1, 2. Ngera el meringel el tekoi a mle kirir a rebebil el mo mesisiich er ngii me bo el sebechir el pioneer?

¹ ‘Ngkmal mla mo betok a tekoi el kuruul! Ngmera el olechotel a llomeserreng a bo kumuchel el mesiou el pioneer er chelechang?’ Aika uldesuel a ta el odos er a lorrenges er a ta er a remechuodel el pioneer el oltobed er a cheldecheduch el ngar er a circuit assembly el dai er ngii a kmo “Molengeriakl el Beduluchei Sel Mosiou el Pioneer.” A ngeasek el odam el ngar er a osisiu el ongdibel a kuk ulemdasu el kmo, ‘Ngmekerang ngika el odam e sebechel el pioneer? Ngak a diak ta er a remechuodel, engdi klengar er ngak a kmal mla mo mui er a betok el tekoi el kuruul!’

² Me ngika el odam er a lolemolem el mesaod a klengeltengat el dengai el okiu tia el ureor, e nguleker er a rebebil el pioneer el mla er sel circuit me louchais el kirel a omelodech el mle kirir el meruul me bo el sebechir el mo pioneer me a rolel a Jehovah er a lomekngeltengat er tir. Ngmla er ngii a ta er tir el mle chitechut, e a tang a dimlak el Kristiano a bechil, me a kuk tang a mle kirel el mengoit er a urerel el mengereker a betok el udoud e bai di mlo mengereker aike el lousbech. Me a lerenges a chisir tirka el pioneer el mlo ungil er tia el ureor el okiu a ngelseuil a Jehovah, e ngika el odam me a odos el dilengchokl a ulemuchel el merriter a uldesuir me a blekerdelel a klengar er tir. Aki mengemedaol er kemiu el dirrek el mo meruul el uaisei.

3. Ngera el tekoi a kired el melatk a lsoad el mo mesiou el pioneer?

³ Kede medengei el kmo a Jehovah a Ulemeob e Merreder er a eanged me a chutem me a klengar er kid a mla er ngii el mei. (Dan. 4:17; Rel. 17:28) Ngbleketakl el kmo a Jehovah a di ousbech er a ta el cheldebechel. Ngklou el techall a dobang el sebeched el mesiou el oba blakerreng, e olengeseu er a “mellomes a rengul e blak a rengul mesiou” el ousioning el kirel a Renged er a uchei er a lemei a ulebongel. (Mt. 24:45; 25:40; 1 Pe. 2:9) Kede kmedang er a “ulebongel er a beluulchad,” me kede melechesuar el kmo ngkmal mla mo kosekodel a taem. (2 Ti. 3:1) Me nguaisei, engdi ngdirk kired el olengeseu er a telungalek er kid er aike el lousbech. (1 Ti. 5:8) A kerrekerengel a chad a dikea lungil a ildisel el ua ngar er a mong. Alta klisichel a bedenged a dikea leua ngar er a mong. E a mera er ngii, ngsoad a lengar er ngii a telkib el temed me a ududed el dousbech el di kired. (Oli. 3:12, 13) Sei a uchul me kede mo melatk el kmo a bo dosiou el pioneer ngmera lolechotel a llomeserreng me a lechub e ngdiak.

4. Ngera uchul me a derta er kid a kired el merriter er a blekerdelel a klengar er kid?

⁴ Me ngdi mo ultuil er a derta er kid el merriter a blekerdelel a klengar er kid e mo melilt el kmo kede mo pioneer me a lechub e ngdiak. (Rom 14:12; Gal. 6:5) Ngmelisiich er kid sel domes a ildisir tirke el mla kongei el mo pioneer el di merael el mo obdois. Me alta ngbetok a orimel me a mondai er aika el uriul sils, engdi sel report er a odingel er a 2014 Yearbook a ochotii el kmo ngbekord el 1,500,000 el chedal a Jehovah er a beluulechad el rokir a olengeriakl el beduluchei el mesiou el pioneer. A losiou el ngar er a meringel a keizai er ngii el blekeradel, e diak a ungil el olidiuul, e le ngar er ngii a secherel a bedengir, me a lechub e te chelebangel a kuk bebil er a ringel, e tirka el odam me a rudos a diak lemeterob el meruul a ungil, me kede kmal chemat er tir. (Gal. 6:9) Te mla kongei er a tekingel a Jehovah el kmo molasem er ngak. (Mal. 3:10) Te melechesuar el kmo a losiou el pioneer a kmal mellomes el rolel a lousbech a kosekodel el temir me aike el ngar er ngii er tir, e a Jehovah a mla omekngeltengat er tir el kirel a omelodech el lurruul me bo el sebechir el mo soiseb e melemolem el ngar tia el rolel a omesiou.

5. Ngmilekerang a ta el odos e ngosuir a ngelekel el redil er sera lochellii?

⁵ Tirke el Pioneer a Mukngeltengat: A odos el ngar er a Cameroon el ngar er ngii a kekerei el ngelekel el redil a mesaod el kmo: “Sera lemechell a ngelekek el me er chelechang e ngmle blechoel el obengkek el oldingel. Uchei er a bo lorael e ak blechoel el oltour er ngii er a ulkek, el kmal el ungil el rrengodel er a mamed. A ta el tutau er aki moldingel, e ak mlo dechor er bita er a ta el makit er a tkul a rael. E a ngelekek a ngilai a bebil er a magazine er a tik, e mlo cheroid er bita er ngak. Ngmlekekokil el omekebakes el mo er a kuk ta er a makit el di mle kmeed er kemam. Alta e ngdimlak el sebechel el ungil el mengedecheduch, engdi ngulechuir a osengel a ta el redil e milsa magazine. Ngika el redil a kmal mle mechas a rengul el omes er a kmal kekerei el ngalek el teloi er tia el ureor. Ngdi mle mereched el nguu tia el magazine e kilengei er a omesubel a Biblia!”

6. Ngera el tekoi a lerirellii a ta er a remechuodel alta e ngmle kosekodel a temel?

⁶ A bo longer er tia el okedong el mo auxiliary pioneer, e a ta er a remechuodel el bdelul a telungalek el ngar er a Zambia el mla er ngii a mui el taem el urerel a tilbir el mo auxiliary pioneer alta ngkmal mle kosekodel a temel. Ngmle soal kutmeklii a ungil el kerebai el kirel a ongdibel me a telungalek er ngii. A lebebil er a taem, e ngstob er a mlil er a tkul a rael e orrael er a cassette el The Secret of Family Happiness. Sel lengelakl a rechad e ngoleker er tir el me orrenges el obengkel. Ngoeak tia el rolel, e ngmle sebechel el remous a 29 el babier e ulemuchel a teblo el omesubel a Biblia.

7. Ngmekerang a ongdibel e ochotii a ungil el reng er a pioneer?

⁷ A kmal ungil el reng er a pioneer a dirrek el meues el ngar er a bita er ngii el beluu er a Zimbabwe. A ta el ongdibel el mla er ngii a 117 el publisher er ngii a mle report er a 70 el auxiliary me a 9 el mesiou el pioneer. A lmuut el ta er a ongdibel el mla er ngii a 94 el publisher er ngii a mle report a 58 el auxiliary pioneer. Me a lmuut el tang a mla er ngii a 126 el publisher er ngii, e mle report el kmo a 58 er tir a mlo auxiliary pioneer el obengterir tirke el 4 el mesiou el pioneer. Me alta e a rudam a kmal mle mechesang a tekoi el kirel a telungalek er tir, me a tekoi er a ongdibel, me a okedecherul a branch, engdi te millemolem el olecholt a llomeserreng sel lousbech a temir el oldingel.

8. Ngmekerang a Jehovah a lolengeseu sel denguu a tekoi er a Renged el mo kot?

⁸ Tirke el pioneer a medengei el kmo a bo lomuchel er tia el ureor e loutekangel el meruul er ngii a diak el ultuil er a di klisichir. Tir a kot el mo kongei el kmo a ngii di el ngerang el loruul a sebechel el meketmokl el mo ungil e le tir el ultuil er a ‘klisiich el le besterir a Dios.’ (1 Pe. 4:11) A klaumerang er tir a rulleterir el mo melemolem er a omesiungir er a bek el sils. Me ngdiak losiik a betengel a tekoi el kirir me a lechub a mo ungilbesul el kirir, te bai melechesuar el kmo a lolemolem el olengeriakl el beduluchei, e te ousbech er a “meringel telekangel”, el ngii a sebechel el mo uchul a betok el klengeltengat el bo lengai.​—1 Th. 2:2, BT.

9. Ngmekerang e sebeched el ngmai a klungioled er a kerebil a apostol el Paulus?

⁹ Ngungil a Doukerebai er a Paulus: A Biblia a ouchais a tekoi el lekiltmokl a Paulus er a omesiungel me a ungil el ngeso el lebilsterir a rebetok el chad. Nguaisei, a Paulus a kmal mle betok a tekoi el lurruul. Nguluutekangel a odechelakl me a ringel me bo el sebechel el omerk er a ungil chais e lolisiich a ongdibel. Ngdirrek el mle kirel el outekangel a secherel a bedengel. (2 Ko. 11:21-29; 12:7-10) Ngkmal mle soal el ousbech a temel el ngar er a mellomes el rolel. Ngkilengei el kmo ngmle sebechel el kutmokl a rokui el urerel el oeak a ngelsuil a Jehovah. (2 Ko. 4:7) Ngdimlak a ta er tirke el chad el lengilsuterir el sebechel el melekoi el kmo a temel me a blakerreng er a Paulus er a omesiungel el mo er a Jehovah a dimlak a belkul me a lechub e ngmle sebechel el ousbech er ngii er a lmuut el ungil el rolel. E le kid er chelechang a dirk melai a klungioled er a kerebil a Paulus! Kede kmal loba omereng el saul el kirel a ulekrael el lebilskid me bo deketmokl a meklou a ultutelel el tekoi el doruul e dolemolem el ngar er a klemerang er a chelsel aika el meringel el taem!

10. Ngera uchul me ngklou a ultutelel er chelechang el dousbech a temed el ngar er a mellomes el rolel?

¹⁰ Me chelechang, e ngkmal “mla mo kosekodel a taem” el dousbech er ngii el omerk er a ungil chais. (1 Ko. 7:29, BT; Mt. 24:14) Me seikid, e ngungil a di el kid el oker el kmo, ‘Omko ak di mereched el mad er a klukuk, e ngsebechek el melekoi er a Jehovah er chelecha el sils el kmo ak uluusbech a temek el ngar er a mellomes el rolel?’ (Jak. 4:14) Ngera me ngdiak bai moluluuch el mo er a Jehovah er chelechang, e mouchais er ngii el kmo ngmera el soam el ousbech a temem el ngar er a mellomes el rolel el ta er a Sioning er ngii? (Psa. 90:12) Moluluuch el mo er a Jehovah me lengesukau el omekbeot er a klengar er kau. Alta e kulemdasu el kmo ngkmal diak el sebechem el kutmeklii tia el ureor, engdi omomdasu e chelechang e ngsebechem el mo mesiou el pioneer?

11. A rokui el mesiungel a Jehovah ngulterekokl a rengrir er a ngerang, alta ngsebechir el mesiou el pioneer me a lechub e ngdiak?

¹¹ Moruul er Sel Tkurrebab el Sebechem: Nguaisei, a blekerdelel a klengar er a rechad a uchul e ngdiak el tirke el rokui el sorir a sebechir el chemoit a 70 el sikang er a bek el buil el mesiou el pioneer. Engdi, te betok el publisher a sebechir el mengoit a 50 el sikang er a ta el buil el oldingel el auxiliary pioneer, e melasem el meruul el uaisei. A lsekum a blekerdelel a klengar er kau a uchul e ngdiak el sebechem el auxiliary me a lechub e ke mesiou el pioneer, e lak bo lemekngit a rengum. Molemolem el meluluuch me lemengodech a blekeradel el mngar er a chelsel. E sola e a lak el sebechel el mengodech, e modengei el kmo a Jehovah a kmal dmeu a rengul er sel kot el tkurrebab el omesiou el sebechem el msang el mla er a rengum. (Mt. 13:23) Ngsebechel el mesang el kmo ke mesisiich el dechor el ngar bita er ngii e melasem er a tkurrebab el klisichem el mo blak a rengum el publisher el diak becherei a ta el buil melengelakl el dimlak mosiik a techall el mo olecholt el kirel. Nglocha dirrek el sebechem el olengeriakl sel molisiich er a duch er kau er a berkel a klumech, e moureor el mo ungil el omerk e molisechakl er a ungil chais.​—1 Ti. 4:16.

12. Ngdiak dobes er a ngera el tekoi?

¹² Me chelecha el sal lolekeda sel “klou e kdekudel sils er a RUBAK,” e ngkmal kired el mo ousbech a medechel el temed el ngar er a mellomes el rolel a lsoad el churrengelii tia el mloterekokl er kid el ureor. (Joel 2:31) A Satan a medengei el kmo a temel a kmal kedeb, me ngmelasem el ousbech er a klisichel el rokir el mo omekringel a klengar er kid me bo lak el sebeched el meruul a meklou a ultutelel el tekoi. (Fil. 1:10; Och. 12:12) Lak mobes er a klemeriarreng er a Jehovah el kirem me a klisichel el sebechel el ngosukau el mo omekbeot er a klengar er kau me bo mosiou er ngii el ngar sel tkurrebab el sebechem. (Psa. 145:16) Ngdmeu a rengud, e le te betok a mla metik el kmo, sel lluut el merriter a blekerdelel a klengar er tir, e ngmlo sebechir el mo auxiliary me a lechub e te mesiou el pioneer. Nguaisei, tirke el pioneer a melechesuar a dmolech el deurreng sel lousbech a temir el ngar er a mellomes el rolel. Kau ke mo ta er tir?