Mngesuterir el Lmuut el Mo Mesiou
1. Te rua techang el ngar er a ongdibel er kid a ousbech a ngelsuid?
1 A apostol el Paulus a millatk el kirir tirke el mla mo oudeleokl er a omesiungir el mo er a Jehovah. (Rom 13:11) Me nguai a Paulus, kid me kede dirrek el omekerreu er a rudam me a rudos er kid el tir a diak el blechoel el mei er a ongdibel. Kede mekerang a dengesuterir el lmuut el mo mesiou?
2. Ngera sebechir a remechuodel el meruul er ngii el ngosuterir tirke el mla mo oudeleokl er a omesiungir?
2 Ngera Sebechir a Remechuodel el Meruul er Ngii: A rebetok er tirke el mla mo oudeleokl a omesiungir a dirkak lechitii a klemerang. Ngblechoel a odam me a lechub e ngodos el mo oudeleokl a omesiungel e le ngii el mo mechitechut a rengul, me a lechub e ngmo er ngii a mondai er ngii, me a lechub e ngmo osiik a tekoi er a kerruul, me a lechub e ngkuk di bebil er a sebekreng er a klengar a uchul. (Lk. 21:34-36) A lsebechel, e ngkmal ungil a dengesuterir er a uchei er a bo el oudeleokl a omesiungir. Ngdirrek el sebechel el meketmokl a taem el bo loldingel er tir a remechuodel el melisiich er tir. A remechuodel a kirir el melasem el mo medengelii a uchul a mondai me a rolel e ngsebechir el ngosuterir.
3. Kede mekerang e ngosuterir tirke el rudam me a rudos el mla mo oudeleokl er a omesiungir?
3 Te Mekerang a Rebebil a Lolengeseu: A ruumesingd er kid a ngar er ngii a chad el dodengelii el mla mo oudeleokl er a omesiungel. Nglocha chad el desal kmal mle medengelii er a ngar er a mong. Ngera sebeched el rullii el ngosuir? Nglocha sebeched el mo oldingel er ngii e douchais er ngii el kmo kid me a dirrek el chad er a ongdibel a kmal oureng el lmuut el omes er ngii el ngar er a miting. Ngungil a ledeu a rengud e bo doldingel er ngii e dolekoi a tekoi el melisiich. Ngsebeched el ouchais er ngii el kmo kede melatk er ngii engdi ngdiak bo dolekoi a tekoi el mesaod er ngii el mla mo mechitechut er a omesiungel el mo er a Dios. Ngdirrek el sebeched el ouchais er ngii el kirel aike el tekoi el dilubech el uchul a omelisiich me a kuk bebil er a ungil el tekoi el mla meketmokl er a chelsel a ongdibel. E sel kmal sebechel el ngosuir a ngii el me teloi er a rechad er a ongdibel. Ngsebechem el melekoi er ngii e kom dmak el mei er a miting. Mouchais er a remechuodel el kmo ngmlo ua ngerang er a bo moldingel er ngii.
4. Ngera sebechel melisiich er tirke el lmuut el mei er a miting?
4 A chad el mla mo oudeleokl er a omesiungel sel lluut el mei er a miting, e nglocha kora mo merur sel lesterir tirke el ble lodengelterir er a ngar er a mong. Ngungil a lak doker el kmo, “Kau ke mla er ker?” Ngbai soad el outkeu er ngii, e dedak el chadecheduch kid me a rebebil. Ngdirrek el sebeched el nguu el mo mengedecheduch er tirke el chad el diak lodengelterir. Ngsebeched el dmak el dengchokl er a temel a miting, e desa el kmo ngngar er ngii a blil a cheliteklel me aike el babier el mo soadel er sel taem. Ngdirrek el ungil a dolisiich er ngii el lmuut el mei er a ongdibel e dengesuir a lsekum ngousbech a ngeso.
5. Ngera mo duubech sel dengesuterir a rebebil el lmuut el mo mesiou er a Jehovah?
5 A Jehovah me a Jesus a dmeu a rengrir sel sekum a choua tirka el chad a lmuut el mei er a ongdibel, e le tir el oba bltikerreng el bedul tirke el mlo cheroid. (Mal. 3:7; Mt. 18:12-14) Ngsebeched el mo melechesuar er a osisiu el deurreng sel dengesuterir a rebebil el lmuut el mo mesiou er a Jehovah.