Klaumerang​—A Blekeradel el Ngosukid el Mo Mesisiich

A KLAUMERANG a meskid a lmuut el klou el klisiich. El ua tiang, alta e a Satan a soal melemall er a deleuill er kid lobengkel a Jehovah, engdi a klaumerang er kid a ngosukid el mo sebeched “el dmokou el mekoad a rokui el kmard el belechel ngikel Mekngit.” (Efe. 6:16) A lsekum ngar ngii a klaumerang er kid, e ngsebeched el outekangel a mondai er kid alta e ngkmal mo meklou el ua rois. A Jesus a dilu er a redisaiplo er ngii el kmo: “Chomko kom di telkib el oumerang el ua klungel a tane er a meringel, e ng sebechiu el dmu er tial bukl el kmo, ‘Mengukl er tial mor sei!’ e ng mong.” (Mt. 17:20) Me kid el medengei el kmo a klaumerang er kid a lmuut el smisichii a deleuill er kid me a Jehovah, me ngungil el dolatk aika el ker el kmo: Ngerang a klaumerang? Ngmekerang a tekoi el ngar a rengud e ngar ngii a lerellii er a klaumerang er kid? Ngoeak a ngera el rolel e ngsebeched el melisiich er a klaumerang er kid? E a klaumerang er kid, ngkirel lultuil er a techang?​—Rom 4:3.

NGERANG A KLAUMERANG?

A klaumerang a lmuut el klou er a di bo doumerang a tekoi el ngar a Biblia, e le ngmo lmuut er a ‘remekngit el chelid me te dirrek el oumerang [el kmo ngar ngii a Dios] e omritel er a dakt.’ (Jak. 2:19) Me a leuaisei, e ngerang a klaumerang?

A Biblia a mesaod er a belkul a klaumerang el ngar a eru el rolel. A kot, “a chad el oumerang a kmal medengei a ikel tekoi el lolatk e mengiil.” (Heb. 11:1a) Me a lsekum ngar ngii a klaumerang er kau, e ke oumerang el kmo a rokui el tekoi el lolekoi a Jehovah a klemerang e ulterekokl el mo tmaut. El ua tiang, a Jehovah a dilu er a rechad er a Israel el kmo: “A RUBAK a kmo, a lsekum ng sebechiu el tomellii a telbilek el kirel a llomes ma klebesei, me ng mo diak le mei er a ikel ulterekokl el belsechel, e sola e a telbilek er a mesiungek er a David a dirrek el sebechel el metemall.” (Jer. 33:20, 21) Me kau, ngar ngii a taem el bo medakt e le komdasu el kmo a sils a mo diak lengasech e bo lengelt, el rullii me ngmo diak a llomes me a klebesei? Ngdiak leuaisei a uldesuem a lsekum ngulterekokl a rengum el kmo a sils a mo ngmasech e mo ngmelt er a bek el sils. Me a leuaisei, ke dirk oumededenger el kmo Ngike el Ulemeob aika el tekoi a diak lsebechel lotaut a telbilel? Nglocha diak leuaisei a uldesuem!​—Isa. 55:10, 11; Mt. 5:18.

A ongerung, a klaumerang er a chad a rullii el mo “ultebechel a uldesuel el kirel a ikel diak le moues.” A klaumerang er a chad a rullii me ‘ngultebechel a uldesuel’ el kirel a tekoi el diak lsebechel mes, engdi ngoumerang el kmo ngmera el tekoi. (Heb. 11:1b) Lokiu a ngera el rolel? Oleko ngalek a oker er kau el kmo, ‘Ke mekera e medengei el kmo ngmera el ngar ngii a eolt?’ Alta e ngdirkak a ta el mesa eolt, engdi nglocha soam el ngosuir a ngalek el mo medengelii tiang lousbech a tekoi el ngar ngii el ua sel douteliil, me a klisichel a eolt, me a lmuut el bebil. Me sel taem el ngalek a omtab aika el olechotel a tekoi e ngmo oumerang, e tiang a rullii el mo medengei el kmo ngmera el sebeched el mo oumerang a tekoi el diak lsebeched el mes. Me ngdi osisiu, a klaumerang a mo er ngii lultuil er a tekoi el sebeched el mes.​—Rom 1:20.

A KLAUMERANG A MO ER NGII E LE KID EL MENGREOS ER A KLEMERANG

A uchetemel a klaumerang a okiu a olechotel a tekoi, me a klaumerang er a chad a mo er ngii lokiu sel losuub el mo ‘medengelii a klemerang.’ (1 Ti. 2:4) Engdi ngdiak di el tiaikid e lemerekong. A apostol Paulus a milluches el kmo: “Ele chad a oumera er a chelsel a rengul.” (Rom 10:10) Me a chad el oumerang er a klemerang el tekoi a kmal kirel el dirrek el mo mengreos er ngii. Ngokiu tiaikid el rolel e ngmo soal melemolem el melisiich er a klaumerang er ngii el belkul a kmo ngmo kiei loldeu er a rengul a Dios. (Jak. 2:20) A chad el diak loba omereng el saul el kirel a klemerang a locha mo oltngakl a bleketakl lolechotel a tekoi e le ngii el diak lsoal melodech er a klaumerang er ngii me a lechub engdi ngmeruul a soal. (2 Pe. 3:3, 4; Jud. 18) Tiaikid a uchul me ngar a taem er a Biblia, e ngdimlak el tirke el rokui el lulemes a mengasireng el tekoi el dilubech a mlo oumerang. (Ule. 14:11; Jn. 12:37) A chedaol reng er a Dios a mesterir a “klaumerang” er a rechad el tir a mera el betik a rengrir er a klemerang.​—Gal. 5:22, NW; 2 Th. 2:10, 11.

A ROLEL E A DAVID A MILEKURULII A MESISIICH EL KLAUMERANG ER NGII

A King David a ta er tirke el mle kot el mesisiich a klaumerang er ngii. (Heb. 11:32, 33) Me nguaisei, engdi ngdimlak el rokui el chad er a telungalek er ngii a mle mesisiich a klaumerang er tir. El ua tiang, a ta el taem e a Eliab el kot el klou el obekul a David, a dimlak a klaumerang er ngii er a lochotii a ngesechel a rengul er sel taem el David a millekoi a mo melsemai er a Goliath. (1 Sa. 17:26-28) Ngdiak a chad el di mechell e ngar ngii a klaumerang er ngii, me a lechub e ngmudiukes er a klaumerang er a demal me a delal, me a klaumerang er a David a mlo er ngii el deleuill er ngii me a Dios a uchul.

Ngar a 27 el bliongel er a Psalm, e a David a ochotii a rolel e ngmlo mesisiich a klaumerang er ngii. (1 el bades) A David a millebedebek aike el tekoi el dilubech er a klengar er ngii er a uchei, me sel rolel e a Jehovah a milsebechakl er ngii er a recherrouel. (2, 3 el bades) Nguleba klou el omereng el saul el kirel a templo er a Jehovah. (4 el bades) A David a milengull er a Dios el teloi er a rekldemel er a klaumerang el ngar a templo. (6 el bades) Ngmle blak a rengul el meluluuch el mora Jehovah. (7, 8 el bades) A David a dirrek el mle semeriar el mosisechakl er a rolel er a Dios. (11 el bades) A klaumerang a kmal mle klou a ultutelel er a rengul a David a uchul me nguleker el kmo: “Ak mo er ker a lsekum ngdimlak a klaumerang er ngak?”​—13 el bades, NW.

A ROLEL E KE MELISIICH ER A KLAUMERANG ER KAU

Ngsebechel a klaumerang er kau el mo ua klaumerang er a David a lsekum ke oukerebai er a uldesuel me a omerellel el losaod a 27 el bliongel er a Psalm. A uchetemel a klaumerang a mo er ngii lokiu a melemalt el klemedengei, me a cherengel a taem el mosuub er a Tekingel a Dios, me aike el babier el mengai a uchetemel er a Biblia, e ngmo beot er kau el mekurulii tiaikid el rodech er a reng er a Dios. (Psa. 1:2, 3) Mongoit a temem el melebedebek er sel temem el mesuub. A lsekum ke mo ungil melatk a tekoi el mosuub, e ngmengal mekurulii a omereng el saul er kau el mora Jehovah. Me a cherengel a taem el lemukeroul a omereng el saul er kau el mora Jehovah, e nglmuut el mo soam el melisiich er a klaumerang er kau lokiu a omengull er kau el ngar a miting er a ongdibel, me a dirrek sel momerk er a klumech el kirel a omelatk el mora rebebil. (Heb. 10:23-25) Kede dirrek lochotii el kmo kede oumerang sel dolemolem el ‘meluluuch el kmal diak bo le kekere rengud.’ (Lk. 18:1-8) Me a leuaisei, e “moluluuch el di blechoel” el mora Jehovah, e moumerang el kmo ng “omekerreu er kemiu.” (1 Th. 5:17; 1 Pe. 5:7) A klaumerang er kid a rullid el mo meruul a melemalt el tekoi, e sel doruul a llemalt, e a klaumerang er kid a lmuut el mo mesisiich.​—Jak. 2:22.

MSISICHII A KLAUMERANG ER KAU ER A JESUS

Sel kesus er a uchei er a kodellel a Jesus, e ngdilu er a redisaiplo er ngii el kmo: “Moumera er a Dios, e dirrek el moumera er ngak.” (Jn. 14:1) Me ngdiak di dolisiich er a klaumerang er kid el kirel a Jehovah, e ngdirrek el kired el melisiich er ngii el kirel a Jesus. Me ke mekera e smisichii a klaumerang er kau er a Jesus? Me bo dosaod a edei el rolel.

A kot, momes er a olubet el tenget el ua ileakl el sengk er a Dios el mei er kau. A apostol Paulus a dilu el kmo: “Ngak el oumera er a Ngelekel a Dios, el ngikel mle betik a rengul er ngak me ng tilengetengii a klengar er ngii el kirek.” (Gal. 2:20) A lsekum ke melisiich er a klaumerang er kau er a Jesus, e ke oumerang el kmo a olubet el tenget a sebechel ngosukau, e ngii a uchetemel a klausubes el kirel a kngtim, e meskau a omelatk el mo kiei el mo cherechar, e dirrek ngii a olechotel a kot el klou el bltkil a rengul a Dios el kirem. (Rom 8:32, 38, 39; Efe. 1:7) Aikang a mo uchul e ke mo mesisiich me ngmo diak lemekngit a ukltkem el di kirem.​—2 Th. 2:16, 17.

A ongerung, molekeed er kau er a Jehovah lokiu sel moluluuch el ultuil er a olubet el tengetengel a Jesus. Ngokiu tia el olubet el tenget, e ngsebeched el mimokl el meluluuch el mora Jehovah “me bo de nguu er ngii a klechubechub e de betik er a krasia el mo ngosukid sel dousbech er ngii.” (Heb. 4:15, 16; 10:19-22) A nglunguuch a ngosukid el lmuut el mo blak a rengud loltngakl a omengesuseu.​—Lk. 22:40.

A ongedei, molengesenges er a Jesus. A apostol Johanes a milluches el kmo: “Ngikel oumera er a Ngalek oba diak a ulebengelel klengar; e ngikel diak lorrenges er a Ngalek a diak loba klengar; ng bai di mo obals er a Dios el diak a ulebengelel.” (Jn. 3:36) Momtab el kmo a Johanes a silodii a klekakerous er sel dolisiich er a klaumerang er kid me sel lak dolengesenges. Me a leuaisei, e ke melisiich er a klaumerang er kau er a Jesus sel molengesenges er ngii. Ke olengesenges er a Jesus lokiu sel moltirakl “a llechul a Kristus,” el ike el rokui el lullisechakl me a lulengelechel. (Gal. 6:2) Ke dirrek lolengesenges er a Jesus lokiu sel moltirakl a ulekrael er ngii lokiu a “blak a rengul e mellomes a rengul mesiou.” (Mt. 24:45) E sel molengesenges er a Jesus, e ngmo sebechem loutekangel a mondai alta e ngkmal mo kdekudel e mesisiich el ua mesisiich el eolt.​—Lk. 6:47, 48.

“MOLEMOLEM EL OMEKEROUL ER A KLENGAR ER KEMIU EL OUMERA ER A DIOS”

A ta el chad a lilangel el mora Jesus el kmo: “Ak uumerang, e ngdi diak kmesisiich el oumerang. Mngesukak me bo kmesisiich el oumerang!” (Mk. 9:24) Ngmla er ngii a telkib el klaumerang er ngii, engdi ngii el chad a mle ngariou a rengul me ngmle medengei el kmo ngousbech er a lmuut el klou el klaumerang. Me kid el rokui a dirrek el ua ngika el chad el mo er ngii a taem er a klengar er kid el bo dousbech er a lmuut el klou el klaumerang. Me chelecha el taem, e ngsebeched el rokui el omekeroul er a klaumerang er kid. Me ngdi ua bla desuub er a uchei, kede melisiich er a klaumerang er kid sel dosuub er a Tekingel a Dios, e dolebedebek er ngii, e tiang a mo uchul e ngmengal mo klou a omereng el saul er kid el mora Jehovah. A klaumerang er kid a dirrek el lmuut el mo mesisiich sel deteloi er a rekldemed er a klaumerang el mengull er a Jehovah, e douchais er a rechad el kirel omelatk el dobang, e dolemolem el meluluuch. Me a lmuut el tang, sel dolisiich er a klaumerang er kid, e kede mo nguu a kot el klou el omeksuled el ngii a lmuut el klou er a rokui el omeksaul. A Tekingel a Dios a mengelechel er kid el kmo: “Kemiu el betik er a renguk, molemolem el omekeroul er a klengar er kemiu el oumera er a Dios . . . e momtebechel er kemiu el ngar a bltikerreng er a Dios.”​—Jud. 20, 21.