A Sers a Medechang el Mengiil er a Omeridm
1. Ngera el klou a ultutelel el ureor a mocha er ngii?
1 A uriul er a lousioning el mo er a redil er a Samaria, e a Jesus a dilu er a redisaiplo er ngii el kmo: “Mokiis a medemiu el mesa sers el medechang el mengiil er chomeridm.” (Jn. 4:35, 36) Ngmocha er ngii a omeridm el kirir tirke el kongei er a klemechel a Dios, me a Jesus a mle sebechel el mesa cherrengelel tia el ureor er a beluulechad el rokir. Me ngngar er a deruchellel er a eanged, e ngdirk melemolem el teloi er tia el ureor er a omeridm. (Mt. 28:19, 20) Ngera olecholt el kmo tia el ureor a dirk melemolem el merael el mo klou er chelecha el kmedang a ulebengelel?
2. Ngera el tekoi a olecholt el kmo a ureor er a omeridm er a beluulechad el rokir a di merael el mo klou?
2 Cherengelel a Ureor er a Omeridm er a Beluulechad el Rokir: Sera 2009 el rak er a omesiou, e ngmle 3.2 el basent a ngelsecheklir a rechad el mla mo oldingel a obliil er a beluulechad el rokir. Aike el beluu el diak el kengei er a ureor er a berkel a klumech a dirrek el ngilasech a ildisir a rechad el omerk a klumech er a 14 el basent. A ildisir a rechad el mesuub a Biblia er a bek el buil a dirrek el ilengelakl er a 7,619,000—el ngii a kuk klou er a ildisir a ruumerk er a klumech e dirrek el kmeed el tedobech el miliol el klou a ildisir er tirke el milsuub er tia el mlo merek el rak. Me chelecha el di lorael el mo klou tia el ureor er a betok el beluu, e ngmerael el mo betok a ongit el kirir a remissionari el mla mo er a skuul er a Gilead. Ngdirrek el kmal mla mo betok el chad el melekoi a ngodech el omelekoi a mla kongei er tia el ungil el chais er a betok el beluu. Me ngbleketakl el kmo a Jehovah a orreched er tia el ureor er chelecha el ulebengelel a taem er a omeridm. (Isa. 60:22) Kau ngungil a osengem el kirel a basio el moldingel er ngii?
3. Ngera sebechel el mo uldesuir a rebebil el kirel a omeridm el ngar er a basio el lekiei er ngii?
3 Omeridm el Ngar er a Basio el Omkiei er Ngii: A rebebil a locha mo melekoi el kmo, “A basio el kuldingel er ngii a diak el sal semeriar a rechad er ngii.” Ngklemerang el kmo a bebil er a basio el doldingel a locha diak el sal bekerredechel el ua bebil me a lechub e ngdiak el bekerredechel el ua ngar er a mong. A rebebil er a Resioning a sebechir el mo omdasu el kmo tia el ureor er a omeridm a mla mo merek me chelechang e ngdi urerir el mengudel er tirke el medechel. Tiang mera el uaisei?
4. Ngua ngera el ungil el blekeradel el kirel a omesiunged a kired el mekurulii, e ngera uchul?
4 Ngar er a uchelel el mo er a ulebengelel, e a omeridm a taem er a klou el ureor. Ka momtab aika el tekingel a Jesus el olecholt er a rechedel a taem el dekiei er ngii el kmo: “A sim a klou, e ar chad el oureor a mekesai; misei e molengit era Rubak ra sim me loderuklterir ar chad ra ureor el kirel a sim er ngii.” (Mt. 9:37, 38) A Jehovah, el Rubak er a sim, a oungerachel er a taem me a basio el leduubech a tane er ngii. (Jn. 6:44; 1 Ko. 3:6-8) Ngerang a ngerecheled? A Biblia a onger el kmo: “Molalem a dellemelem a le tutau e dirrek a le kebesengei.” (Oli. 11:4-6) Nguaisei, sel lebocha er a orokiolel tia el ureor er a omeridm e ngdiak el taem el kired el olengull!
5. Ngera uchul me ngkired el melemolem el omerk er a klumech el oba blakerreng alta basio el doldingel er ngii a diak lourodech?
5 Molemolem el Meridm: Malta ngmla mo betok el taem el doldingel er a osisiu el basio me a rechad er ngii a diak el sorir el orrenges, me ngii a di ngar er ngii a ungil el uchul e kede oureor el oba blakerreng me a uldasu el kmo ngorechudel el taem er chelechang. (2 Ti. 4:2) A meklou el omelodech er a blekeradel er a beluulechad a rulleterir a rechad el mo melodech a blekerdelir e mo kerekikl el omdasu el kirel a ngar mederir el klebesei. A rengeasek sel lorael el mo meklou, e te mo melechesuar el kmo te ousbech a ulekerreu me a budech er a uldasu. A blakerreng er kid a sebechel el mengas a rengrir a rechad. Nguaisei, tirke el dimlak el orrenges er a uchei a sebechir el mo kongei el orrenges er chelechang. Ngmo lmuut er tirke el durengrir el oltngakl er tia el klemeched me ngdirrek el kirir el muklatk.—Ese. 2:4, 5; 3:19.
6. A lsekum e ngchetituokel a basio el doldingel er ngii, e ngera sebechel el ngosukid el lomelemii a blakerreng er kid?
6 A lsekum ngchetituokel a basio el doldingel er ngii, e ngera sebechel el ngosukid el lomelemii a blakerreng er kid? Nglocha sebeched el meruul a lmuut el bebil er a rolel a omesiou, el obengkel a odingel a obliil, el uai sel doldingel a siobai me a lechub e kede oldingel el okiu a dengua. Me a lechub e ngsebeched el ngodechii a cheldechedechad me bo el ngar er ngii a beches el rolel a dongedecheduch er a rechad. Nglocha sebeched el ngodechii a temed me bo el sebeched el oldingel a leklebesei me a lechub e ngkuk bebil er a taem el lengar er a blai a rechad. Nglocha dirrek el sebeched el mesuub er a beches el omelekoi me bo el sebeched el merkii a ungil el chais el mo er a rebetok el chad. Ngdirrek el sebeched el menglou er a omesiunged el oeak a bo deteloi er a ureor er a mui el taem. Me a lechub e ngsebeched el melukl el mo er a basio el mekesai a rechad er a omeridm er ngii. A lsekum e ngmelemalt a osenged el kirel tia el ureor er a omeridm, e kede mo melasem er a tkurrebab el sebeched el mo teloi er tia el kmal klou a ultutelel el ureor.
7. Kede ngar er tia el ureor er a omengudel el mo lmuut er a oingerang?
7 A rechad er a sers a ngar er ngii a telkael el temir el mengudel a redechel a dellemelir, me ngdiak el lolengull me a lechub e bo el soro el mo lmuut er a bo el merek a ureor. Tia el omeridm el kirir tirke el kongei er a tekingel a Dios a kmal orechudel. Kede ngar er tia el ureor er a omengudel el mo lmuut er a oingerang? Ngar er a chelsel a “ullebongel ra belulechad” el mo lmuut er a ‘ulebengelel.’ (Mt. 24:14; 28:20) El ua ngike el kot el ngaruchei el Mesiungel a Jehovah, e kid a soad el merekui er tia el ureor el mloterekokl er kid. (Jn. 4:34; 17:4) Me a leuaisei e dolemolem el oltaut er a omesiunged el oba blakerreng me a deurreng, e doba melemalt uldasu el mo lmuut er a ulebongel. (Mt. 24:13) A omeridm a dirkak el bo el merek!
[Blurb el ngar er a 2 el llel]
Ngar er a uchelel el mo er a ulebengelel, e a omeridm a taem er a klou el ureor