Ngkired el Mo Oba Kllourreng er a Omesiunged
1. Ngoeak a ngera el rolel e a Jehovah a mla ochotii a kllourreng er ngii el kirel a klechad?
1 A Dios a kmal oba kllourreng el kirel a klechad. (Ex. 34:6; Psa. 106:41-45; 2 Pe. 3:9) A ta er a kot el ngarbab el kerebai el kirel a kllourreng er ngii a sebeched el mesang er a ureor er a berkel a klumech er a Renged el meliuekl er a beluulechad. A Jehovah a mla oureor el obengkel a klechad el bekord el 2,000 el rak, e dirk melemolem el mengurs er a remelemalt a rengrir el chad el mo er ngii. (Jn. 6:44) Me ngmekerang e sebechel a omesiunged el ochotii a kllourreng er a Jehovah?
2. Ngmekerang e sebeched el olecholt er a kllourreng sel doureor er a territory er kid?
2 Odingel a Obliil: Kede oukerebai er a kllourreng er a Jehovah sel domerk er a klumech el ‘diak de meterob’ er a chelsel a territory el rechad er ngii a dirkak el ochotii a klemeriarreng. (Rel. 5:42) Ngmeduch a rengud el outekangel a mekngit el blekeradel me a ultok er a chelsel a omesiunged. (Mk. 13:12, 13) Kede dirrek el olecholt er a kllourreng sel leblak a rengud el lmuut el mo osiik er tirke el mle semeriar e dolasem el melubs er sel tane el mildalem er a rengrir.
3. Ngera uchul me a kllourreng a usbechall sel bo doldingel er tirke el mle semeriar me tirke el dosuub a Biblia el obengterir?
3 Omesubel a Biblia: A omellemel a dellomel a ousbech a kllourreng. Ngsebeched el mo ungil el omekerreu er ngii, engdi ngdiak el sebeched el orechedii a okurulel. (Jak. 5:7) Me ngdi osisiu, a okurulel a tekingel a Dios a ngar er ngii a blechebechel e dirrek el ousbech er a klou el taem. (Mk. 4:28) Tirke el chad el dosuub el obengterir a locha mo meringel er tir el mengoit aike el klsuul el osisechakl el loumerang me a lechub aike el siukang el omtok a llechul a Dios. Ngkmal diak el kired el orreched er a okurulel a klaumerang er a chad el oeak a dorrimel er ngii el mo melodech a blekerdelel. A kllourreng a usbechall el mo msang a techellel a oureor el klisichel a Dios me ngmo rutechii a rengul a chad el mesuub er a Biblia.—1 Ko. 3:6, 7.
4. Ngmekerang a kllourreng e sebechel el ngosukid el mo ungil el ocholt el mo er a rediak el loumerang el chedad?
4 A Rediak el Loumerang el Chedad: Alta e ngkmal el soad a rechedad a bo lodengelii a klemerang, engdi ngkired el oba kllourreng el mengiil er sel ungil el taem el mo sebeched el ochotii a klaumerang er kid er tir, e dirrek el kerekikl me lak di domekeek er tir er a betok el tekoi el mo uchul e ngmo seselk a rengrir. (Oli. 3:1, 7) E a cherengel a taem, e bo el sebechel a omerelled el mo ungil el kerebai el kirir, e de blechoel el kltmokl el ouchais el kirel a klaumerang er kid el oeak a delemedemek me a klou el omengull el bedul tir. (1 Pe. 3:1, 15) Me ngkmal bleketakl el kmo a omesiunged a lmuut el olengeriakl a lsekum e kede olecholt er a kllourreng, e tia el omeruul a kmal oldeu er a rengul a Demad el ngar er a eanged.