Ngsebechem el Ousioning er a Taem el Diak Moldingel!

1. (a) Ngera belkul a dousioning er a taem el diak doldingel a obliil? (b) Te telang el ngar er tia el miting er chelechang a mlo medengelii a klemerang e le rechad a milengedecheduch er tir er a taem el dimlak loldingel a obliil?

¹ Te tela el ngar er a chelsel a ongdibel er kau a mlo medengelii a klemerang e le rechad a uluusioning el mo er tir er a taem el dimlak loldingel a obliil? Ke locha mo mechas a rengum er a nger er tiang. A dousioning er a taem el diak doldingel a uldimukl er sel dongedecheduch er a rechad el desterir er a bek el sils, el ua sel dengar er a omerael, sel doldingel er a rechedad me a lechub a retonari er kid, sel debo er a stoang, me sel dengar er a skuul me a dengar er a ureor me a lmuut el bebil. A 40 el basent er a ta el cheldellir a rebetok er a recheru el dart el mla metecholb el Sioning a mlo medengelii a klemerang e le rechad a uluusioning el mo er tir er a taem el dimlak loldingel! Me a leuaisei, e tiakid el rolel a berkel a klumech a kmal oureor.

2. Ngera el kerebai el kirel a dousioning er a taem el diak doldingel a sebeched el metik er a Bades?

² Tirke el ulemerk er a klumech er a kot el dart el rak a mle blechoel el mengedecheduch er a rechad er a taem el dimlak loldingel. El ua tiang, a Jesus er a lengar er a omerollel er a chelsel a Samaria, e nguluusioning el mo er a ta el redil el millai a ralm er a chido er a Jakob. (Jn. 4:6-26) A Filipus a milechelii a cheldecheduch el obengkel a ta er a olab a klisiich el chad er a Ethiopia el milenguiu er a babier er a Isaia er a loker er ngii el kmo: “Ke mtab a ikel monguiu?” (Rel. 8:26-38) Sera lengar er a kelebus er a Filipi, e a apostol el Paulus a uluusioning el mo er a ta er a kelebus el mla er sei. (Rel. 16:23-34) E a uriul, er a lekelebus el ngar er a blil, e a Paulus a “ngiliiteterir tirikel rokui el mler ngii, e di chilolt e ka le mokebai el omerk ra rengedel a Dios el olisechakl a tekoi ra Rubak el Jesus Kristus.” (Rel. 28:30, 31) Kau me ngdirrek el sebechem el ousioning er a taem el diak moldingel a obliil, alta e ke merur. Ngmekerang a omoruul el uaisei?

3. Ngera sebechel el ngosukid me ngmo diak demerur?

³ Aike el Kired el Meruul er a Uchei: Betok er kid a meringel er kid el omuchel a cheldechedechad el lobengterir a rechad el diak dodengelterir. Ngdirrek el sel dongedecheduch er tirke el dodengelterir el chad el kirel a klemerang me ngkora meringel er kid. Engdi ngsebeched el muchelechel el mo mengedecheduch a lsekum e kede melebedebek er a ungilreng er a Jehovah, me aike el mekreos el klemerang el bla lebeskid, me a mekngit el blekeradel el seluk er ngii a rechad er tia el beluulechad. (Jon. 4:11; Psa. 40:5; Mt. 13:52) Me a lmuut el tang, ngsebeched el olengit er a Jehovah me lengesukid el mo ‘bekeu.’ (1 Th. 2:2) A ta el chad el tilobed er a skuul er a remo missionari a dilu el kmo: “Ak mla metik er ngii el kmo a nglunguuch a mera el blechoel el ngosukak sel lemeringel er ngak el mengedecheduch er a rechad.” A lsekum e ngmeringel er kau el mengedecheduch er a rechad, e mdelii a kedeb el nglunguuch el ngar er a rengum.​—Neh. 2:4.

4. Ngera el turrekong a sebeched el di me a uchei e kutmokl el kired, e ngera uchul?

⁴ Me tia el blekeradel el sebeched el mengedecheduch er a rechad er a taem el diak doldingel a beot e diak el lousbech er a ileakl el tekoi el mo meruul er ngii. Kede locha mo metik er ngii el kmo ngungil a derellii a turrekong er kid el di omuchel a cheldecheduch el obengterir a rechad er a bai domdasu el kmo ngkired el di me a kot e kede ousioning el mo er tir. A rebetok el mla mo oldingel a obliil a ouchais el kmo a loruul er tiang e ngmesterir a ulterekokl el reng el lousbech er ngii el mo omerk er a ungil el chais er a uriul. Me a lsekum a chad a diak el soal el mengedecheduch, e ngdiak el ungil a dorrimel er ngii. Nglocha sebeched el kodebengii a tekinged e mo ungil el sumesmechii.

5. Ngera ngilsuir a ta el sekemerur el odos el mo ousioning er a taem el diak loldingel?

⁵ A ta el sekemerur el odos sel taem el lengar er a blil a makit, e ngomuchel el omes er a chad el oba ungil el klikm er ngii. A lsekum a chad a dirrek el ungil a klikm er ngii el bedul ngii e ngmo sebechel el mengedecheduch er ngii el telkib. E a lsekum a chad a semeriar, e tiang a smisichii a rengul me ngsebechel el lmuut el komengetii a cheldechedechal. Me sel longedecheduch ngika el chad, e ngkerekikl el orrenges e omtab el kmo ngera el telengtengil a ungil el chais a bo el semeriar er ngii ngika el chad. Ngii el meruul er tiang a uchul me ngmla remous a betok el babier e dirrek el mla mechelii a omesubel a Biblia el obengkel a chad.

6. Ngmekerang e sebeched el omuchel a cheldechedechad sel dousioning er a taem el diak doldingel?

⁶ Rolel a Domuchel a Cheldecheduch: Ngera sebeched el melekoi el omuchel a cheldechedechad? A Jesus er a longedecheduch er ngike el redil el ngar er a chido, e ngulemuchel el olengit er ngii me lebsang a imelel. (Jn. 4:7) Nglocha sebechem el mechelii a cheldechedecham el oba ungil el klikm me a lechub e ke oker a ker. Me sel omchadecheduch e nglocha sebechem el metik er a ungil el techall el ochotii a ungil el uldasu el ngar er a Bades e locha dirrek el sebechem el dolemii a tane er a klemerang er a rengul. (Oli. 11:6) A rebebil a mla metik er ngii el kmo ngungil a lomuchel el oba kmal meang el tekoi el omeksemeriar er a chad me a lechub e ngrullii el mo soal el oker a ker. El ua tiang, sel omongiil el mo omes er a toktang, e ngsebechem el mechelii a cheldecheduch el oeak sel molekoi el kmo, “Ngmera el dmeu a renguk el medengei el kmo ngmo er ngii a taem e ngdiak luut el mo smecher.”

7. Ngmekerang a lebeiusech a medad a lengesukid el mo ousioning er a taem el diak doldingel?

⁷ A bo lebeiusech a medad a dirrek el ta er a tekoi el sebechel el ngosukid el omuchel a cheldecheduch. A lsekum kede mesang a chedam me a lechub e ngchedil el obetiterir a rengelekir el kmal ungil a blekerdelir, e ngsebeched el chemat er ngii, e sola e oker er ngii el kmo, “Ngerang a mla ngosukau el mo ungil el chedam me a lechub e ngchedil?” A ta el odos a omtab aike el losaod tirke el ledak el oureor e sola e olecholt er tir a suobel el lesemeriar er ngii. Sera bo lodengei el kmo a ta el redil er a urerel a melatk el mo bechiil, e ngmlisang a Awake! el babier el milsaod el kmo ngmekerang a dongetmokl er a merengel a chebechiil. Tiang a mlo uchul e ngmlo sebechir el mesaod er a Biblia.

8. Ngmekerang a dousbech a babilenged el omuchel a cheldecheduch?

⁸ A ta er a rolel e ngsebeched el omuchel a cheldechedechad a sel sekum e kede menguiu a babilenged er a basio el sebechir a rechad el mesekid. A ta el odam a mekengii a A Ongkerokel me a lechub e ng Awake! el mo er a suobel el ngar er ngii el olechau a osengir a rechad e mekekokil el menguiu er ngii. A lsekum ngmesang a chad el ulemes er a babilengel, e ngoker er a ker me a lechub e ngouchais er a di kedeb el uldesuel el kirel ngii el suobel. Tiang a blechoel el mo uchul a ungil el cheldecheduch me a dirrek el ungil el sioning. Me a debecherei a ta er a babilenged er a basio el sebechir a rechad el mesang a sebechel el omeksemeriar er a rechad el dedak el oureor me a lechub e tirke el dedak el ngar er a skuul e rulleterir el mo sorir el oker el kirel.

9, 10. (a) Kede mekerang a domekdubech a techall el mo ousioning er a ngii di el taem? (b) Ke mlekerang e mlo sebechem el meruul er tiang?

⁹ Domekdubech a Techall: Ngii el kmal orechudel tia el ureor er a berkel a klumech a uchul me ngdiak el soad el omes er tia el techall el ousioning er a taem el diak doldingel el ua el tekoi el di ngii el mo duubech. Ngbai soad el osiik a techall el mo ousioning sel doruul a urered er a bek el sils. Momdasu er a uchei el kirir tirke el chad el multerekokl el mo mesterir e molatk el kmo ngmekerang a bo bechelii a ungil el cheldecheduch el obengterir. Moba Biblia er kau me a bebil er a babier el sebechem el mesterir tirke el olecholt a klemeriarreng.​—1 Pe. 3:15.

¹⁰ Me ngoeak a lungil el omdasu, e te betok el chad el mla mo oldingel a mla metik a betok el rolel e ngsebechir el omekdubech a techall el mo ousioning er a taem el diak loldingel. A ta el odos el kiei er aike el blai el mesisiich a omengkar er ngii a ousbech aike el basio el kirel a omilil el omechobech a puzzle er a klebokel el siasing er a basio el meliuekl er kid. A rechad sel lestob e longedecheduch er ngii el kirel a klebekelel aika el siasing, e ngousbech er tia el techall el mo mechelii a cheldecheduch e ouchais er tir er a iaksok er a Biblia el kirel a “beches el eanged ma beches el belulechad.” (Och. 21:1-4) Ngsebechem el mdasu a bebil el rolel el sebechem el omekdubech a techall el mo ousioning er a rechad er a taem el diak moldingel?

11. Ngmekerang e sebeched el melasem el lmuut el mo oldingel er a chad el semeriar el debiltik er ngii er a taem el dimlak doldingel a obliil?

¹¹ Mluut el Mo Oldingel er Tirke el Mle Semeriar: A lsekum e ke metik er a chad el soal el orrenges, e molasem el lmuut el mo oldingel er ngii. A lungil besul, e ngsebechem el dmu er ngii el chad el kmo: “Ngmera el mle dmeu a renguk el mengedecheduch er kau. Ngsebechek el metik er kau er ker me deluut el mo chadecheduch er a uriul?” A rebebil er a mla mo oldingel a obliil a msang ngike el chad a address me a lambang er tir e dmu er ngii el kmo: “Ak mera el mle dmeu a renguk el mengedecheduch er kau. A lsekum e ngsoam el mo medengei a lmuut el betok el omesodel aike el dulsaod, e ngsebechem el metik er ngak er tiang.” A lsekum e ngdiak el sebechem el mo oldingel er ngika el semeriar el chad, e mereched el rullii a Please Follow Up (S-43) el babier e mnguu el msang a melechesel a ongdibel er kau me bo el sebechel a kuk ta er a ongdibel el mo omes er ngii.

12. (a) Ngera uchul me ngkired el blechoel el meluches aike el taem el dongoit sel dousioning er a taem el diak doldingel a obliil? (b) Ngera el tekoi a mla duubech e le rechad el ousioning er a taem el diak loldingel a obliil? (Momes er sel baks el “A Dousioning er a Taem el Diak Doldingel a Ngar er Ngii a Lerellii”)

¹² A taem el dongoit sel dousioning er a rechad er a taem el diak doldingel a obliil a kired el lmuches. Me a leuaisei, e mluches a temem, alta ngdi sesei el bung er a bek el sils. Ka molatk er tiang: A lsekum a rebek el chad el mla mo oldingel a obliil a uluusioning er a taem el dimlak loldingel el eim el bung er a bek el sils, e ngmo kuk betok er a 17 el miliol el sikang er a bek el buil a lechoit el meruul er tia el tekoi.

13. Ngera sebechel otbechid el mo ousioning er a taem el diak doldingel?

¹³ Kid a ngar er ngii er kid a kmal ungil el uchul e kede ousioning er a taem el diak doldingel, el ngii a bltkil a rengud el mo er a Dios me a rengar er a bita er kid. (Mt. 22:37-39) A reng el mui er a omereng el saul el kirel a blekerdelel a Jehovah me a moktek er ngii a motbechid el mo mesaod el kirel a “kebkall el klengarbab er a rengedem.” (Psa. 145:7, 10-12) Kid el mera el melatk er a rengar er a bita er kid a rullid el mo ousbech a bek el techall el mo ouchais er a ungil el chais er chelecha el dirk ngar er ngii a taem. (Rom 10:13, 14) Kid el rokui a sebeched el ousioning er a taem el diak doldingel e mo chormii sel deurreng el mo er ngii sel douchais er a klemerang el mo er a chad el bliochel a rengul.

[Blurb el ngar er a 4 el llel]

Ke locha metik er ngii el kmo ngungil a lsekum e ngngar er ngii a turrekong er kau el mo medengelterir a rechad e omuchel a cheldecheduch el obengterir

[Blurb el ngar er a 5 el llel]

Me ngoeak a lungil el omdasu, e te betok el chad el mla mo oldingel a mla metik a betok el rolel e ngsebechir el omekdubech a techall el mo ousioning er a taem el diak loldingel

[Baks el ngar er a 5 el llel]

Aike el Ulekrael el Kirel a Domuchel a Cheldecheduch

◼ Moluluuch el kirel a ngeso me bo el sebechem el omuchel

◼ Molilt er tirke el ungil a blekerdelir e diak lorreched

◼ Momes er a chad el oba ungil el klikm er kau e mosaod a kmung ngerang el omsemeriar er ngii el terung

◼ Bo mungil el orrenges

[Baks el ngar er a 6 el llel]

A Dousioning er a Taem el Diak Doldingel a Ngar er Ngii a Lerellii

• A ta el odam er a lengar er a blil a omeruul el mlai e longiil er a mlil el lurruul er ngii, e nguluusioning el mo er tirke el chad el mle iliuekl er ngii e milsterir a siotaikeng el mengemedaol er tir el mo er a cheldecheduch el mo er a buai. A ta el rak er a uriul er a lebo er aike el meklou el ongdibel, e a ta el odam el dimlak el lodengelii a uluutkeu er ngii. Ngika el chad a mle ta er tirke el lebilsterir a siotaikeng er a lengar er a blil a omeruul el mlai er a ta el rak er a uchei! Ngmlo sebechel el mo orrenges er a cheldecheduch el mo er a buai e ullengit me bo el sebechel a chad el mo mesuub el obengkel. E ngii me a bechil a miltecholb.

• A ta el odos el mlo medengelii a klemerang e le chad a uluusioning el mo er ngii er a taem el dimlak loldingel a omerk er a klumech el mo er tirke el chad el bo lodengeleterir el oeak a rengelekel. Tirkang a uldimukl er a retonari er ngii me a rechedam me a rechedil el bo lekaodengei er a skulir a rengelekel me aike el miting er a skuul el kirir a ruungalek. Sel ta el louchais er a ngklel, e ngmelekoi er a kedeb el tekoi el mla er a rengul el kmo a Biblia a kmal klou a lengilsuir er a okurulel a rengelekel, e sola e mo mesaod er a ngodech el tekoi. Ngii el mla mechelii a cheldecheduch a uchul me ngbeot er ngii el mo mesaod er a Biblia er a uriul. Me ngii el mirruul er tiang a uchul, e ngmla ngosuterir a 12 el chad el mo metecholb.

• A ta el odos er a bo lomes er ngii a chad er a insurance, e nguluusbech er ngii el techall el ousioning er ngii. Nguleker er ngii el chad a lsekum e ngmle soal a ungil el klisichel a bedengel, me a deurreng, me a diak a ulebengelel el klengar. E ngii el chad a ulenger el kmo choi e uleker el kmo ngera el insurance a lulsaod er ngii. Me ngii el odos a ulechotii el mo er ngii el chad aike el iaksok er a Biblia e milsang a ta er a babilenged, el lulenguiu er ngii el rokir er a ta el kesus. E ngii el chad a ulemuchel el mesuub a Biblia. E dirrek el mlo omuchel el mo er aike el miting, e a uriul e ngmlo metecholb.

• A ta el odos a ulemuchel el mengedecheduch er a redil el dilengchokl er bita er ngii el ngar er a skoki e mlo sebechel el ousioning el mo er ngii. Ngar er a ulebengelel a omerollir, e ngii el odos a milsang ngika el redil a address me a lambang er ngii e millisiich er ngika el redil el mo kongei er a omesubel a Biblia sel lluut el mo oldingel er ngii a Resioning er a Jehovah. A bo el kukuk, e a reteru el Sioning a mlo er a blil ngika el redil. Me ngmlo omuchel el mesuub a Biblia, e mle mereched el olengeriakl, e mlo metecholb e mlo mesuub a Biblia el obengterir a retedei el chad.

• A 100 a rekil el meiko el odam el kiei er aike el blirir a remechuodel a mle blechoel el melekoi el kmo, “Kede ousbech er a Renged.” Tiang a mlo uchul e a renurs me a resmecher a mlo sebechir el oker a ker e ngii a mlo sebechel el mesaod el mo er tir el kmo ngerang a Renged. A ta er tirke el redil el uluureor er sei a uleker er ngii el kmo ngerang ngmo meruul er a Paradis. Me ngulenger el kmo, “Ak lmuut el mo omes e merael e mo sebechek el sosebii a wheelchair er ngak.” Me ngii el meiko a uchul, me ngolengit er ngii el redil me longuiu aike el magazine el mo er ngii. A ngelekel ngii el odam sera be lomes er ngii, e ngii el redil a uleker er ngii a lsekum e ngsebechel el ngmai ngii el babier el mo er a blil. A ta er a renurs a millekoi er ngika el ngelekel ngii el rubak el kmo, “A beches el omelekoi er tia el blai a kmo: ‘Kede ousbech er a Renged.’ ”

• A ta el odos a mla er a line er a blil a blengur e rirengesterir a rebebil er a rubak el mle dengchokl er bita er ngii el mesaod a tekoi er a balatiks. A ta er tir a dilu el kmo a kabelment a diak el sebechel el sumechokl a mondai er kid. Ngii el odos a di mle ngii el melekoi el kmo, “Tiakid a techellek el mengedecheduch er tir.” Ngdillii a kedeb el nglunguuch e mlo mengedecheduch er tir. Uriul er a louchais er a ngklel, e nguluuchais er tir el kirel a kabelment el mo sumechokl a mondai er a klechad, el ngii a Rengedel a Dios, e sola e milsterir a brochure. Seikid e ngmermang a merreder er tia el blil a blengur. E ngika el odos a ulemdasu el kmo ngmo olengit er ngii me lorael. Engdi ngbai dilu er ngii el kmo ngullerrenges er ngii e dirrek el soal a ta er a brochure. E a ta er a chad er a ureor el dirrek el ulerrenges a mlo er ngii el odos el mengedengader a iuechel a medal e le ngmilsuub er a uchei e soal el lmuut el mo mesuub.