Mngesuir a Chad er a Blai el Mo Meduch el Mesaod a Tekoi
1. Ngera el rolel a domerk a klumech a ungil el dousbech er ngii?
1 Ngera er aika el rolel a domerk er a klumech a oureor—ngsel di demeringel el oldubech a uldesued me a lechub e kede ngosuir a chad er a blai el mo meduch el mesaod a tekoi e mo medengei el kmo ngerang a melemalt el omesodel? A apostol el Paulus a uluusbech er tia el ongeru el rolel er sera longedecheduch er a Rechijudea el ngar er a Thesalonika, “mar bebil ra chelsir a ngilsenges” ngii el tekoi me te mlo oumerang. (Rel. 17:2-4) Ngerang a uldimukl er sel dosaod a tekoi el obengterir a rebebil?
2. Ngmekerang a doukerebai er a Paulus sel domerk er a ungil el chais?
2 Molatk er a Uldesuel a Chad me a Basio el Omngar er Ngii: A bo dolengeseu er a rechad el ngar er a basio el doldingel er ngii el mo meduch el mesaod a tekoi, e ngkired el melatk a uldesuir. A Paulus a ulemuchel er a cheldechedechal el mo er tirke el dimlak el loumerang el chad er a Grik el mla er a Areopagus el ousbech a tekoi el ble lodengei me aike el luluumerang. (Rel. 17:22-31) Me nguaisei, sel mongetmokl a cheldechedecham el mo oldingel a obliil, e ngungil a molatk aike el leblechoel el loumerang me aike el diak loumerang tirke el chad el ngar er a basio el moldingel er ngii. (1 Ko. 9:19-22) Me a lsekum a chad er a blai a mo er ngii a ultekengel, e molasem el osiik a tekoi el mdul semeriar er ngii, e mosaod er ngii el tekoi.
3. Ngoeak a ungil el usbechel a ker, e kede mekerang e mo meduch el mesaod a tekoi el obengterir a rechad?
3 Bo Meduch el Ousbech a Ker: Ngdiak el sebeched el ochotii er a chad a rael el mo er a basio el soal el mo er ngii a lsekum e ngdiak el sbedid er a basio el lengar er ngii er sel taem. Me ngdi osisiu, ngdiak el sebeched el ngosuir a chad er a blai el mo medengei a melemalt el tekoi a lsekum e ngdiak dodengelii a uldesuel er sel taem. Me a uchei er a losaod a tekoi el mo er a rurrenges er ngii, e a Jesus a mle blechoel el oker a ker me bo lodengei aike el ngar er a uldesuir a rechad. El uai tiang, a chad er a loker er a Jesus el kmo, “Sensei, a kukera e ak mediukes ra diak a ullebengelel klengar?,” e a Jesus a millasem el mo medengelii a uldesuel ngii el chad er a uchei er a longer er ngii. (Lk. 10:25-28) A Jesus a dirrek el mle meduch el lousbech a ker el ulemeklemalt er a uldesuel a Petrus er a ta el taem el mle cheleuid a uldesuel. (Mt. 17:24-26) Me a chad er a blai a loker a ker me a lechub e lecheleuid a omesodel er a tekoi, e ngsebeched el ousbech a ker el ngosuir el mo meduch el mesaod a tekoi.
4. Ngera me ngkired el melasem el olengeseu er a chad er a blai el mo meduch el mesaod a tekoi?
4 Sel dengesuir a chad er a blai el mo meduch el mesaod a tekoi, e kede oukerebai er a Klou el Sensei el Jesus me a rebebil el mle meduch el omerk er a evangkelio er a kot el dart el rak. Ngoeak tiang, e kede kobkellii e dirrek el ochotii a omengull el mo er a chad er a blai. (1 Pe. 3:15) E sel doruul el uaisei, e a chad er a blai a mo kongei er kid el lmuut el mo oldingel er ngii.