“Kau a Sebechem el Kmal Mo Ungil el Pioneer!”
1. Ngmle ua ngera uldesuel a ta el odos el kirel a omesiungel el ua ta er a pioneer?
1 A Kathe B. Palm a millekoi el kmo: “Ngdimlak el sebechek el metik er a kuk ngodech el ureor el mlo sebechel el odeuir a renguk me a lechub e ngmlo uchul a betok el klengeltengat er a klereng el mei er ngak el uai tiang.” Ngika el odos a chiloit a kmal betok el rak el oldingel el ua ta er a pioneer er a bita el ulebengelel a Chile er a South America el mo lmuut er a bitang. Me a lolebedebek aika el chisel a klengar er a rengar er a mui el taem el omesiou el kmal klou a klengeltengat el lolechesuar, e alta ngngar er ngii a mla dmu er kau el kmo: “Kau a sebechem el kmal mo ungil el pioneer!”
2. Ka mosaod el kmo ngera uchul me a chad a sebechel el mo melechesuar er a klou el deurreng sel loruul a tekoi el kirel a omesiungel.
2 Klengar el Uchul a Deurreng: A Kerebai el kired, el Jesus, a miltik er a mera el ulengull el mo er a reng er ngii el loeak a loruul a soal a Demal. (Jn. 4:34) Me seikid a uchul me a Jesus a mera el mle blak a rengul el olisechakl er a rulebengkel el kmo a mera el deurreng a sebeched el nguu el loeak a blakerreng er kid el meruul a tekoi er a chelsel a omengull er kid el mo er a Jehovah. Ngungil a rengud sel sekum a klengar er kid a mechesang er a ureor el mo uchul e kede ngmai a kengei er a Jehovah. Ngdirrek, sel demengal mo mengoit er a klou el taem, klisichel a bedenged, me aike el ngar er ngii er kid el mo olengeseu er a rebebil, e a deurreng er kid a mengal medechel el mo klou.—Rel. 20:31, 35.
3. Ngera el deurreng a sebeched el mo melechesuar er ngii sel bo dongoit a lmuut el betok el taem el omerk er a klumech?
3 A dongoit er a klou el taem er a ureor er a berkel a klumech, e ngmengal mo klou a techelled el mo melechesuar er a deurreng el loeak sel domuchel e dolemolem el mesuub a Biblia el obengterir a rechad. Ngmo lmuut er aike el basio el kora diak el sal semeriar a rechad, me ngdirrek el sebeched el metik el kmo a basio el doldingel er ngii a kmal ungil el ourodech el diak el ua sel uldesued el kirel er a kot el uchul sel lorael a duch er kid er a ureor er a berkel a klumech el mo klou. A repioneer a sebechir el ousbech er a klou el lomesuub el lenguu er a Pioneer Service School er a uriul er a bla lepioneer el bekord el ta el rak. (2 Ti. 2:15) A dolemolem el meruul er tia el ureor, e ngulterekokl el sebeched el dualem a tane er a klemerang el ltang mo ourodech er a uriul el taem.—Oli. 11:6.
4. A rengeasek el olekeda er a omelilt er a skuul ngngera sebechir el mo melatk?
4 Rengeasek: Chelecha el bocha morekui er a uchetemel a omesuub el molai er ngii er a skuul, e ke mla kerekikl el omdasu el kirel a obo moruul er ngii er a klengar er kau er a ngar er medam? Ngme lmuut er chelechang e a subelem er a skuul a kora ulelterekokl a bldeklel a tekoi el moruul. Ngmekera obo mousbech aika el mededesa el temem er a uriul er a omelilt? Ngera me ngdiak e bai moeak a nglunguuch e molebedebek er a mui el taem el omesiou el ua turrekong er kau er bai mosiik a ureor? A duch el bo msuub el ua—sioning el mo er a kakerous a bedengel a klengar er tir el chad, mo meduch el outekangel me a lechub e ke mesmechokl a chetituokel el tekoi er a klengar er kau, omekeroul er a blekeradel el sebechem el otirakl a omellach el mketmokl el omtebechel er a klengar er kau me a blekerdelem, e mekurulii a duch er kau el olisechakl—a tekoi el sebechel el mo uchul a klungiaol el kirem er a klengar er kau el rokir.
5. Te mekerang a ruungalek me a ongdibel e lolisiich er a repioneer?
5 Kemiu a rechedam me a rechedil, ko meruul a ngerecheliu el omekrael a uldesuir a rengelekiu el mo omdasu er a mui el taem el omesiou? A tekingiu me a ungil el kerebai er kemiu a kmal klou a lengesuir el rulleterir el mo ngmai a tekoi er a Renged el mo kot er a klengar er tir. (Mt. 6:33) A Ray el ulemuchel el pioneer er aike el ulebongel el rak er ngii er a high school a melekoi el kmo: “A delak a mle blechoel el melekoi el kmo a klepioneer a mo uchul a deuil a rengud er a kot el ungil el rolel a klengar.” Me a rokui el ngar er a chelsel a ongdibel a sebechir el melisiich er a rengar er a mui el taem el omesiou el oeak a tekingir me a ngelsurir. A Jose er a beluu er a Sebangiol a melekoi el kmo: “A ongdibel er ngak a ulemes er a ureor er a klepioneer el ua lekot el ungil el ureor el kirir a rengeasek. A tekingir me a omereng el saul er tir el kirel a urerir a repioneer el mo lmuut er a tekoi el loruul el olengeseu er tir a rirellii el kmal mlo beot er ngak el mo omuchel el pioneer.”
6. Ngera sebeched el meruul er ngii a lsekum ngdiak a uldesued el mo pioneer er chelechang?
6 Mdedaes Aike el Melenget er Medam: Engdi omko ke melekoi el kmo, ‘Ngdiak a uldesuek el mo pioneer.’ A lsekum ngseikid a mle uldesuem er a kot el uchul, e moluluuch el mo er a Jehovah el kirel a uldesuem e mouchais er ngii el kmo, ‘Ngdiak kudengei el kmo a klepioneer ngungil kirek me a lechub e ngdiak, engdi ngsoak el mo meruul a tekoi el oldeu er a rengum.’ (Psa. 62:8; Osi. 23:26) E mosiik a ulekrael el mla er ngii el mei el oeak a Tekingel me a cheldebechelel. Te betok el mui el taem el pioneer a ulemuchel el “mengarm” er tia el ureor el ua auxiliary pioneer, e a deurreng el blo lolechesuar a rirelleterir el mo sorir el melemolem er tia el ureor el mui el taem.—Psa. 34:8.
7. Ngmekera dosmechokl a sebekreng er kid el kirel a 70 el sikang el locha mo diak el sebeched el kutmokl er a bek el buil?
7 E a lsekum ngdiak desal medengei el kmo ngmo sebeched el meruul a 70 el sikang er a bek el buil me a lechub e ngdiak? Ngera me ngdiak bai mongedecheduch er a repioneer el osisiu a blekerdelel a klengar er tir me kau? (Osi. 15:22) E mluches a betok el bldeklel a taem me a yotei er odingel el sebechem el ousbech. Kulterekokl el mo metik el kmo a omolecheuekl a taem el kirel a ureor er a berkel a klumech a kuk diak el sal meringel el ua sel mulemdasu er ngii.—Efe. 5:15, 16.
8. Ngera me ngkired el lebebil er a taem e kede kuk mo merriter a blekerdelel a klengar er kid?
8 Mluut el Mo Ungil el Tirterii a Blekerdelel a Klengar er Kau: A blekerdelel a klengar er kid a blechoel el mengedengodech. Ngungil a lebebil er a taem e kuk bo mchelellakl e morriter er a blekerdelel a klengar er kau. El ua tiang, kau nglocha di kmedung e ngmo merek a rak er kau er a ureor? A Randy el mle mereched el mo olengull er a ureor a melekoi el kmo: “Tia el omelilt el krirellii a ngilsukak el mo sebechek el mo mui el taem el pioneer el obengkel a bechik, e mla meskemam a techall el melukl el mo mesiou el ngar er aike el ongdibel el ousbech er a klou el ngeso. Ak mla ngmai a betok el klengeltengat el kirel tia el omelilt er ngak, engdi sel kot el ngarbab el klengeltengat el bla knguu a klikiid el ukltkek.”
9. Ngera kirir a rubekel el mo melebedebek?
9 A rebebil er a rubekel a miltik el kmo ngdi ungil a lak loureor el mui el taem el mengereker el terung. Ngklemerang el kmo ngkirel a telungalek er tir el mo omekbeot a rolel a klengar er tir, engdi a chouaisei el omelenget a kmal rredemelel a tekoi el lolatk er ngii. A John el bechil a dirk mlo diak loureor el mui el taem me bo el sebechel el mo menglou er a omesiungel a melekoi el kmo: “Ngdiak a ngodech el ungil el tekoi el odeuir a renguk el ua kudengei el kmo a bechik a mechesang el ta el sils el kirel a tekingel a Dios.”
10. Ngera rulleterir a Rekristiano el mo melatk er a ureor er a klepioneer?
10 Ochotel a Bltikerreng me a Klaumerang: A Jehovah a mla rullii a berkel a klumech el mo kot el klou a ultutelel el tekoi el sebechel a ngii di el ta er kid el mo meruul er ngii. Tia el mechut el blekeradel er a beluulechad a kmal di kmedung e ngmo metemall, e di tirke el omekedong er a ngklel a Jehovah a mo suobel. (Rom 10:13) A bltikerreng el mui er a chelsel a rengud me a omereng el saul el dobang el kirel aike el rokui el bla lrruul el kired a mo odbechid el mo olengesenges er a oderuchel el mla er a Ngelekel el mo omerk er a klumech el oba blakerreng. (Mt. 28:19, 20; 1 Jn. 5:3) Ngdirrek, a doumerang el kmo kede mera el kiei er a taem er a ulebongel e kede mo meruul aike el sebeched er a berkel a ungil el chais er chelechang el dirk ngar er ngii a taem, er a bai dolatk el lousbech er tia el beluulechad el mo er sel tkurrebab el sebeched.—1 Ko. 7:29-31.
11. Ngkirel mo ua ngera osenged er a chad el dmu er kid el kmo ngsebeched el mo ungil el pioneer?
11 A mui el taem el ureor er a klepioneer a diak el loruul er ngii a chad el ua lekuk di el ta er a bldeklel a omesiou el mlotobed er a cheldebechelel a Dios, e le tiang a ochotel a mera el blakerreng el oba chad el bedul a Dios. Me a lsekum ngngar er ngii a chad el dmu er kau el kmo kau a sebechem el mo ungil el pioneer, e momes er ngii el kmo ngmelekoi el chemat er kau. E moeak a nglunguuch e momes el kmo ke mekera e mo teloi er a rechad el ngar tia el telengtengil a omesiou er chelechang.
[Blurb el ngar er a 4 el llel]
Kemiu a ruungalek, ko meruul er a ngerecheliu el omekrael a uldesuir a rengelekiu el mo bedul a mui el taem el omesiou?
[Blurb el ngar er a 5 el llel]
A Jehovah a mla rullii a berkel a klumech el mo kot el klou a ultutelel el ureor el sebechel a ngii di el ta er kid el mo meruul er ngii.