el dullekoi a mera el ngar a rengud. Me sel dekengei el melekoi el kmo “amen” alta ngdi ngar a rengud, el kirel a nglunguuch el meldung er a delongelir a rechad, e kede ochotii el kmo kede kongei aike el tekoi el meldung. Me bo dosaod a lmuut el bebil luchul me a tekoi el “amen” a klou a ultutelel.

Kede kerekikl lorrenges sel loluluuch a ta er a chad, e le tiang a tedebechel a omengull er kid. Kede mengull er a Jehovah el diak di lokiu sel dekengei a tekoi el medung er a nglunguuch e ngdirrek lokiu a blekerdeled er sel taem el doluluuch. Me kid el soad el dmu “amen” el mera el ngar a rengud a uchul me tiang a ngosukid el mo oba tabesul el uldasu e dirrek el mo kerekikl lomtab sel lengar ngii a nglunguuch.

Kid a dmak el mengull er a Jehovah. Sel dorrenges a nglunguuch e ngoldak er kid el rokui el ngar a ongdibel el orrenges er ngii. (Rel 1:14; 12:5) Me sel deteloi er a rudam me a rudos er kid el kongei er a nglunguuch, e kede mengal mo oba kltarreng er a delongeled. Me alta e ngklou a ngered el melekoi me a lechub e ngdi ngar a rengud, e kede kmo “amen,” tiang a rullii a Jehovah me ngmo soal remuul aike el tekoi el dullengit er ngii.

Kede odengesii a Jehovah. A Jehovah a sebechel lomes a rokui el tekoi el doruul el kirel a omengull er kid. (Lk. 21:2, 3) Ngungil medengei a moktek er kid me aike el ngar a rengud. Mo lmuut er a taem el mo kired el di orrenges er a miting lokiu a dengua, me ngulterekokl a rengud el kmo sel dekengei el dmu “amen” e a Jehovah a orrenges er kid. E sel doruul uaisei, kede teloi er tirke el rokui el ngar a miting el oldanges er a Jehovah.

Alta “amen” er kid a ua lekekerei el tekoi, engdi tiang a kmal klou a ultutelel. A ta el encyclopedia er a Biblia, a mesaod el kirir a remesiungel a Dios el kmo ngsebechir el “ulterekokl a rengrir, e mereched el kongei, e dirrek el ochotii a omelatk el lobang lokiu a usbechel tia el di chimo el tekoi.” Mada bo lsebechel a rokui el “amen” er kid el mo odeuir a rengul a Jehovah.​—Psa. 19:14.