Bo “Mchubechub”
1. A rechad er chelecha el taem te kmal ousbech er a ngera el tekoi?
1 Chelecha el taem er a reksi er a klechad e a rebetok el chad a kmal ousbech er a klechubechub. A blekeradel er a beluulechad el di merael el mo mekngit a mla mo uchul a klou el klengiterreng, ringelel a uldasu, e dirrek el mla rulleterir a rechad el mo diak a omeltkir el kirel a klengar. Me a rebetok el miliol a kmal ousbech a ngeso, me kid el Kristiano a kired el mo olecholt er a mera el bltikerreng el mo er a rokui el chad. (Mt. 22:39; Gal. 6:10) Me kede mekerang a doruul er tia el tekoi?
2. Ngerang a kot el ngarbab el rolel e kede olecholt er a klechubechub?
2 A Ureor el Olechotel a Klechubechub: A Dios a ngike el uchelel a melemolem el ongelaod. (2 Ko. 1:3, 4) Ngii el Jehovah a mengelechel er kid el mo oukerebai er ngii el mo “chubechub” e dirrek el mla meskid a ngerecheled el mo oldingel er a rechad el kmeed er kid e ouchais er tir el kirel tia el ungil el chais er a Renged. (1 Pe. 3:8) A kot el ungil el rolel e ngsebeched el mo mengelaod er tirke el ‘chelemuul’ a rengrir a sel debo er a tkurrebab el sebeched el meruul er tia el ureor e le Rengedel a Dios a di ta el tekoi el sebechel el mengelaod er a chormang el klechad e msang a mera el omelatk. (Isa. 61:1) Me ngoeak a klechubechub er a rechedal a Jehovah, e ngdi kmedung e ngii el Jehovah a mo okngemed a rokui el chelebirukel e dirrek el mo toketekii a melemalt e beches el beluulechad.—2 Pe. 3:13.
3. El uai a Jesus, e ngkirel mo ua ngerang a osenged el kirir a rechad?
3 Momes er a Rechad el Oba Osengel a Jesus: Sel taem er a lolisechakl a meklou el seked a Jesus e ngdimlak di lekerekikl el omes er a ildisir a rechad. Ngulemes er a derta el chad el kmo ngmle kirir el mekurulii a kmes el deleuill er tir el obengkel a Dios. Te mle ua sib el cheloit el dimlak a omekrael. Ngkmal rirtechii a rengul a Jesus er sera lomes er tir me ngmlo soal el olisechakl er tir el oba kllourreng. (Mk. 6:34) Me a lsekum e kede mo ua osengel a Jesus el bedul a rechad, e ngulterekokl el smisichid el mo oba klechubechub el bedul tir. E tia el omeruul a mo chemolt lokiu a rolel a dongedecheduch me a dirrek el osenged. A berkel a klumech a kmal klou a ultutelel me ngkired el mo kerekikl el melatk a tekoi el dolekoi el mo er a rebebil er a uchei er a dongedecheduch.—1 Ko. 9:19-23.
4. Ngera uchul me ngkired el olecholt er a klechubechub?
4 A klou el ildois er a rechad er a kakerous el beluu a olecholt er a klemeriarreng el kirel a klumech er a Renged me aike el ungil el tekoi el losuub el kirel. Me a dolemolem el olecholt er a klechubechub el bedul tir e ngmo sebeched el odeuir a rengul ngika el chubechub el Jehovah el Dios.—Kol. 3:12.