Ngak Ak Meruul Aike el Sebechek?
1. Ngera el tekoi a sebechel el omeksebek er a rengul a blak a rengul el Kristiano?
1 Ngmla ta el di el kau el oker er tia el ker? Alta ngmla mo diak msal teloi er a ureor er a berkel a klumech e le ke mla mo chuodel, me a lechub e ngbetok a secherem, me a lechub e ngmla mo klou a ngerechelem er a telungalek er kau, el uchul me ngmo mechitechut a rengum. A ta el odos el tedei a rengelekel a milluches el kmo, a lebebil er a taem e ngmo mekngit a rengul e le temel me a klisichel el lousbech el mengetmokl er a telungalek er ngii, a rullii el mo meringel er ngii el meruul aike el sebechel el ngar er a omesiungel. Ngera sebechel el ngosukid el mo omes a tekoi el ngar er a tabesul el rolel?
2. A Jehovah ngerang mengerechir er ngii er kid?
2 Aike el Longerechir er Kid a Jehovah: Ngulterekokl el kid el rokui a soad el meruul a lmuut el betok el ngar er a omesiunged. Engdi ngngar er ngii a klou el klekakerous er aike el soad el meruul me aike el sebeched el meruul. Me kid el soad el meruul a lmuut el betok a ochotii el kmo ngdiak el di el ungil er a rengud aike el bla deruul. Ngdiak dobes el kmo a Jehovah a kmal medengei aike el sebeched el meruul e diak longerechir er kid aike el diak el sebeched. (Psa. 103:13, 14) Me ngerang mengerechir er ngii er kid? Ngsoal a dosiou er ngii el oba klengar er kid el rokir, e debsa aike el kot el ungil er kid.—Kol. 3:23.
3. Ngmekerang e sebeched el merriter aike el doruul el ngar er a omesiunged?
3 Ngerang a mo ngosukid el mo medengei aike el mera el sebeched el meruul? Ngsebeched el olengit er a Jehovah me lengesukid el mo ungil el mesang a blekerdelel a klengar er kid. (Psa. 26:2) A doumerang er ngii el mesisiich el Kristiano el sechelid el kmal medengelkid e diak lemedakt el louchais er kid a dousbech a omesmechokl a dirrek el sebechel el ngosukid. (Osi. 17:17) Kele mobes el kmo a blekerdelel a klengar a blechoel el mengodech me sei a uchul me ngmo uchul a klungiaol a deblechoel el merriter er ngii.—Efe. 5:10.
4. Ngkirel el mo ua ngerang a osenged er aike el uleklatk er a Biblia el kirel a omesiunged?
4 Ngkirel el Mo Ua Ngerang a Osenged el Kirel a Uleklatk: Sel temel a klaidesachel, e a rechoiendang a blechoel el melisiich er tirke el remurt. A moktek er tiang a olengeseu er tirke el remurt el mo oltaut er a turrekong er tir er a bai longitechut er tir. Me nguaisei, aike el ongelaod me a uleklatk el ngar er a Biblia el dengai er a miting er kid me a babilenged el mo ‘omerk a tikingel a Dios’ el oba blakerreng a mo uchul a klungioled e diak el belkul a kmo aike el doruul a ua lolengesonges. (2 Ti. 4:2) Me ngsebechel el mo ulterekokl a rengud el kmo a dolemolem el meruul aike el tkurrebab el sebeched, e a Jehovah a mo lmatk a bltkil a rengud me a urered el oba kengei.—Heb. 6:10.