Bo Meduch el Mengeluch Sel Molisechakl
1. A dungil el lousbech er a Tekingel a Dios er a chelsel a omesiunged ngdirrek el uldimukl er ngii a ngerang?
1 A remeduch el mesiou, el ua apostol el Paulus, a mle medengei el kmo a de “melemalt loleisech a tekoi ra klemerang” e ngdimlak el belkul a kmo kede di meduch el lolecholt a lolekoi a Chedaol el Llechukl e merekong. (2 Ti. 2:15) Me a dousbech a Tekingel a Dios, e kede mekerang e ousbech a ‘omengeluch’ er a chelsel a osisechekled?—Rel. 28:23.
2. Ngmekera dengesuterir a rechad el mo menglou a omengull er tir el mo er a Tekingel a Dios?
2 Becherei a Tekingel a Dios Me Longedecheduch: A kot e mocheuir a osengel a chad el mo er a Biblia el oeak a rolel el melisiich a omengull el mo er a llomeserreng er a Dios el debetik er a chelsel. A ulterekokl el reng el dobang el kirel a Tekingel a Dios a sebechel el melisiich er a chad el orrenges er kid el mo kerekikl el orrenges sel lengar er ngii a omengiuel a bades. (Heb. 4:12) Ngsebeched el di dulii a beot el tekoi el kmo: “Ak metik er ngii el mo klungioled a bo dodengei el kmo ngngera uldesuel a Dios el kirel tia el tekoi. Ka mesa el kmo ngngerang melekoi a Tekingel.” Me a ngii di el taem el sebechel, e becherei a Tekingel a Dios me longedecheduch el loeak sel obkisii e monguiu a tekoi el llechukl er a chelsel.
3. Uriul er a lemechuiu a bades, e ngera ungil el derellii el mo ngosuterir a rechad el orrenges er kid me bo lebleketakl a rengrir er a belkul?
3 Ongerung, e msodii a bades el muluusbech er ngii. Te betok el chad a meringel er tir el mo medengei a lolekoi a bades sel lekot el rongesii a omengiuel. Me a omesaod a blechoel el usbechall me bo el sebechir el mo medengelii a uchul me kede ousbech er ngii er omesodel sel suobel. (Lk. 24:26, 27) Mocholt aike el meklou a ultutelel el tekoi el molai er a bades el mo melisiich er a suobel el mosaod er ngii. A ker a locha sebechel el mo oterekeklii el kmo a suobel el mulsaod er ngii a mle bleketakl me a lechub e ngdiak.—Osi. 20:5; Rel. 8:30.
4. Ngera el ulebongel el bakes a klou a ultutelel sel dolisechakl el loba omengeluch?
4 Mosiik a Urebetellel a Omesaod el Oeak a Bades: Ongedei, molasem el olisechakl el mo rutechii a uldesuel me a rengul a chad. Mngesuir a chad el mongedecheduch er ngii el mo sebechel el mesa el kmo a bades ngmekera lemotaut el mo er ngii. A omosiik a ungil el urebetellel a omesodel a tekoi el oeak a Bades e a chad a sebechel el mongeseu el mo melodech er a uldesuel. (Rel. 17:2-4; 19:8) El di ua tiang, uriul er a omonguiu er a Psalm 83:18 el obengkel a footnote el ngar er a 3 el llel a Biblia el tekoi er a Belau, e ngsebeched el mo mesaod er a kmo a bo dodengelii a ngklel a chad a uchetemel a okurulel a deleuill er kid me ngii el chad. E locha sebeched el oker el kmo, “Omomdasu e a omodengelii a ngklel a Dios e ngsebechel el rullii a nglunguchem el telkib el mo er ngii a belkul?” Sel mochir a bades el mo er a klengar er a chad el mongedecheduch er ngii el oeak tia el rolel e ke mla ochotii a mera el ultutelel a Biblia er ngii. Chouaisei el osisecheklel a Tekingel a Dios el oba omengeluch a sebechel el mengurs er a remelemalt a rengrir el chad el mo mengull er a klemerang e dingar el Dios el Jehovah.—Jer. 10:10.