Ngsebechem el Mo Medengelterir a Rediak el Ngar er a Klemerang el Becherir a Rudam me a Rudos?
1. Ngera uchul me a Rekristiano el kiei er a delengchokl el kakerous a klechelid er ngii a diak el di el tir el tang a sorir el olengeseu er a rebecherir el mo kongei er a klemerang?
1 Ngar er ngii a rebebil el mla mo oldingel a obliil el ngar er a ongdibel er kau el becherir a diak el ngar er a klemerang? A leuaisei, e ngulterekokl tirka el rudam me a rudos el kmal sorir a rebecherir a bo el obengterir el ngar er a mera el omengull. Engdi ngdiak el di el tir el tang. A ongdibel el rokir a olecholt er a urungulel a Dios el soal “a le mosobel a rokuil chad e bo lodenge klemerang.” (1 Ti. 2:4) Kede mekerang e mo medengelterir a rediak el ngar er a klemerang el becherir a rudam me a rudos el ngar er a ongdibel er kid?
2. Ngmekerang a doba klemedengei a lengesukid el mo ngosuterir a rediak el ngar er a klemerang el becherir a rudam me a rudos er kid?
2 A kot e ngkired el omes a tekoi el oba osengel ngika el chad el diak el ngar er a klemerang. A rebetok er tir a betik a rengrir er a telungalek er tir e melasem el mo ungil el bechiil el chad e mo ungil el chedam me a lechub e te chedil, alta ngkuk ngodech a klaumerang er tir er kid. Te locha diak el sal medengei a betok el kirir a Resioning er a Jehovah e le te mla remenges a cheleuid el tekoi er a rechad el diak a ungil el klemedengei er tir el kired me a lechub e te mengetukel er kid. A rebebil a sebechir el ua bo lechetirir sel taem el lousbech er ngii a rebecherir el kirel a omengull, el ngii a mle taem el ledak el telungalek er a uchei. A klemedengei er kid el kirel tiang a sebechel el ngosukid el mo ungil a blekerdeled e mo olecholt a omengull el mo er tir e mo diak desal changar sel dekeed er tir.—Osi. 16:20-23.
3. Ngera kot el ungil el tekoi el sebeched el rullii el ngosuir a diak el ngar er a klemerang el bechil a odam me a lechub e ngodos el me soiseb er a klemerang?
3 Doba Klemeriarreng: A kot el ungil el tekoi el sebeched el rullii er a uchei, el ngosuterir a rediak el ngar er a klemerang el becherir a rudam me a rudos el mei er a klemerang, a oeak a blekerdeled, el diak loeak a omesodel a Bades. (1 Pe. 3:1, 2) A klou a ultutelel el tekoi el kirel tiang a dolecholt a klemeriarreng. A rudos el ngar er a ongdibel a sebechir el olecholt a klemeriarreng er a rebechiil el redil el diak el ngar er a klemerang, me a rudam a sebechir el meruul el uaisei el obengterir a rediak el ngar er a klemerang el bechiil el sechal. Ngmekerang a loruul er tiang?
4. Kede mekerang e olecholt a klemeriarreng?
4 A lsekum e ngdiak modengelii ngika el bechiil el sechal me a lechub e ngredil, e nglocha sebechem el mo medengelii er a uriul er a omongedecheduch er a bechil el Kristiano. Lak bo el mekngit a rengum a lsekum ngii el chad a diak el olecholt a klemeriarreng er a uchelel. A bo dungil el sechelei e dolecholt a klemeriarreng el mo er ngii a sebechel el rullii el mo ungil a osengel el kirir a Resioning er a Jehovah. (Rom 12:20) A rebebil er a remesisiich el Kristiano a mla mengemedaol er a diak el ngar er a klemerang el bechiil el chad me a telungalek er ngii el mo omesoil, me bo el sebechir el mo kaodengei e choroid a ngii di el omengetukel el ngar er ngii. Te mesaod aike el lesemeriar er ngii el tekoi, er a bai lolechelech el mesaod a tekoi er a Biblia. Uriul, e sel bo el sau, e nglocha sebechiu el mo mesaod a tekoi er a Bades. Me a lechub e ngsebechel el kongei a omongemedaol er ngii el mo er a ta er a miting er kid, e le ngii el mla mo medengelterir a rebebil el ngar er a ongdibel, me lesa el kmo ngerang mesuub a bechil. Malta ngdiak el kltmokl el mo merriter er a klemerang, engdi ngkmal sebeched el chotengii el kirel a ngelsuil el mo er a bechil el Kristiano.
5. Te mekerang a remechuodel e mo medengelii a chad el diak el loumerang?
5 A remechuodel a ileakl el kirir el mo medengelterir a rebecherir a rudam me a rudos e mo kerekikl el osiik a techall el mo ousioning el mo er tir. A chad el diak el loumerang e diak el kengei el orrenges a tekoi er a Biblia a sebechel el orrenges a omelisiich el mlengai er a Biblia sel lengar er a osbitar me a lechub e ngsmecher er a meringel el rakt. A lsekum a delengchokl el kakerous a klechelid er ngii a mo chelebangel a meringel el blekeradel, el uai a kodellel a ta er a chedal a telungalek, e a remechuodel a sebechir el olengit er ngike el diak el loumerang el me obengterir sel longelaod er a telungalek.
6. Ngera bebil er a uchul e kede mo medengelterir a rediak el loumerang el becherir a rudam me a rudos?
6 Ka molatk er sel deurreng el bo lolechesuar er ngii a Kristiano el ngar er a ongdibel er kid a lsekum a bechil a kongei er a klemerang e me soiseb er a ongdibel! A chouaitia el tekoi a dirrek el mo uchul a deuil a rengul a Jehovah, me a rechanghel, me a rokui el ngar er a ongdibel. (Lk. 15:7, 10) Engdi, a lsekum ngika el diak el loumerang a diak el kengei el orrenges er a kot el uchul, engdi kid a dmeu a rengud el kmo a blakerreng er kid el soad el olengeseu er ngii a odeuir a rengul a Jehovah, el ngii a “chetil a lriid a tang, e bai soal cho bora bult el rokui.”—2 Pe. 3:9.
[Blurb el ngar er a 6 el llel]
A kot el ungil el tekoi el sebeched el rullii er a uchei, el ngosuterir a rediak el ngar er a klemerang el becherir a rudam me a rudos el mei er a klemerang, a oeak a blekerdeled, el diak loeak a omesodel a Bades