Kerrir A Rechad

◼ Ngkired el meluluuch sel dosuub a Biblia er a medal a tuangel?

Ngbetok a klungiaol el dengai sel domuchel e dongesimer er a omesubel a Biblia el obengkel a chad el oeak a nglunguuch. Ngoeak a nglunguuch, e kede olengit er a oureor el klisichel a Jehovah me ngomekrael er a omesubed. (Lk. 11:​13) A nglunguuch a dirrek el meketeklii a klungel a ultutelel a omesubel a Biblia el mo er a chad el mesuub, e dirrek el osisecheklii el mo meduch el meluluuch. (Lk. 6:​40) Me a leuaisei, e ngkmal ungil a doluluuch er sel kot el mereched e ungilbesul el taem. Engdi a chad el oldingel a obliil a kirel el oba sekutaberreng el melilt el kmo, ngungil a loluluuch me a lechub e ngdiak, el di oltirakl a blekeradel er sel basio.

A ta er a klou a ultutelel el tekoi el kired el melatk er ngii a blekerdelel a omesuub el meketmokl er sel taem. A lsekum e ngungil a techall el tir a cheroid er a rebetok el chad, e ngsebechel a di kedeb el nglunguuch er a uchei er a lomuchel e longesimer er a omesubir. Engdi a lsekum e ngomes er tia el omeruul el mo uchul e ngolechau a osengir a rechad me a lechub e ngrullii ngike el mesuub el mo metacherbesul, e ngungil a bai longiil el mo er sel taem el di tir el tang. Me a ngii di el basio el dengar ngii, me kid a di kired el mo ungil el melebedebek el kmo ngoingerang e ngsebeched el omuchel el meluluuch sel dosuub el obengkel a chad.​​—Momes er a March 2005 el Omesiunged el kirel a Renged, er a 4 el llel.