Ngeso el kirel a Telungalek

1. Ngmilekerang a Ulengull el Sils er a bek el sandei e mlo uchul a klungiolir a rengalek er a Israel?

¹ A oketmeklel a Ulengull el Sils a tekoi el mileketmokl el mla er a Jehovah el mlo uchul a klungiolel a telungalek. A rengalek er a Israel a ulengull er a urerir e mlo er ngii a temir el melebedebek er a ungilreng er a Jehovah me a deleuill er tir el obengkel. A rechedam me a rechedil a mle sebechir el ousbech er tia el techall el mo sichedekl er a chelsel a rengrir a rengelekir a Llach. (Dut. 6:​6, 7) A Ulengull el Sils a milsterir a rechedal a Jehovah a taem er a bek el sandei me bo el sebechir el melisiich er a deleuill er tir me a Jehovah.

2. A Ulengull el Sils ngosisecheklid a ngerang el kirel a Jehovah?

² Nguaisei, a Jehovah a dikea longelechel er a retelungalek me bo longedaol er a Ulengull el Sils. Engdi sel llach a osisecheklid a kmung ngerang el kirel a Dios. Ngkmal semeriar er a kmo ngmekerang a rechedal a lengai a klungiolir er a ungil el deleuill er tir me Ngii. (Isa. 48:​17, 18) Chelecha el sils, e a ta er a rolel e a Jehovah a olecholt er a bltkil a rengul a oeak a oketmeklel sel temel a Omengull el Telungalek.

3. Ngerang a moktek er sel klebesei er a Omengull el Telungalek?

³ Ngerang a Moktek er Sel Klebesei er a Omengull el Telungalek? Sera Kot el Buil er a rak er a 2009, e a Book Study er a Ongdibel a mlo er ngii er a osisiu el kesus el ngar er ngii a Skuul el kirel a Berkel a Klumech me a Omesuub el kirel a Omesiunged el Mo er a Dios. A ta er a uchul a omeldechel tia el tekoi a mlo mesterir a retelungalek a techall el mo melisiich er a delongelir el obengkel a Jehovah el oeak a loterekeklii a klebesei el kirel a omengull el telungalek. A derta el telungalek a mluchelechel el mo ngodechii a temel a omesubel a telungalek er tir el mo er sel dimla temel a Book Study, a di lungilbesul, e mo ousbech er tiakid el taem el diak lorreched e mesaod e mesuub a tekoi el ngar er a Biblia el ungil el kirel aike el lousbech a telungalek er tir.

4. Ngkirel a omengull el telungalek el di mo ta el sikang a klemengetel? Mosaod.

⁴ Sera el dirk el ngar er ngii a Book Study e kede mera el uluusbech a taem el mengetmokl er kid e mo er a blil a ongdibel. Me a taem el dechilitii el meruul er tiang a kuk mle klou er a temel tia el miting. Me tia el omeldechel a temel a miting er kid a uchul me chelechang e ngsebeched el ousbech er tia el taem el mo mengull er a Jehovah el telungalek. A leuaisei, e ngdiak el kired el kodebengii a temel a Omengull el Telungalek er kid el di mo ta el sikang. Ngbai kired el melatk aike el lousbech a telungalek er kid me aike el lengesonges er ngii e kutmeklii a ungil el taem el mo mesaod aikang.

5. Ngkmal kirir el ousbech er a taem el rokir el dmak el mesaod er a Biblia? Mosaod.

⁵ Ngkmal Kirir el Ousbech er a Taem el Rokir el Dmak el Mesaod er a Biblia? A rubekel me tirke el ngar er ngii a rengelekir sel ledak el mesaod a suobel er a Biblia e te dmak el kasisiich. (Rom 1:​12) A rechedal a telungalek a mera el mo kmes a deleuill er tir. Me a leuaisei, a omesodel a Bades a kirel el mo klou a ultutelel el tedebechel a Omengull el Telungalek. Engdi, a derta el chedal a telungalek a dirrek el sebechir el ousbech er sel taem el di tir el mesuub. El di ua tiang, uriul er a omesaod e nglocha sebechel a telungalek el di dmak engdi a rederta el chad a melemolem er a omesubir el di tir el tang, el merekui er a omengetmeklir el kirel a miting me a lechub e te menguiu a babier. A bebil el telungalek a melilt el di mecherei a TV me ngulekoad er sel kesus.

6. Ngua ngera rolel a dongetmokl er a temel a Omengull el Telungalek?

⁶ Ngua Ngera Rolel a Dongetmokl er a Temel a Omengull el Telungalek? A teletelel a doruul er tiang a diak el blechoel el oeak a ker me a nger. Te betok el telungalek a mla remuul a prokuram er a Omengull el Telungalek er tir el mo ua teletelel a miting er kid er a Ongeua el Ureor me bo el sebechir el mo semeriar er ngii. Tomii aike el bo losaod e oltobed el ngar er a kakerous el rolel. El ua tiang, nglocha sebechir el dmak el menguiu er a Biblia, mengetmokl er tir el kirel a miting, e melasem aike el bo lolekoi sel bo loldingel. A 6 el llel a meskid a bebil er a tekoi el sebeched el meruul.

7. Ngua ngera el blekeradel a kirir a ruungalek el melasem el meruul er ngii?

⁷ Ngua Ngera el Blekeradel a Kirir a Ruungalek el Melasem el Meruul er Ngii? A telungalek er kau a kmal mo ungil el mesuub er a chelellakl el basio. Ngsebechiu el mesuub er rikl a lsekum e ngungil a eanged. A lsekum e ko mousbech el olengull, e ngsebechiu el olengull el telkib. A bebil el telungalek a remuul a kall el sebechir el mengang er a uriul. Me alta ngungil a lsekum a ruungalek a lak lousbech er tia el taem el mo mengokl me a lechub e te mellach er a rengelekir, engdi ngsebechir el ousbech er a telkib er ngii el mo mesaod a ulterekokl el blekeradel me a lechub e ngmondai el bla leues. Nguaisei engdi ngdirrek el ungil a lsekum ko mesaod aike el tekoi el lechelebangel a derta el ngelekiu er a kuk ta er a taem sel di el kemiu el tang me lak bo el merur er a mederir a rebebil er tir. A temel a Omengull el Telungalek a kirel el omeksemeriar er a rengud e ungil el olecholt er ngike el dmeu a rengul el Dios el dongull er ngii.​—1 Ti. 1:​11.

8, 9. Ngmekerang a bdelul a telungalek a longetmokl el kirel a Omengull el Telungalek?

⁸ Ngmekerang a Bdelul a Telungalek a Longetmokl el kirel a Omengull el Telungalek? A telungalek a sebechir el ngmai a klungiolir a lsekum a bdelul a telungalek a mo ungil el kutmeklii er a uchei er a bek el temel a Omengull el Telungalek er tir el loeak a lolilt el kmo ngera kirel el mo soadel e mekerang a bo losaod er ngii el ngar er a kot el ungil el rolel. (Osi.  21:⁠5) A bechiil el sechal a ungil a longedecheduch er a bechil el kirel tiang. (Osi. 15:​22) A rebdelul a telungalek a dirrek el ungil a lebebil er a taem e loker er a rengelekir el kirel aike el sorir el meruul. A omoruul el uaisei e ngsebechiu el mo medengei aike el lesemeriar er ngii el tekoi me aike el lolatk.

⁹ A lebebil er a taem, e a bdelul a telungalek a diak longoit er a klou el taem el mengetmokl er ngii. Seikid e a rechedal a telungalek a locha mo dmeu a rengrir er a bebil el tekoi el sebechir el meruul er a bek el sandei me a bdelul a telungalek a diak el blechoel el kirel el omdasu a beches el tekoi el bo loruul er a bek el taem. Ngdirrek el ungil a lsekum a bdelul a telungalek a mengetmokl er ngii er a uriul er a derta el Omengull el Telungalek e le ngdirk melatk aike el lousbech a telungalek er ngii. A rebebil el bdelul a telungalek a meluches aike el bo loruul er a ongingil el temel a omengull er tir e mereked er a ice box me bo el sebechir a rechedal a telungalek el mesang. Tiang a mo uchul a klemeriarreng e dirrek el mesterir a techall el mo mengetmokl er tir.

10. Te mekerang tirke el di kiei el di tir el tang a lousbech er sel temel a Omengull el Telungalek er tir?

¹⁰ E a lsekum e Ngkuk Di Ngak el Tang er a Chelsel a Telungalek er Ngak? Tirke el kiei el di tir el tang a sebechir el ousbech er a temel a Omengull el Telungalek el kirel a omesuub el di tir el tang. A ungil e beot el rolel a omosuub el di kau el tang a sebechel el uldimukl er ngii a omengiuel a Biblia, omengetmeklem el kirel a miting, me a omengiuel a A Ongkerongel. A rebebil a odekiar er tiang a omesubel a ngii di el tekoi el bla el ngiltii el mo merriter er ngii. A lebebil er a taem, e ngsebechir el olengit er a ta er a mla mo omerk er a klumech me lobengterir el mesaod er a tekoi el ngar er a Biblia el uchul a omelisiich.

11, 12. Ngera bebil er a klungiolel a lengar er ngii a ulterekokl el temel a Omengull el Telungalek?

¹¹ Ngera Klungiolel a Lengar er Ngii a Ulterekokl el Temel a Omengull el Telungalek? Tirke el mera el ngar er a rengrir e teloi er a mera el omengull a mo kmeed er a Jehovah. Me a lmuut el tang, a telungalek el dmak el ngar er a ta el omengull a sebechir el smisichii a delongelir. A ta el obekel a milluches el kirel aike el klengeltengat el luleldeu a rengrir er ngii el kmo: “Kemam el ngar er a mui el taem el omesiou e diak a rengelekam a uchul me aki kmal omes el bedul uchei el kirel a temel a Omengull el Telungalek er kemam. Aki melechesuar el kmo ngmera el mla mo kmes a deleuill er kemam el terung me a dirrek el deleuill er kemam el obengkel a Demmam el ngar er a eanged. Me chelechang e sel ki bekiis er sel sils el ki bla mngiltii el mo temel a omesubam e aki kauklatk el kmo: ‘Alii a kebesengei e Ngtemel a Omengull el Telungalek er kid!’

¹² A oketmeklel a temel a omengull el telungalek a dirrek el ngosuterir a retelungalek el blechoel el mechesang. A ta el mesobil el chedil el omekeroul er a reteru el ngelekel el sechal e ngar er a mui el taem el omesiou a melekoi el kmo: “A ngar er a mong, e ngdimlak el blak a rengmam el mesuub el telungalek. Ngmle blechoel el ngar er ngii a tekoi el duubech el mo mengesang a temam me ngii a dimlak el ulterekokl a temam el mesuub el le ak mle blechoel el skareter. Ngdimlak kudengei el kmo ak mo mekerang e mo sebechek el remuul a rokui el tekoi. Me ak meluches el eko er kemiu el oureng a suliu el kirel a temel a Omengull el Telungalek. Ngmla mo er ngii a ulterekokl el temel a telungalek er kemam el mesuub e aki dirrek el mla ngmai a betok el klungiaol el loeak tia el tekoi.”

13. Ngera ochotii a klungel a klungiaol el lebo el nguu a telungalek er kau er tia el techall el mla meketmokl?

¹³ El uai a Ulengull el Sils, a temel a Omengull el Telungalek a sengk el mla er a Demad el ngar er a eanged el ngii a sebechel el olengeseu er a retelungalek. (Jak. 1:​17) Sel rolel a rechad er a Israel a lousbech er a Ulengull el Sils a ulechotii a klungel a klungiaol el lengilai er a ungil el deleuill er tir me a Jehovah. Me ngdi osisiu, a rolel a dousbech er sel kebesengei el temel a omengull el telungalek er kid a ochotii a klungel a klungiaol el bo lengai a telungalek er kid er ngii. (2 Ko. 9:6; Gal. 6:​7, 8; Kol. 3:​23, 24) Me sel bo mungil el lousbech er tia el techall, e ngsebechel a telungalek er kau el melekoi el kmo: “Ngdi kuk le ngak e ng bai ungil a dekeed er a Dios! Ak metik er osebechakl el ngar a Rubak el Dios.”​​—Psa. 73:⁠28.

[Blurb el ngar er a 5 el llel]

A temel a Omengull el Telungalek a kirel el omeksemeriar er a rengud e ungil el olecholt er ngike el dmeu a rengul el Dios el dongull er ngii

[Baks el ngar er a 6 el llel]

MKETMEKLII

Bebil er a Uldasu el kirel a Temel a Omengull el Telungalek

Biblia:

• Mdak el menguiu er a telkib er a omengiuel a Biblia er sel sandei. A bebil er a cheldecheduch er a Biblia a lluches el sebechel a ta el chad el menguiu er a omesodel, e a rebebil a sebechir el menguiu a tekingir a rekakerous el chad el ngar er a chelsel.

• Motebedii a sibai el kirel a omengiuel a Biblia.

• Molengit er a derta el chedal a telungalek el mo menguiu a meltutk el bliongel er a Biblia er a uchei e loluches a tang me a lechub e ngeru el ker el kirel aike el bla el chuiu. E sola e mosiik a nger er a kerrir a rokui el chad.

• A bek el sandei e mketmokl a mekekerei el babier el ngar er ngii a bades er ngii e molasem el mo chausbengdik er ngii e mo meduch el mesaod er ngii. Mchudel aikeikid el mekekerei el babier e momelekl er a bek el sandei e mesa el kmo ngtela el bades a sebechem el lmatk.

• Morrenges a rekord er a omengiuel a Biblia e moltirakl er ngii er a Biblia er kau.

Aike el Miting:

• Mdak el mengetmokl er kemiu el kirel aike el miting.

• Molasem el mengitakl aike el chelitakl er a Renged el bo dongitakl er a ongingil el miting.

• A lsekum e ngngar er ngii a chad el ngar er ngii a cheldechedechal er a Skuul el kirel a Berkel a Klumech me a lechub e ngkirel el olecholt er a rolel a dorous a babier er a Omesuub el kirel a Omesiunged el Mo er a Dios, e mosaod a uldasu er a kmo ngmekerang a bo loltobed er ngii me a lechub e molasem er ngii er a medal a telungalek er kau.

Aike el Lousbech a Telungalek:

• Molasem aike el tekoi el sebechem el remuul a lsekum e ke mo chelebangel a blekeradel el sebechel el duubech er a skuul.

• Molasem a blekeradel el leko rechedam me a rechedil a rengalek e a rengalek a leko te chedam me a chedil. A rengalek a mo merriter er a tekoi el sorir el mesaod er ngii e mo mesaod er ngii el obengterir a redemerir me a rederrir.

Ureor er a Berkel a Klumech

• Molasem aike el tekoi el bo molekoi sel bo moldingel er a Sebadong me a Sandei.

• Mosaod a ungil el turrekong el sebechel a telungalek el remuul el mo menglou er a omesiungir er a blsechel a Chedaol el Blsoil me a lechub sel ulengull er a skuul.

• Besterir a rechedal a telungalek a sesei el bung el mo merriter a nger er tir er a kakerous el ker el sebechir a rechad el loker sel doldingel e motobed a bebil el olechotel a doruul er tiang.

Lmuut el Bebil el Tekoi el Sebeched el Remuul:

• Mdak el menguiu a suobel el mla er aike el beches el makesin.

• Molengit er a rederta el chedal a telungalek me lechiuii a suobel er aike el beches el makesin el lesemeriar er ngii e lotebedii a omesodel el kirel.

• A lebebil er a taem e ngsebechiu el olengit er a chad el mla mo oldingel a obliil me a lechub e te obekel me te me teloi er a Omengull el Telungalek er kemiu e moker er tir a bebil er a ker.

• Momes er a ta er aike el video er kid e mosaod er ngii.

• A uriul er a ta el sils me a lechub e ngeru el sils el ongdibel e mosaod el kirel aike el meklou a ultutelel el tekoi el bla msuub.

• Momes e momtab a blebelel a Jehovah e mosaod el kmo ngera ngosisecheklid er ngii el kirel.

• Mdak el meruul a teletelel a kmung ngerang me a map me a lechub e ng chart.